Lèsnan Ku Nos Ta Siña for di Hesus Su Último Palabranan

1-2. Kiko a sosodé promé ku Hesus a papia su último palabranan?

TABATA 14 di nisan, aña 33. Despues ku Hesus su enemigunan a akus’é falsamente i a husg’é pa un krímen ku e no a kometé, nan a hasi bofon di dje, tortur’é kruelmente i djei klab’é na un staka. E klabunan a pasa dor di su man i pia. Kada bes ku e tabata hala rosea i papia, e tabata sinti masha doló. Pero, e no por a keda ketu; e tabatin algun kos hopi importante di bisa.

² Laga nos analisá loke Hesus a bisa nèt promé ku el a muri riba staka i loke nos por siña for di esei. Ku otro palabra, laga nos “skuch’é.”—Mat. 17:5.

 3. Ken probablemente Hesus tabatin na mente ora el a bisa: “Tata, pordoná nan”?

³ Loke Hesus a bisa. Ora nan a klaba Hesus na staka, el a resa: “Tata, pordoná nan.” Pordoná ken? E siguiente palabranan ta yuda nos kontestá esei: “Nan no sa kiko nan ta hasi.” (Luk. 23:33, 34) Probablemente Hesus tabata referí na e sòldánan romano ku a klab’é na e staka. Nan no tabata sa ku e tabata Yu di Dios. Kisas e tabatin na mente tambe algun di e hendenan ku na promé instante a eksigí pa mat’é, pero ku despues lo a pone fe den dje. (Echo. 2:36-38) Hesus no a permití e inhustisia ku el a sufri pon’é bira amargá ni rabiá. (1 Ped. 2:23) En bes di esei, el a pidi Yehova pa pordoná esnan responsabel pa su morto.

 4. Kiko nos ta siña for di e echo ku Hesus tabata dispuesto pa pordoná su enemigunan?

⁴ Loke nos ta siña. Meskos ku Hesus, nos mester ta dispuesto pa pordoná. (Kol. 3:13) Kisas esei lo enserá pordoná nos mes famia. Nan por oponé nos pasobra nan no ta komprondé nos kreensianan ni dikon nos ta biba segun prinsipionan di Beibel. Kisas nan por asta gaña riba nos, humiá nos, destruí nos literatura òf asta menasá di maltratá nos. En bes di karga renkor, nos por pidi Yehova pa yuda esnan ku ta oponé nos pa nan tambe haña e bèrdat un dia. (Mat. 5:44, 45) Tin biaha por ta masha difísil pa pordoná un hende, spesialmente si el a trata nos hopi malu. Pero si nos keda karga renkor, nos ta hasi nos mes mas daño ku bon. Un ruman muhé a splika: “M’a realisá ku pordoná no ke men ku mi ta aprobá loke hende a hasi ku mi, ni ku mi ta laga nan probechá di mi. Pordoná ke men ku mi ta skohe pa no keda rabiá ku nan.” (Sal. 37:8) Ora nos disidí di pordoná, nos ta opta pa no laga e kosnan negativo ku a sosodé ku nos pone nos bira un hende amargá.—Efe. 4:31, 32.

 5. Kiko Hesus a primintí un di e kriminalnan ku tabata kologá na staka banda di dje, i dikon el a hasi e promesa ei?

⁵ Loke Hesus a bisa. Dos kriminal tabata kologá na staka banda di Hesus. I na promé instante, nan dos tambe tabata hasi bofon di Hesus. (Mat. 27:44) Pero, dado momento un di nan a stòp. El a realisá ku Hesus “no a hasi nada malu.” (Luk. 23:40, 41) I no esei so. Ku su palabranan el a indiká ku e tabata kere ku Hesus lo resusitá for di morto i ku un dia lo e bira rei. El a bisa: “Hesus, kòrda riba mi ora bo drenta bo Reino.” (Luk. 23:42) E hòmber ei a demostrá gran fe! Anto Hesus a primintié: “Di bèrdat mi ta bisa bo awe: Lo bo ta ku mi [no den mi Reino, pero] den Paradeis.” (Luk. 23:43) Ripará ku Hesus a usa e palabra “mi” i “bo,” i di e manera ei el a duna e promesa un toke personal. Hesus por a duna e kriminal, ku tabata den muri, e speransa ei pasobra e tabata sa ku su Tata ta miserikòrdioso.—Sal. 103:8.

