Yehova Ta Perkurá pa Nos Nesesidatnan Diario

“No sigui preokupá. Pasobra . . . boso Tata sa ku boso tin mester di e kosnan aki.”—LUKAS 12:29, 30.

 1. Kon Yehova ta perkurá pa e mundu di animal?

BO A yega di wak kon un mòfi òf kualke otro para ta kana koba den loke ta parse simplemente tera? Probablemente bo a puntra bo mes ta kiko lo e por haña pa kome dor di djis kana pik-pik den tera. Den su Sermon Riba Seru, Hesus a mustra ku nos por siña un lès for di e manera ku Yehova ta perkurá pa para. Hesus a deklará: “Mira e paranan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan?” (Mateo 6:26) Den maneranan maravioso Yehova ta perkurá kuminda pa tur su kriaturanan.—Salmo 104:14, 21; 147:9.

2, 3. Ki lèsnan spiritual nos por siña for di e echo ku Hesus a siña nos pidi pa nos pan di kada dia?

² Dikon anto Hesus a inkluí den su orashon modelo e petishon: “Duna nos awe nos pan di kada dia”? (Mateo 6:11) Nos por siña lèsnan spiritual profundo for di e petishon simpel aki. Na promé lugá, e petishon ta rekordá nos ku Yehova ta e berdadero fuente di tur provishon ku nos mester. (Salmo 145:15, 16) Hende por planta i kultivá, pero ta Dios so por laga kos krese, tantu spiritualmente komo físikamente. (1 Korintionan 3:7) Loke nos ta kome i bebe ta un regalo di Dios. (Echonan 14:17) Dor di pidié duna nos loke nos mester pa kada dia nos ta mustra ku nos no ta konsiderá e provishonnan ei komo kosnan ku nos ta haña di mes. Klaru ku e petishon ei no ta libra nos di e responsabilidat di traha si nos ta den posishon di traha.—Efesionan 4:28; 2 Tesalonisensenan 3:10.

³ Na di dos lugá, dor di pidi pa nos “pan di kada dia,” òf literalmente pa nos ‘pan pa e dia aki,’ esei ta indiká ku nos no mester ta demasiado preokupá tokante futuro. Mas aleu Hesus a deklará: “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki. Ma buska promé e reino di Dios i su hustisia, i tur e kosnan aki lo wòrdu añadí na boso. P’esei, no preokupá boso mes pa e dia di mañan . . . Kada dia tin sufisiente problema di su mes.” (Mateo 6:31-34) Nos petishon pa nos “pan di kada dia” ta establesé e patronchi ku nos mester sigui pa nos por hiba un bida simpel di “santidat akompañá pa kontentamentu.”—1 Timoteo 6:6-8.

Alimento Spiritual pa Kada Dia

 4. Ki insidente den bida di Hesus i di e israelitanan ta enfatisá e importansia di tuma alimento spiritual?

⁴ Nos orashon pa nos pan di kada dia mester rekordá nos tambe ku tur dia nos tin mester di alimento spiritual. Ounke Hesus tabatin hopi hamber despues di a yuna pa un periodo largu, el a resistí e tentashon di Satanas pa kambia piedra den pan, i a bisa: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’” (Mateo 4:4) Aki Hesus a sita profeta Moisés, kende a bisa e israelitanan: “[Yehova] a humiá bo i a laga bo pasa hamber, i a alimentá bo ku mana ku bo no tabata konosé, ni bo tatanan no tabata konosé, pa e hasi bo komprondé ku hende no ta biba di pan so, ma ku hende ta biba di tur loke ta sali for di boka di SEÑOR.” (Deuteronomio 8:3) E manera ku Yehova a perkurá e mana no solamente a duna e israelitanan alimento físiko, sino tambe a siña nan lèsnan spiritual. Un di e lèsnan ei tabata ku nan mester a “rekohé e porshon pa un dia.” Si nan a rekohé mas di loke tabata sufisiente pa e dia, e loke a resta a kuminsá hole stinki i kria bichi. (Eksodo 16:4, 20) Sin embargo, esaki no a sosodé riba e di seis dia di siman ora ku nan mester a rekohé dòbel e kantidat pa satisfasé nan nesesidatnan pa sabat. (Eksodo 16:5, 23, 24) Pues anto, e mana a graba den nan mente ku nan mester tabata obedesidu, i ku nan bida a dependé no solamente di pan sino di ‘tur loke ta sali for di boka di Yehova.’

