E Palabra di Yehova Ta Bibu
Puntonan Sobresaliente di e Buki di Lukas
TUR kos ta indiká ku Mateo a skirbi su Evangelio prinsipalmente pa e lektor hudiu, i ku e Evangelio di Marko tabata pa esnan no-hudiu. Sin embargo, e Evangelio di Lukas tabata pa hende di tur nashon. E buki di Lukas, skirbí entre aña 56 pa 58 di promé siglo, ta un relato ekstenso di e bida i ministerio di Hesus.
Lukas, for di e punto di bista di un dòkter komprensivo i ku tin atenshon pa detaye, a investigá “tur kos kuidadosamente for di prinsipio” i ta abarká un periodo di 35 aña, for di aña 3 promé ku nos era te ku 33 di nos era. (Luk. 1:3) Kasi 60 porshento di e informashon den e Evangelio di Lukas no ta den e otro Evangelionan.
PROMÉ PARTI DI HESUS SU MINISTERIO
Despues di duna e detayenan tokante e nasementu di Juan Boutista i di Hesus, Lukas ta konta nos ku Juan a kuminsá ku su ministerio den e di 15 aña di e reinado di Tiberio Cesar, esta, na komienso di aña 29 di promé siglo. (Luk. 3:1, 2) Juan a batisá Hesus den e último parti di e aña ei. (Luk. 3:21, 22) Pa aña 30, ‘Hesus a bolbe na Galilea i a kuminsá siña e hendenan den nan snoanan.’—Luk. 4:14, 15.
Hesus a kuminsá ku su promé gira di predikashon na Galilea. El a bisa e multitut: “Mi mester prediká e reino di Dios na e otro statnan tambe.” (Luk. 4:43) El a hiba Simon e piskadó i otronan huntu kuné. El a bisa nan: “For di awor padilanti [boso lo] ta piskadó di hende.” (Luk. 5:1-11; Mat. 4:18, 19) E 12 apòstelnan a kompañá Hesus durante su di dos gira di predikashon na Galilea. (Luk. 8:1) Durante e di tres gira, el a manda e 12 apòstelnan “bai proklamá e reino di Dios, i kura hende malu.”—Luk. 9:1, 2.
Kontesta Riba Pregunta Bíbliko:
1:35—E eisèl, òf óvulo, di Maria a hunga un papel den su embaraso? Pa e yu di Maria por tabata un berdadero desendiente di su antepasadonan Abraham, Huda i David, manera Dios a primintí, lo mester a usa su eisèl pa e sali na estado. (Gén. 22:15, 18; 49:10; 2 Sam. 7:8, 16) Sin embargo, Yehova a usa su spiritu santu pa transferí e bida perfekto di su Yu i kousa su konsepshon. (Mat. 1:18) Ta parse ku esaki a neutralisá kualke imperfekshon ku tabatin den e eisèl di Maria i asina for di prinsipio a protehá e èmbrio ku tabata desaroyá kontra tur loke por tabata perhudisial.
1:62—Ta muda i surdu Zakarias a bira? Nò. Ta su abla so el a pèrdè. E hendenan a puntra Zakarias “ku seña” kon e kier a yama su yu, pero no pasobra e tabata surdu. Muy probablemente el a tende kiko su kasá a bisa ku mester yama nan yu. Podisé ta otro hende a puntra Zakarias esaki dor di hasi seña. E echo ku ta su abla so e mester a haña bèk ta indiká ku Zakarias su oido no a ser afektá.—Luk. 1:13, 18-20, 60-64.
2:1, 2—Kon e referensia na ‘e senso ku a tuma lugá pa promé biaha’ ta yuda nos determiná na ki tempu Hesus a nase? Bou di mando di Cesar Ougusto, mas ku ún senso a tuma lugá; e promé tabata na aña 2 promé ku nos era komo kumplimentu di Daniel 11:20 i e di dos na aña 6 òf 7 di promé siglo. (Echo. 5:37) Sirenio tabata gobernadó di Siria durante ámbos senso; evidentemente el a okupá e posishon ei dos biaha. E echo ku Lukas ta referí na e promé senso ta nifiká ku e fecha di Hesus su nasementu tabata na aña 2 promé ku nos era.
2:35—Den ki sentido “un spada” lo a traspasá Maria su alma? Esaki ta referí na e angustia ku Maria a pasa aden ora el a mira mayor parti di e pueblo rechasá Hesus komo e Mesias i e tristesa ku el a sinti pa Hesus su morto doloroso.—Juan 19:25.
9:27, 28—Dikon Lukas ta bisa ku e transfigurashon a tuma lugá “ocho dia” despues ku Hesus a primintí su disipelnan ku algun di nan “lo no eksperensiá morto” promé ku nan mir’é bin den su Reino, miéntras ku tantu Mateo komo Marko ta deklará ku esei a sosodé “seis dia despues”? (Mat. 17:1; Mar. 9:2) Lukas aparentemente a inkluí dos dia mas: e dia ku Hesus a hasi e promesa i e dia di e transfigurashon.
9:49, 50—Dikon Hesus no a taha un hòmber di saka demoño, apesar ku e hòmber no tabata siguié? Hesus no a taha e hòmber pasobra e kongregashon kristian no tabata formá ainda. Pues, e hòmber no tabatin nodi kompañá Hesus físikamente pa asina ehersé fe den su nòmber i saka demoño.—Mar. 9:38-40.
Lès pa Nos:
1:32, 33; 2:19, 51. Maria a warda e suseso- i palabranan ku a kumpli ku profesia den su kurason. Nos tambe ta warda loke Hesus a profetisá tokante “e fin” di e sistema aki den nos kurason, i ta kompará loke el a bisa ku loke ta pasando awe?—Mat. 24:3.
