Nacementu di Jesus​—E Berdadero Historia

PENSA riba un suceso ampliamente conocí den historia di bo pais. E ta bon documentá, skirbí dor di mas cu un historiadó. Awor, kico si un hende bisá bo cu e suceso aki no a pasa nunca, cu e no tabata nada mas cu un mito? Of, pa haci e asuntu mas personal, kico si un hende pretendé cu hopi di loke bo famia a contá bo tocante nacementu i hubentud di bo welo ta falsu? Den tur dos caso, e idea so caba por indigná bo. Sigur lo bo no aceptá e pretensionnan ei asina-asina!

Tog, críticonan djawe por lo general ta descartá loke Mateo i Lucas a skirbi den e Evangelionan tocante e nacementu di Jesus. Nan ta bisa cu e relatonan aki ta totalmente contradictorio i no ta klop cu otro i cu tur dos ta contené falsedad abierto i eror histórico garafal. Esei por ta berdad? En bes di aceptá acusacionnan asina, laga nos examiná pa nos mes loke e Evangelionan a skirbi. Den transcurso di esaki, laga nos mira kico nan tin di siña nos awe.

E Propósito dje Evangelionan

Pa cuminsá, ta bon pa corda kico ta e propósito dje relatonan bíblico aki. Nan no ta biografia; nan ta Evangelio. E distincion ta importante. Den un biografia, e autor por yena cientos di página pa purba mustra con e persona di ken e ta skirbi a desaroyá bira un figura cu ta asina bon conocí. P’esei, algun biografia ta dedicá gran cantidad di página cu ta duna detaye di mayornan, nacementu i infancia di e persona. Cu e Evangelionan, esei ta diferente. Dje cuater Evangelionan, ta Mateo cu Lucas so ta conta di Jesus su nacementu i infancia. Sin embargo, nan meta no ta pa mustra con Jesus a desaroyá bira e homber cu el a bira. Corda cu Jesus su siguidónan a reconocé cu el a existí como criatura spiritual promé cu el a bini mes na tera. (Juan 8:23, 58) Pues Mateo cu Lucas no a conta di Jesus su infancia pa por a splica ki clase di homber el a bira. Mas bien, nan a relatá incidentenan cu a sirbi e propósito di nan Evangelio.

I cu ki propósito nan a skirbi nan? E palabra “evangelio” ta nificá “bon noticia.” Tur dos escritor tabatin e mésun mensahe, esta, cu Jesus ta e Mesías of Cristo primintí, cu el a muri pa picá di humanidad, i cu el a resucitá bai shelu. No obstante, nan tabatin antecedente notablemente distinto i a skirbi pa auditorio distinto. Mateo, un cobradó di belasting, a forma su relato pa un auditorio principalmente hudiu. Lucas, un dokter, a skirbi e “excelentísimo Teófilo”—kende posiblemente tabatin un posicion haltu—i, via dje, na un auditorio mas grandi di hudiu i gentil. (Lucas 1:1-3) Cada escritor a selectá incidentenan cu tabata mas relevante pa su auditorio specífico i cu tabatin mas chens di convenc’é. Pues, e registro di Mateo ta enfatisá profecianan dje Scritura Hebreo cu a cumpli en coneccion cu Jesus. Lucas, di otro banda, ta sigui e método mas clásico di skirbi historia cu su auditorio no-hudiu por a reconocé.

No ta un sorpresa anto cu nan relato ta diferenciá for di otro. Pero e dos relatonan no ta contradicí otro manera algun crítico ta pretendé. Nan ta complementá otro, cuadrando bunita cu otro pa forma un plachi mas completo.

Jesus Su Nacementu na Betlehem

Tantu Mateo como Lucas ta skirbi di un milager sobresaliente relacioná cu Jesus su nacementu: el a nace di un bírgen. Mateo ta mustra cu e milager aki a cumpli cu un profecia cu Isaías a declará hopi siglo promé. (Isaías 7:14; Mateo 1:22, 23) Lucas ta splica cu Jesus a nace na Betlehem pa motibu cu un inscripcion cu César a manda a obligá José cu Maria biaha bai ei. (Mira cuadro na página 7.) E echo cu Jesus a nace na Betlehem tabata significativo. Siglonan promé, profeta Mikéas a predicí cu e Mesías lo a bini for dje pueblo aparentemente insignificante aki cerca di Jerusalem.—Mikéas 5:2.

