Bo Ta Kla pa Batisá?

 1. Kiko un hende mester hasi promé ku e kuminsá traha un kas?

IMAGINÁ ku un hende ke traha un kas. E sa ki tipo di kas e ke traha. Akaso esei ke men ku mesora e por bai kumpra e materialnan i kuminsá traha? Nò. Promé ku e kuminsá, e tin ku hasi algu masha importante: kalkulá e gastunan enbolbí. Dikon? Pasobra e mester hasi sigur ku e tin sufisiente plaka pa trah’é. Si di antemano e tuma tempu pa kalkulá e gastunan enbolbí, lo e tin mas chèns di kaba di traha e kas.

 2. Segun Lukas 14:27-30, riba kiko bo mester pensa bon promé ku bo batisá?

² Bo tin pensá di batisá? Wèl, probablemente ta bo amor i gratitut pa Yehova ta motivá bo pa pensa riba esei. Bon mirá, bo tin ku tuma un desishon paresido na esun di e hende ku ke traha un kas. Dikon nos ta bisa esei? Wak e palabranan di Hesus na Lukas 14:27-30. (Les’é.) Ei Hesus tabata papia tokante kiko ke men bira un siguidó di dje. Si nos ke siguié, nos mester ta dispuesto pa aseptá “e gastu,” esta, e difikultat i sakrifisio enbolbí. (Luk. 9:23-26; 12:51-53) Pues promé ku bo batisá, bo mester pensa bon riba tur loke esei ta enserá. E ora ei, lo bo ta mihó prepará pa sigui sirbi Dios fielmente despues ku bo batisá.

 3. Kiko nos lo analisá den e artíkulo akí?

³ E gastunan ku ta enbolbí den bira un disipel batisá di Kristu ta bale la pena? Sigur ku sí! Boutismo ta habri porta pa masha hopi bendishon—tantu awor komo den futuro. Den e artíkulo akí, nos lo analisá algun pregunta importante tokante boutismo. Esei lo yuda bo haña sa si bo ta kla pa batisá.

 4. (a) Kiko dedikashon ta? (b) Segun Mateo 16:24, kiko ta nifiká “nenga” bo mes?

⁴ Kiko dedikashon ta? E ta un orashon masha importante ku bo tin ku hasi promé ku bo batisá. Den e orashon ei, bo ta primintí Yehova ku lo bo usa bo bida pa sirbié pa semper. Ora bo dediká bo mes na Yehova, bo ta “nenga” bo mes. Ku otro palabra, bo ta bisa Yehova ku di awor padilanti bo ta enfoká riba sirbié i no riba agradá bo mes. (Lesa Mateo 16:24.) Awor bo ta pertenesé na Yehova, i esei ta un privilegio grandi. (Rom. 14:8) Bo dedikashon ta un voto—un promesa solèm ku bo ta hasi na Dios. Yehova no ta fòrsa nos pa hasi e voto ei. Pero, unabes ku nos hasié, e ta ferwagt ku nos ta kumpli kuné.—Sal. 116:12, 14.

 5. Ki diferensia tin entre dedikashon i boutismo?

⁵ Ki diferensia tin entre dedikashon i boutismo? Dedikashon ta algu personal i privá; algu entre abo ku Yehova. Pero, boutismo ta públiko; algu ku bo ta hasi dilanti otro hende, generalmente na un asamblea òf kongreso. Ora bo batisá, bo ta demostrá otro hende ku ya bo a dediká bo mes na Yehova.b Ku otro palabra, bo ta laga nan sa ku bo ta stima Yehova ku henter bo kurason, alma, mente i forsa i ku bo a disidí di sirbié pa semper.—Mar. 12:30.

6-7. Segun 1 Pedro 3:18-22, dikon nos mester batisá?

⁶ Di bèrdat ta nesesario pa batisá? Wak kiko Beibel ta bisa na 1 Pedro 3:18-22. (Les’é.) Meskos ku e arka tabata un prueba visibel di Noe su fe, bo boutismo ta un prueba visibel di bo dedikashon na Yehova. Pero boutismo di bèrdat ta nesesario? Sí, i Pedro a bisa dikon. Promé, boutismo ta “salba” bo. Pa boutismo salba nos, nos mester demostrá ku nos tin fe den Hesus; esei ta enserá kere ku el a muri pa nos, ku el a resusitá bai shelu i ku “e ta na man drechi di Dios.”

⁷ Di dos, boutismo ta duna nos “un konsenshi limpi.” Kon asina? Wèl, ora nos dediká nos mes na Yehova i batisá, nos ta sera un amistat spesial kuné. Anto komo ku nos a arepentí di kurason i tin fe den e reskate, Dios ta pordoná nos pikánan. Asina ei, nos por tin un konsenshi limpi dilanti dje.

