“Mira, e Leon Ku Ta di e Tribu di Huda”

1-3. Ki peliger a bin riba Hesus, i kon el a reakshoná?

UN MULTITUT violento tabata buska Hesus pa arestá. Nan tabata armá ku spada i klòp i kompañá pa sòldá. Komo si fuera ku un solo propósito maligno na mente, nan a kana dor di e kayanan skur di Yerusalèm i a pasa den Roi Kedron rumbo pa Seru di Oleifi. Tabata luna yen, i tòg nan tabatin flambeu i lantèrna. Akaso nan tabatin esakinan pasobra e nubianan a tapa e klaridat di luna? Òf nan a kere ku e persona ku nan tabata buska lo a bai skonde den skuridat? Un kos ta sigur: Ken ku a pensa ku Hesus lo a kobardiá no a konosé su karakter.

² Hesus tabata sa di e peliger ku tabata aserká. Tòg el a para warda. E multitut violento a yega serka dje, guiá pa Hudas ku anteriormente tabata un amigu di konfiansa. Sin niun klase di bèrgwensa, Hudas a traishoná Hesus. El a identifiká su shon ku un saludo i un sunchi hipókrita. Pero Hesus a keda trankil. Anto Hesus a bin dilanti di e multitut violento i a puntra nan: “Ta ken boso ta buska?” Nan a kontest’é: “Hesus di Názarèt.”

³ Mayoria di hende lo tabata morto spantá dilanti di un multitut violento i armá asina. Podisé ta esei tabata loke e multitut aki a ferwagt di e hòmber nan dilanti. Pero Hesus no a kobardiá, e no a hui bai ni e no a kore gaña algu. Mas bien, el a bisa simplemente: “Ta ami t’e.” El a reakshoná asina kalmu, ku asina tantu kurashi, ku e hòmbernan a keda pasmá. Nan a hala atras, tambaleá i kai abou na suela!—Juan 18:1-6; Mateo 26:45-50; Marko 14:41-46.

4-6. (a) Beibel ta kompará e Yu di Dios ku kiko, i dikon? (b) Kua ta tres manera ku Hesus a desplegá kurashi?

⁴ Kiko por a yuda Hesus konfrontá un peliger asina grandi ku tantu trankilidat i dominio propio? Den un solo palabra: kurashi. Kurashi ta un di e kualidatnan mas nesesario i mas gustá den un lider, i ningun hende nunka a igualá, muchu ménos surpasá, Hesus den esaki. Den e kapítulo anterior, nos a siña kon humilde i mansu Hesus tabata. Korektamente Beibel a yam’é “un Lamchi.” (Juan 1:29) Sin embargo, e kurashi di Hesus ta pone ku Beibel ta deskribié ku kompletamente un otro nòmber. E ta bisa di e Yu di Dios: “Mira, e Leon ku ta di e tribu di Huda.”—Revelashon 5:5.

⁵ Leon ta ser ligá hopi biaha ku kurashi. Abo a yega di ta kara-kara ku un leon machu adulto? Wèl, muy probablemente tabatin un waya ta protehá bo for di e bestia aki, kisas e waya di su kouchi den un parke di bestia. Asina mes, esei por ta un eksperensia ku ta hinka spantu den bo kurpa. Ora bo wak e kriatura grandi i poderoso aki stret den su kara i e tambe keda wak bo bèk duru den bo kara, lo bo no por imaginá ku un leon ta kore bai di miedu. Beibel ta papia di “e leon, ku ta esun di mas fuerte entre e bestianan, i ku no ta hala atras pa nada.” (Proverbionan 30:30) Asina e kurashi di Kristu tabata.

⁶ Laga nos ban konsiderá awor tres manera ku Hesus a desplegá kurashi manera leon: ora el a defendé e bèrdat, ora el a sostené hustisia i ora el a enfrentá oposishon. Nos lo mira tambe ku nos tur por imitá Hesus den mustra kurashi, sea ku di naturalesa nos tin kurashi òf nò.

