Capítulo 6

Milagro realmente a sosode?

Un dia na aña 31 EC, Jesús i disípel di dje tabata bai na Naín, un stad den nort di Palestina. Ora nan a yega cerca e porta dje stad, nan a topa cu un entierro. E fayecido tabata un homber hoven. Su mama tabata biuda, i esei tabata su único yiu, pues awor e tabata completamente so. Segun e relato, Jesús “a compadecele, i a bisa: ‘No yora.’ Cu esei el a hala cerca i a toca e cama, i cargador a para ketu, i el a bisa: ‘Hoven, mi ta bisábo, Lanta!’ I e morto a lanta i a cuminza papia.”—Lucas 7:11-15.

 1. (Inclui introduccion.) (a) Jesús a haci cua milagro cerca e stad di Naín? (b) Ki importante ta milagro den e Bijbel, i toch tur hende ta kere cu nan realmente a sosode?

ESEI ta un relato conmovedor, pero ta berdad? Hopi hende ta haya cu ta difícil pa kere cu tal cosnan realmente a sosode. No obstante, milagro ta un parti esencial dje registro bíblico. Kerimento den e Bijbel kier men kere cu tabatin milagro. Realmente, tur e structura dje berdad bíblico ta depende di un milagro mashá importante: e resureccion di Jesucristo.

Pakico algun hende no ta kere

 2, 3. Menciona un liña di razonamento cu David Hume, filósofo escocés, a usa den su esfuerzo pa proba cu milagro no sa sosode.

² Bo ta kere den milagro? Of bo ta kere cu den e era científico aki, no ta lógico pa kere den milagro—esta, den suceso extraordinario cu ta duna evidencia di obra sobrenatural? Si bo no ta kere, bo no ta e promé. Dos cien aña pasá un filósofo escocés yamá David Hume tabatin e mesun problema. Tal bez bo motibo pa no kere ta similar cu su motibo.

³ Hume tabatin tres punto sobresaliente contra e idea di milagro.¹ E promé punto, segun Hume: “Milagro ta un violacion di ley di naturaleza.” Desde tempo inmemorial, hende a depende di ley di naturaleza. Nan sa cu un obheto lo cai si nada no ta wanté, cu e solo lo sali tur maínta i drenta tur anochi, etc. Di instinto, nan sa cu suceso semper ta sigi tal rutina conocí. Nada no ta sosode nunca cu no ta na armonía cu ley di naturaleza. Segun Hume, tal ‘prueba’ contra e posibilidad di milagro “ta tanto completo como cualkier argumento biniendo di experencia.”

 4, 5. Menciona dos otro motibo cu David Hume a presenta pa nenga e posibilidad di milagro.

⁴ E segundo argumento cu el a presenta tabata cu ta fácil pa gaña hende. Algun hende kier kere den maraviya i milagro, specialmente ora nan tin cu ber cu religion, i hopi di loke ta ser yamá milagro a resulta di ser gañamento. Su tercer argumento tabata cu milagro generalmente a sosode den tempo di ignorancia. Mientras mas educá hende tá, menos milagro ta ser reportá. Segun Hume, “Tal cos maraviyoso nunca ta sosode den nos tempo.” P’sei el a kere cu milagro nunca a sosode.

⁵ Te ne dia djawe, e mayoría di argumento contra milagro ta sigi tal principio general, pues, láganos considera keho di Hume un pa un.

Milagro ta contrario cu ley di naturaleza?

 6. Pakico no ta lógico pa nenga idea di milagro abase di cu nan ta ‘violacion dje ley di naturaleza’?

⁶ Kico dje keho di cu milagro ta ‘viola ley di naturaleza’ i cu p’sei no por ta berdad? Superficialmente, esei por parce convenciente; pero analiza loke esei realmente ta bisa. Generalmente, milagro kier men algo cu ta sosode fuera di ley normal di naturaleza.a Milagro ta un suceso tanto inesperá cu mirones ta keda convencí cu nan a presenciá un obra sobrehumano. Pues, loke e keho realmente kier men ta: ‘Milagro ta imposibel pasobra nan ta milagroso!’ Pakico bo no ta considera evidencia promé cu bo ta yega na tal conclusion?

