E Palabra di Yehova Ta Bibu
Puntonan Sobresaliente di e Buki di Marko
DI E kuater Evangelionan, esun di Marko ta esun di mas kòrtiku. Juan Marko a skirbi e Evangelio aki rònt di 30 aña despues di e morto i resurekshon di Hesukristu. E ta kontené hopi suseso emoshonante ku a tuma lugá durante Hesus su ministerio di tres aña i mei.
Aparentemente, e buki di Marko tabata skirbí pa personanan no-hudiu, spesialmente e romanonan. E ta presentá Hesus komo e Yu di Dios ku ta hasi milager i efektuá un kampaña di predikashon enérgiko. E buki ta pone énfasis riba loke Hesus a hasi i no riba loke el a siña hende. Ora nos presta atenshon na e Evangelio di Marko, esaki lo fortalesé nos fe den e Mesias i motivá nos pa bira proklamadónan entusiasmá di e mensahe di Dios den e ministerio kristian.—Heb. 4:12.
E GRAN MINISTERIO NA GALILEA
Despues di a relatá den solamente 14 versíkulo e aktividat di Juan Boutista i Hesus su 40 dianan den desierto, Marko ta kuminsá ku un informe emoshonante di Hesus su ministerio na Galilea. E echo ku e ta keda ripití e palabra “mesora” ta duna un sentido di urgensia na e relato.—Mar. 1:10, 12.
Den ménos ku tres aña, Hesus a kompletá tres kampaña di predikashon na Galilea. Marko ta presentá mayor parti di e relato den un órden kronológiko. E Sermon Riba Seru i hopi di Hesus su diskursonan largu no ta aparesé den e buki di Marko.
Kontesta Riba Pregunta Bíbliko:
1:15—E “tempu” pa kiko tabata “kumplí”? Akinan, Hesus tabata bisando ku e tempu señalá a yega pa e kuminsá su ministerio. Debí ku e tabata presente komo Rei Nombrá, e Reino di Dios a yega serka. E ora ei, hende di kurason rekto por a reakshoná riba su trabou di prediká i dal e pasonan ku lo a yuda nan haña Dios su aprobashon.
1:44; 3:12; 7:36—Dikon Hesus no tabata ke pa hende propagá su milagernan? Hesus no tabata ke pa hende saka konklushon a base di relatonan sensashonalista òf kisas eksagerá i ku no ta basá riba bèrdat. Mas bien, e tabata ke pa nan mira pa nan mes ku e tabata e Kristu i tuma un desishon personal basá riba e evidensia ei. (Isa. 42:1-4; Mat. 8:4; 9:30; 12:15-21; 16:20; Luk. 5:14) Un eksepshon ku el a hasi tabata den e kaso di un hòmber ku anteriormente tabata poseí pa demoño den e tera di e gadarenonan. Hesus a bis’é bai kas i konta su famianan loke a pasa. Debí ku e hendenan di e tera ei a pidi Hesus pa bandoná e área, lo e tabatin masha poko òf ningun kontakto ku e pueblo ei. E presensia i testimonio di un hòmber ku Hesus a kura bondadosamente por a kontrarestá kualke papiamentu negativo tokante e pèrdida di e porkonan.—Mar. 5:1-20; Luk. 8:26-39.
2:28—Dikon Beibel ta yama Hesus “Señor, asta di sabat”? Apòstel Pablo a skirbi ku ‘e Lei tin solamente un sombra di e bon kosnan ku ta bin.’ (Heb. 10:1) Lei a stipulá ku Sabat tabata despues di seis dia di trabou, i Hesus a kura hopi hende riba e dia ei. Esaki a prefigurá e deskanso pasífiko i otro bendishonnan ku humanidat lo eksperensiá bou di e Reinado di Mil Aña di Kristu despues di e fin di Satanas su gobernashon opresivo. P’esei, Beibel ta yama e Rei di e Reino ei “Señor di sabat” tambe.—Mat. 12:8; Luk. 6:5.
3:5; 7:34; 8:12—Kon Marko por tabata sa detayenan tokante Hesus su estado emoshonal? Marko no tabata un di e 12 apòstelnan ni e no tabata un kompañero íntimo di Hesus. Segun tradishon di ántes, apòstel Pedro, Marko su kompañero íntimo, a dun’é mayoria di su informashonnan.—1 Ped. 5:13.
6:51, 52—Ki nifikashon “di e pannan” e disipelnan no a kapta? Djis algun ora promé, Hesus a alimentá 5.000 hòmber ademas di hende muhé i mucha ku solamente sinku pan i dos piská. E nifikashon “di e pannan” ku e disipelnan mester a kapta for di e suseso ei tabata ku Yehova Dios a duna Hesus poder pa hasi milager. (Mar. 6:41-44) Si nan a kapta e grandesa di e poder ku Dios a duna Hesus, nan lo no a keda sorprendí ora el a kana milagrosamente riba awa..
8:22-26—Dikon Hesus a restorá bista di e hòmber siegu den dos etapa? Kisas Hesus a hasi esaki asina debí ku el a mustra konsiderashon ku e hòmber. E restorashon gradual di e bista di un hòmber, ku a kustumbrá pa hopi tempu ku skuridat, lo a permitié ahustá su mes na e klaridat di lus di solo.
