Sigui “Karga Hopi Fruta”

“Karga hopi fruta i asina . . . demostrá di ta mi disipelnan.”—HUAN 15:8.

 1. (a) Ki rekisito pa por ta su disipel Hesus a menshoná na su apòstelnan? (b) Kiko nos mester puntra nos mes?

TABATA e anochi promé ku Hesus su morto. El a tuma basta tempu pa animá su apòstelnan den un kòmbersashon íntimo i franko. Lo mester tabata despues di meianochi, pero motivá dor di amor pa su amigunan íntimo, Hesus a sigui papia. Anto meimei di su kòmbersashon el a rekordá nan di un rekisito mas ku nan mester kumpli kuné pa por keda su disipel. El a bisa: “Den esaki mi Tata ta wòrdu glorifiká, ku boso ta karga hopi fruta i asina ta demostrá di ta mi disipelnan.” (Huan 15:8) Nos awe ta kumpli ku e rekisito aki pa por ta su disipel? Kiko kier men “karga hopi fruta”? Pa nos haña sa, laga nos bolbe konsiderá e kòmbersashon di e anochi ei.

 2. Ki komparashon tokante fruta Hesus a konta e anochi promé ku su morto?

² E konseho pa karga fruta ta parti di un komparashon ku Hesus a konta su apòstelnan. El a bisa: “Ami ta e berdadero mata di wendrùif, i mi Tata ta e kunukero. Tur rama den mi ku no ta karga fruta, e ta kita, i tur rama ku ta karga fruta, e ta snui, pa esaki duna mas fruta. Boso ta limpi kaba pa motibu di e palabra ku mi a papia ku boso. Keda den mi, i ami den boso. Meskos ku e rama no por karga fruta di su mes, si e no keda den e mata di wendrùif, asina boso tampoko, si boso no keda den mi. Ami ta e mata di wendrùif, boso ta e ramanan. . . . Den esaki mi Tata ta wòrdu glorifiká, ku boso ta karga hopi fruta i asina ta demostrá di ta mi disipelnan. Meskos ku e Tata a stima mi, ami tambe a stima boso; keda den mi amor. Si boso warda mi mandamentunan, boso lo keda den mi amor.”—Huan 15:1-10.

 3. Kiko e siguidónan di Hesus tin ku hasi pa nan por duna fruta?

³ Den e komparashon aki Yehova ta e Kunukero, Hesus ta e mata di wendrùif i e apòstelnan ku Hesus tabata papia kuné ta e ramanan. Tanten ku e apòstelnan a hasi esfuerso pa “keda den” union ku Hesus, nan lo a karga fruta. Anto Hesus a splika kon e apòstelnan por a logra mantené e union importante aki: “Si boso warda mi mandamentunan, boso lo keda den mi amor.” Mas despues apòstel Huan a skirbi kasi e mesun palabranan na otro kompañeronan kristian: “Esun ku warda [Kristu] su mandamentunan ta permanesé den dje.”a (1 Huan 2:24; 3:24) Pues anto, dor di kumpli ku Kristu su mandamentunan su siguidónan ta keda den union kuné, i e union ei ta hasi posibel ku nan por karga òf duna fruta. Ta ki tipo di fruta nos tin ku produsí?

Oportunidat pa Krese

 4. Kiko nos por siña for di e echo ku Yehova ta “kita” tur rama ku no ta karga fruta?

⁴ Den e komparashon di e mata di wendrùif, Yehova ta “kita” òf kap e rama ku no ta karga fruta. Kiko esaki ta bisa nos? No solamente e ta bisa nos ku tur disipel mester karga fruta sino tambe ku tur por hasié, sin importá kiko ta nan sirkunstansia òf limitashon. Si no tabata asina, Yehova lo no ta demostrando amor ora e “kita” òf deskualifiká un disipel di Kristu debí ku e no a kumpli ku algu ku tabata fuera di su alkanse.—Salmo 103:14; Kolosensenan 3:23; 1 Huan 5:3.

 5. (a) Kon e komparashon di Hesus ta indiká ku nos por produsí mas fruta? (b) Kua dos tipo di fruta nos lo analisá?