 7, 8. (a) Respecto na ley di naturaleza cu nos conoce, di ki manera científico a alcanza un punto di bista mas amplio di loke ta posibel i no ta posibel? (b) Si nos ta kere den Dios, nos també mester kere den su poder di haci cos extraordinario?

⁷ E berdad tá cu hende educá djawe ta menos prepará cu David Hume pa insisti cu ley conocí di naturaleza ta aplica di igual manera den tur lugar i na tur ocasion. Homber científico tin e tendencia di considera si den lugar di tres dimension conocí, esta, largura, hanchura, i haltura, por tin hopi otro dimension den e universo.² Nan ta traha teoría tocante existencia di burracu pretu, strea enorme cu a bira mas chikito te cu nan densidad ta casi infinito. Nan ta bisa cu den nan becindario estructura di espacio ta tanto deformá cu tempo mes ta keda pará.³ Hende científico asta ta debati di cu si, den cierto circunstancia, tempo ta bai patrás en bez di padilanti!⁴

⁸ Stephen W. Hawking, prominente profesor di matemática di Universidad di Cambridge, den un consideracion di comienzo di universo, a bisa: “Den e teoría clásico di relatividad general . . . e principio di universo tabatin cu ser un solo bola di densidad curvatura di espacio i tempo infinito. Den tal circunstancia, tur ley di física conocí por faya.”⁵ Pues, científico moderno no ta acepta e idea di cu algo contrario cu ley normal di naturaleza no por sosode. Den circunstancia extraordinario, algo extraordinario por sosode. Siguramente, si nos ta kere den Dios Todopoderoso, nos tin cu admiti cu e tin e poder di causa suceso extraordinario—milagroso—ora ta conbini su propósito.—Éxodo 15:6-10; Isaías 40:13, 15.

Kico di milagro falso?

 9. Ta cierto cu tin milagro falso? Splica bo contesta.

⁹ Ningun hende razonabel por nenga di cu tin milagro falso. Por ehempel, algun hende ta bisa cu nan tin e poder di cura hende enfermo cu e milagro di curacion di fe. Un cierto médico, William A. Nolan, a investiga como su proyecto special tal tipo di curacion. El a investiga hopi supuesto curacion tanto di curioso evangélico na América como di esnan yamá ciruhano síkico na Asia. Cu ki resultado? Tur loke el a haya tabata ehempel di decepcion i gañamento.⁶

10. Bo ta kere cu ya cu tin prueba cu algun milagro ta gañamento, esei ta proba cu tur milagro ta gañamento?

¹⁰ Tal gañamento kier men cu berdadero milagro nunca a sosode? No necesariamente. Tin bez cu nos ta tende cu hende ta traha i ta plama placa falso, pero esei no kier men cu tur placa ta falso. Algun hende enfermo ta pone hopi fe den curandero, médico falso, i ta dúnanan hopi cen. Pero esei no kier men cu tur docter ta gañador. Algun pintor ta bira experto falsificando pintura di pintor famoso di pasado. Pero esei no kier men cu tur pintura ta falso. E echo cu algun supuesto milagro ta claramente falso tampoco no kier men cu berdadero milagro nunca por sosode.

‘Milagro no ta sosode awor’

11. Menciona e tercer keho di David Hume contra e idea di milagro.

¹¹ E tercer keho tabata expresá brevemente como lo sigiente: “Tal cos maraviyoso nunca ta sosode den nos tempo.” Hume nunca a mira un milagro, pues el a nenga di kere cu milagro por sosode. Sin embargo, tal clase di razonamento ta inconsistente. Cualkier hende pensador tin cu admiti cu, promé cu e tempo dje filósofo escocés, “cos maraviyoso” a sosode cu no a wordu repití durante e bida di Hume. Kico a sosode?