 5. Kon Yehova ta perkurá alimento spiritual diariamente pa nos?

⁵ Nos tambe tin ku alimentá nos mes diariamente ku alimento spiritual ku Yehova ta perkurá mediante su Yu. Ta pa e propósito ei Hesus a nombra un “esklabo fiel i prudente” pa perkurá “kuminda na su debido tempu” pa e famia di fe. (Mateo 24:45) E grupo di esklabo fiel no solamente ta perkurá un abundansia di alimento spiritual den forma di publikashonnan pa studia Beibel sino tambe ta animá nos pa lesa Beibel tur dia. (Josué 1:8; Salmo 1:1-3) Meskos ku Hesus, nos tambe por haña nutrishon spiritual dor di hasi esfuerso tur dia pa siña tokante Yehova i hasi su boluntat.—Juan 4:34.

Pordon di Piká

 6. Pa kua debe nos ta pidi pordon, i bou di ki kondishon Yehova ta dispuesto pa kanselá nan?

⁶ E siguiente petishon den e orashon modelo ta: “Pordoná nos nos debenan, meskos ku nos tambe ta pordoná nos debedónan.” (Mateo 6:12) Aki Hesus no tabata papia di debe di plaka. E tabatin na mente pordon di nos pikánan. Den e Evangelio di Lukas e petishon aki den e orashon modelo ta bisa: “Pordoná nos nos pikánan, pasobra nos tambe ta pordoná tur esnan ku ta debe nos.” (Lukas 11:4) Pues, ora nos peka ta komo si fuera nos ta akumulá un debe serka Yehova. Pero nos Dios amoroso ta dispuesto pa ‘kita’ òf kanselá e debe ei si nos repentí sinseramente, “kombertí,” i pidié pordon a base di fe den e sakrifisio di reskate di Kristu.—Echonan 3:19; 10:43; 1 Timoteo 2:5, 6.

 7. Dikon nos mester resa pidi pordon tur dia?

⁷ Mirá for di un otro punto di bista, nos ta peka ora nos no kumpli ku Yehova su normanan di hustisia. Debí na piká heredá, nos tur ta bisa, hasi i pensa kos malu òf nos ta keda sin hasi loke nos lo mester a hasi. (Eklesiastés 7:20; Romanonan 3:23; Santiago 3:2; 4:17) P’esei, sea ku nos ta konsiente ku nos a peka durante dia òf nò, nos tin ku inkluí den nos orashonnan diario un petishon pa pordon di nos pikánan.—Salmo 19:12; 40:12.

 8. Nos orashon pa pordon di piká mester pone nos hasi kiko, i ki bon resultado esaki lo tin?

⁸ Tambe nos mester hasi orashon pidi pordon despues ku nos hasi un eksaminashon onesto di nos mes, i nos repentí i konfesá a base di fe den e poder di reskate di e sanger di Kristu. (1 Juan 1:7-9) Pa duna prueba ku nos orashon ta sinsero, nos mester apoyá nos petishon pa pordon ku “obranan ku ta kuadra ku repentimentu.” (Echonan 26:20) E ora ei nos por tin fe ku Yehova ta kla pa pordoná nos pikánan. (Salmo 86:5; 103:8-14) Resultado di esaki ta un pas mental sin igual, “e pas di Dios, ku ta surpasá tur komprondementu,” loke na su turno “lo warda [nos] kurason i [nos] mente den Kristu Hesus.” (Filipensenan 4:7) Pero Hesus su orashon modelo ta siña nos mas kos ainda ku nos tin ku hasi pa haña pordon pa nos pikánan.

Pa Nos Ser Pordoná, Nos Tin Ku Pordoná

9, 10. (a) Ki komentario Hesus a agregá na e orashon modelo, i kiko esaki ta enfatisá? (b) Ki ehèmpel adishonal Hesus a duna pa mustra ku nos mester pordoná otro hende?

⁹ Ta interesante pa nota ku e petishon “pordoná nos nos debenan, meskos ku nos tambe ta pordoná nos debedónan,” ta e úniko parti di e orashon modelo ku Hesus a duna un splikashon p’e. Despues ku el a konkluí e orashon, el a agregá: “Pasobra si boso pordoná hende nan transgreshonnan, boso Tata selestial tambe lo pordoná boso. Ma si boso no pordoná hende, boso Tata tampoko lo no pordoná boso transgreshonnan.” (Mateo 6:14, 15) Pues anto, Hesus a mustra bon kla ku Yehova su pordon ta dependé di si nos ta dispuesto pa pordoná otro hende.—Marko 11:25.