⁵ Tambe Hesus su komparashon di e mata di wendrùif ta mustra ku te kaminda ku nos sirkunstansia ta permití, nos tin ku buska chèns pa hasi progreso den nos aktividatnan komo disipel. Ripará kon Hesus a ekspresá esei: “Tur rama den mi ku no ta karga fruta, e ta kita, i tur rama ku ta karga fruta, e ta snui, pa esaki duna mas fruta.” (Huan 15:2) Na fin di e komparashon Hesus a urgi su siguidónan pa karga “hopi fruta.” (Versíkulo 8) Kiko esaki ta bisa nos? Komo disipel, nunka nos no mester bira indiferente ni satisfecho ku nos mes. (Revelashon 3:14, 15, 19) Mas bien nos mester buska maneranan pa produsí mas fruta. Ki tipo di fruta nos ta purba produsí mas abundantemente? Tin dos tipo: (1) “fruta di e spiritu” i (2) fruta di Reino.—Galationan 5:22, 23; Mateo 24:14.

E Fruta di Kualidatnan Kristian

 6. Kon Hesukristu a enfatisá e balor di e promé fruta di spiritu ku ta ser menshoná?

⁶ E promé “fruta di e spiritu” ku ta ser menshoná ta amor. Dios su spiritu santu ta produsí amor den kristiannan, pasobra nan ta obedesé e mandamentu ku Hesus a duna djis promé ku el a konta e komparashon di e mata di wendrùif ku ta pari fruta. El a bisa su apòstelnan: “Un mandamentu nobo mi ta duna boso, pa boso stima otro.” (Huan 13:34) De echo, durante henter su kòmbersashon e último anochi ei di su bida komo hende, Hesus bes tras bes a rekordá su apòstelnan ku nan mester mustra amor.—Huan 14:15, 21, 23, 24; 15:12, 13, 17.

 7. Kon apòstel Pedro a mustra ku karga fruta tin di haber ku desplegá kualidatnan manera esnan di Kristu?

⁷ Pedro, kende tabata presente e anochi ei, a komprondé ku berdadero disipelnan di Kristu mester desplegá e amor i otro kualidatnan ku Kristu a desplegá. Añanan despues Pedro a enkurashá kristiannan pa kultivá kualidatnan manera dominio propio, kariño fraternal i amor. Anto el a bisa aserka ku dor di hasi esei nos ta evitá di ‘keda inútil i sin fruta.’ (2 Pedro 1:5-8) Sea kual sea nos sirkunstansia, nos tur por desplegá e fruta di spiritu. P’esei laga nos hasi esfuerso pa mustra amor, bondat, suavedat i otro kualidatnan similar na esnan di Kristu na un grado mas amplio, pasobra “kontra kosnan asina no tin lei,” es desir no tin límite. (Galationan 5:23) Sí, laga nos karga “mas fruta.”

Karga Fruta di Reino

 8. (a) Ki konekshon tin entre fruta di e spiritu i fruta di Reino? (b) Ki pregunta ta bon pa nos konsiderá?

⁸ Fruta kolorido i sukulento ta hasi un mata mas bunita. Sin embargo, e balor di e frutanan ei ta bai mas leu ku djis hasi e mata bunita. Fruta ta importante tambe pa yuda e mata plama via e simianan. Di igual manera, e fruta di e spiritu ta hasi hopi mas ku djis embeyesé nos personalidat kristian. Kualidatnan manera amor i fe ta motivá nos tambe pa plama e mensahe di Reino ku ta manera simia ku nos ta haña den e Palabra di Dios. Ripará kon apòstel Pablo a enfatisá e konekshon importante aki. El a bisa: “Nos tambe ta ehersé fe [un parti di e fruta di spiritu] i p’esei nos ta papia.” (2 Korintionan 4:13, NW) Manera Pablo a sigui splika, ta dor di papia nos ta ‘ofresé un sakrifisio di alabansa na Dios, esta, e fruta di lepnan,’ ku ta e di dos tipo di fruta ku nos tin ku desplegá. (Hebreonan 13:15) Bo tin oportunidat den bo bida pa bira mas produktivo, sí pa karga “hopi fruta,” komo proklamadó di e Reino di Dios?