12. Cua suceso maraviyoso di pasado no por ta splicá usando ley di naturaleza cu ta funciona awe?

¹² Entre otro cosnan, bida a cuminza riba tera. Anto, cierto forma di bida tabata duná e don di bida consiente. Despues, homber a presenta, cu e don di sabiduría, imaginacion, e capacidad di stima, i e facultad di concenshi. Ningun científico por splica a base di ley di naturaleza cu ta funciona awe con cosnan extraordinario asina a sosode. Pero, nos tin evidencia bibo di cu esei a sosode.

13, 14. Menciona algun cos awe cu ta común cu por a parce milagro pa David Hume.

¹³ I kico di “cos maraviyoso” cu a sosode desde e tempo di David Hume? Supongamos cu nos por bolbe na su tempo i bisé tocante e mundo djawe. Imaginábo cu bo ta purba di splica cu un comerciante den Hamburgo por papia cu hende miles di kilometer di distancia den Tokio sin sikiera hiza su boz; cu hende rond di mundo por mira un wega di futbol den Spaña asta ne ora cu e ta ser hungá; cu avion hopi mas grandi cu barcu di lamá di dia di Hume por subi for di tera i hiba 500 hende na halto pa miles di kilometer den poco ora di tempo. Bo por imaginábo con Hume lo a reacciona? ‘Imposibel! Tal cos maraviyoso nunca ta sosode den nos tempo!’

¹⁴ Sin embargo, tal ‘cos maraviyoso’ sí ta sosode den nos tempo. Pakico? Pasobra hende, usando principio científico di locual Hume no tabatin ningun idea, a siña traha telefón, television, i avion. Pues, ta tanto difícil pa kere cu tabatin bez den pasado cu Dios por a haci loke pa nos ta milagroso, aunque nos no ta comprende con el a hacié?

Con nos por sa?

15, 16. Si milagro sí a sosode, cua ta e único manera pa nos sa di nan? Ilustra bo contesta.

¹⁵ Naturalmente, bisando cu milagro por a sosode no kier men cu nan sí a sosode. Con nos por sa, den siglo 20 aki, si acaso ayá den tempo bíblico cu Dios a haci berdadero milagro of no usando sirbidor di dje riba tera? Ki clase di prueba bo ta spera pa tal cosnan? Imaginábo cu un hende di mondi tabata hibá pa bishita un stad grandi. Ora e bai cas, con e por splica su pueblo cosnan maraviyoso di civilizacion? E no por splica con auto ta corre of pakico música ta sali for di radio portátil. E no por traha un computer pa duna prueba cu tal cos ta existi. Tur loke e por haci ta di conta loke el a mira.

¹⁶ Nos ta den e mesun situacion cu e famía dje hende di mondi. Si Dios realmente a haci milagro, e único manera pa nos siña tocante nan ta for di testigo ocular. Testigo ocular no por splica con milagro a sosode, ni nan no por duplicánan. Nan solamente por cóntanos loke nan a mira. Claramente, ta posibel pa gaña testigo ocular. També, ta fácil pa nan exagera i gaña. Pues, anto, pa nos kere nan testimonio, nos tin cu sa si tal testigo ocular ta confiabel, tin calidad halto, i ta duna prueba cu nan tin bon motibo.

E milagro cu e mihor prueba

17. (a) Cua milagro di Bijbel tin mas prueba cu tur? (b) Menciona circunstancia cu a resulta den e morto di Jesús.

¹⁷ E milagro cu e mihor prueba den e Bijbel ta e resureccion di Jesucristo, pues, den un sentido, pakico no usa esei como un caso di prueba. Promé, considera echo reportá: Jesús tabata arrestá den anochi di 14 di Nisán—locual tabata un diahuebs anochi segun e moda moderno di conta un siman.b Jesús a para dilanti lider hudío cu a acusé di blasfemia i a decidi cu e tabatin cu muri. Lider hudío a hiba Jesús dilanti gobernador romano Poncio Pilato, cu a sucumbi na nan presion i a entrega Jesús pa ehecucion. Tal bez diabierne cerca merdia—ainda 14 di Nisán segun calendario hudío—nan a claba Jesús ne staca di tormento i den poco ora di tempo e tabata morto.—Marco 14:43-65; 15:1-39.