 6. Kiko nos ta siña for di loke Hesus a bisa e kriminal?

⁶ Loke nos ta siña. Hesus ta imitá su Tata perfektamente. (Heb. 1:3) Yehova ta kla pa pordoná nos i demostrá nos miserikòrdia si di kurason nos ta sinti duele di kosnan malu ku nos a hasi den pasado i si nos tin fe den e sakrifisio di Hesukristu. (1 Huan 1:7) Pero, pa algun di nos ta difísil pa kere ku Yehova lo pordoná nos erornan di pasado. Si tin biaha bo ta sinti asina, pensa riba esaki: Nèt promé ku Hesus a muri, el a demostrá miserikòrdia na e kriminal ku djis un ratu promé a demostrá fe den dje. Awor kuantu mas miserikòrdia Yehova lo no demostrá abo ku ta un fiel sirbidó di dje ku ta hasiendo esfuerso pa obedesé su mandamentunan?—Sal. 51:1; 1 Huan 2:1, 2.

 7. Segun Huan 19:26 i 27, kiko Hesus a bisa Maria i Huan, i dikon el a bisa esei?

⁷ Loke Hesus a bisa. (Lesa Huan 19:26, 27.) Hesus tabata preokupá pa su mama, kende kisas tabata biuda. Awor su rumannan parti di mama kisas por a perkurá pa Maria su nesesidatnan material. Pero, ken lo a perkurá pa su nesesidatnan spiritual? Ta parse ku e tempu ei, niun di su rumannan tabata su disipel ainda. Sinembargo, Apòstel Huan tabata un di Hesus su mihó amigunan. Hesus a mira tur hende ku tabata sirbi Yehova huntu kuné komo su famia spiritual. (Mat. 12:46-50) Hesus tabata stima Maria asina tantu ku e kier a hasi sigur ku un hende lo a kuid’é. Pues, el a pidi Huan pa hasi esei pasobra e tabata sa ku Huan lo a yuda Maria sigui sirbi Yehova. Hesus a bisa su mama: “Ata bo yu!” Anto el a bisa Huan: “Ata bo mama!” For di e dia ei padilanti, Huan a bira manera yu di Maria, i el a kuid’é komo si fuera tabata su mes mama. Loke Hesus a bisa a demostrá ku e tabata stima su mama masha hopi mes; e persona ku a kuid’é for di e momento ku el a nase i ku tabat’ei pará dilanti di su staka.

 8. Kiko nos ta siña for di loke Hesus a bisa Maria i Huan?

⁸ Loke nos ta siña. Nos por ta mas será ku e rumannan den nos kongregashon ku nos mes famianan. Nos famia kisas por oponé nos òf asta bandoná nos. Pero manera Hesus a primintí, si nos pega na Yehova i Su organisashon, nos lo haña “100 biaha mas tantu” ku loke nos a pèrdè. Hopi ruman lo bira manera un yu, un mama òf un tata pa nos. (Mar. 10:29, 30) Den nos famia spiritual nos tur tin fe, nos ta stima Yehova i ta stima otro. Ki dushi ta pa ta parti di un famia asina!—Kol. 3:14; 1 Ped. 2:17.

