E Punto di Bista Bíbliko

Odio Étniko Ta Hustifiká?

KON lo bo sinti si hende ta pensa ku bo ta un persona tramposo, violento, bobo òf inmoral djis pasobra bo ta pertenesé na un sierto grupo étniko?a Ta sigur ku lo bo no gusta esei. Lamentablemente, esaki ta loke miónes di hende ta eksperensiá. Ademas, atraves di historia humano un kantidat inkontabel di hende inosente a yega di bira víktima di abusu i asta a ser matá djis pa motibu di nan rasa òf nashonalidat. Realmente, mayoria konflikto sangriento ku ta tuma lugá awe ta debí na odio étniko. Tòg, hopi hende ku ta apoyá e tipo di violensia ei ta bisa ku nan ta kere den Dios i den Beibel. Tin hende tambe ku ta pretendé ku rasismo ta un parti di naturalesa humano, i p’esei e t’ei pa keda.

Beibel ta kondená odio étniko? Tin sirkunstansia ku ta hustifiká pa bo odia hende ku ta di un otro kultura òf rasa? Tin speransa pa un futuro sin odio étniko? Kiko ta e punto di bista bíbliko?

Nan Echonan A Kondená Nan

Un repaso aribariba di e manera ku Dios a trata ku hende na ántes kisas por pone un persona saka un konklushon robes, esta, ku eigenlijk Dios a apoyá odio étniko. Tin vários relato di Beibel ku ta deskribí Dios komo un persona ku a ehekutá tribu- i nashonnan kompletu, no ta bèrdat? Sí, pero un eksaminashon mas profundo ta indiká ku Dios a kondená e pueblonan aki pa motibu di e manera baho ku nan a ignorá su leinan, i no pa motibu ku nan tabata di un sierto grupo étniko.

Por ehèmpel, Yehova Dios a kondená e kananeonan pa motibu di na ritonan seksual degradá i demoniako. Nan a asta kima nan yunan komo sakrifisio na diosnan falsu! (Deuteronomio 7:5; 18:9-12) Sin embargo, den algun kaso tabatin sierto kananeonan ku a demostrá fe den Dios i a repentí. P’esei, Yehova a spar nan bida i a bendishoná nan. (Josué 9:3, 25-27; Hebreonan 11:31) Un señora di Kánaan ku yama Rahab a asta bira antepasado di Hesukristu, e Mesias primintí.—Mateo 1:5.

E Lei ku Dios a duna e israelitanan ta mustra ku e no ta hasi distinshon di persona. Al kontrario, Dios ta desplegá berdadero interes den e bienestar di tur hende. Na Levítiko 19:33 i 34, nos ta haña e siguiente mandato yen di kompashon ku Dios a duna e israelitanan: “Ora ku un stranhero ta biba serka boso den boso tera, no trat’é malu. E stranhero ku ta biba serka boso mester ta pa boso manera un yu di tera meimei di boso; stim’é manera bo mes, pasobra boso tabata stranhero na tera di Egipto: Ami ta SEÑOR boso Dios.” Den e bukinan bíbliko di Eksodo i Deuteronomio nos ta haña mandamentunan similar. Ta bisto anto ku Yehova no a hustifiká odio étniko. El a insistí pa tin armonia entre gruponan étniko.

Hesus A Promové Toleransia Étniko

Tempu ku Hesus tabata riba tera, hudiu i samaritano tabatin e tendensia di menospresiá otro. Na un okashon e habitantenan di un pueblito samaritano a nenga di risibí Hesus djis pasobra e tabata un hudiu ku tabata bayendo Yerusalèm. Kon abo lo a reakshoná riba e rechaso aki? E disipelnan di Hesus kisas a reflehá e prehuisio ku a eksistí e tempu ei, ora nan a puntr’é: “Señor, bo kier pa nos ordená kandela baha for di shelu i kaba ku nan?” (Lukas 9:51-56) Hesus a laga e prehuisio di su disipelnan influensi’é? Al kontrario, el a skual nan i di un manera pasífiko el a bai buska lugá di keda den un otro pueblo. Djis despues di esei Hesus a konta e parábola di e bon samaritano. Esaki tabata un komparashon poderoso ku a mustra ku un persona su antesedente étniko so no ta hasié un enemigu. De echo, e por resultá asta di ta un bon próhimo!

Gruponan Étniko den e Kongregashon Kristian

Durante su ministerio riba tera, Hesus a enfoká prinsipalmente riba hende ku tabatin mesun nashonalidat kuné pa hasi nan su disipel. Pero el a indiká ku otro hende tambe ku tempu lo a bira su disipel. (Mateo 28:19) Lo e aseptá hende di tur grupo étniko? Sí! Apòstel Pedro a deklará: “Di bèrdat mi ta komprondé awor ku Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echonan 10:34, 35) Despues apòstel Pablo a konfirmá e konsepto aki ora el a bisa bon kla ku un persona su antesedente étniko no ta di ningun importansia den e kongregashon kristian.—Kolosensenan 3:11.

Den e buki bíbliko di Revelashon nos ta haña un otro indikashon ku Dios ta aseptá hende di tur grupo étniko. Den un vishon inspirá dor di Dios, apòstel Juan a mira “un multitut grandi . . . di tur nashon i tur tribu i pueblo i lenga,” ku a risibí salbashon for di Dios. (Revelashon 7:9, 10) E “multitut grandi” aki lo ta e fundeshi di un sosiedat humano nobo den kua hende di tur background lo biba huntu na pas, uní dor di nan amor pa Dios.

Miéntras tantu, kristiannan mester lucha kontra e impulso pa husga otro hende a base di nan background étniko. E proseder hustu i amoroso ta, di mira kada hende komo un persona riba su mes—manera Dios ta mira nan—i no djis komo hende di sierto grupo étniko. No ta asina bo ke pa hende konsiderá bo? Ku rason Hesus a spièrta nos: “P’esei, tur loke boso kier pa hende hasi pa boso, hasi meskos pa nan.” (Mateo 7:12) Ta dushi pa biba sin odio étniko. Hende lo tin mas pas mental i nan lo ta na pas un ku otro. Loke ta mas importante, e ta trese nos den union ku nos Kreadó imparsial, Yehova Dios. Ki un motibu fuerte pa rechasá odio étniko!

[Nota]