E anochi cu Jesus a nace a bira famoso como e base pa esenanan di pesebre. Sin embargo, e historia real ta bastante distinto for di esun cu bo ta mira asina tantu bes. Historiadó Lucas, kende ta conta nos dje censo cu a trece José cu Maria Betlehem, ta conta nos tambe cu e wardadónan a pasa e anochi importante ei pafó den cunucu cu nan tou. E dos circunstancianan aki a pone hopi investigadó di Bijbel concluí cu Jesus no por a nace den december. Nan ta mustra cu lo tabata masha improbabel cu César lo a obligá e hudiunan krepchi pa biaha pa nan stad natal durante e temporada di friu i yobida, loke lo por a haci un pueblo rebelde mas furioso. Eruditonan ta bisa cu ta improbabel tambe cu wardadónan lo a biba pafó den cunucu cu nan tou den mal tempu asina.—Lucas 2:8-14.

Ripará cu Jehova a scoge pa anunciá nacementu di su Yu, no na lidernan religioso educá i influyente dje tempu ei, sino na trahadónan fuerte cu tabata biba pafó den cunucu. Probablemente e escriba i fariseonan tabatin masha poco contacto cu wardadó di carné, kende nan oranan iregular di trabou a stroba nan di warda algun detaye dje ley oral. Pero Dios a faborecé e hombernan fiel i humilde aki cu un onor grandi: un delegacion di angel a informá nan cu e Mesías, kende Dios su pueblo tabata spera pa miles di aña, a caba di nace na Betlehem. Tabata e hombernan aki, i no “tres rey” representá hopi bes den pesebrenan, cu a bishitá Maria cu José i cu a mira e baby inocente drumí den un pesebre.—Lucas 2:15-20.

Jehova Ta Mustra Fabor na Buscadó Humilde dje Berdad

Dios ta mustra fabor na hende humilde cu ta stim’é i cu ta profundamente interesá pa mira su propósitonan cumpli. Esaki ta un tema cu ta bini bek cada bes den e sucesonan cu tin di haber cu nacementu di Jesus. Rond di un luna despues cu e mucha a nace, José cu Maria a present’é n’e tempel, obedeciendo asina e Ley di Moises. Ei nan a haci un ofrenda di “un par di totolica of dos pichon.” (Lucas 2:22-24) Eigenlijk e Ley a exigí un chubat’i carné, pero el a permití e opcion ménos costoso aki den caso di pobresa. (Levítico 12:1-8) Pensa riba esei. Jehova Dios, e Soberano di universo, a scoge, no un famia ricu, sino unu pober como e famia den cua su unigénito Yu stimá lo mester a lanta. Si bo ta un mayor, esaki mester sirbi como un recordatorio bibu cu e mihó regalo cu bo por duna bo yunan—muchu mas mihó cu rikesa material of un educacion prestigioso—ta un ambiente di cas cu ta pone balornan spiritual na promé lugá.

N’e tempel tabatin dos otro adoradó fiel i humilde na ken Jehova a mustra fabor. Un di nan ta Ana, un biuda di 84 aña di edad cu “nunca no tabata falta den e tempel.” (Lucas 2:36, 37) E otro ta un anciano fiel cu yama Simeon. Tur dos ta masha emocioná cu e privilegio cu Dios a otorgá nan, esta, pa promé cu nan muri, mira esun cu lo a bira e Mesías primintí. Simeon ta pronunciá un profecia riba e mucha. E ta un profecia yen di speransa pero cu un tiki lamento. E ta profetisá cu un dia e mama yong aki, Maria, lo sufri un pena profundo pa causa di su yu stimá.—Lucas 2:25-35.