7-9. (a) Kiko a sosodé tempu Hesus tabatin 12 aña, i kiko bo ta kere a hasi e situashon ei intimidante? (b) Kon Hesus a desplegá kurashi den su trato ku e siñadónan den tèmpel?

⁷ Den un mundu goberná pa Satanas, “e tata di mentira,” hopi bes bo mester tin kurashi pa defendé e bèrdat. (Juan 8:44; 14:30) Hesus no a warda te ora el a bira adulto pa hasi esei. Na edat di 12 aña, Hesus a pèrdè for di su mayornan despues di e fiesta di Pasku Hudiu na Yerusalèm. Tres dia largu, Maria ku Hosé a buska e mucha desesperadamente. Finalmente nan a hañ’é den tèmpel. Anto kiko nan a hañ’é ta hasi einan? “Sintá meimei di e siñadónan, ta skucha nan i ta hasi nan pregunta.” (Lukas 2:41-50) Pensa riba e marko di sirkunstansia di e kòmbersashon ei.

⁸ Historiadónan ta bisa ku algun di e lidernan religioso prinsipal tabatin e kustumber di keda na e tèmpel despues di e fiestanan i siña hende den un di e verandanan espasioso ku tabatin einan. Hende tabata kai sinta na nan pia pa skucha nan i hasi nan pregunta. E maestronan aki tabata hòmbernan siñá. Nan tabata vèrsá den e Lei di Moisés i tambe den e gran kantidat di lei i tradishon kompliká ku hende a traha i ku a oumentá sinfin atraves di añanan. Kon abo lo a sinti bo sintá meimei di nan? Intimidá? Esei lo ta di komprondé. I kiko si bo tabatin apénas 12 aña di edat? Hopi mucha ta tímido. (Jeremias 1:6) Tin di nan ta purba tur manera pa no hala atenshon di nan maestronan na skol; e hóbennan aki tin miedu ku ta yama riba nan pa hasi òf bisa algu, nan tin miedu di haña atenshon spesial, miedu di e posibilidat di ser brongosá òf tentá.

⁹ Sin embargo, aki nos ta haña Hesus, sintá meimei di e hòmbernan siñá ei, ta hasi nan pregunta profundo sin miedu. El a bai asta mas aleu. E relato ta bisa nos: “Tur esnan ku a tend’é a keda strañá di su komprondementu i su kontestanan.” (Lukas 2:47, 48) Beibel no ta konta nos kiko el a bisa na e okashon ei, pero nos por tin sigur ku e no a djis ripití manera lora e mentiranan ku e maestronan religioso ei tabata promové. (1 Pedro 2:22) Nò, Hesus a sostené e bèrdat di e Palabra di Dios, i su oyentenan sigur tabata asombrá ku un mucha hòmber di 12 aña por a ekspresá su mes ku asina tantu komprondementu penetrante i kurashi.

10. Kon hóbennan kristian awe ta imitá e kurashi di Hesus?

¹⁰ Awe tin kantidat di hóben kristian ta sigui den e pasonan di Hesus. Ta bèrdat ku nan no ta perfekto manera e hóben Hesus tabata. Pero meskos ku Hesus, nan no ta warda te ora nan bira adulto pa nan defendé e bèrdat. Na skol òf den e komunidat kaminda nan ta biba, nan ta hasi hende pregunta ku takto, ta skucha nan kontesta i ku rèspèt ta kompartí e bèrdat ku nan. (1 Pedro 3:15) Komo grupo, e hóbennan aki a yuda hopi kompañero di skol, maestro i bisiña bira siguidó di Kristu. Yehova lo mester ta hopi kontentu ku nan kurashi! Su Palabra ta kompará hóbennan asina ku serena, algu refreskante, agradabel i numeroso.—Salmo 110:3.

11, 12. Komo adulto, kon Hesus a defendé e bèrdat ku kurashi?