 9. Kiko Hesus su palabranan na Mateo 27:46 ta bisa nos?

⁹ Loke Hesus a bisa. Un poko promé ku Hesus a muri, el a grita: “Mi Dios, mi Dios, pakiko bo a bandoná mi?” (Mat. 27:46) Beibel no ta bisa pakiko Hesus a bisa esei, pero tin algun kos ku nos por siña for di e palabranan ei. Pa kuminsá, ora Hesus a usa e palabranan ei, el a kumpli ku e profesia na Salmo 22:1.b Es mas, for di e palabranan ei nos ta komprondé ku Yehova no a “traha un trankera rònt di dje.” (Yòb 1:10) Hesus a komprondé ku su Tata a permití su enemigunan tèst su fe te na morto. Niun otro hende na mundu a yega di ser di tèst manera Hesus. Ademas, loke Hesus a bisa ta konfirmá ku e no a kometé niun krímen ni a meresé morto.

10. Kiko nos ta siña for di loke Hesus a bisa su Tata?

¹⁰ Loke nos ta siña. Un lès ku nos ta siña ta ku nos no por ferwagt ku Yehova lo protehá nos di prueba. Meskos ku Hesus, nos mester ta prepará pa keda fiel te na morto. (Mat. 16:24, 25) Sinembargo, nos tin sigur ku Yehova lo no laga nos pasa den un tentashon ku nos no por soportá. (1 Kor. 10:13) Un otro lès ku nos ta siña ta ku, meskos ku Hesus, nos tambe lo sufri aunke nos no a hasi nada robes. (1 Ped. 2:19, 20) Hende ta oponé nos pasobra nos no ta parti di mundu i nos ta duna testimonio di e bèrdat. (Huan 17:14; 1 Ped. 4:15, 16) Hesus a komprondé pakiko Yehova a permitié sufri. Di otro banda, algun sirbidó fiel di Yehova ku pasa den prueba, tin biaha sa puntra nan mes: ‘Yehova dikon bo ta laga mi pasa den e prueba akí?’ (Hab. 1:3) Pero, Yehova ta un Dios miserikòrdioso i e tin pasenshi. E ta komprondé ku nan no falta fe, pero ku nan mester di konsuelo; e konsuelo ku ta e so por duna nan.—2 Kor. 1:3, 4.

11. Dikon Hesus a bisa e palabranan menshoná na Huan 19:28?

¹¹ Loke Hesus a bisa. (Lesa Huan 19:28.) Dikon Hesus a bisa: “Mi tin set”? El a bisa esei “pa e skritura por kumpli”—esei ta e profesia ku tin na Salmo 22:15: “Mi forsa a seka manera un skèrf di pòchi-di-klei, i mi lenga ta pega na mi shel’i boka.” Ademas, mirando tur loke el a sufri kaba, inkluyendo e doló inmenso ku e tabatin riba e staka, ta di komprondé ku el a haña set i ku e tabatin mester di yudansa pa kita e set ei.

12. Kiko nos ta siña for di Hesus su palabranan: “Mi tin set”?

¹² Loke nos ta siña. Hesus no a sinti bèrgwensa pa bisa otro hende ku e mester di yudansa, i nos tin ku hasi meskos kuné. Algun di nos no gusta pidi yudansa, nos ta preferá pa nos mes hasi nos kosnan. Pero ta yega momento den bida ku nos mester di yudansa, anto nos no mester tin miedu ni sinti bèrgwensa pa pidi esei. Por ehèmpel, si nos ta di edat avansá òf nos salú no ta masha bon, kisas nos tin ku pidi un ruman pa hiba nos supermarket òf dòkter. Òf si nos ta sinti nos desanimá, nos lo mester pidi un ansiano òf un otro ruman spiritualmente maduro pa skucha nos òf animá nos ku “un bon palabra.” (Pro. 12:25) Kòrda, nos rumannan stima nos i nan ke yuda nos den “tempu di atversidat.” (Pro. 17:17) Pero, nan no por sa ku nos mester di yudansa a ménos ku nos mes bisa nan.