 9. Karga fruta ta nifiká meskos ku hasi disipel? Splika.

⁹ Pa kontestá e pregunta ei bon, nos tin ku komprondé promé di kiko fruta di Reino ta konsistí. Lo ta korekto pa konkluí ku karga fruta ta nifiká hasi disipel? (Mateo 28:19) E fruta ku nos ta karga lo ta referí prinsipalmente na e personanan ku nos ta yuda pa bira adoradónan batisá di Yehova? Nò. Si esei tabata e kaso anto e situashon lo ta un gran desanimashon pa tur e Testigunan stimá ku tin hopi aña ta proklamá e mensahe di Reino fielmente den teritorionan kaminda tin ménos reakshon positivo. Figurá bo, si e fruta di Reino ku nos ta karga ta representá solamente disipel nobo, e Testigunan ei ku ta traha duru lo ta manera e ramanan bashí den Hesus su komparashon! Klaru ku esei no ta e kaso. Kiko anto ta e prinsipal fruta di Reino di nos sirbishi?

Produktivo dor di Plama e Simia di Reino

10. Kon Hesus su komparashon di e sembradó i diferente tipo di tera ta mustra kiko e fruta di Reino ta i kiko e no ta?

¹⁰ Hesus su komparashon di e sembradó i e diferente tiponan di tera ta indiká kiko ta e kontesta, un kontesta alentador pa esnan ku ta prediká den teritorionan ménos produktivo. Hesus a bisa ku e simia ta e mensahe di Reino ku ta ser hañá den e Palabra di Dios i ku e tera ta representá hende su kurason simbóliko. Algun simia “a kai den bon tera, i a krese, i a produsí un kosecha.” (Lukas 8:8) Ki klase di kosecha? Wèl despues ku un palu di trigu krese i madurá, e ta produsí simia nobo komo fruta, i no yu di palu di trigu. Asina tambe un kristian ta produsí simia di Reino komo fruta i no nesesariamente disipelnan nobo.

11. Kon nos por deskribí e fruta di Reino?

¹¹ P’esei e fruta den e kaso aki no ta disipel nobo ni bon kualidat kristian. Komo ku e simia ku ta ser sembrá ta e palabra di e Reino, e fruta mester ta referí na un oumento di e simia ei. Karga fruta den e kaso aki ta referí na papia tokante e Reino. (Mateo 24:14) Ta posibel pa nos produsí e fruta ei di Reino—es desir proklamá e bon nobo di Reino—sea kual sea nos sirkunstansia? Sí, por! Den e mesun komparashon Hesus ta splika dikon.

Duna Lo Mihó pa e Gloria di Dios

12. Ta posibel pa tur kristian produsí fruta di Reino? Splika.

¹² Hesus a bisa: “Ma esun ku simia a wòrdu sembrá riba dje den bon tera . . . ta produsí, algun shen bes, otro sesenta i otro trinta bes mas tantu.” (Mateo 13:23) Grano sembrá den un kunuku ta produsí segun sirkunstansia. Asina tambe loke nos por hasi den proklamá e bon nobo ta varia segun nos sirkunstansia, i Hesus a mustra ku e ta konsiente di esei. Algun kristian tin mas oportunidat; otronan kisas tin mihó salú i mas energia. Pues loke ta na nos alkanse por ta mas òf por ta ménos ku loke otronan ta hasi, pero tanten ku esei ta lo mihó ku nos por, Yehova ta keda kontentu. (Galationan 6:4) Asta si behes òf malesa ta limitá nos partisipashon den e predikashon, nos Tata miserikordioso, Yehova, sin duda ta konsiderá nos komo un di esnan ku ta sigui “karga hopi fruta.” Dikon? Pasobra nos ta dun’é ‘tur loke ku nos tin,’ un sirbishi ku ta di henter nos alma.b—Marko 12:43, 44; Lukas 10:27.

13. (a) Kua ta e motibu prinsipal pa nos sigui karga fruta? (b) Kiko lo yuda nos sigui karga fruta den teritorionan kaminda tin ménos reakshon positivo? (Wak e kuadro na página 21.)

¹³ Ora nos ta tene na mente pakiko nos ta hasi esei, nos lo ser motivá pa sigui “bai i duna fruta” te n’e grado ku nos sirkunstansianan ta permití. (Huan 15:16) Hesus a menshoná e motibu prinsipal: “Den esaki mi Tata ta wòrdu glorifiká, ku boso ta karga hopi fruta.” (Huan 15:8) Sí, nos aktividat di prediká ta santifiká e nòmber di Yehova dilanti di henter humanidat. (Salmo 109:30) Un fiel Testigu di 70 i piku aña ku yama Honor a bisa: “Asta den teritorionan kaminda tin ménos reakshon positivo, ta un privilegio pa representá e Haltísimo.” Ora a puntra Claudio, ku for di 1974 ta un Testigu seloso, pakiko e ta sigui prediká maske masha poko hende ta reakshoná positivo den su teritorio, el a sita Huan 4:34, kaminda nos ta lesa e siguiente palabranan di Hesus: “Mi kuminda ta pa hasi e boluntat di esun ku a manda mi, i pa kumpli ku su trabou.” Claudio a agregá: “Meskos ku Hesus, mi kier kaba ku e trabou di proklamá e Reino ku mi a kuminsá kuné.” (Huan 17:4) Testigunan di Yehova rònt mundu ta opiná meskos.—Wak e kuadro na página 21, “Kon pa ‘Duna Fruta ku Perseveransia.’”

