“Resistí Diabel” Meskos Ku Hesus A Hasi
“Resistí Diabel i e lo hui for di boso.”—SANT. 4:7.
1. Kiko Hesus tabata sa di e oposishon ku lo el a hañ’é kuné riba tera?
HESUKRISTU tabata sa di antemano ku Diabel lo opon’é. Esaki tabata bisto for di e palabranan ku Dios a dirigí na e kolebra, pero ku en realidat tabata dirigí na e spiritu malbado i rebelde ku a papia mediante e kolebra. El a bis’é: “Lo mi pone enemistat entre abo i e muhé [e parti selestial di Yehova su organisashon], i entre bo simia i su simia; e [Hesukristu] lo heridá bo kabes, i abo lo heridá su hilchi di pia.” (Gén. 3:14, 15; Rev. 12:9) E echo ku Hesus lo a ser heridá den hilchi a nifiká ku lo el a sufri solamente un gòlpi temporal ora nan lo a mat’é riba tera pasobra Yehova lo a resusit’é na gloria selestial. Pero e echo ku e kabes di e kolebra lo ser heridá ta nifiká ku Diabel lo risibí un gòlpi mortal for di kua lo e no por rekuperá nunka mas.—Lesa Echonan 2:31 i 32; Hebreonan 2:14.
2. Dikon Yehova tabata sigur ku Hesus lo a resistí Diabel ku éksito?
2 Yehova tabatin sigur ku Hesus lo a kumpli ku su asignashon eksitosamente i resistí e Diabel ora e tabata riba tera. Dikon Yehova tabata asina sigur di esaki? Pasobra hopi tempu promé, el a krea Hesus den shelu. I dor di a opserv’é, e tabata sa ku e “trahadó eksperto” akí i “primogénito di henter kreashon” tabata obediente i fiel. (Pro. 8:22-31; Kol. 1:15) Pues, ora Dios a manda Hesus na tera i a permití Diabel pon’é na prueba te na morto, e tabata sigur ku su Yu unigénito lo a logra resistí Diabel.—Juan 3:16.
Yehova Ta Preservá Su Sirbidónan
3. Kon Diabel ta trata sirbidónan di Yehova?
3 Hesus a yama Diabel “e prens di e mundu akí,” i el a spièrta Su disipelnan ku nan lo ser persiguí meskos ku é a ser persiguí. (Juan 12:31; 15:20) E mundu ku ta drumí den poder di Satanas e Diabel ta odia kristiannan berdadero pasobra nan ta sirbi Yehova i ta predikadónan di hustisia. (Mat. 24:9; 1 Juan 5:19) Diabel ta konsentrá prinsipalmente riba e restu ungí, kendenan ku tempu lo goberná huntu ku Kristu den su Reino selestial. Satanas ta konsentrá tambe riba e gran kantidat di Testigu di Yehova ku tin e speransa di biba pa semper riba un tera kombertí den paradeis. E Palabra di Dios ta spièrta nos: “Boso atversario, e Diabel, ta kana rònt manera un leon ku ta gruña, buskando ken e por devorá.”—1 Ped. 5:8.
4. Kiko ta duna prueba ku e pueblo di Dios a resistí Diabel ku éksito den nos tempu?
4 Komo un organisashon ku tin e apoyo di Yehova Dios, nos ta resistí Diabel ku éksito. Konsiderá e detayenan akí: Durante e último 100 añanan, algun di e diktaduranan di mas feros a purba kaba ku Testigunan di Yehova. Sinembargo, e kantidat di Testigu ta sigui oumentá i aktualmente e ta kasi 7.000.000 persona den mas ku 100.000 kongregashon rònt mundu. Ta e diktaduranan kruel ku a persiguí e pueblo di Yehova ta esnan ku no ta eksistí mas.
5. Kon Isaias 54:17 a kumpli den kaso di sirbidónan di Yehova?
5 Dios a papia ku e kongregashon di Israel di pasado i a primintié: “Ningun arma ku wòrdu formá kontra bo lo no prosperá; i tur lenga ku lanta kontra bo den husgamentu lo bo kondená. Esaki ta e herensia di e sirbidónan di SEÑOR, i nan hustifikashon ta bini for di mi.” (Isa. 54:17) Rònt mundu, e promesa ei a kumpli den kaso di e pueblo di Yehova durante e “último dianan” akí. (2 Tim. 3:1-5, 13) Nos ta sigui resistí Diabel i ningun arma ku e purba usa pa kaba ku e pueblo di Dios lo no tin éksito, pasobra Yehova ta na nos banda.—Sal. 118:6, 7.
