LÈS 16
Kiko Hesus A Hasi Tempu Ku E Tabata Riba Tera?
Hopi hende a yega di tende tokante Hesus. Algun hende sa historia di Hesus tempu e tabata bebi. Otro hende sa ku e tabata un profeta sabí. Anto tin otro hende sa solamente tokante Hesus su morto. Nos por siña mas tokante Hesus ora nos analisá loke Beibel ta bisa di su bida riba tera? Den e lès akí, nos lo wak algun kos importante ku Hesus a hasi. Ademas, nos lo wak kon e kosnan ku el a hasi por benefisiá bo.
1. Kiko tabata e trabou di mas importante ku Hesus a hasi?
E trabou di mas importante ku Hesus a hasi tabata “deklará e bon notisia di e Reino di Dios.” (Lesa Lukas 4:43.) E bon notisia ku Hesus a prediká ta ku Dios lo a trese un reino, òf gobièrnu, ku lo solushoná tur problema di humanidat.a Hesus a kompartí e mensahe positivo akí ku otro hende pa tres aña i mei sin kansa.—Mateo 9:35.
2. Dikon Hesus a hasi milager?
Beibel ta bisa ku “pa medio di [Hesus], Dios a hasi obra poderoso, kos impreshonante i milager.” (Echonan 2:22) Dios a duna Hesus poder pa kalma un tormenta fuerte, pa duna kuminda na míles di hende, pa kura hende malu i asta pa lanta hende for di morto. (Mateo 8:23-27; 14:15-21; Marko 6:56; Lukas 7:11-17) E milagernan ku Hesus a hasi a demostrá bon kla ku ta Dios a mand’é na tera. Ademas, e milagernan ei a proba ku Dios tin poder pa solushoná tur nos problemanan.
3. Kiko nos por siña for di e manera ku Hesus a hiba su bida?
Hesus semper a obedesé Yehova. (Lesa Huan 8:29.) Asta ora otro hende a purba di strob’é, Hesus a hasi tur loke su Tata a pidié. El a keda fiel te na morto. Hesus a demostrá ku hende por sirbi Dios asta ora nan haña nan ku difikultat. Pues, Hesus a laga “un ehèmpel pa [nos] sigui su pasonan fielmente.”—1 Pedro 2:21.
KIKO MAS NOS POR SIÑA?
Laga nos wak kon Hesus a prediká e bon notisia tokante e Reino di Dios. Ademas, wak dikon e por a hasi milager.
4. Hesus a kompartí bon notisia ku otro hende
Hesus a kana míles di kilometer riba kaminda di tera pa kompartí e bon notisia ku mas tantu hende posibel. Lesa Lukas 8:1. Despues, analisá e siguiente preguntanan:
Hesus a prediká solamente na hende ku a bini pa skuch’é?
Ki esfuerso Hesus a hasi pa prediká na otro hende?
Dios a bisa di antemano ku e Mesías lo a kompartí bon notisia ku otro hende. Lesa Isaías 61:1, 2. Despues, analisá e siguiente preguntanan:
Kon Hesus a kumpli ku e profesia akí?
Bo ta kere awe tambe hende mester tende e bon notisia ei?
5. Hesus a siña hende lès balioso
Hesus no solamente a prediká e bon notisia tokante e Reino di Dios, sino tambe el a siña hende vários lès práktiko. Wak ehèmpel di algun lès práktiko ku el a siña hende durante su famoso Sermon Riba Seru. Lesa Mateo 6:14, 34 i 7:12. Despues, analisá e siguiente preguntanan:
Ki bon konseho Hesus a duna den e versíkulonan akí?
Bo ta kere ku e konsehonan ei por yuda hende awe?
6. Hesus a hasi milager
Yehova a duna Hesus poder pa hasi hopi milager. Pa wak ehèmpel di un milager ku Hesus a hasi, lesa Marko 5:25-34 òf pasa e VIDIO. Despues, analisá e siguiente preguntanan:
Segun e vidio, kiko e señora ku tabata malu tabata konvensí di dje?
Kiko ta impreshoná bo di e milager akí?
Lesa Huan 5:36. Despues, analisá e siguiente pregunta:
Ki testimonio, òf evidensia, e milagernan a duna di Hesus?
Bo tabata sa?
Nos ta haña mayoria di informashon tokante Hesus su bida den e kuater Evangelionan, esta, e bukinan di Beibel Mateo, Marko, Lukas i Huan. Kada eskritor a skirbi algun detaye tokante Hesus ku e otronan no a skirbi. Ora bo lesa tur e kuater bukinan akí, bo ta haña un bista kompleto di Hesus su bida fasinante.
MATEO
a skirbi e promé Evangelio. Den e buki di Mateo, nos ta haña vários di Hesus su siñansanan, spesialmente loke Hesus a siña hende tokante e Reino di Dios.
MARKO
a skirbi e Evangelio di mas kòrtiku. Den e buki di Marko, nos ta haña vários suseso fasinante i emoshonante di e bida di Hesus.
LUKAS
a skirbi kon importante orashon tabata pa Hesus i ku Hesus a trata hende muhé ku bondat.
HUAN
a relatá vários kòmbersashon ku Hesus tabatin ku su bon amigunan i ku otro hende. Esei ta laga nos mira ki tipo di persona Hesus ta.
LOKE HENDE SA BISA: “Hesus no tabata e Mesías; e tabata djis un bon hende.”
Kiko abo ta pensa?
RESÚMEN
Hesus a prediká tokante e Reino di Dios, a hasi milager i a obedesé Yehova na tur momento.
Repaso
Kiko tabata e trabou di mas importante ku Hesus a hasi tempu ku e tabata riba tera?
Kiko e milagernan ku Hesus a hasi a demostrá?
Ki lès balioso Hesus a siña hende?
MAS INFORMASHON INTERESANTE
Wak e mensahe prinsipal ku Hesus a prediká tempu ku e tabata riba tera.
“Dikon e Reino di Dios Ta Importante pa Hesus?” (E Toren di Vigilansia di 1 di òktober 2014)
Wak ki bon motibu nos tin pa kere ku Hesus su milagernan realmente a tuma lugá.
“E Milagernan di Hesus—Kiko Bo Por Siña for di Nan?” (E Toren di Vigilansia di 15 di yüli 2004)
Wak kon un hòmber a kambia su bida ora el a haña sa kuantu interes Hesus tabatin den otro hende.
“Mi Tabata Pensa Solamente Riba Mi Mes” (E Toren di Vigilansia di 1 di òktober 2014)
Wak suseso prinsipal di Hesus su sirbishi aki riba tera den e órden ku nan a tuma lugá.
“Susesonan Prinsipal di Hesus Su Bida Riba Tera” (Yudansa pa Studia e Palabra di Dios, Sekshon 4-B)