 8. Riba kiko bo desishon pa batisá mester ta basá?

⁸ Riba kiko bo desishon pa batisá mester ta basá? Debí na bo estudio di Beibel, bo a siña masha hopi kos tokante Yehova—su personalidat i su manera di hasi kos. Tur loke bo a siña ei a konmové bo kurason i a pone ku bo a stim’é mashá. P’esei, bo desishon pa batisá mester ta basá prinsipalmente riba bo amor pa Yehova.

 9. Segun Mateo 28:19 i 20, kiko ke men batisá den nòmber di e Tata i di e Yu i di spiritu santu?

⁹ Bo desishon pa batisá tambe ta basá riba e bèrdatnan bíbliko ku bo a aseptá. Pensa riba loke Hesus a bisa ora el a duna e mandamentu di hasi hende disipel. (Lesa Mateo 28:19, 20.) El a splika ku un hende ku batisá mester hasi esei “den nòmber di e Tata i di e Yu i di spiritu santu.” Esei ke men kere di henter bo kurason loke Beibel ta bisa tokante Yehova, tokante su Yu, Hesus, i tokante spiritu santu. E bèrdatnan ei tin hopi poder i por yega te den fondo di bo kurason. (Heb. 4:12) Laga nos analisá algun di nan.

10-11. Ki bèrdat tokante e Tata bo a siña i a aseptá?

¹⁰ Bo ta kòrda ora bo a siña e bèrdatnan tokante e Tata? Su nòmber ta Yehova, e ta “e Haltísimo riba henter tera” i e so ta “e Dios berdadero.” (Sal. 83:18; Yer. 10:10) E ta nos Kreador i “salbashon ta di” dje. (Sal. 3:8; 36:9) Ademas, el a perkurá pa salba nos for di piká i morto i a duna nos e speransa di bida eterno. (Huan 17:3) Bo dedikashon i boutismo lo demostrá públikamente ku bo ta un Testigu di Yehova. (Isa. 43:10-12) Lo bo forma parti di un famia mundial di adoradó di Yehova ku ta karga su nòmber ku orguyo i ta hasié konosí na otro hende.—Sal. 86:12.

¹¹ Esta un onor di por komprondé loke Beibel ta bisa tokante e Tata! Ora bo aseptá e bunita bèrdatnan ei, bo kurason lo motivá bo pa dediká bo mes na Yehova i batisá.

12-13. Ki bèrdat tokante e Yu bo a siña i a aseptá?

¹² Kon bo a reakshoná ora bo a siña e siguiente bèrdatnan tokante e Yu? Hesus ta e di dos persona mas importante den universo. E ta nos Reskatador. Di buena gana el a duna su bida komo reskate pa nos. Ora nos demostrá pa medio di nos echonan ku nos tin fe den e reskate ei, nos por haña pordon di nos pikánan, tin un amistat ku Dios i haña bida eterno. (Huan 3:16) Hesus ta nos Sumo Saserdote. E ke yuda nos benefisiá di e reskate i pa nos tin un amistat será ku Yehova. (Heb. 4:15; 7:24, 25) Komo ku e ta e Rei di Dios su Reino, Yehova lo us’é pa santifiká Su nòmber, kita maldat i trese bendishon eterno pa hende den e paradeis ku ta bini. (Mat. 6:9, 10; Rev. 11:15) Hesus ta nos ehèmpel. (1 Ped. 2:21) El a usa su bida pa hasi Dios su boluntat i asina a pone un ehèmpel pa nos imitá.—Huan 4:34.

¹³ Ora bo aseptá loke Beibel ta bisa tokante Hesus, lo bo haña gana di stima e Yu stimá ei di Dios. E amor ei lo motivá bo pa usa bo bida pa hasi Dios su boluntat, meskos ku Hesus. I en buèlta, esei lo duna bo e deseo di dediká bo mes na Yehova i batisá.

14-15. Ki bèrdat tokante spiritu santu bo a siña i a aseptá?

¹⁴ Kon bo a reakshoná ora bo a siña e siguiente bèrdatnan tokante spiritu santu? E no ta un persona, sino e forsa aktivo di Dios. Yehova a us’é pa guia skirbimentu di Beibel, i e mesun spiritu ei ta yuda nos komprondé i apliká loke nos ta lesa den Beibel. (Huan 14:26; 2 Ped. 1:21) Pa medio di spiritu santu, Yehova ta duna nos “poder ku ta surpasá esun di hende.” (2 Kor. 4:7) Spiritu santu ta duna nos forsa pa prediká e bon notisia, resistí tentashon, trata ku desanimashon i soportá prueba. E ta yuda nos biba di akuerdo ku Galationan 5:22 i 23. Ademas, generosamente Dios ta duna su spiritu na hende ku ta pidié di kurason i ku ta konfia den djE.—Luk. 11:13.

¹⁵ Ta un konsuelo pa sa ku adoradó di Yehova por dependé riba yudansa di Yehova su spiritu santu pa por sirbié! Ora bo aseptá e bèrdatnan ku bo a siña tokante spiritu santu, lo bo sinti bo motivá pa dediká bo mes na Dios i batisá.