6. Kiko e profesia di Daniel ta konta nos tokante e futuro di Diabel su gobernashon?
6 Durante e fin di henter e sistema di kosnan malbado ku ta aserkando rápidamente, tur rasgo di Satanas su gobernashon lo ser eliminá kompletamente. Bou di inspirashon, profeta Daniel a skirbi e siguiente profesia: “Den e dianan di e reinan ei [ku ta eksistí den nos tempu] e Dios di shelu lo lanta un reino [den shelu] ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí [ku ta eksistí awor], ma e mes lo dura pa semper.” (Dan. 2:44) Ora esei kumpli, Satanas su gobernashon i tambe di hende imperfekto lo disparsé. Tur rasgo di e sistema di kosnan di Diabel lo disparsé pa semper, i e Reino di Dios lo goberná sin ningun oposishon riba henter e tera.—Lesa 2 Pedro 3:7 i 13.
7. Kon nos por sa ku sirbidónan individual di Yehova por resistí Diabel ku éksito?
7 No tin ningun duda ku Yehova lo preservá su organisashon i ku esaki lo sigui gosa di Su aprobashon. (Lesa Salmo 125:1 i 2.) Kiko di nos? Beibel ta bisa ku nos por resistí Diabel, meskos ku Hesus a hasi. Sí, loke Kristu a profetisá mediante apòstel Juan ta mustra ku apesar di oposishon di Satanas, “un multitut grandi” di hende ku tin speransa pa biba riba tera lo sobrebibí e fin di e sistema akí. Segun e Skritura, nan ta grita: “Salbashon ta di nos Dios, kende ta sintá riba e trono, i di e Lamchi [Hesukristu].” (Rev. 7:9-14) Beibel ta bisa ku kristiannan ungí ta vense Satanas, i nan kompañeronan, e “otro karnénan,” tambe ta resistié ku éksito. (Juan 10:16; Rev. 12:10, 11) Pero pa nan por hasi esaki, nan tin ku hasi esfuerso diligente i resa pidi Yehova sinseramente pa ‘libra nan for di e malbado.’—Mat. 6:13.
E Ehèmpel Perfekto den Resistí Diabel
8. Segun Beibel, kiko ta e promé tentashon ku Diabel a usa kontra Hesus den desierto, i kon Kristu a reakshoná?
8 Diabel a purba kibra Hesus su integridat. Den desierto, Satanas a usa vários tentashon den un intento pa pone Hesus desobedesé Yehova. Sinembargo, Hesus a pone un ehèmpel perfekto den resistí Satanas. Despues ku Hesus a yuna 40 dia i 40 nochi, probablemente e tabatin masha gana di kome. Diabel a bis’é: “Si bo ta e yu di Dios, ordená e piedranan akí pa nan bira pan.” Pero Hesus a nenga di usa su poder ku Dios a dun’é pa benefisiá su mes. En bes di esei, Hesus a bis’é: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’”—Mat. 4:1-4; Deu. 8:3.
9. Dikon nos tin ku resistí Diabel su intentonan pa probechá di nos deseonan físiko normal?
9 Awendia, Diabel ta purba probechá di deseo físiko normal di Yehova su sirbidónan. P’esei, nos mester ta determiná pa resistí tentashon seksual, ku ta masha komun den e mundu inmoral akí. E Palabra di Dios ta bisa enfátikamente: “Òf boso no sa ku e inhustunan lo no heredá e reino di Dios? No laga nan gaña boso; ni fornikadó, ni adoradó di dios falsu, ni adúltero, ni sodomita, ni homoseksual . . . lo no heredá e reino di Dios.” (1 Kor. 6:9, 10) Ta bisto anto ku Dios lo no permití hende ku ta hiba un bida inmoral i ku no ke kambia drenta su mundu nobo.