18. Segun e Bijbel, di ki manera informacion dje resureccion di Jesús a cuminza plama?

¹⁸ Despues cu un soldad romano a hinca su lanza den e custía di Jesús pa confirma cu e realmente tabata morto, nan a dera e curpa di dje den un graf nobo. Su mañan, 15 di Nisán (diabierne/diasabra), tabata sabat. Pero madrugá dia 16 di Nisán—diadomingo maínta—algun disípel a bai ne graf i a hayé bashí. Pronto, cuenta a cuminza plama tocante hende cu a mira Jesús bibo. E reaccion inicial na tal cuenta asombroso tabata exactamente e reaccion djawe—incredulidad. Asta e apóstolnan a nenga di kere. Pero ora nan mes a mira Jesús bibo, nan tabatin cu acepta e realidad di cu e tabata lantá for di morto.—Juan 19:31–20:29; Lucas 24:11.

E graf bashí

19-21. (a) Segun Hustino Mártir, con hudío a contraresta e predicacion di hende cristian dje resureccion di Jesús? (b) Nos por keda sigur di cu kico tabata e berdad tocante e graf di Jesús dia 16 di Nisán?

¹⁹ Jesús tabata resusitá, of nan a inventa e cuenta? Un cos cu hende dje tempo ayá probablemente a puntra tabata: E curpa di Jesús ta den e graf ainda? Sigidor di Jesús tabatin cu enfrenta un obstáculo enorme si nan opositor por a mustra su cadáver mes den e graf ainda como prueba di cu e no tabata resusitá. Pero, no tin ningun cuenta cu nan a haci esei. Mas bien, segun e Bijbel, nan a paga soldad asigná pa warda e graf i a mándanan: “Bisa, ‘Su disípelnan a bini den anochi i a horté mientras cu nos tabata drumí.’” (Mateo 28:11-13) Nos també tin prueba fuera di Bijbel cu lider hudío a haci esei.

²⁰ Rond di un siglo despues di morto di Jesús, Hustino Mártir a skirbi un obra yamá Diálogo cu Trifón. Den dje el a bisa: “Boso [hudío] a manda homber escogí i ordená den tur e mundo pa proclama cu un herehía sin dios i sin ley a bini di un cierto Jesús, un gañador galileo, cu nos a crucifica, pero su disípelnan a horté den anochi for dje graf, unda nan a poné.”⁷

²¹ Wel, Trifón tabata hudío, i Diálogo cu Trifón tabata skirbí pa defende cristianismo contra hudaísmo. Pues, probablemente Hustino Mártir lo no a skirbi esei, esta, cu hudío a acusa cu hende cristian a horta e cadáver di Jesús for di graf, si hudío no a haci tal acusacion. Di otro manera, hudío por a acusa Hustino Mártir di a gaña i fácilmente duna prueba di dje. Hustino Mártir por a bisa esei solamente si hudío realmente a manda mensahero asina. I nan por a haci esei solamente si e graf realmente tabata bashí dia 16 di Nisán di aña 33 EC, i si nan no por a mustra e curpa di Jesús den e graf como prueba di cu e no tabata resusitá. Pues, siendo cu e graf tabata bashí, kico a pasa? Disípel sí a horta e curpa? Of e tabata kitá milagrosamente como prueba di cu Jesús realmente tabata resusitá?

E conclusion di Lucas, e docter

22, 23. Menciona un homber educá dje promé siglo cu a investiga e resureccion di Jesús. Cua fuente di informacion tabata disponibel pe?

²² Un homber cu bon educacion dje promé siglo cu a duna consideracion cuidadoso ne prueba tabata Lucas, un docter. (Colosense 4:14) Lucas a skirbi dos buki cu awor ta un parti dje Bijbel: un buki tabata su Evangelio, of historia dje ministerio di Jesús, i e otro, yamá Echo dje Apóstolnan, tabata un historia di plamamento di cristianismo durante e añanan despues di morto di Jesús.

