Mateo A Bira Disipel di Hesus

Despues di a kura e hòmber lam, Hesus a keda un poko tempu mas den área di Kapernaum, serka di Laman di Galilea. Atrobe, hopi hende tabata bini serka dje, i e tabata siña nan. Segun ku e tabata kana, el a mira Mateo, kende nan tabata yama Levi, sintá den ofisina di belasting. Hesus a ekstendé un invitashon maravioso na dje. Hesus a bis’é: “Sigui mi.”—Mateo 9:9.

Probablemente Mateo, meskos ku Pedro, Andres, Santiago i Huan, tabata sa algu kaba di e obranan ku Hesus a efektuá den e área ei i di loke e tabata siña hende. I meskos ku e kuater disipelnan ei, ‘Mateo a siguié’ mesora. Esei ta loke Mateo mes a bisa den e Evangelio ku el a skirbi. (Mateo 9:9) Pues, Mateo a laga su trabou di kobradó di belasting i a bira disipel di Hesus.

Mas despues, Mateo a pone un bankete grandi na su kas, kisas pa mustra gratitut pa e gran privilegio ku el a haña di por a bira disipel di Hesus. Awor, fuera di Hesus i Hesus su disipelnan, ken mas Mateo a invitá na e bankete? Entre e hendenan ku el a invitá tabatin un kantidat di kobradó di belasting, su eks-koleganan, kendenan tabata kobra belasting pa outoridat romano, un entidat ku e hudiunan tabatin masha rabia riba dje. E kobradónan di belasting tabata kobra barkunan ku drenta haf, karavananan ku tabata usa kaminda prinsipal i tabata kobra belasting riba produkto importá. Ki opinion e hudiunan en general tabatin di e kobradónan di belasting? Pa nan, kobradónan di belasting tabata hende despresiabel pasobra hopi biaha nan tabata desonesto i tabata kobra mas plaka ku e tarifa normal di belasting. Fuera di e kobradónan di belasting, tabatin “pekadó” tambe na e bankete, esta, hende ku tabatin e reputashon di ta hasidó di maldat.—Lukas 7:37-39.

Ora e fariseonan ku tabata presente a mira Hesus ta kome ku kobradó di belasting i pekadó, nan a puntra su disipelnan: “Dikon boso maestro ta kome ku kobradó di belasting i pekadó?” (Mateo 9:11) Komo ku Hesus a tende loke nan a puntra, el a kontestá nan: “Hende bon di salú no tin mester di dòkter, ma hende malu sí. Bai anto, i siña loke esaki ta nifiká: ‘Mi ke miserikòrdia i no sakrifisio.’ Pasobra mi no a bini pa yama hende hustu, sino pekadó.” (Mateo 9:12, 13; Oséas 6:6) No ta di kurason e fariseonan a referí na Hesus komo maestro; p’esei, nan no tabata ke siña for di dje aunke e por a siña nan loke tabata korekto.

Aparentemente, Mateo a invitá kobradó di belasting i pekadó na su kas pa nan por a skucha Hesus pa asina nan por a drecha nan relashon ku Dios. I Beibel ta bisa ku ‘hopi di nan a bira siguidó di Hesus.’ (Marko 2:15) Sí, Hesus tabata ke yuda nan kultivá un bon relashon ku Dios. Distinto for di e fariseonan, kendenan tabata hustu den nan mes bista, Hesus sí no a despresiá kobradó di belasting i pekadó. Hesus tabata un persona kompasivo i miserikordioso; e tabata kla pa yuda tur hende ku tabata malu den sentido spiritual.

E echo ku Hesus a mustra miserikòrdia na nan no a nifiká ku el a pasa por haltu di nan pikánan. Nò, el a hasi esei pa mustra komprenshon i bondat, manera el a demostrá na hende ku tabata físikamente malu. Bo ta kòrda kon el a trata e hòmber ku tabatin lepra? Motivá pa kompashon, el a mishi kuné i bis’é: “Mi ke. Sea kurá.” (Mateo 8:3) Nos tambe mester kultivá e aktitut ku Hesus tabatin pa nos por trata hende den nesesidat ku miserikòrdia i yuda nan spesialmente den sentido spiritual.