10. Segun Mateo 4:5 i 6, ki otro tentashon Satanas a usa den un intento pa kibra Hesus su integridat?
10 Relashoná ku un di e tentashonnan ku Hesus a hañ’é kuné den desierto, e Skritura ta bisa: “Diabel a hib’é na e stat santu; i el a pon’é para riba e pinákulo di tèmpel, i a bis’é: ‘Si bo ta e yu di Dios, tira bo kurpa abou; pasobra ta pará skirbí: “E lo duna su angelnan enkargo tokante di bo, i den nan mannan nan lo karga bo, pa bo no dal bo pia na piedra.”’” (Mat. 4:5, 6) Supuestamente, esaki mester a bira un despliegue espektakular pa prueba ku Hesus di bèrdat ta e Mesias. Pero en realidat, lo el a bira un akto inkorekto i di arogansia ku lo no tabatin Dios su aprobashon ni su apoyo. Den e kaso akí tambe Hesus a mantené su integridat na Yehova i a reakshoná dor di sita un teksto di Beibel. El a bisa: “Tambe ta pará skirbí: ‘No tenta [Yehova] bo Dios.’”—Mat. 4:7; Deu. 6:16.
11. Kon Satanas por tenta nos, i kiko por ta e resultado?
11 Satanas por tenta nos pa pone Yehova na prueba. Kon asina? E por influensiá nos pa buska aprobashon di e mundu akí. Ademas, e por purba motivá nos pa imitá e mundu su estilonan ekstremo di moda den nos manera di bisti i di areglá nos mes òf pa partisipá den entretenimentu kuestionabel. Pero si nos ignorá konseho bíbliko i imitá e mundu, nos no por ferwagt ku e angelnan ta protehá nos for di e mal konsekuensianan di un desishon asina, no ta bèrdat? Ounke Rei David a repentí di su pikánan den e kaso di Bètsabé, e no a skapa di e konsekuensianan di su akshonnan. (2 Sam. 12:9-12) Laga nos no pone Yehova na prueba den maneranan inkorekto, kisas dor di sera amistat ku e mundu.—Lesa Santiago 4:4; 1 Juan 2:15-17.
12. Ki tentashon Mateo 4:8 i 9 ta relatá, i kon e Yu di Dios a reakshoná?
12 Un otro tentashon ku Diabel a usa den desierto a enbolbé un oferta pa duna Hesus poder polítiko. Satanas a mustra Hesus tur e reinonan di mundu i nan gloria i a bis’é: “Tur e kosnan akí lo mi duna bo, si bo tira bo kurpa abou i adorá mi.” (Mat. 4:8, 9) Asina, di un manera sin eskrúpulo, Satanas a purba haña adorashon ku ta pertenesé na Yehova i a tenta Hesus p’e bira infiel na Dios. Debí ku e angel ei—ku un tempu tabata leal—a sigui pensa riba su deseo pa haña adorashon, el a peka i a bira e tentadó envidioso i malisioso, Satanas e Diabel. (Sant. 1:14, 15) Sinembargo, Hesus tabata masha distinto for di Satanas, e tabata determiná pa keda fiel na su Tata selestial, i p’esei el a bisa Diabel: “Bai for di akinan, Satanas! Pasobra ta pará skirbí: ‘Adorá [Yehova] bo Dios, i sirbi e so.’” Asina Hesus a bolbe resistí Diabel ku palabranan bon kla. E Yu di Dios no ke tabata parti di e mundu di Satanas i hamas lo e adorá e malbado ei.—Mat. 4:10; Deu. 6:13; 10:20.
“Resistí Diabel i E Lo Hui for di Boso”
13, 14. (a) Kiko Diabel tabata ofresé Hesus ora el a mustr’é tur e reinonan di mundu? (b) Kon Satanas ta purba korumpí nos kurason?
13 Dor di mustra Hesus tur e reinonan di mundu, Diabel tabata ofres’é poder ku ningun hende no a yega di tin. Satanas a spera ku loke Hesus a mira lo a atra’é i konvens’é ku lo e por a bira e lider polítiko di mas poderoso na mundu. Awendia, Diabel no ta ofresé nos un reino, pero e ta purba korumpí nos kurason mediante e kosnan ku nos ta mira, tende i pensa.
