Con Bo Por Mantené un Punto di Bista Balansá di Placa?

Amor pa placa i un deseo pa posesion material no ta nada nobo; ni no ta asina cu Bijbel no ta papia di nan, como si fuera nan ta fenómenonan nobo. Nan ta masha bieu. Den e Ley, Dios a instruí e israelitanan: “Bo no mag deseá cas di bo próhimo . . . ni niun cos cu ta pertenecé na bo próhimo.”—Éxodo 20:17.

AMOR pa placa i pa posesionnan material tabata comun den tempu di Jesus. Considerá e detayenan dje combersacion cu tabatin entre Jesus i un yoncuman “hopi ricu.” “Jesus a bis’é: ‘Un cos bo falta ainda: Bende tur loke bo tin i partié cu hende pober, i lo bo tin tesoro den shelu; i bin, sea mi siguidó.’ Ora el a tende esaki, el a bira masha tristu pasobra e tabata hopi ricu.”—Lucas 18:18-23.

E Punto di Bista Corecto di Placa

Sin embargo, lo ta robes pa concluí cu Bijbel ta condená placa riba su mes of cualkier un di su usonan básico. Bijbel ta mustra cu placa ta percurá un proteccion contra pobresa i e problemanan cu ta compañá pobresa, i ta haci posibel pa hende por obtené nan necesidadnan. Rey Sálomon a skirbi: “Sabiduria ta pa un proteccion mescos cu placa ta pa un proteccion.” I: “Pan ta pa e harimentu dje trahadónan, i biña mes ta alegrá bida; pero placa ta loke tin bon acohida den tur cos.”—Eclesiástes 7:12; 10:19.

Dios ta aprobá e uso corecto di placa. Por ehempel, Jesus a bisa: “Gana amigu pa boso mes pa medio di rikesa inhustu.” (Lucas 16:9) Esaki ta encerá duna contribucion pa e adelanto dje adoracion berdadero di Dios, pasobra definitivamente nos lo kier Dios como nos Amigu. Sálomon mes, siguiendo e ehempel di su tata David, a contribuí sumanan grandi di placa i cosnan balioso pa construccion dje tempel di Jehova. Un otro mandato cristian ta pa duna yudansa material na esnan den necesidad. Apostel Pablo a bisa: “Compartí cu e santunan conforme cu nan necesidadnan.” I el a agregá: “Sigui e caminda di hospitalidad.” (Romanonan 12:13) Hopi bes esaki ta encerá gasta un suma di placa. Pero, kico di amor pa placa?

‘E Cariño pa Plata’

Pablo a trata extensamente e asuntu di “amor pa placa”—of literalmente, “cariño pa plata”—ora el a skirbi Timoteo, un compañero cristian mas yong cuné. Nos por haña Pablo su spiertamentu na 1 Timoteo 6:6-19. Pablo a comentá riba “amor pa placa” como parti di su consideracion mas amplio di cosnan material. Ta bon pa nos studia Pablo su comentario inspirá cuidadosamente en bista dje énfasis cu e cultura djawendia ta pone riba placa. Definitivamente esei lo ta un examinacion probechoso ya cu e ta revelá e secreto con pa “haña un gara firme riba e berdadero bida.”

Pablo ta spierta: “Amor pa placa ta rais di tur sorto di cos perhudicial, i percurando pa realisá e amor aki algun a ser desviá for dje fe i a hinca nan mes tur caminda cu hopi dolor.” (1 Timoteo 6:10) E texto aki no ta bisa cu placa riba su mes ta malu, ni no tin niun otro texto cu ta bisa esei. Tampoco e apostel ta bisa cu placa ta e causa fundamental di “cos perhudicial” of cu placa ta e rais di tur problema. Mas bien, amor pa placa por ta un causa—aunke kisas no e único causa—di tur clase di “cos perhudicial.”

Vigilá Contra Golosidad

E echo cu placa riba su mes no ta ser condená den e Scritura no mester mengua e seriedad di Pablo su advertencia. Cristiannan cu cuminsá stima placa ta core e riesgo di haña nan cu tur clase di problema, i esun pió ta cu nan por dual for dje fe. E berdad aki ta ser enfatisá dor di loke Pablo a bisa e cristiannan na Colósas: “P’esei, mata boso miembronan di curpa cu ta riba tera pa loke ta . . . deseo perhudicial, i cudishi, loke ta idolatria.” (Colosensenan 3:5) Con cudishi, golosidad, of “amor pa placa” por ta idolatria? Esaki kier men cu ta malu si bo kier un cas mas grandi, un auto mas nobo of un trabou cu ta mas mihó pagá? No, niun dje cosnan aki riba nan mes no ta malu. E pregunta ta: Kico ta motivá bo curason di manera cu bo kier cualkier un dje cosnan aki, i nan ta realmente necesario?