Lès pa Nos:
2:18; 7:11; 12:18; 13:3. Marko ta splika kustumber-, ekspreshon-, kreensia- i sitionan ku kisas lo tabata deskonosí pa lektornan no-hudiu. Por ehèmpel, el a splika ku e fariseonan “tabata yuna,” ku korban ta nifiká un regalo “duná na Dios,” ku e saduseonan “ta bisa ku no tin resurekshon” i ku “Seru di Oleifi” tabata “enfrente di e tèmpel.” Siendo ku e liña di desendensia di e Mesias tabata di interes prinsipalmente pa e hudiunan, e no a inkluyé den su buki. Asina Marko ta pone un ehèmpel pa nos. Nos mester tene kuenta ku background di nos oyentenan ora nos ta partisipá den e ministerio kristian òf ora nos ta duna diskurso na reunionnan di kongregashon.
3:21. Hesus su famianan no tabata kreyente. P’esei, e por komprondé pa esnan ku, pa motibu di nan fe, ta ser oponé dor di nan miembronan di famia ku no ta kreyente.
3:31-35. Ora Hesus a batisá, el a bira Dios su Yu spiritual, i “Yerusalèm djariba” a bira su mama. (Gal. 4:26) Desde e tempu ei, Hesus su disipelnan tabata mas yegá na dje i mas kerí p’e ku su famianan karnal. Esaki ta siña nos pa pone kosnan ku tin di haber ku adorashon berdadero na promé lugá den nos bida.—Mat. 12:46-50; Luk. 8:19-21.
8:32-34. Nos mester ta lihé pa rekonosé i rechasá kualke bondat ekiboká ku otro hende ta desplegá. Un siguidó di Kristu mester ta prepará pa “nenga su mes,” i bisa nò na deseo- i ambishonnan egoista. E mester ta dispuesto pa tuma “su staka di tormento,” [NW]—pa sufri, si ta nesesario, òf pa keda brongosá òf persiguí òf asta ser matá pasobra e ta un kristian. I e tin ku “sigui” Hesus kontinuamente, bibando na armonia ku su ehèmpel. Pa nos ta un disipel di Hesus, nos tin ku kultivá i mantené un aktitut di sakrifisio propio meskos ku Hesukristu tabatin.—Mat. 16:21-25; Luk. 9:22, 23.
9:24. Nos no mester tin bèrgwensa di konta hende tokante nos fe ni di pidi Dios mas fe.—Luk. 17:5.
E ÚLTIMO LUNA
Na final di aña 32 di nos era, Hesus a yega na “e region di Hudea, i te na e otro banda di Hordan.” I einan tambe, un multitut di hende a bin serka dje. (Mar. 10:1) Despues ku el a prediká einan, el a kohe rumbo pa Yerusalèm.
Dia 8 di nisan, Hesus tabata na Betania. E tabata sintá ta kome ora un muhé a drenta i basha zeta perfumá riba su kabes. E susesonan desde Hesus su entrada triunfal den Yerusalèm te na su resurekshon ta ser deskribí den un órden kronológiko.
Kontesta Riba Pregunta Bíbliko:
10:17, 18—Dikon Hesus a korigí un sierto hòmber pasobra el a yam’é “Bon Maestro”? Dor di nenga di aseptá e título aki ku a dun’é gloria, Hesus a dirigí e gloria na Yehova i a indiká ku e Dios berdadero ta e fuente di tur kos bon. Ademas, Hesus a hala atenshon na e bèrdat fundamental, esta, ku ta solamente Yehova Dios, e Kreadó di tur kos, tin e derecho di pone norma pa loke ta bon i malu.—Mat. 19:16, 17; Luk. 18:18, 19.
14:25—Kiko Hesus tabata ke men ora el a bisa su fiel apòstelnan: “Lo mi no bebe mas di e fruta di e mata di wendrùif, te na e dia ei ku mi beb’é nobo den e reino di Dios”? Hesus no tabata bisando ku tin biña literal den shelu. Siendo ku tin biaha biña ta simbolisá alegria, Hesus tabata refiriendo na e goso di ta huntu ku su siguidónan ungí resusitá den e Reino.—Sal. 104:15; Mat. 26:29.
14:51, 52—Ken tabata e hóben ku ‘a hui bai sunú’? Ta Marko so a referí na e insidente aki. Pues, ta rasonabel pa nos konkluí ku ta tokante su mes e tabata papia.
15:34—Hesus su palabranan, “mi Dios, mi Dios, pakiko bo a bandoná mi?,” ta un indikashon ku e tabata falta fe? Nò. Nos no sa sigur dikon Hesus a ekspresá su mes asina. Pero kisas Hesus su palabranan ta indiká ku el a rekonosé ku Yehova a kita Su protekshon pa asina integridat di Su Yu por a ser poné na prueba kompletamente. Por ta posibel tambe ku Hesus a bisa e palabranan ei pasobra e kier a kumpli ku loke Salmo 22:1 a profetisá relashoná kuné.—Mat. 27:46.
Lès pa Nos:
10:6-9. Dios su propósito ta pa parehanan kasá keda huntu. P’esei, en bes di kore buska divorsio, esposo- i esposanan mester hasi esfuerso pa apliká prinsipionan bíbliko pa vense kualke difikultat ku lo por surgi den matrimonio.—Mat. 19:4-6.
12:41-44. E ehèmpel di e biuda pober ta siña nos ku nos mester ta generoso i duna sosten finansiero na adorashon berdadero.
[Plachi na página 11]
Dikon Hesus a bisa e hòmber aki pa konta su famianan tur loke a pasa kuné?