¹¹ Komo adulto, Hesus bes tras bes a defendé e bèrdat ku kurashi. De echo, su ministerio a kuminsá ku un konfrontashon ku hopi hende lo a yama spantoso. Hesus komo hende di karni i sanger, no komo arkangel poderoso, mester a konfrontá Satanas, e enemigu di mas fuerte i peligroso di Yehova. Hesus a rechasá Satanas i a refutá e manera ku el a trose e Skritura inspirá. Hesus a terminá e enkuentro bisando ku kurashi: “Bai for di akinan, Satanas!”—Mateo 4:2-11.

¹² Pues asina Hesus a establesé e patronchi ku lo el a sigui den su ministerio, esta, di defendé e Palabra di su Tata ku kurashi kontra esfuersonan pa tros’é òf aplik’é robes. E tempu ei, meskos ku awor, tabatin hopi engaño religioso. Hesus a bisa lidernan religioso di su tempu: ‘Boso ta hasi e palabra di Dios bira sin balor dor di boso tradishon ku boso a pasa over pa otronan.’ (Marko 7:13) E pueblo en general tabata venerá e hòmbernan ei mashá, pero sin miedu Hesus a denunsiá nan komo guia siegu i hipókrita.a (Mateo 23:13, 16) Kon nos por imitá e aspekto aki di Hesus su ehèmpel di kurashi?

13. Kiko nos tin ku kòrda ora nos ta imitá Hesus, pero ki privilegio nos tin?

¹³ Naturalmente, nos ta konsiente ku nos no tin Hesus su kapasidat di lesa kurason ni su outoridat di husga. Sin embargo, nos por imitá su kurashi den defendé e bèrdat. Por ehèmpel, ora nos ta desenmaskará mentiranan religioso—e mentiranan ku asina hopi biaha nan ta siña hende tokante Dios i su propósito i su Palabra—nos ta trese lus den un mundu ku ta den skuridat debí na propaganda satániko. (Mateo 5:14; Revelashon 12:9, 10) Nos ta yuda libra hende for di sklabitut na siñansanan falsu ku ta yena nan kurason ku un miedu insaludabel i ku ta perhudiká nan relashon ku Dios. Ki un gran privilegio nos tin di mira e kumplimentu di Hesus su promesa: “E bèrdat lo hasi boso liber”!—Juan 8:32.

14, 15. (a) Kua ta un manera ku Hesus a klarifiká “kiko ta hustisia”? (b) Ora Hesus a papia ku un muhé samaritano, ki prehuisionan e no a hasi kaso di dje?

¹⁴ Profesia bíbliko a bisa di antemano ku e Mesias lo a klarifiká pa e nashonnan “kiko ta hustisia.” (Mateo 12:18, NW; Isaias 42:1) Hesus sigur a kuminsá hasi esei tempu e tabata riba tera. Ku gran kurashi el a demostrá di ta semper hustu i imparsial den su trato ku hende. Por ehèmpel, el a nenga di adoptá e prehuisionan i intoleransia ku tabata reina den e mundu rònt di dje i ku tabata kontrali na siñansa bíbliko.

¹⁵ Ora ku Hesus a papia ku un muhé samaritano na e pos di Sikar, su disipelnan a keda sorprendí. Dikon? Den e tempu ei, hudiu en general tabata odia samaritano; pa hopi siglo kaba nan tabatin e despresio aki. (Esdras 4:4) Ademas, algun rabi tabata mira hende muhé ku menospresio. E reglanan rabíniko, ku despues nan a pone por eskrito, a deskurashá hende hòmber di kòmbersá ku hende muhé; asta nan a sugerí ku hende muhé no tabata digno di haña instrukshon den e Lei di Dios. Spesialmente hende muhé samaritano nan a konsiderá impuru. Hesus no a hasi kaso di tal prehuisio inhustu i abiertamente el a siña e muhé samaritano (ku por sierto tabata hiba un bida inmoral), i asta a revelá na e muhé ku é ta e Mesias.—Juan 4:5-27.