14 Debí ku Diabel tin e mundu akí bou di su kontròl, e tin dominio tambe riba su medionan di komunikashon. Pues, no ta un sorpresa ku loke e mundu ta ofresé pa hende wak, skucha i lesa ta saturá ku inmoralidat i violensia. E mundu akí su propagandanan ta purba lanta den nos un deseo pa kumpra un avalancha di produkto ku nos no tin mester. Ta e medionan ei Diabel ta usa pa tenta nos konstantemente ku e brio atraktivo di kosnan material ku por atraé nos wowo, orea i mente. Pero ora nos ta nenga di wak, skucha i lesa informashon ku ta na konflikto ku prinsipionan bíbliko, de echo, nos ta bisando: “Bai for di akinan, Satanas!” Di e manera ei, ora nos ta rechasá e mundu impuru di Satanas na un manera firme i desididu, nos ta imitá Hesus. E echo ku nos no ta parti di e mundu di Satanas ta bisto tambe den e manera ku nos ta identifiká nos mes ku kurashi komo Testigunan di Yehova i siguidónan di Kristu na trabou, na skol, den bario i den nos famia.—Lesa Marko 8:38.
15. Dikon nos mester ta alerta kontinuamente pa por resistí Satanas?
15 Despues ku Diabel su di tres intento pa pone Hesus kibra Su integridat na Dios tampoko no a prosperá, “Diabel a lag’é.” (Mat. 4:11) Sinembargo, no tabata Satanas su intenshon pa stòp di tenta Hesus, pasobra Beibel ta bisa nos: “I ora Diabel a kaba ku tur tentashon [den desierto], el a lag’é pa un tempu.” (Luk. 4:13) Ora nos logra resistí Diabel, nos mester gradisí Yehova. Pero ademas di esei, nos mester sigui buska Dios su yudansa, pasobra Diabel lo bini bèk pa tenta nos ora ta kumbinié, i no nesesariamente na un momento ku nos kisas ta ferwagt di haña nos ku tentashon. P’esei, tur ora bai nos mester ta alerta, kla pa perseverá den rindi sirbishi sagrado na Yehova sin importá ki prueba nos haña nos kuné.
16. Kua forsa poderoso Yehova ta duna nos, i dikon nos tin ku pidi esaki den orashon?
16 Pa yuda nos den nos esfuersonan pa resistí Diabel, nos mester resa pidi Dios e forsa di mas poderoso di universo, esta, su spiritu santu, ku e konfiansa ku nos lo risibié. Esaki lo yuda nos hasi kosnan ku riba nos propio forsa lo tabata imposibel. Hesus a sigurá su siguidónan ku nan por haña Dios su spiritu ora el a bisa: “Si boso anto, siendo [imperfekto, pues relativamente] malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Luk. 11:13) Laga nos sigui resa pidi Yehova pa su spiritu santu. Ku e forsa di mas poderoso akí tras di nos determinashon pa resistí Diabel, nos lo sali viktorioso. Ademas di hasi orashon ferviente riba un base regular, nos tin ku bisti henter e armadura spiritual ku ta bini di Dios pa nos por “para firme kontra e trampanan di Diabel.”—Efe. 6:11-18.
17. Ki goso a yuda Hesus resistí Diabel?
17 Tin un otro kos ku a yuda Hesus resistí Diabel i ku por yuda nos tambe. Beibel ta bisa: “Pa motibu di e goso poní su dilanti, [Hesus] a soportá e sufrimentu di [“un staka di tormento,” NW], sin hasi kaso di bèrgwensa, i a sinta na man drechi di e trono di Dios.” (Heb. 12:2) Nos tambe por tin e goso ei basta nos apoyá Yehova su soberania, onra su nòmber santu i mantené e rekompensa di bida eterno nos dilanti. Nos lo eksperensiá gran goso ora Satanas i tur su obranan ser eliminá pa semper i ‘e humildenan heredá e tera, i deleitá nan mes den pas abundante.’ (Sal. 37:11) P’esei, sigui resistí Diabel, meskos ku Hesus a hasi.—Lesa Santiago 4:7 i 8.
Kon Lo Bo Kontestá?
• Ki prueba tin ku Yehova ta preservá su pueblo?
• Kon Hesus a pone un bon ehèmpel den resistí Satanas?
• Den ki maneranan bo por resistí Diabel?
[Plachi na página 25]
Amistat ku mundu ta hasi nos enemigu di Dios
[Plachi na página 27]
Hesus a rechasá Satanas su oferta pa dun’é tur e reinonan di mundu