2:37. E ehèmpel di Ana ta siña nos ku nos mester adorá Yehova na un manera konstante, ‘hasiendo orashon tur ora bai,’ i no neglishá di ‘asistí na nos reunionnan’ kristian.—Luk 18:1; Heb. 10:24, 25.
2:41-50. Hosé a pone interesnan spiritual na promé lugá den su bida i a perkurá pa e bienestar físiko i spiritual di su famia. Den e aspektonan aki el a pone un ekselente ehèmpel pa kabesnan di kas.
4:4. Nos no mester laga ni ún dia pasa sin konsiderá asuntunan spiritual.
6:40. Un maestro di e Palabra di Dios mester pone un bon ehèmpel pa su studiantenan. E mester praktiká loke e ta prediká.
8:15. Pa “retené [e palabra] i duna fruta ku perseveransia,” nos mester komprondé, apresiá i apsorbá e Palabra di Dios. Nos mester meditá huntu ku orashon ora nos ta lesa Beibel i publikashonnan basá riba Beibel.
ÚLTIMO PARTI DI HESUS SU MINISTERIO
Hesus a manda 70 otro disipel bai su dilanti den e statnan i lugánan di Hudea. (Luk. 10:1) El a pasa “dor di e statnan i pueblitonan ta siña hende.”—Luk. 13:22.
Sinku dia promé ku e Pasku Hudiu di aña 33, Hesus a drenta Yerusalèm sintá riba un yu di buriku. A yega e tempu pa e palabranan ku el a bisa su disipelnan kumpli: “E Yu di hende mester sufri hopi kos i wòrdu rechasá pa e ansianonan i saserdotenan prinsipal i eskribanan, i wòrdu matá, i wòrdu lantá riba e di tres dia.”—Luk. 9:22, 44.
Kontesta Riba Pregunta Bíbliko:
10:18—Na kiko Hesus tabata referí ora el a bisa e 70 disipelnan: “Mi a mira Satanas kai for di shelu manera lamper” òf werlek? Hesus no tabata ke men ku Satanas a ser saká kaba for di shelu. Ta te poko despues ku Kristu a keda instalá komo Rei selestial na aña 1914 esei a tuma lugá. (Rev. 12:1-10) Ounke nos no por bisa esaki ku tur siguransa, evidentemente ora ku Hesus a referí na e futuro suseso aki komo si fuera el a tuma lugá kaba, e kier a enfatisá ku esei lo sosodé sigur.
14:26—Den ki sentido siguidónan di Kristu mester “odia” nan famia? Den Beibel, “odia” por referí na stima un persona òf un opheto ménos ku un otro. (Gén. 29:30, 31) Kristiannan mester “odia” nan famia den sentido di stima nan ménos ku nan ta stima Hesus.—Mat. 10:37.
17:34-37—Ken ta “e águilanan,” i kiko ta “e kadaver” kaminda nan ta reuní? Hende ku lo ser “tumá,” òf salbá, ta ser kompará ku águila ku tin un bista skèrpi. “E kadaver” kaminda nan ta reuní ta e Kristu berdadero durante su presensia invisibel i tambe e kuminda spiritual ku Yehova ta perkurá pa nan.—Mat. 24:28.
22:44—Dikon Hesus tabata den asina un ansha di morto? Esaki a sosodé pa vários motibu. Hesus tabata preokupá pa e manera ku su morto komo un kriminal lo a afektá Yehova Dios i Su nòmber. Ademas, Hesus tabata bon konsiente di e echo ku su bida eterno i e futuro di henter e rasa humano a dependé di su fieldat.
23:44—Ta un eklipse solar a kousa e skuridat di tres ora largu? Nò. Eklipse solar ta tuma lugá solamente ora ta luna nobo, no ora luna ta yen, manera ta e kaso na e tempu di Pasku Hudiu. E skuridat kousá riba e dia di Hesus su morto tabata un milager di Dios.
Lès pa Nos:
11:1-4. Ora nos kompará e instrukshonnan aki ku e palabranan un tiki diferente for di e orashon modelo, duná den e Sermon Riba Seru un 18 luna promé, nos ta komprondé bon kla ku nos orashonnan no mester ta djis un ripitishon di sierto palabranan.—Mat. 6:9-13.
11:5, 13. Ounke Yehova ta dispuesto pa kontestá nos orashonnan, nos mester ta persistente ora di hasi orashon.—1 Juan 5:14.
11:27, 28, BPK. Nos ta haña berdadero felisidat dor di hasi e boluntat di Dios fielmente i no di relashonnan familiar òf logronan material.
11:41. E limosnanan, òf regalonan di miserikòrdia, ku nos ta duna mester sali for di un kurason amoroso i di buena gana.
12:47, 48. Un persona ku tin mayor responsabilidat pero ku no ta kumpli kuné ta mas kulpabel ku un hende ku no sa òf no ta komprondé plenamente kiko ta su deber.
14:28, 29. Ta sabí di nos parti pa biba segun nos forsa.
22:36-38. Hesus no a pidi su disipelnan karga arma pa protekshon òf defensa propio. Mas bien, e spadanan ku nan tabatin e anochi ku Hesus a ser traishoná a dun’é e oportunidat di siña nan un lès sumamente importante: “Tur esnan ku saka spada lo peresé pa medio di spada.”—Mat. 26:52.
[Plachi na página 9]
Hosé a pone un ekselente ehèmpel komo kabes di kas
[Plachi na página 9]
Lukas ta esun ku a skirbi e relato di mas ekstenso di e bida i ministerio di Hesus