¹⁰ Na un otro okashon, Hesus a duna un komparashon ku ta mustra ku ta nesesario pa nos pordoná otro hende si nos ta ferwagt pa Yehova pordoná nos. El a konta di un rei ku generosamente a kanselá un debe enorme ku un esklabo a akumulá. Pero despues e rei a kastigá e mesun hòmber aki severamente pasobra e hòmber a nenga di kanselá un debe hopi mas chikí di un otro esklabo. Hesus a terminá su komparashon bisando: “Asina tambe mi Tata selestial lo hasi ku boso, si kada un di boso no pordoná su ruman di henter su kurason.” (Mateo 18:23-35) E lès ta bon kla: E debe di piká ku Yehova a pordoná kada un di nos ta hopi mas grandi ku kualke falta ku kualke hende por a kometé kontra nos. Es mas, Yehova ta pordoná nos diariamente. Siguramente, nos por pordoná e ofensa ku otro hende de bes en kuando ta kometé kontra nos.

11. Nos lo sigui ki konseho ku apòstel Pablo a duna si nos ke pa Yehova pordoná nos, i ku ki bon resultado?

¹¹ Apòstel Pablo a skirbi: “Sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.” (Efesionan 4:32) Pordonamentu di otro ta promové pas entre kristiannan. Mas aleu Pablo a urgi kristiannan: “Manera esnan ku a wòrdu skohí di Dios, santu i stimá, bisti un kurason di kompashon, kariño, humildat, mansedumbre i pasenshi. I boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi. I ademas di tur e kosnan aki bisti amor, kual ta e laso perfekto di unidat.” (Kolosensenan 3:12-14) Tur e kosnan aki ta kai bou di e orashon ku Hesus a siña nos: “Pordoná nos nos debenan, meskos ku nos tambe ta pordoná nos debedónan.”

Protekshon Ora Nos Ta den Tentashon

12, 13. (a) Kiko lo no por ta e nifikashon di e penúltimo petishon di e orashon modelo? (b) Ken ta e gran Tentadó, i kiko ta nifiká ora nos ta pidi pa no ser hibá den tentashon?

¹² E penúltimo petishon den Hesus su orashon modelo ta: “No hiba nos den tentashon.” (Mateo 6:13) Hesus tabata ke men ku nos mester pidi Yehova pa no tenta nos? Esaki no por ta asina pasobra disipel Santiago a skirbi bou di inspirashon: “No laga ningun hende bisa ora ku e wòrdu tentá: ‘Mi ta wòrdu tentá dor di Dios’; pasobra Dios no por wòrdu tentá dor di maldat, i e mes no ta tenta ningun hende.” (Santiago 1:13) Ademas, e salmista a skirbi: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) Yehova no ta vigilá ansiosamente pa wak delaster un eror ku nos kometé, i siguramente e no ta purba tenta nos pa kometé eror. Pues, kiko e parti aki di e orashon modelo ta nifiká?

¹³ Esun ku ta purba tenta nos pa kometé eror, ku ta usa trampa pa pone nos kai, i asta ta purba devorá nos ta Satanas e Diabel. (Efesionan 6:11) E ta e gran Tentadó. (1 Tesalonisensenan 3:5) Ora nos pidi Yehova pa no hiba nos den tentashon, nos ta pidié pa no laga nos kai ora nos ta den tentashon. Nos ta pidié pa yuda nos pa “Satanas no tuma bentaha riba nos,” pa nos no entregá na tentashon. (2 Korintionan 2:11) Nos orashon ta pa nos keda “bou di e protekshon di e Haltísimo,” risibiendo e protekshon spiritual ku ta ser duná na esnan ku ta rekonosé Yehova su soberania den tur loke nan ta hasi.—Salmo 91:1-3.

14. Kon apòstel Pablo ta sigurá nos ku Yehova lo no bandoná nos si nos akudí na dje ora nos ta den tentashon?

¹⁴ Nos por tin sigur ku si ta esei ta nos deseo sinsero—ku nos ta ekspresá via nos orashon- i akshonnan—Yehova nunka lo no bandoná nos. Apòstel Pablo ta sigurá nos: “Ningun tentashon, fuera di loke tur hende ta pasa aden, no a bin riba boso; i Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.”—1 Korintionan 10:13.

