Pregunta di Lector

Jesus a urgi: “Haci esfuerso vigoroso pa drenta dor dje porta smal, pasobra hopi, mi ta bisa boso, lo purba drenta pero lo no por.” (Lucas 13:24) Kico e tabata kier men i con nos por aplik’e awe?

E mihó manera pa nos comprendé e pasashi di Bijbel interesante aki bon ta dor di considerá su marco di circunstancia. Un seis luna promé cu su morto, Jesus tabata na Jerusalem durante e aniversario dje rededicacion dje tempel. El a bisa cu e ta e wardadó di Dios su carnénan, pero el a señalá cu hudiunan en general no tabata entre e carnénan ei, ya cu nan a nenga di scucha. Ora el a bisa cu e tabata “un” cu su Tata, hudiunan a coge piedra pa piedr’é. El a hui bai Perea n’e otro banda di Jordan.—Juan 10:1-40.

Ei un homber a puntr’é: “Señor, esnan cu ta ser salbá ta poco?” (Lucas 13:23) E pregunta ei tabata na su lugá, ya cu hudiunan dje tempu ei a kere cu solamente un cantidad limitá di hende lo a merecé salbacion. Mirando nan actitud, no ta difícil pa nos imaginá ta ken nan a pensa e grupo chikitu ei tabata. Manera desaroyonan despues lo a mustra, ki ekibocá nan tabata!

Jesus tabata entre nan pa mas o ménos dos aña, i el a siña, haci milager i a ofrecé na nan e posibilidad pa bira heredero dje Reino celestial. Cu ki resultado? Nan, i foral nan lidernan, tabata orguyoso di ser desendiente di Abraham i dje echo cu nan tabatin Dios su Ley. (Mateo 23:2; Juan 8:31-44) Pero nan no a reconocé ni nan no a reaccioná n’e bos dje Wardador Excelente. Tabata como si fuera tabatin un porta habrí pa nan, i e recompensa principal pa drenta e porta ta participacion den e Reino. Pero nan a nenga. Relativamente poco hudiu so, mayoria di nan dje clase di condicion humilde, a tende Jesus su mensahe dje berdad, a reaccioná faborablemente i a sigui Jesus.—Lucas 22:28-30; Juan 7:47-49.

Riba dia di Pentecoste di aña 33 E.C., tabata e últimonan aki cu tabata den posicion pa ser ungí cu spiritu. (Echonan 2:1-38) Nan no tabata entre e hacidónan di inhusticia cu Jesus a mencioná cu lo yora i morde riba djente pa motibu cu nan no a probechá dje oportunidad cu nan tabatin.—Lucas 13:27,28.

Consecuentemente, den promé siglo e “hopi” tabata hudiunan en general, i specialmente e lidernan religioso. Esakinan a pretendé cu nan a deseá Dios su aprobacion—pero solamente segun nan mes norma i camindanan, no segun esnan di Dios. Na contraste, e relativamente “poco” cu a respondé, motivá pa un interes sincero pa ser parti dje Reino, a bira miembronan ungí dje congregacion cristian.

Considerá awor e aplicacion mas extenso cu ta tuma lugá den nos tempu. Un cantidad incontabel di persona cu ta asistí na iglesianan di cristiandad a ser siñá cu nan lo bai shelu. Sin embargo, e aspiracion aki no ta basá riba siñansa exacto dje Scritura. Mescos cu e hudiunan di promé, esakinan kier haña Dios su aprobacion, solamente segun nan mes condicionnan.

Tog, den nos tempu tin relativamente poco hende cu humildemente a respondé n’e mensahe di Reino, a dedicá nan mes na Jehova, i ta den posicion pa ricibí su aprobacion. Esaki a hiba cu nan a bira “yunan dje reino.“ (Mateo 13:38) E “yunan” ungí ei a cuminsá ser invitá na Pentecoste 33 E.C. Pa hopi tempu caba Testigonan di Jehova ta kere cu evidencia di Dios su trato cu su pueblo ta indicá cu básicamente e miembronan dje clase celestial a ser recogé. P’esei esnan cu a siña e berdad bíblico den añanan recien a comprendé cu e speransa di bida eterno den paradijs ta ser extendé awor. Esakinan ta surpasá e cantidad dje resto di cristiannan ungí, cu ta menguando, kendenan sí tin e prospecto di bai shelu. Aunke Lucas 13:24 no ta aplicá principalmente na esnan cu no tin speransa celestial, sigur-sigur e tin conseho sabí pa nan.

Dor di urgi nos pa haci esfuerso vigoroso, Jesus no tabata bisando cu e of su Tata ta pone obstáculonan den nos caminda pa stroba nos. Pero for di Lucas 13:24 nos por comprendé cu Dios su rekisitonan ta di tal forma cu nan ta excluí esnan indigno. “Haci esfuerso vigoroso” ta implicá lucha, forsa nos mes. P’esei nos lo por puntra nos mes: ‘Mi ta duna tur di mi mes?’ Nos por parafraseá Lucas 13:24: ‘Mi mester haci esfuerso vigoroso pa drenta dor dje porta smal pasobra hopi lo purba drenta, pero lo no por. Pues mi ta ègt haciendo esfuerso vigoroso? Mi ta mescos cu un atleta den un stadion di antigwedad cu ta duna tur cu tin pa gana e premio? Un atleta asina lo no ta sin entusiasmo, bayendo trankil. Ami sí ta asina?’

Jesus su palabranan ta indicá cu kisas algun hende lo por purba “drenta dor dje porta,” pero solamente manera ta cumbiní nan, cu pasonan trankil, manera nan ta preferá. Un actitud asina lo por afectá testigonan individual. Kisas algun por razoná: ‘Mi conocé cristiannan deboto cu pa añanan a haci sacrificio; tog nan a muri sin mira e fin dje sistema di cosnan. P’esei kisas ta mihó mi bai mas trankil, i hiba un bida mas normal.’

Ta fácil pa pensa asina, pero esei ta sabí? Por ehempel, e apostelnan a pensa asina? Definitivamente cu no. Nan a duna nan mes completamente na adoracion berdadero, te na morto. Por ehempel Pablo por a bisa: “[Cristo] ta esun cu nos ta publicá . . . P’esei mes en berdad mi ta trahando duru, haciendo esfuerso di acuerdo cu e funcionamentu di dje i cu ta obra den mi cu poder.” Despues el a skirbi: “P’esei mes nos ta traha duru i ta haci esfuerso vigoroso, pasobra nos a pone nos speransa den un Dios bibu, cu ta Salbador di tur clase di hende, specialmente di esnan fiel.”—Colosensenan 1:28,29; 1 Timoteo 4:10.

Nos sa cu dor di haci esfuerso, Pablo a haci net e cos corecto. Ki contentu cada un di nos lo ta si nos por bisa manera Pablo: “Mi a lucha e lucha excelente, mi a core e careda te na fin, mi a observá e fe.” (2 Timoteo 4:7) P’esei na armonia cu Jesus su palabranan registrá na Lucas 13:24, cada un di nos por puntra: ‘Mi ta dedicá mi mes cu diligencia i ta traha duru? Sí, mi ta duna evidencia amplio i regular cu mi ta tuma na pechu Jesus su amonestacion: “Haci esfuerso vigoroso pa drenta dor dje porta smal”?’