Un Yu den Peliger

E profecia di Simeon ta un recordatorio tristu cu e mucha inocente aki lo bira obheto di odio. Siendo un baby ainda, ya caba e odio aki a sali na cla. Mateo su relato ta duna detaye di esaki. Un cantidad di luna a pasa, i José, Maria i Jesus ta biba awor den un cas na Betlehem. Nan ta ricibí un bishita inesperá di un cantidad di stranhero. Apesar di loke hopi pesebre ta mustra, Mateo no ta bisa specíficamente cuantu dje hombernan aki a bini, ni e no ta yama nan “sabio,” muchu ménos “tres rey.” E ta usa e palabra griego má·goi, cu ta nificá “astrólogo.” Esaki so caba mester duna e lector un clave cu algu malbado ta obrando aki, pasobra astrologia ta un arte cu e Palabra di Dios ta condená i cu hudiu fiel a evitá estrictamente.—Deuteronomio 18:10-12; Isaías 47:13, 14.

E astrólogonan aki a sigui un strea for di oost i ta biniendo cu regalo pa “esun cu a nace como rey dje hudiunan.” (Mateo 2:2) Pero e strea no ta guia nan na Betlehem. E ta dirigí nan na Jerusalem i na Herodes e Grandi. Ningun hende na mundu ta poseé tal recurso i motibu pa haci daño n’e mucha chikitu Jesus. E homber ambicioso i asesino aki a mata vários di su mes miembronan pegá di famia cu el a mira como menasa.a Molestiá pasobra el a tende di nacementu di un futuro “rey dje hudiunan,” e ta despachá e astrólogonan pa haña Esun ei na Betlehem. Segun cu nan ta bai, algu straño ta sosodé. Parce cu e “strea” cu a guia nan pa biaha pa Jerusalem ta move!—Mateo 2:1-9.

Awor, nos no sa si esaki tabata un lus mes den shelu of djis un vision. Pero sí nos sa cu e “strea” aki no a bini di Dios. Cu un precision particularmente malbado, e ta guia e adoradónan pagano aki derechitu na Jesus: un mucha vulnerabel i impotente, protehá solamente dor di un carpinté pober cu su esposa. Probablemente e astrólogonan lo a raportá bek n’e monarca vengativo ya cu nan no tabata sa cu Herodes a engañá nan. Esei sigur lo a hiba na morto dje yu. Pero Dios ta intervení mediante un soño i ta manda nan bek nan pais via un otro ruta. E “strea” anto, mester tabata un invento di Satanas, enemigu di Dios, cu lo a haci tur loke tabata na su alcanse pa haci daño n’e Mesías. Ki un ironia cu e “strea” i astrólogonan ta ser representá den pesebre como representante di Dios!—Mateo 2:9-12.

Ainda Satanas no ta entregá. Su compinchi den e asuntu, Rey Herodes, ta manda mata tur criatura na Betlehem bou di dos aña di edad. Pero Satanas no por gana un bataya contra Jehova. Mateo ta mencioná cu hopi tempu pasá Dios a premirá asta e matansa malicioso aki di mucha inocente. Atrobe Jehova a contestá Satanas su accion, spiertando José mediante un angel pa hui bai Egipto na siguridad. Mateo ta informá cu un poco tempu despues José a bolbe muda su famia chikitu i finalmente a establecé nan mes na Názaret, caminda Jesus a lanta huntu cu su rumannan mas yong.—Mateo 2:13-23; 13:55, 56.

Nacementu di Cristo—Loke E Ta Nificá pa Bo

E resúmen aki dje sucesonan cu tin di haber cu Jesus su nacementu i promé añanan di infancia no ta sorprendé bo un tiki? Hopi hende sí. Nan ta keda sorprendí cu e relatonan ta realmente armonioso i exacto, apesar dje declaracionnan tribí di algun persona di cu esei no ta e caso. Nan ta keda sorprendí ora nan haña sa cu Bijbel a predicí algun suceso cientos di aña delantá. I e echo cu algun elemento clave den e Evangelionan ta diferenciá notablemente for dje representacionnan den historia i pesebrenan tradicional ta sorprendé nan.

Pero, e echo mas sorprendente ta cu un parti hopi grandi di celebracion tradicional di Pascu ta falta e puntonan vital dje Evangelionan. Por ehempel, nan ta duna masha poco atencion na Jesus su Tata, no José, sino Jehova Dios. Imaginá con el a sinti ora el a confia su Yu stimá na José cu Maria pa nan lant’é i percurá p’e. Imaginá e agonia dje Tata celestial ora el a laga su Yu crece den un mundu caminda un rey yen di odio lo a trama su morto asta ora apénas e tabata un mucha! Tabata Jehova su amor profundo pa humanidad cu a impuls’é pa haci e sacrificio aki.—Juan 3:16.