²³ Den e introduccion di su Evangelio, Lucas a menciona hopi prueba cu tabata disponibel pe pero cu no ta disponibel mas pa nos. El a menciona documento skirbí tocante e bida di Jesús cu el a consulta. El a skirbi també cu el a papia cu testigo ocular dje bida, morto, i resureccion di Jesús. Anto, el a bisa: “Mi a investiga tur cos desde e comienzo cu exactitud.” (Lucas 1:1-3) Evidentemente, e investigacion di Lucas tabata cabal. E tabata un bon historiador?

24, 25. Con hopi hende ta considera calificacion di Lucas como historiador?

²⁴ Sí, segun hopi hende. Ayá na 1913, Sir William Ramsay den un discurso a comenta riba exactitud dje obra di Lucas. El a yega na cua conclusion? “Lucas tabata un historiador dje primera clase; no solamente pa motibo cu nos por confia su declaracion di echonan; sino també e tabatin un berdadero sentido histórico.”⁸ Investigador mas reciente a yega ne mesun conclusion. The Living Word Commentary (Comentario riba e Palabra bibo), den su introduccion di su volumen tocante Lucas, el a bisa: “Lucas tabata tanto historiador (i historiador fiel) como teólogo.”

²⁵ Dr. David Gooding, un ex-profesor di griego di Testament Bieu den Nort Irlanda, a declara cu Lucas tabata “un historiador di antigua den e tradicion di historiador di Testament Bieu i den e tradicion di Tucídides [un historiador di mas apreciá di mundo di antigua]. Mescos cu nan, el a haci mashá esfuerzo pa investiga fuente di informacion i scogé, i ordené. . . . Tucídides a combina tal método cu un pasion pa exactitud histórico: no tin motibo pa kere cu Lucas a haci menos.”⁹

26. (a) Lucas a yega na cua conclusion tocante e resureccion di Jesús? (b) Kico por a fortalece su conclusion?

²⁶ Lucas, un homber tanto capaz, a yega na cua conclusion tocante pakico e graf di Jesús tabata bashí dia 16 di Nisán? Tanto den su Evangelio como den e buki di Echo, Lucas a bisa cu ta berdad cu Jesús tabata lantá for di morto. (Lucas 24:1-52; Echo 1:3) E no tabatin ningun duda di dje. Kizás su mes experencia a fortalece su kerimento den e milagro dje resureccion. Aunque ta parce cu e mes no tabata un testigo ocular dje resureccion, e sí a informa di a presenciá milagro cu apóstol Pablo a haci.—Echo 14:8-10; 20:7-12; 28:8, 9.

Nan a mira Jesús resusitá

27. Menciona algun hende cu a bisa cu nan a mira Jesús resusitá.

²⁷ Dos Evangelio, segun tradicion, tabata di homber cu a conoce Jesús, a miré muri, i a bisa cu nan realmente a miré despues di su resureccion. Nan ta apóstol Mateo, ex-cobrador di belasting, i Juan, e apóstol stimá di Jesús. Un otro skirbidor di Bijbel, apóstol Pablo, també a bisa cu el a mira Cristo resusitá. Además, Pablo a skirbi un lista di nomber di hende cu a mira Jesús bibo despues di su morto, i a bisa cu na un tempo Jesús a presenta na “mas cu cinco cien ruman.”—1 Corintio 15:3-8.

28. E resureccion di Jesús tabatin cua efecto riba Pedro?

²⁸ Un hende cu Pablo a menciona como testigo ocular ta Santiago, mitá ruman carnal di Jesús, cu mester a conoce Jesús desde chikito. Un otro tabata apóstol Pedro; historiador Lucas a skirbi cu Pedro a duna un testimonio francu tocante e resureccion di Jesús un poco siman so despues di morto di Jesús. (Echo 2:23, 24) Segun tradicion, Pedro a skirbi dos carta den e Bijbel, i den e promé di eseinan Pedro a mustra cu su kerimento den e resureccion di Jesús ainda tabata un impulso fuerte asta hopi aña despues dje suceso. El a skirbi: “Bendito sea e Dios i Tata di nos Señor Jesucristo, pasobra segun su gran misericordia el a dúnanos un nacimento nobo na un speranza bibo mediante e resureccion di Jesucristo for di morto.”—1 Pedro 1:3.