Prediká i Siña Hende

14. (a) Kua dos propósito e trabou di Huan Boutista i di Hesus tabatin? (b) Kon lo bo deskribí e aktividat kristian djawe?

¹⁴ E promé proklamadó di Reino ku e Evangelionan ta menshoná ta Huan Boutista. (Mateo 3:1, 2; Lukas 3:18) Su propósito prinsipal tabata pa “duna testimonio” i el a hasi esei ku fe profundo i ku e speransa ku tur tipo di hende lo kere. (Huan 1:6, 7) I en bèrdat algun hende ku Huan a prediká na dje a bira disipel di Kristu. (Huan 1:35-37) Pues, Huan tabata un predikadó i tambe un hasidó di disipel. Hesus tambe a prediká i siña otro hende. (Mateo 4:23; 11:1) P’esei no ta nada straño ku el a manda su siguidónan pa prediká e mensahe di Reino i tambe yuda e personanan ku aseptá e mensahe pa bira su disipel. (Mateo 28:19, 20) Di manera ku nos trabou awe ta un kombinashon di prediká i siña hende.

15. Den ki manera e reakshon riba e trabou di prediká ku a ser efektuá den promé siglo ta kasi meskos ku esun efektuá den nos tempu?

¹⁵ Di e personanan den promé siglo ku a tende Pablo prediká i siña otronan, “algun tabata wòrdu konvensí dor di loke a wòrdu bisá, ma otronan no kier a kere.” (Echonan 28:24) Awe e reakshon ta kasi meskos. Lamentablemente, gran parti di e simianan di Reino ta kai den mal tera. Pero ku tur esei, algun simia ta kai den bon tera, ta saka rais i krese manera Hesus a profetisá. De echo, mundialmente un promedio di mas ku 5.000 persona pa siman ta bira berdadero disipel di Kristu tur aña! E disipelnan nobo aki ta ‘konvensí di loke a wòrdu bisá,’ ounke mayoria hende sí no. Kiko a yuda habri nan kurason pa e mensahe di Reino? Hopi biaha ta e interes ku e Testigunan ta mustra den nan ta hasi e diferensia; ta komo si fuera nan ta muha e simianan resien plantá. (1 Korintionan 3:6) Konsiderá dos ehèmpel so di e tantísimonan ku tin.

Interes Personal Ta Hasi un Diferensia

16, 17. Dikon ta importante pa nos mustra interes personal den e personanan ku nos ta topa den sirbishi?

¹⁶ Karolien, un Testigu hóben na Bèlgika, a bishitá un señora di edat ku no a mustra interes den e mensahe di Reino. Komo ku e señora su man tabata den verbant, Karolien i su kompañera a ofresé pa yuda ku algu, pero e señora a nenga. Dos dia despues e mesun dos Testigunan ei a bai bèk na kas di e señora i a puntr’é kon a sigui kuné. Karolien a bisa: “Esaki a hasi e diferensia. El a keda asombrá ku di bèrdat nos tabata interesá den su persona. El a invitá nos drenta paden, i nos a kuminsá un studio di Beibel kuné.”

¹⁷ Sandi, un Testigu ku ta biba na Merka, tambe ta mustra interes personal den esnan ku e ta prediká na dje. E ta buska anunsionan di nasementu den un korant lokal i despues ta pasa ku e publikashon Mi buki di relato bíblicoc serka e mayornan ku a kaba di haña yu. Komo ku por lo general ta e mama ta na kas i e ta orguyoso pa mustra su beibi, hopi bes Sandi ta haña chèns di kòmbersá. E ta splika: “Mi ta papia ku e mayornan tokante e importansia di krea un banchi ku e yu resien nasí dor di lesa p’e. Despues mi ta papia di e tarea difísil pa lanta yu den e mundu djawe.” Poko tempu pasá, debí na un di e bishitanan ei, un mama i seis yu a kuminsá sirbi Yehova. Si nos tuma inisiativa i mustra interes personal, nos tambe lo por tin resultadonan gososo asina den nos sirbishi.