13. Kiko Hesus a logra debí ku el a keda fiel te na morto?

¹³ Loke Hesus a bisa. Rònt di 3 or di atardi, un poko promé ku Hesus a muri, el a grita: “Tur kos a kumpli!” (Huan 19:30) E tabata sa ku el a hasi tur loke Yehova a pidié. Anto e echo ku el a keda fiel te na morto a pone ku el a logra vários kos. Di promé, el a proba ku Satanas ta un gañadó. El a demostrá ku ni maske kiko Satanas hasi, un hende perfekto por keda fiel. Di dos, el a ofresé su bida komo reskate. Su morto a hasi posibel ku hende imperfekto por bira amigu di Yehova i tin speransa di biba pa semper. Di tres, el a proba ku Yehova su manera di goberná ta hustu. Ademas, el a vindiká nòmber di su Tata.

14. Splika kiko nos mester hasi tur dia.

¹⁴ Loke nos ta siña. Tur dia, nos tin ku hasi tur nos esfuerso pa keda fiel. Wak loke Ruman Maxwel Friend, kende tabata sirbi komo instruktor na Skol Bíbliko di Galaad di Watchtower, a bisa durante su diskurso na un kongreso internashonal: “No laga loke bo por hasi awe pa mañan. Ken a bisa bo ku bo t’ei mañan? Biba kada dia komo si fuera ta bo último chèns pa demostrá ku bo ta digno di bida eterno.” Pues, laga nos biba kada dia manera ta nos último chèns pa keda fiel na Yehova! Djei, si sosodé ku nos tin ku muri, nos por bisa: “Yehova, m’a hasi mi esfuerso pa keda fiel, pa proba ku Satanas ta un gañadó i pa vindiká bo nòmber i soberania!”

15. Segun Lukas 23:46, kiko Hesus tabatin sigur di dje?

¹⁵ Loke Hesus a bisa. (Lesa Lukas 23:46.) Ku konfiansa Hesus a bisa: “Tata, den bo man mi ta konfia mi spiritu.” Hesus tabata sa ku su futuro tabata den man di Yehova, i e tabatin sigur ku su Tata lo a kòrda riba dje.

16. Kiko bo ta siña for di loke a pasa ku Joshua?

¹⁶ Loke nos ta siña. Meskos ku Hesus, bo mester ta dispuesto pa laga bo bida den man di Yehova. Pa hasi esei, bo tin ku “konfia den SEÑOR ku henter bo kurason.” (Pro. 3:5) Joshua tabata un Testigu di Yehova di 15 aña ku tabatin un malesa terminal. El a nenga di tuma kualke tratamentu médiko ku a bai kontra di Dios su leinan. Djis promé ku el a muri, el a bisa su mama: “Mama, mi ta den man di Yehova. . . . Un kos mi por bisa mama: Mi tin sigur ku Yehova ta bai resusitá mi. El a wak den mi kurason i mi stim’é masha hopi mes.”c Lo ta bon pa nos tur hasi nos mes e pregunta akí: ‘Si un dia mi haña mi ku un situashon ku mi por muri, lo mi keda fiel na Yehova i konfia ku lo e kòrda riba mi?’

17-18. Ki lès nos ta siña? (Wak e kuadro “Hesus Su Último Palabranan.”)

¹⁷ For di Hesus su último palabranan, nos ta siña hopi lès importante. Nos ta siña ku ta importante pa nos pordoná otro i pa nos konfia ku Yehova lo pordoná nos tambe. Nos ta masha kontentu ku nos tin rumannan spiritual den nos kongregashon ku ta kla pa yuda nos. Pero ora nos mester di yudansa, nos mester pidi nan esei. Nos sa ku Yehova lo duna nos e forsa ku nos mester pa nos keda fiel bou di kualke prueba. I nos ta mira e importansia di biba kada dia manera ta nos último chèns pa demostrá ku nos ta fiel, konfiando ku Yehova lo resusitá nos si nos muri.

¹⁸ Si nos apliká loke nos a siña, nos lo ta hasiendo loke Yehova mes a bisa tokante su Yu: “Skuch’é.”—Mat. 17:5.