29. Aunque nos no por papia cu testigo ocular dje resureccion, sin embargo, cua evidencia impresivo ta disponibel pa nos?

²⁹ Pues, mescos cu Lucas por a papia cu hende cu a bisa cu nan a mira i a papia cu Jesús despues di su morto, nos por leza e palabra cu algun dje hendenan ei a skirbi. I nos por huzga pa nos mes si tal hende tabata gañá, si nan a purba di gáñanos, of si nan realmente a mira Cristo resusitá. Francamente, ningun hende por a gáñanan. Varios di nan tabata amigo íntimo di Jesús te na su morto. Algun di nan a presenciá su agonía riba e staca di tormento. Nan a mira e sanger i awa basha for di herida dje lanza dje soldad cu a hinqué. E soldad tabata sa, i nan tabata sa, cu Jesús tabata innengablemente morto. Despues, segun nan, nan a mira Jesús bibo i asta a papia cuné. No, ningun hende por a gáñanan. Pues, anto, nan a purba di gaña nos, bisando cu Jesús tabata resusitá?—Juan 19:32-35; 21:4, 15-24.

30. Pakico tabata imposibel pe promé testigonan ocular dje resureccion di Jesús gaña tocante dje?

³⁰ Pa contesta esei, tur loke nos tin cu haci ta di puntra nos mes: Nan mes a kere loke nan a bisa? Sí, sin duda. Pa hende cristian, incluyendo esnan cu a bisa cu nan tabata testigo ocular, e resureccion di Jesús tabata e fundeshi completo di nan kerimento. Apóstol Pablo a bisa: “Si Cristo no a ser lantá, nos predicamento siguramente ta en bano, i nos fe ta en bano . . . Si Cristo no a ser lantá, boso fe ta inútil.” (1 Corintio 15:14, 17) Esei ta parce palabra di un hende cu a gaña ora el a bisa cu el a mira Cristo resusitá?

31, 32. Cristian di promé a haci cua sacrificio, i pakico esei ta prueba fuerte di cu tal cristian tabata papia e berdad ora nan a bisa cu Jesús tabata resusitá?

³¹ Tuma na cuenta loke kier men pa ser un cristian den e tempo ei. Nan no a gana prestigio, poder, of riqueza. Tur lo contrario. Hopi cristian di promé ‘a acepta gozosamente e plundermento di nan pertenencia’ pa causa di nan fe. (Hebreo 10:34) Cristianismo a exigi un bida di sacrificio i persecucion cu den hopi caso a termina den martirio den un morto bergonzoso i doloroso.

³² Algun hende cristian a bini di famía próspero, mescos cu apóstol Juan kende su tata aparentemente tabatin un negoshi próspero di piscamento den Galilea. Hopi tabatin bon prospecto, tal como Pablo cu, ora el a acepta cristianismo, tabata un studiante bao dje famoso rabi Gamaliel i a cuminza gana fama den bista di gobernante hudío. (Echo 9:1, 2; 22:3; Galatio 1:14) Pero, nan tur a bira lomba pa loke mundo a ofrece, pa nan por plama un mensahe basá riba e echo cu Jesús tabata resusitá for di morto. (Colosense 1:23, 28) Pakico nan a haci sacrificio asina pa nan sufri pa un causa cu nan tabata sa tabata fundá riba un mentira? E contesta tá, nan no a hacié. Nan a keda dispuesto di sufri i muri pa un causa cu nan tabata sa tabata fundá riba e berdad.

Milagro realmente ta sosode

33, 34. Siendo cu e resureccion sí a sosode, kico nos por bisa tocante otro milagro di Bijbel?