16. Dikon kristiannan tin mester di kurashi pa ta diferente relashoná ku prehuisio?

¹⁶ Bo a yega di ta den kompania di hende ku tin prehuisio masha ofensivo? Podisé nan ta konta chiste di menospresio tokante hende di otro rasa òf nashon, ta rebahá e sekso opuesto òf ta despresiá hende di otro nivel ekonómiko òf sosial. Siguidónan di Kristu no ta aprobá tal punto di bista ku ta reflehá odio, i nan ta traha duru pa eliminá kualke rastro di prehuisio ku tin den nan propio kurason. (Echonan 10:34) Kada un di nos tin ku kultivá kurashi pa ta hustu den e aspekto aki.

17. Ki akshon Hesus a tuma den tèmpel, i dikon?

¹⁷ Ta kurashi tambe a pone Hesus bringa pa tene e pueblo di Dios limpi i pa e areglo di adorashon puru. Na prinsipio di su ministerio, el a drenta den e patio di e tèmpel na Yerusalèm i a keda hororisá di mira komersiante i kambiadó di plaka ta hasi nan negoshi einan. Yen di indignashon hustu, Hesus a saka e hòmbernan golos ei i nan merkansia for di den tèmpel. (Juan 2:13-17) Mas despues, kasi na final di su ministerio, el a bolbe hasi meskos. (Marko 11:15-18) E akshonnan aki sigur a pon’é haña algun enemigu poderoso, tòg e no a vasilá. Dikon? Pasobra for di chikí, el a yama e tèmpel aki e kas di su Tata, i el a men esei. (Lukas 2:49) E kontaminashon di adorashon puru ku tabata tuma lugá einan tabata un inhustisia ku hamas lo e por a sera wowo p’e. Su selo a dun’é e kurashi pa hasi loke tabata nesesario.

18. Kon kristiannan djawe por demostrá kurashi den e asuntu di tene e kongregashon limpi?

¹⁸ E siguidónan di Kristu awe tambe ta profundamente interesá pa e pueblo di Dios ta limpi i interesá den e areglo di adorashon puru. Si nan mira ku un kompañero kristian ta enbolbí den malecho serio, nan no ta djis sera wowo pa esei. Ku kurashi nan ta papia ku e persona òf ku e ansianonan. (1 Korintionan 1:11) Nan ta hasi sigur ku e ansianonan di kongregashon ta haña sa di e asuntu. E ansianonan por yuda e personanan ku ta spiritualmente malu i tambe por tuma akshon pa konserbá e posishon limpi di e karnénan di Yehova.—Santiago 5:14, 15.

19, 20. (a) Ki inhustisianan tabata reina den tempu di Hesus, i ki preshon Hesus a konfrontá? (b) Dikon siguidónan di Kristu ta nenga di mete den polítika i violensia, i kiko ta un di e rekompensanan pa nan posishon?

¹⁹ Pero nos mester konkluí for di esaki ku Hesus a lucha kontra inhustisia den mundu en general? Tur rònt di dje siguramente tabatin inhustisia. Su pais tabata okupá pa un potensia stranhero. E romanonan a oprimí e hudiunan ku un presensia militar potente, a kobra nan belasting pisá i asta a interferí den nan kustumbernan religioso. P’esei no ta un sorpresa ku hopi hende tabata ke pa Hesus drenta den e polítika di su tempu. (Juan 6:14, 15) Un biaha mas Hesus mester a demostrá kurashi.

²⁰ Hesus a splika ku su Reino no tabata parti di mundu. Mediante su ehèmpel, el a entrená su siguidónan pa nan no mete den e peleanan polítiko di e tempu ei i pa nan enfoká mas bien riba e predikashon di e bon nobo di e Reino di Dios. (Juan 17:16; 18:36) El a siña nan un lès impaktante relashoná ku neutralidat ora ku e multitut violento a bin pa arest’é. Pedro a bula aktua, i sin pensa el a zuai su spada i heridá un hòmber. Ta fásil pa aprobá loke Pedro a hasi. Si un dia violensia lo por a parse hustifiká, lo tabata e anochi ei ku nan a ataká Dios su Yu inosente. Sin embargo, Hesus na e momento ei a establesé e norma pa su siguidónan terenal te ku awe: “Pone bo spada bèk na su lugá; pasobra tur esnan ku saka spada lo peresé pa medio di spada.” (Mateo 26:51-54) Pa e siguidónan di Kristu por a mantené tal posishon pasífiko, nan definitivamente tabatin mester di kurashi e tempu ei, meskos ku ta e kaso awe. Debí ku e pueblo di Dios djawe a tuma un posishon di neutralidat kristian, nan registro ta limpi i nunka nan a enbolbé nan mes den e kantidat sinfin di guera, holokousto, disturbio i aktonan similar di violensia. E registro ekselente ei ta un di e rekompensanan pa nan kurashi.