“Libra Nos for di e Malbado”

15. Dikon ta mas importante ku nunka pa nos pidi pa libra nos for di e malbado?

¹⁵ Segun e manuskritonan mas konfiabel di e Skritura Griego Kristian, Hesus su orashon modelo ta terminá ku e palabranan: “Libra nos for di e malbado.”a (Mateo 6:13) Protekshon kontra Diabel ta asta mas nesesario den e tempu di fin aki. Satanas i su demoñonan ta hibando un guera kontra e restu ungí, “kendenan ta warda e mandamentunan di Dios i tin e [“trabou di duna,” NW] testimonio di Hesukristu.” (Revelashon 7:9; 12:9, 17) Apòstel Pedro a spièrta kristiannan: “Sea sobrio, sea alerta. Boso atversario, e Diabel, ta kana rònt manera un leon ku ta gruña, buskando ken e por devorá. Ma resistié, firme den boso fe.” (1 Pedro 5:8, 9) Satanas lo tin gana di stòp nos trabou di duna testimonio, i mediante su agentenan riba tera—sea ta religioso, komersial òf polítiko—e ta purba intimidá nos. Sin embargo, si nos para firme, Yehova lo libra nos. Disipel Santiago a skirbi: “P’esei, someté boso na Dios. Resistí Diabel i e lo hui for di boso.”—Santiago 4:7.

16. Ki medionan Yehova tin na su disposishon pa yuda su sirbidónan ku ta pasa den prueba?

¹⁶ Yehova a permití Diabel tenta su Yu. Pero despues ku Hesus a resistí Diabel, usando e Palabra di Dios komo protekshon, Yehova a manda angel pa fortales’é. (Mateo 4:1-11) Asina tambe Yehova ta usa su angelnan pa yuda nos si nos hasi orashon ku fe i hasi Yehova nos refugio. (Salmo 34:7; 91:9-11) Apòstel Pedro a skirbi: “Señor sa tambe kon pa reskatá e santunan for di tentashon, i kon pa tene e inhustunan bou di kastigu pa e dia di huisio.”—2 Pedro 2:9.

Liberashon Kompletu Ta Serka

17. Kon Hesus mediante e orashon modelo a pone kosnan den nan perspektiva korekto?

¹⁷ Den e orashon modelo, Hesus ta pone kosnan den nan perspektiva korekto. Nos preokupashon prinsipal mester ta santifikashon di Yehova su gran nòmber santu. Siendo ku e Reino Mesiániko ta e instrumento pa logra esaki, nos ta pidi den orashon pa e Reino bin i destruí tur reino òf gobièrnu humano imperfekto i hasi sigur ku Dios su boluntat ta sosodé plenamente tantu den shelu komo riba tera. Nos speransa pa bida eterno riba e tera kombertí den paraiso ta dependé di e santifikashon di Yehova su nòmber i di ku henter universo ta rekonosé su soberania hustu. Despues di pidi pa e kosnan sumamente importante aki den orashon, nos por pidi pa nos nesesidatnan diario, pa pordon di nos pikánan i pa ser librá for di tentashon i trampa di e malbado, Satanas e Diabel.

18, 19. Kon Hesus su orashon modelo ta yuda nos keda alerta i hasi nos speransa ‘firme te na fin’?

¹⁸ Nos liberashon kompletu for di e malbado i su sistema di kosnan korupto ta yegando serka. Satanas sa bon-bon ku e tin solamente “un poko tempu mas” pa e baha su “gran furia” riba tera, partikularmente riba e sirbidónan fiel di Yehova. (Revelashon 12:12, 17) Den e señal kombiná di e fin di e sistema aki, Hesus a profetisá susesonan eksitante, di kua algun ainda tin ku tuma lugá. (Mateo 24:3, 29-31) Segun ku nos ta mira e kosnan aki sosodé, nos speransa di liberashon lo bira mas briante. Hesus a deklará: “Ma ora ku e kosnan aki kuminsá tuma lugá, wak ariba i lanta boso kabes, pasobra boso redenshon ta yegando serka.”—Lukas 21:25-28.

¹⁹ E orashon modelo kòrtiku i al kaso ku Hesus a duna su disipelnan ta duna nos un guia konfiabel relashoná ku loke nos mester inkluí den nos orashonnan segun ku e fin ta aserká. Laga nos keda ku e konfiansa ku te na fin Yehova lo sigui perkurá pa nos nesesidatnan diario, tantu esnan spiritual komo material. Dor di keda alerta enkuanto orashon, nos lo por “tene firme na e prinsipio di nos siguransa te na fin.”—Hebreonan 3:14; 1 Pedro 4:7.

[Nota]

Komo Repaso

• Kiko e petishon pa nos “pan di kada dia” ta enserá?

• Splika e petishon “pordoná nos nos debenan, meskos ku nos tambe ta pordoná nos debedónan.”

• Kiko nos ke men ora nos pidi Yehova pa no hiba nos den tentashon?

• Dikon nos tin ku pidi pa “libra nos for di e malbado”?

[Plachi na página 15]

Nos mester pordoná otro hende pa Dios pordoná nos

[Rekonosementu pa Potrèt na página 13]

Lydekker