³³ Sí, prueba basá riba testimonio ta absolutamente convenciente. Jesús realmente tabata lantá for di morto dia 16 di Nisán di aña 33 EC. I siendo cu su resureccion a tuma lugar, tur otro milagro dje Bijbel ta posibel—milagro pa locual nos també tin e testimonio firme di testigo ocular. E mesun Poder cu a lanta Jesús for di morto també a haci posibel pa Jesús lanta e yiu dje biuda di Naín. També el a duna Jesús poder pa haci milagro menor cu esei di curacion, pero toch maraviyoso. E mesun Poder tabata tras di alimentacion milagroso dje multitud, i E també a haci posibel pa Jesús camna riba awa.—Lucas 7:11-15; Mateo 11:4-6; 14:14-21, 23-31.

³⁴ Pues, mencion di milagro den e Bijbel no ta un motibo pa duda su berdad. Mas bien, ya cu milagro sí a sosode den tempo bíblico, esei ta duna prueba fuerte di cu e Bijbel realmente ta e Palabra di Dios. Pero, tin un otro acusacion hací contra e Bijbel. Hopi hende ta bisa cu e Bijbel ta contradici su mes i p’sei no por ta e Palabra di Dios. Esei ta berdad?

[Nota]

[Komentario na página 81]

Enemigo di cristianismo a bisa cu e disípelnan a horta e curpa di Jesús. Si esei tabata e caso, pakico hende cristian a keda dispuesto di muri pa un fe fundá ariba su resureccion?

[Kuadro na página 85]

Pakico no tin milagro awe?

Tin bez cu e pregunta ta presenta: ‘Pakico no tin milagro awe manera esnan di Bijbel?’ E contesta tá cu milagro a cumpli cu nan propósito den e tempo ayá, pero awe Dios ta spera pa nos biba pa medio di fe.—Habacuc 2:2-4; Hebreo 10:37-39.

Den e tempo di Moisés, milagro a sosode pa establece autorizacion di Moisés. Milagro a mustra cu Jehova Dios tabata usa Moisés i també cu e pacto di Ley realmente tabata di origen divino i cu dje ora ei padilanti israelita tabata e pueblo escogí di Dios.—Éxodo 4:1-9, 30, 31; Deuteronomio 4:33, 34.

Den e promé siglo, milagro a yuda establece autorizacion di Jesús i, despues di dje, dje congregacion cristian nobo. Milagro a yuda demonstra cu Jesús tabata Mesías primintí, cu despues di su morto e pueblo special di Dios, e congregacion cristian a reemplazá Israel carnal, i asina a mustra cu e Ley di Moisés no tabata na vigor mas.—Echo 19:11-20; Hebreo 2:3, 4.

Despues di tempo dje apóstolnan, e tempo di milagro a pasa. Apóstol Pablo a splica: “Si tin don di profetizá, nan lo ser eliminá; si tin lenga, nan lo caba; sin tin conocimento, lo e ser eliminá. Pasobra nos tin conocimento incompleto i nos ta profetiza incompletamente; pero ora loke ta completo ta yega, loke ta incompleto lo ser eliminá.”—1 Corintio 13:8-10.

Awe, nos tin e Bijbel completo, cu ta inclui tur revelacion i conseho di Dios. Nos tin cumplimento di profecía, i nos tin comprendimento delantá dje propósito di Dios. P’sei, no tin mester di milagro mas. No obstante, e mesun spiritu di Dios cu a haci milagro posibel ta existi ainda i ta produci resultado cu ta duna prueba igualmente fuerte di poder divino. Nos lo mira mas di esei den un capítulo mas leu.

[Plachi na página 75]

Hopi hende ta mira lo confiabel di ley di naturaleza, tal como salimento di solo tur maínta, i cu esei ta duna prueba cu milagro no por sosode

[Plachi na página 77]

Creacion dje tera como e habitacion di cosnan bibiente tabata un ‘suceso maraviyoso’ cu no a wordu repití

[Plachi na página 78]

Con bo por splica maraviya di ciencia moderno na hende cu a biba 200 aña pasá?