21, 22. (a) Ki yudansa Hesus a haña promé ku el a enfrentá su prueba di mas difísil? (b) Kon Hesus a demostrá di tin kurashi te na final?

²¹ Yehova su Yu tabata sa di antemano ku lo el a enfrentá oposishon severo aki riba tera. (Isaias 50:4-7) El a enfrentá hopi menasa di morto ku a kulminá den esun deskribí na komienso di e kapítulo aki. Kon Hesus a mantené su kurashi apesar di tal peliger? Wèl, kiko Hesus tabata hasi nèt promé ku e multitut violento a bin pa arest’é? E tabata hasi orashon ferviente na Yehova. Anto kiko Yehova a hasi? Beibel ta bisa nos ku Hesus “a wòrdu tendí.” (Hebreonan 5:7) Yehova a manda un angel for di shelu pa fortalesé su Yu balente.—Lukas 22:42, 43.

²² Djis despues ku e angel a fortales’é, Hesus a bisa su apòstelnan: “Lanta, laga nos ban.” (Mateo 26:46) Pensa riba kuantu kurashi tabatin tras di e palabranan ei. El a bisa: “Laga nos ban,” sabiendo ku e lo a pidi e multitut violento pa spar su amigunan, sabiendo ku tur e kompañeronan ei lo a hui bai lag’é, i sabiendo ku ta e so lo a bai enfrentá e eksperensia di mas difísil di su bida. E tabata su so ora el a enfrentá un huisio ilegal i inhustu, tambe bofon, tortura i un morto agonisante. Atraves di tur esei, su kurashi ningun momento so no a lag’é na kaya.

23. Splika dikon e manera ku Hesus a enfrentá peliger i menasa di morto no tabata un akto deskabeyá.

²³ Akaso Hesus su reakshon tabata un akto deskabeyá? Nò; ser deskabeyá no tin nada keber ku berdadero kurashi. De echo, Hesus a siña su siguidónan pa ta kouteloso, i alehá prudentemente for di peliger pa nan por sigui hasi e boluntat di Dios. (Mateo 4:12; 10:16) Pero den e kaso aki Hesus tabata sa ku no tabatin manera p’e kita for di einan. E tabata sa ku esaki tabatin di hasi ku e boluntat di Dios. Hesus tabata determiná pa mantené su integridat, pues e úniko kaminda tabata di sigui padilanti, i enfrentá e prueba di su fe direktamente.

24. Dikon nos por ta sigur ku nos por tin kurashi apesar di kualke prueba ku surgi?

²⁴ Hopi biaha siguidónan di Hesus a sigui ku kurashi den e pasonan di nan Shon! Hopi di nan a para firme apesar di bofon, persekushon, aresto, enkarselashon, tortura i asta morto. Di unda hende imperfekto ta saka tal kurashi? Esei no ta sali simplemente di nan mes. Meskos ku Hesus a haña yudansa djariba, asina tambe ta e kaso ku su siguidónan. (Filipensenan 4:13, NW) Pues, nunka tene miedu di loke por bin den futuro. Sea determiná pa mantené bo integridat, i Yehova lo duna bo e kurashi ku bo tin mester. Sigui saka fortalesa for di e ehèmpel di nos Lider, Hesus, kende a bisa: “Tene kurashi, mi a vense mundu.”—Juan 16:33.