Un Lès Tokante Pordon

E manera ku e hendenan tabata reakshoná riba loke Hesus tabata siña nan i tabata hasi a reflehá loke tabatin den nan kurason. Esei a bira bisto na un kas na Galilea. Un fariseo ku tabata yama Simon a invitá Hesus pa bin kome na su kas, kisas pa e por a siña konosé e persona ku tabata hasi milager un poko mas djaserka. Podisé Hesus a mira esaki komo un oportunidat pa prediká na e hendenan ku lo a bai ta presente. P’esei, el a aseptá e invitashon meskos ku el a aseptá anteriormente pa kome huntu ku kobradó di belasting i hende pekadó.

Pero Hesus no a risibí e trato kordial ku normalmente huéspetnan tabata haña. E tempu ei, e hendenan tabata bisti sandalia. Awor, komo ku e kamindanan di Palestina tabata yen di stòf, nan pianan tabata bira kayente i sushi. Normalmente, pa demostrá hospitalidat, hende den e tempu ei tabatin e kustumber di laba pia di un huéspet ku awa. Pero nan no a laba Hesus su pianan. Ademas, e no a haña e sunchi di bonbiní ku normalmente un bishitante lo a haña. Un otro kustumber pa demostrá kariño i hospitalidat tabata esun di basha zeta riba kabes di un huéspet. Esei tampoko nan no a hasi ku Hesus. Nos por bisa ku e tabata realmente bon biní?

Awor, ora e huéspetnan tabata na mesa komiendo, un muhé ku no tabata invitá i ku tabata “konosí den e stat komo pekadó” a drenta e kamber ketu ketu. (Lukas 7:37) Bon mirá, tur hende imperfekto ta pekadó. Pero ta parse ku e señora akí tabata hiba un bida inmoral; kisas, e tabata un prostituta. Podisé el a tende loke Hesus tabata siña e hendenan i di Hesus su invitashon pa tur ku ta kargá bini serka dje pa haña refreskamentu. (Mateo 11:28, 29) Aparentemente, Hesus su palabra- i echonan a konmov’é; p’esei e tabata buska Hesus.

E muhé a bini di patras na e mesa i a kai na rudia na pia di Hesus. Su lágrimanan a muha Hesus su pianan i el a seka nan ku su kabei. Ku ternura el a sunchi Hesus su pianan i a basha e zeta perfumá ku el a bini kuné riba nan. Simon no a gusta loke e tabata mirando i a bisa den su mes: “Si e hòmber akí ta un profeta, lo e tabata sa ta ken i ki sorto di muhé ta mishi kuné, ku ta un pekadó e ta.”—Lukas 7:39.

Pero Hesus tabata sa kiko Simon tabata pensa. El a bisa: “Simon, mi tin un kos di bisa bo.” Simon a kontest’é: “Papia numa, Maestro!” Hesus a bis’é: “Dos hòmber tabata debe un fiadó di plaka; un tabata debe 500 denario, pero e otro 50. Komo ku nan no tabatin moda di pag’é bèk, el a pordoná tur dos nan debe libremente. P’esei, kua di nan dos lo stim’é mas?” Kisas ku un aktitut indiferente, Simon a kontest’é: “Mi ta suponé ku ta esun ku tabatin e debe mas grandi.”—Lukas 7:40-43.

Hesus tabata di akuerdo kuné. Anto el a wak den direkshon di e muhé i a bisa Simon: “Bo ta mira e muhé akí? Mi a drenta bo kas; abo no a duna mi awa pa laba mi pianan. Ma e muhé akí a muha mi pianan ku su lágrimanan i seka nan ku su kabei. Abo no a kumindá mi ku un sunchi; ma for di ora ku mi a drenta, e muhé akí no a stòp di sunchi mi pianan tiernamente. Abo no a hunta mi kabes ku zeta, ma e muhé akí a hunta mi pianan ku zeta perfumá.” Hesus a mira ku e muhé tabatin duele ku anteriormente e tabata hiba un bida inmoral. P’esei, na final Hesus a bisa: “Mi ta bisa bo, maske su pikánan ta hopi, nan ta ser pordoná, pasobra el a mustra hopi amor. Ma esun ku ta ser pordoná pa tiki piká ta mustra tiki amor.”—Lukas 7:44-47.

Hesus no tabata hustifikando inmoralidat. Mas bien, el a demostrá kompashon i komprondementu pa hende ku a kometé piká serio pero ku a mustra ku nan a arepentí i a akudí na dje pa haña alivio. E señora lo a sintié masha aliviá ora Hesus a bis’é: “Bo pikánan ta pordoná. . . . Bo fe a salba bo; bai na pas.”—Lukas 7:48, 50.