Nan A Haci e Boluntad di Jehova

Maria Ta Scoge “e Bon Porcion”

TEMPU cu Jesus tabata riba tera, tradicion dje rabinan a pone hopi restriccion pa hende muher hudiu. P’esei, tabata desanimá nan pa studia e Ley. Sí, un pasashi den Mishna a declará: “Si un homber duna su yu muher conocimentu dje Ley, ta como si fuera el a siñ’é inmoralidad.”—Sotah 3:4.

Esaki a pone cu hopi hende muher den Hudea dje promé siglo no tabatin masha educacion. Segun The Anchor Bible Dictionary: “No tin ningun evidencia di cu promé cu Jesus su ministerio, a yega di permití muhernan hudiu bira disipel di un gran maestro, i muchu ménos pa nan instruí otro persona cu no ta mucha chikitu.” Pa rebahá hende muher mas ainda, algun lider religioso asta a establecé un regla cu ta bisa cu un homber no mag papia cu hende muher den público!

Jesus a ignorá e actitudnan malbado ei. El a siña tantu homber como muher, i e tabatin disipel homber i muher. (Lucas 8:1-3) Na un ocasion, Marta cu Maria a invitá Jesus na nan cas. (Lucas 10:38) E dos muhernan aki tabata ruman di Lázaro, i nan tur tres tabata disipel i bon amigu di Jesus. (Juan 11:5) Debí n’e gran cantidad di hende cu a bin consolá Marta cu Maria ora Lázaro a muri, nos por saca afó cu kisas nan tabata un famia prominente. En todo caso, loke a sosodé den nan cas ora Jesus a bishitá nan, a percurá un les balioso no solamente pa nan, sino pa nos tambe.

Siña na Pia di Jesus

Sin duda, Marta cu Maria tabata ansioso pa sirbi Jesus un bankete luhoso, i kisas nan tabatin e medionan financiero pa haci esaki tambe. (Compará cu Juan 12:1-3.) Sin embargo, ora nan bishitante a yega, Maria “a cai sinta na pia di Señor i a sigui scucha na su palabra.” (Lucas 10:39) Jesus no a laga ningun tradicion di hende strob’é di siña un muher sincero cu tabata asina ansioso pa siña! Nos por imaginá nos Maria sintá dilanti Jesus, poniendo su mes den posicion di un alumno cu ta scucha i ta keda completamente absorbá den e siñansa di su Señor.—Compará cu Deuteronomio 33:3; Echonan 22:3.

En cambio, Marta “a keda distraí atendiendo hopi tarea.” P’e prepará un cuminda grandi, e tabata hopi druk cu e keasernan cu esaki a exigí. No a dura mashá cu Marta a rabia pasobra e so tabatin cu haci tur e trabou, miéntras cu su ruman muher tabata sintá na pia di Jesus! P’esei Marta a interumpí Jesus su palabranan, kisas asta un poco rabiá, bisando: “Señor, no ta importá bo cu mi ruman a laga mi so pa atendé e cosnan? P’esei, bis’é bin yuda mi.”—Lucas 10:40.

Riba su mes, Marta su peticion no tabatin nada malu cuné. Al fin i al cabo, prepará un cuminda pa un grupo di persona ta hopi trabou, i e carga no mester cai riba un hende so. Sin embargo, loke Marta a bisa, a duna Jesus un oportunidad pa siñ’é un les balioso. “Marta, Marta,” el a bis’é, “bo ta ansioso i molestiá tocante hopi cos. Pero poco cos ta necesario, of un so. Di su parti, Maria a scoge e bon porcion, i esei lo no ser kitá for di dje.”—Lucas 10:41, 42.

Jesus no tabata kier men cu Marta a falta interes den cosnan spiritual. Al contrario, e tabata conoc’é como un muher profundamente deboto na Dios.a Sin duda ta esei mes ta loke a impuls’é pa invitá Jesus na su cas. Sin embargo, cu e reprendementu suave aki, Jesus tabata mustrando cu dor di Marta su atencion ansioso p’e cuminda, e tabata laga un oportunidad único pa ricibí instruccion personal for dje Yu di Dios pas’é forbij.

Claro cu kisas e cultura dje tempu ei a apoyá e punto di bista cu e mihó manera pa un hende muher proba su balor ta dor di su abilidad den cumpli cu su keasernan di cas. Pero, Jesus su palabranan a mustra cu hende muher, mescos cu hende homber por a sinta na pia dje Yu di Dios i ricibí e dichonan di bida! (Juan 4:7-15; Echonan 5:14) En bista di esaki, lo tabata hopi mas mihó si Marta a percurá pa djis un par di plato di cuminda—of asta unu so—si esaki lo a dun’é e oportunidad pa sinta na pia dje Señor i siña for di dje.—Compará cu Mateo 6:25.

Un Les pa Nos

Awe, tin tantu hende muher como homber entre esnan cu ta respondé na Jesus su invitacion pa “tuma e awa di bida grátis.” (Revelacion 22:17) Amor a conmové algun, manera Marta, pa haci tur loke nan por pa satisfacé e necesidad di nan compañeronan creyente. Nan ta personanan cu ta pensa práctico i ta cla pa tuma accion, i Jehova ta primintí di recompensá nan trabou amoroso. (Hebreonan 6:10; 13:16) Kisas tin otronan cu parce Maria mas tantu. Nan ta ketu i ta gusta meditá riba cosnan spiritual. Nan entusiasmo pa meditá riba e Palabra di Dios ta yuda nan keda firmemente ancrá den e fe.—Efesionan 3:17-19.

Tur dos clase di individuo ta yena un necesidad vital den e congregacion cristian. Sin embargo, al final, nos tur mester ‘scoge e bon porcion’ dor di pone e énfasis primario riba cosnan spiritual. Dor di haci sigur dje cosnan mas importante, nos lo tin Jehova su aprobacion i bendicion.—Filipensenan 1:9-11.

[Nota]