Nos por compará e diferencia entre deseo normal i golosidad, cu e diferencia entre e candela chikitu di un kampvuur cu ta cushiná cuminda i e candela grandi cu ta caba cu un mondi. Deseo sano i apropiado por ta constructivo. E ta motivá nos pa traha i ser productivo. Proverbionan 16:26 ta bisa: “E alma di esun cu ta traha duru a traha duru p’e, pasobra su boca a primié.” Pero golosidad ta peligroso i destructivo. E ta deseo descontrolá.

E problema principal ta di controlá nos deseo pa placa. E placa cu nos acumulá of e cosnan material cu nos kier, lo sirbi nos necesidadnan of nos necesidadnan lo haci nos catibu di placa? Ta p’esei Pablo ta bisa cu ser un “persona golos . . . kier men ser un idólatra.” (Efesionan 5:5) Ser golos pa algu ta nificá eigenlijk cu nos ta entregá nos boluntad na e cos ei; de echo nos ta hacié nos doño, nos dios, e cos cu nos ta sirbi. Na contraste, Dios ta insistí: “Bo no mag tin ningun otro dios contra mi cara.”—Éxodo 20:3.

E echo cu nos ta golos ta indicá tambe cu nos no ta confia cu Dios lo cumpli cu su promesa di suministrá loke nos tin mester. (Mateo 6:33) Pues, golosidad ta igual cu apartá for di Dios. Den e sentido aki tambe golosidad ta “idolatria.” No ta nada straño anto cu Pablo ta spierta asina cla contra dje!

Jesus tambe a duna un spiertamentu directo contra golosidad. El a manda nos pa tene cuidou cu anhelo pa algu cu nos no tin: “Tene boso wowo habrí i vigilá contra tur sorto di cudishi, pasobra asta ora un persona tin na abundancia, su bida no ta resultá dje cosnan cu e ta poseé.” (Lucas 12:15) Segun e pasashi aki i e ilustracion cu Jesus a duna despues di esaki, golosidad ta basá riba e creencia bobo cu loke ta importante den bida ta cuanto cos un hende tin. Esei por ta placa, státus, poder of cosnan por estilo. Ta posibel ser golos pa cualkier cos cu por ser adkerí. E idea ta cu ora nos haña e cos ei den nos posesion lo e laga nos keda satisfecho. Pero segun Bijbel i experencia humano, ta Dios so por i lo satisfacé nos berdadero necesidadnan, manera Jesus a razoná cu su siguidónan.—Lucas 12:22-31.

E sociedad djawe cu ta orientá riba compra i benta di producto, ta sobresalí den stimulá golosidad. Hopi hende, siendo influenciá den maneranan sutil pero tog poderoso, ta cuminsá kere cu sea loke sea nan tin, esei no ta suficiente. Nan tin mester di mas cos, cos mas grandi i mas mihó. Aunke nos no por spera di cambia e mundu rond di nos, con nos personalmente por resistí e tendencia aki?

Keda Satisfecho Versus Golosidad

Pablo ta ofrecé e alternativa pa golosidad: keda satisfecho of contentu cu loke bo tin. E ta bisa: “Pues, teniendo cuminda, paña i dak, nos lo keda contentu cu esakinan.” (1 Timoteo 6:8) E descripcion aki di tur loke nos realmente tin mester—“cuminda, paña i dak”—por zona basta simpel of ingenuo. Hopi hende ta ser entretené pa programanan di television caminda televidentenan ta bishitá personanan famoso cu ta biba den casnan luhoso. Esei no ta e manera pa keda satisfecho.

Claro cu no ta ser rekerí di sirbidónan di Dios pa nan imponé riba nan mes un bida di pobresa. (Proverbionan 30:8, 9) Sin embargo, Pablo ta recordá nos kico pobresa realmente ta: falta di cuminda, paña i dak apropiado pa sobrebibí caminda bo ta biba. Di otro banda, si nos tin e cosnan ei, nos tin e base pa keda satisfecho.

Pablo tabata serio tocante e descripcion ei di keda satisfecho? Ta realmente posibel pa keda satisfecho cu djis e cosnan básico: cuminda, paña i dak? Pablo lo mester tabata sa. El a experenciá personalmente e rikesa i privilegionan di tin un rango haltu den e comunidad hudiu i di tin e ciudadania romano. (Echonan 22:28; 23:6; Filipensenan 3:5) Tambe Pablo a pasa hopi necesidad den su actividad di misionero. (2 Corintionan 11:23-28) Atrabes di tur esei, el a siña un secreto cu a yud’é keda contentu cu loke e tin. Kico esei tabata?

“Mi A Siña e Secreto”

Pablo a splica den un di su cartanan: “Mi sa en berdad con pa tin falta di provision, mi sa en berdad con pa tin abundancia. Den tur cos i den tur circunstancia mi a siña e secreto tantu di keda saciá como di tin hamber, tantu di tin abundancia como di padecé di necesidad.” (Filipensenan 4:12) Pablo ta zona asina confiá, asina optimista! Lo tabata fácil pa asumí cu su bida tabata ideal ora el a skirbi e palabranan ei. Pero no tabata asina. E tabata den prizon na Roma!—Filipensenan 1:12-14.