18. (a) Dikon e rekisito pa “karga hopi fruta” ta na nos tur su alkanse? (b) Kua tres rekisito pa por ta disipel, menshoná den e Evangelio di Huan, bo ta desididu pa kumpli kuné?

¹⁸ Ta ki un gran animashon pa sa ku e rekisito di “karga hopi fruta” ta na nos alkanse! Sea ku nos ta hóben òf bieu, sea ku nos tin bon salú òf nò, sea ku nos ta prediká den teritorionan kaminda tin hopi reakshon positivo òf nò, nos tur por karga hopi fruta. Kon? Dor di desplegá e fruta di spiritu na un mayor grado i dor di plama e mensahe di e Reino di Dios lo mihó ku nos por. Na mesun tempu, nos ta hasi esfuerso pa ‘keda den e palabra di Hesus’ i pa nos mustra “amor un pa otro.” Sí, dor di kumpli ku e tres rekisitonan importante aki pa por ta disipel (menshoná den e Evangelio di Huan), nos ta duna prueba ku nos “ta berdaderamente disipelnan” di Kristu.—Huan 8:31; 13:35.

[Nota]

Pregunta di Repaso

• Ki tipo di fruta nos tin ku produsí mas abundantemente?

• Dikon e meta di “karga hopi fruta” ta na nos alkanse?

• Kua tres rekisito importante pa por ta disipel di Hesus, menshoná den e Evangelio di Huan, nos a konsiderá?

[Kuadro/Plachi na página 21]

KON PA “DUNA FRUTA KU PERSEVERANSIA”

KIKO ta yuda bo sigui prediká e mensahe di Reino fielmente den teritorionan kaminda tin ménos reakshon positivo? At’akí algun kontesta práktiko riba e pregunta ei.

“E echo ku nos sa ku nos tin e pleno apoyo di Hesus ta motivá nos pa keda optimista i perseverá, sea kual sea e reakshon den teritorio.”—Harry di 72 aña; batisá na 1946.

“E teksto di 2 Korintionan 2:17 (NW) semper ta animá mi. E ta bisa ku nos ta partisipá den sirbishi ‘den bista di Dios, den kompania ku Kristu.’ Ora mi ta den sirbishi, mi ta gosa di e kompania di mi mihó amigunan.”—Claudio di 43 aña; batisá na 1974.

“Frankamente bisá, e trabou di prediká ta un lucha pa mi. Sin embargo, e palabranan di Salmo 18:29 a kumpli den mi kaso, kaminda e ta bisa: ‘Ku mi Dios mi por bula over di un muraya.’”—Gerard di 79 aña; batisá na 1955.

“Si mi por lesa maske ta ún teksto den sirbishi, esei ta duna mi e satisfakshon ku a lo ménos un persona su kurason a ser saminá dor di Beibel.”—Eleanor di 26 aña; batisá na 1989.

“Mi ta sigui purba diferente introdukshon. Tin asina hopi ku lo mi no por kaba di usa nan tur den e añanan di bida ku a keda mi.”—Paul di 79 aña; batisá na 1940.

“Mi no ta laga e reakshonnan negativo ofendé mi. Mi ta purba pa mi manera di presentá ta amigabel dor di kòmbersá ku hende i skucha nan punto di bista.”—Daniel di 75 aña; batisá na 1946.

“Mi a yega di topa hende resien batisá ku a bisa mi ku mi trabou di prediká a hunga un ròl den e echo ku nan a bira Testigu. Sin ku mi tabata sa, un otro hende despues a studia Beibel ku nan i a yuda nan hasi progreso. Ta un goso pa mi ku nos sirbishi ta trabou di un tim.”—Joan di 66 aña; batisá na 1954.

Kiko ta yuda abo “duna fruta ku perseveransia”?—Lukas 8:15.

[Plachi na página 20]

Dor di desplegá e fruta di spiritu i dor di proklamá e mensahe di Reino, nos ta karga hopi fruta

[Plachi na página 23]

Kiko Hesus tabata kier men ora el a bisa su apòstelnan: “Karga hopi fruta”?