16. Kiko nos a analisá te asina leu?

¹⁶ E desishon di dediká bo mes na Dios i batisá ta masha importante. Manera ya nos a siña, bo mester ta dispuesto pa aseptá e gastunan enbolbí. Pero, e bendishonnan ku lo bo risibí lo superá difikultat i sakrifisio ku bo tin ku hasi. Boutismo por salba bo i ta permití bo tin un konsenshi limpi dilanti Dios. Bo desishon di batisá mester ta basá prinsipalmente riba bo amor pa Yehova. Tambe bo mester kere di henter bo kurason e bèrdatnan ku bo a siña tokante e Tata, e Yu i e spiritu santu. Di loke nos a analisá te asina leu, bo ta kla pa batisá?

17. Kiko ta algun paso ku bo mester dal promé ku bo batisá?

¹⁷ Si bo ta sinti ku bo ta kla pa batisá, sin duda ya bo a dal vários paso pa bo por tin un bon amistat ku Yehova.c Debí na bo estudio regular di Beibel, bo por a haña sa mas tokante Yehova i Hesus. Bo a kultivá fe den Dios. (Heb. 11:6) Bo ta konfia plenamente den e promesanan di Yehova ku tin den Beibel, i bo ta konvensí ku bo fe den e sakrifisio di Hesus por salba bo di piká i morto. Bo a arepentí di bo pikánan, es desir, bo tin masha duele di e erornan ku bo a kometé i bo a pidi Yehova pordoná bo. Bo a kambia bo bida, ku otro palabra, bo a bandoná bo manera di biba anterior i awor bo ta hasi loke ta agradá Dios. (Echo. 3:19) Bo ta gusta papia ku otro hende tokante bo fe. Bo a kualifiká pa bira un publikadó no batisá i a kuminsá prediká ku e kongregashon. (Mat. 24:14) Yehova ta orguyoso di bo i hopi kontentu ku bo a dal e pasonan nesesario ei.—Pro. 27:11.

18. Kiko mas bo tin ku hasi promé ku bo por batisá?

¹⁸ Promé ku bo por batisá, tin algun kos mas ku bo tin ku hasi. Manera nos a mira na paragraf 4, bo mester dediká bo mes na Dios, esta, hasi un orashon spesial den privá i di kurason i primintié ku lo bo usa bo bida pa hasi su boluntat. (1 Ped. 4:2) Despues bisa e koordinadó di e kuerpo di ansiano ku bo ke batisá. Lo e pidi algun ansiano pa reuní ku bo. Bo no mester sinti bo nèrvioso; kòrda ku e rumannan bondadoso ei ya konosé bo i ta stima bo. Nan lo repasá ku bo e siñansanan básiko di Beibel pa hasi sigur ku bo ta komprondé nan i ku bo sa kon importante dedikashon i boutismo ta. Si nan tur ta di akuerdo ku otro, nan lo bisa bo ku bo por batisá na e siguiente asamblea òf kongreso.

19-20. Kiko bo mester hasi despues ku bo batisá, i kon bo por hasi esei?

¹⁹ Kiko bo mester hasi despues ku bo batisá?d Kòrda ku dedikashon ta un voto i ku Yehova ta ferwagt ku lo bo kumpli kuné. P’esei, despues ku bo batisá, bo mester biba di akuerdo ku bo dedikashon. Kon bo por hasi esei?

²⁰ Keda serka di bo kongregashon. Ora bo batisá, bo ta bira parti di un “hermandat” mundial. (1 Ped. 2:17) Bo rumannan di kongregashon ta bo famia spiritual. Si bo asistí regularmente na reunion, lo bo fortalesé bo amistat ku nan. Lesa e Palabra di Dios tur dia i meditá riba loke bo a lesa. (Sal. 1:1, 2) Esei ke men, despues di lesa un porshon, tuma algun minüt pa meditá riba loke bo a lesa. Asina ei, e palabranan lo yega na bo kurason. “Hasi orashon kontinuamente.” (Mat. 26:41) Bo orashonnan sinsero lo hala bo mas serka di Yehova. Anto, “sigui buska . . . promé e Reino.” (Mat. 6:33) Kon? Esei ta ora bo hasi e trabou di prediká un di bo prioridatnan den bida. Si bo ta prediká regularmente, bo fe lo keda fuerte, i bo por yuda otro hende subi riba e kaminda ku ta hiba na bida eterno.—1 Tim. 4:16.

21. Bo boutismo lo habri porta pa kiko?

²¹ E desishon di dediká bo mes na Yehova i batisá ta esun di mas importante ku lo bo tuma den bo bida. Ta bèrdat ku tin gastu enbolbí. Pero, no tin duda ku e ta bale la pena! Kualke prueba ku bo haña bo kuné den e mundu bieu akí ta “leve i pa un tempu kòrtiku.” (2 Kor. 4:17) En kambio, bo boutismo lo habri porta pa un bida mas felis awor i pa e berdadero bida den futuro. (1 Tim. 6:19) P’esei pensa bon, hasi orashon i kontestá e pregunta: “Mi ta kla pa batisá?”