E Mayordomo Fiel A Haña e Mandato pa Ta Prepará!

Hesus a kaba di splika ku ta un “tou chikitu” so lo haña un lugá den e Reino selestial. (Lukas 12:32) Pero e rekompensa maravioso akí ta trese responsabilidat serio kuné. Hesus a mustra ku un persona mester tin e aktitut korekto pa e por forma parti di e Reino.

P’esei, el a urgi su disipelnan pa nan ta prepará pa ora e bolbe. El a bisa: “Sea bistí i prepará i keda ku boso lampi sendí, i sea manera hende ku ta warda nan doño bini bèk for di e fiesta di kasamentu, pa ora e yega i bati na porta, nan por habri p’e mesora. Felis ta e esklabonan ku ora e doño yega, e haña nan ta vigilá!”—Lukas 12:35-37.

For di Hesus su ilustrashon, fásilmente e disipelnan por a saka afó ki aktitut Hesus tabata referí na dje. E sirbidónan den e ilustrashon tabata prepará, wardando pa e momento ku nan doño lo a bolbe. Hesus a bisa: “Si e [doño] yega den e di dos warda [alrededor di 9 or pa 12 or djanochi], òf asta den e di tres [di 12 or pa 3 or di mardugá], i haña nan ta vigilá, nan lo ta felis!”—Lukas 12:38.

Esaki tabata mas ku djis un konseho pa yuda un persona ser un sirbidó, òf trahadó, diligente. Nos por konkluí esei for di loke Hesus, e Yu di hende, a bisa di su mes den e ilustrashon. El a bisa su disipelnan: “Boso tambe, sea prepará, pasobra e Yu di hende ta bini na un ora ku boso no ta kere.” (Lukas 12:40) Pues, Hesus lo a bolbe den futuro. I e tabata ke pa ora esei sosodé, su siguidónan—spesialmente e “tou chikitu”—ta prepará.

Pedro tabata ke komprondé e asuntu bon, p’esei el a puntra Hesus: “Señor, e ilustrashon akí ta konta pa nos òf pa tur hende tambe?” Hesus no a duna Pedro un kontesta direkto; mas bien, el a konta un otro ilustrashon pa hasi e punto kla. Hesus a bisa: ‘Ken realmente ta e mayordomo fiel, esun prudente, kende su doño lo nombra riba tur su sirbidónan pa e sigui duna nan sufisiente kuminda na e debido tempu? Felis e esklabo ei ta si ora su doño yega, e hañ’é ta hasi esei! Di bèrdat mi ta bisa boso: E doño lo nombr’é riba tur su pertenensianan.’—Lukas 12:41-44.

Den e promé ilustrashon, ta opvio ku “e doño” ta referí na Hesus, e Yu di hende. Pues, “e mayordomo fiel” ta un grupo di hende ku lo a forma parti di e “tou chikitu” ku lo risibí e Reino selestial. (Lukas 12:32) Den e último ilustrashon, Hesus a mustra ku algun miembro di e “tou chikitu” lo a haña e responsabilidat di perkurá “sufisiente kuminda na e debido tempu” pa alimentá “su sirbidónan.” Pues, Pedro i e otro disipelnan kendenan Hesus mes tabata siña i alimentá den sentido spiritual por a konkluí ku e Yu di hende lo a bolbe den futuro. Durante e periodo ei, lo tabatin un organisashon ku ta perkurá kuminda spiritual pa Hesus su siguidónan, esta, “e sirbidónan” di e Doño.

Despues, Hesus a ilustrá na un otro manera dikon su disipelnan mester keda alerta i ku un bon aktitut. Por sosodé ku, despues di tempu, un persona por kuminsá bira indiferente i bai asina leu di kuminsá oponé su rumannan den fe. Hesus a bisa: “Si e esklabo ei bisa den su kurason: ‘Mi doño ta tarda pa bini,’ i e kuminsá bati e otro kriánan, tantu hòmber komo muhé, i e bai kome, bebe i bira burachi, e doño di e esklabo ei lo bini riba un dia ku e no ta sper’é i na un ora ku e no sa, i lo e dun’é e kastigu di mas severo i un lugá huntu ku hende infiel.”—Lukas 12:45, 46.

Hesus a bisa ku el a bini pa “sende un kandela riba tera.” I esei tabata loke el a hasi. El a bini ku tópikonan ku a lanta hopi kontroversia i, di e manera ei, el a refutá siñansa- i tradishonnan falsu. Sí, su siñansanan ta asta separá hende ku lo mester ta uní ku otro; nan ta pone “tata kontra yu hòmber i yu hòmber kontra tata, mama kontra yu muhé i yu muhé kontra mama, suegra kontra nuera i nuera kontra suegra.”—Lukas 12:49, 53.

Loke Hesus a kaba di papia tabata spesialmente pa su disipelnan. Despues, el a dirigí su atenshon na e multitut. Mayoria di e hendenan no kier a aseptá ku Hesus tabata e Mesías, apesar di tur e evidensianan ku nan a haña. P’esei Hesus a bisa nan: “Ora boso mira un nubia skur forma den wèst, boso ta bisa mesora: ‘Tin un tormenta na kaminda,’ i asina ta sosodé tambe. I ora boso mira ku bientu ta supla di zùit, boso ta bisa: ‘Lo bai tin un ola di kalor,’ i asina ta sosodé tambe. Hipókritanan, boso sa kon pa analisá aparensia di tera i shelu, ma kon bini boso no sa kon pa analisá loke ta pasando den e tempu akí?” (Lukas 12:54-56) Tabata bisto ku nan no tabata prepará.