Hopi biaha e berdadero Jesus ta perdí den celebracionnan di Pascu. Figurá bo, ningun caminda ta pará skirbí cu el a sikiera bisa e disipelnan su fecha di nacementu; ni no tin ningun indicacion cu su siguidónan a celebrá su cumpleaño.

Jesus a manda su siguidónan conmemorá, no su nacementu, sino su morto como un suceso significativo cu a marca historia. (Lucas 22:19, 20) No, Jesus no a deseá pa hende record’é como un baby impotente den un pesebre, pasobra awor aki sigur e no ta un baby impotente mas. Mas cu 60 aña despues cu a ehecutá Jesus, el a revelá su mes den vision na apostel Juan como un Rey poderoso bayendo pa bataya. (Revelacion 19:11-16) Ta den e papel ei, como Gobernante di Dios su Reino celestial, nos tin cu siña conocé Jesus awe, pasobra e ta un Rey cu lo cambia mundu.

[Nota]

[Kuadro/Plachinan na página 7]

Was Luke in Error?

Lucas Tabata Ekiboca?

CON Jesus, kende a lanta na Názaret i kende tabata comunmente conocí como e nazareno, por a nace na Betlehem, un 150 kilometer leu? Lucas ta splica: “Awor, den e dianan ei [promé cu Jesus a nace] a sali un decreto for di César Augusto cu tur e tera habitá mester inscribí; (e promé inscripcion aki a tuma lugá ora Quirinio tabata gobernadó di Siria;) i tur hende a bai di biahe pa inscribí, cada un na su mes stad.”—Lucas 1:1; 2:1-3.

Críticonan di tur banda ta atacá e pasashi aki como un eror garafal of, pió ainda, como un mentira. Nan ta insistí cu e censo aki i e gobernacion di Quirinio a tuma lugá na aña 6 of 7 E.C. Si nan tin rason, esaki lo trece duda serio riba Lucas su relato, pasobra evidencia ta indicá cu Jesus a nace na aña 2 P.E.C. Pero e críticonan aki ta pasa por haltu di dos factor clave. Di promé, Lucas ta reconocé cu tabatin mas cu un censo. Ripará cu e ta referí na “e promé inscripcion aki.” E tabata bon na altura di un otro inscripcion, unu mas despues. (Echonan 5:37) E di dos censo aki ta e mésun cu historiadó Josefo a describí, cu a tuma lugá na aña 6 E.C. Di dos, e gobernacion di Quirinio no ta obligá nos asigná Jesus su nacementu n’e fecha mas despues ei. Pakico? Pasobra evidentemente Quirinio a sirbi den e posicion ei dos bes. Hopi erudito ta reconocé cu su promé periodo a incluí aña 2 P.E.C.

Algun crítico ta bisa cu Lucas a inventá e censo pa crea un motibu pa Jesus nace na Betlehem, i cumpli asina cu e profecia di Mikéas 5:2. E teoria aki ta haci Lucas un gañadó deliberá, i ningun crítico por kere cu un pretension asina ta pas cu e historiadó conciencial kende a skirbi e Evangelio i e buki di Echonan.

Algu mas cu ningun crítico no por splica: E censo mes a cumpli cu un profecia! Den siglo seis P.E.C., Daniel a profetisá tocante un gobernante cu lo a “causa pa un exigidó pasa dor dje reino espléndido.” Esaki a aplicá na Augusto i su ordu pa cumpli cu e censo den Israel? Wel, e profecia ta sigui bisa cu lo a “kibra” e Mesías, of “Lider dje pacto,” durante e reinado dje sucesor di e gobernante aki. En berdad nan a “kibra” of ehecutá Jesus durante e reinado di Tiberio, sucesor di Augusto.—Daniel 11:20-22.

[Pictures]

César Augusto (27 P.E.C.–14 E.C.)

Tiberio César (14-37 E.C.)

[Rekonosementu]

Musée de Normandie, Caen, Francia

Potret sacá pa cortesia dje Museo Británico

[Plachi na página 8]

Jehova su angel a faborecé wardadónan humilde cu e bon nobo di Cristo su nacementu