Teniendo cuenta cu e echo serio ei, e pasashi aki ta transmití un mensahe poderoso relacioná cu e asuntu di keda satisfecho, no solamente cu bo posesionnan material sino tambe cu bo circunstancianan. Rikesa extremo of miseria extremo por pone nos prioridadnan na prueba. Pablo a papia di recursonan spiritual cu a yud’é keda satisfecho sin importá su circunstancia material: “Pa tur cos mi tin e forsa den birtud di [Dios] cu ta duna mi poder.” (Filipensenan 4:13) En bes di dependé riba posesionnan material, sea ta hopi of tiki, of riba su circunstancia, sea ta bon of malu, Pablo a dependé riba Dios pa satisfacé su necesidadnan. Como resultado el a sinti satisfaccion.

Foral pa Timoteo e ehempel di Pablo tabata hopi importante. E apostel a urgi e yoncuman ei pa sigui tras di un estilo di bida cu a pone debocion na Dios i un relacion íntimo cu Dios, promé cu rikesa. Pablo a bisa: “Sin embargo, abo, o homber di Dios, hui dje cosnan aki. Pero sigui tras di husticia, debocion na Dios, fe, amor, awante, genio suave.” (1 Timoteo 6:11) Podisé e palabranan ei tabata dirigí na Timoteo, pero nan ta aplicá na ken cu kier onra Dios i kier tin un bida realmente felis.

Timoteo mester a tene cuidou cu golosidad mescos cu cualkier otro cristian. Aparentemente, tabatin creyentenan ricu den e congregacion na Efeso, caminda e tabata ora Pablo a skirbié. (1 Timoteo 1:3) Pablo a introducí e bon nobo di Cristo na e centro comercial próspero aki, i a combertí hopi hende. Sin duda vários di nan tabata hende ricu, mescos cu ta e caso di algun persona den e congregacion cristian djawe.

Pues e pregunta cu ta surgi, foral en bista dje siñansa na 1 Timoteo 6:6-10, ta: Kico hende cu ta mas bon pará materialmente tin cu haci si nan kier onra Dios? Pablo ta bisa cu nan mester cuminsá na examiná nan actitud. Placa tin e tendencia di crea e sintimentu di cu un hende mes por percurá pa su necesidadnan. Pablo ta bisa: “Duna ordu na esnan cu ta ricu den e sistema actual di cosnan pa no ta halsá, i pa pone nan speransa, no den rikesa insigur, sino den Dios, cu ta percurá pa nos tur cos ricamente pa nos por disfrutá di nan.” (1 Timoteo 6:17) Hende ricu tin cu siña wak mas ayá di nan placa; nan tin cu dependé riba Dios, e fuente original di tur rikesa.

Pero actitud ta solamente mitar dje lucha. Tardi of trempan, cristiannan ricu tin cu usa nan rikesa bon. Pablo a spierta: ‘Obra loke ta bon, sea ricu den obranan excelente, sea generoso, cla pa compartí.’—1 Timoteo 6:18.

“E Berdadero Bida”

E obhetivo principal di Pablo su conseho ta cu nos tin cu recordá nos mes dje balor relativo cu cosnan material tin. E Palabra di Dios ta bisa: “Cosnan balioso di e hende ricu ta su pueblo fuerte, i nan ta manera un muraya protector den su imaginacion.” (Proverbionan 18:11) Sí, e siguridad cu rikesa por percurá ta al final puru imaginacion i ta en realidad engañoso. No ta bon pa enfocá nos bida riba rikesa en bes di riba gana Dios su aprobacion.

E insiguridad di rikesa material ta demasiado instabil pa nos fiha nos speransa riba dje. Berdadero speransa mester ta ankrá na algu fuerte, significativo i duradero. E speransa cristian ta fihá riba nos Creador, Jehova Dios, i riba su promesa di bida eterno. Miéntras ta cierto cu placa no por cumpra felicidad, ta asta mas cierto cu placa no por cumpra salbacion. Solamente nos fe den Dios por duna nos tal speransa.

Pues, sea nos ta ricu of pober, laga nos hiba un bida cu lo haci nos “ricu pa cu Dios.” (Lucas 12:21) No tin nada mas balioso cu un posicion aprobá cerca e Creador. Tur esfuerso cu nos haci pa manten’é ta yuda nos ‘atesorá pa nos mes un fundeshi excelente pa futuro, pa nos por haña un gara firme riba e berdadero bida.’—1 Timoteo 6:19.

[Plachi na página 7]

Pablo a siña e secreto di keda satisfecho

[Plachinan na página 8]

Nos por ta felis i satisfecho cu loke nos tin