Hala Serka Dios
Esun Ku Por Restorá Bida
ABO a pèrdè un ser kerí den morto? Si esei ta e kaso, bo ta pasando den un di e eksperensianan mas doloroso den bida. Nos Kreadó ta komprondé bo tristesa. Es mas, e por eliminá loke ta kousa morto. Den Beibel, el a laga registrá vários relato tokante resurekshon. E relatonan ei ta mustra no solamente ku Yehova ta e Dunadó di bida sino tambe ku e ta Esun ku por restorá bida. Laga nos konsiderá un di e okashonnan ei den kua el a duna su Yu, Hesukristu, e poder pa resusitá un hende. Nos ta haña e relato di e milager ei na Lukas 7:11-15.
Tabata aña 31 di nos era. Hesus a bai e stat di Galilea ku yama Nain. (Versíkulo 11) Ora e tabata yegando e stat probablemente tabata birando anochi. Beibel ta bisa: “Ora ku e tabata yega na porta di e stat, ata, un morto tabata wòrdu hibá pa dera, e úniko yu hòmber di su mama, kende tabata biuda; i un multitut grandi for di e stat tabata huntu kuné.” (Versíkulo 12) Bo por imaginá kon tristu e mama biuda ei tabata? Ora su úniko yu a muri, tabata e di dos biaha ku nèt esun ku mester a proteh’é i perkurá p’e a muri.
Hesus a dirigí su atenshon na e mama tristu, kende probablemente tabata kana banda di su yu morto. E relato ta bisa: “Ora Señor a mir’é, el a sinti kompashon p’e, i a bis’é: ‘No yora.’” (Versíkulo 13) Hesus a sinti un duele profundo pa loke e biuda tabata pasando aden. Kisas e tabata pensando riba su mama, kende e tempu ei probablemente tabata biuda kaba, ku pronto lo a yora su morto.
Hesus a aserka e proseshon di entiero—pero no pa kana huntu ku nan. Ku un gesto di outoridat, el a “mishi ku e [kama ku tabata karga e] morto” i e multitut a para. E ora ei ku un stèm di un hende ku a haña poder riba morto, el a bisa: “‘Hóben, mi ta bisa bo: Lanta!’ I e morto a lanta sinta i a kuminsá papia. I Hesus a entreg’é bèk na su mama.” (Versíkulo 14 i 15) E hóben ei no tabata huntu ku su mama mas ora el a muri. Pues ora Hesus “a entreg’é bèk na su mama,” nan a bira un famia atrobe. E lágrimanan di tristesa di e biuda sin duda a kombertí den lágrimanan di gran alegria.
Bo kurason ta anhelá e alegria ei—pa ta huntu atrobe ku bo sernan kerí ku a muri? Bo por tin sigur ku Dios ta sinti pa bo. Loke Hesus a sinti pa e biuda tristu ei ta un refleho di Dios su kompashon, pasobra Hesus a reflehá e personalidat di su Tata na un manera perfekto. (Juan 14:9) Beibel ta siña nos ku Dios ta anhelá pa lanta hende ku ta preservá den su memoria for di morto. (Jòb 14:14, 15) Su Palabra, Beibel, ta duna nos un speransa maravioso, esta, e ekspektativa di biba den un paradeis riba tera i di mira e resurekshon di nos sernan kerí ku a muri. (Lukas 23:43; Juan 5:28, 29) Nos ta animá bo pa siña mas tokante Esun ku por restorá bida i loke bo tin ku hasi pa bo por tin e speransa ei.
[Plachi na página 19]
“E morto a lanta sinta i a kuminsá papia. I Hesus a entreg’é bèk na su mama”