LÈS 57

Kiko si Bo A Kometé un Piká Serio?

Edishon Imprimí

Tin biaha, lo bo kometé fayo apesar ku bo ta stima Yehova hopi i ta hasi esfuerso pa evitá di hasié tristu. Sinembargo, algun piká ta mas serio ku otro. (1 Korintionan 6:9, 10) Si bo a kometé un piká serio, kòrda esaki: Yehova no a stòp di stima bo, i e ta kla pa pordoná bo i yuda bo.

1. Kiko nos mester hasi pa Yehova pordoná nos?

Hende ku ta stima Yehova ta bira masha tristu ora nan realisá ku nan a kometé un piká serio. Pero Yehova ta konsolá nan ku e promesa ku el a hasi na su pueblo: “Maske boso pikánan ta kòrá manera sanger, nan lo bira blanku manera sneu.” (Isaías 1:18) Si nos arepentí di kurason, Yehova lo pordoná nos kompletamente. Kon nos ta demostrá ku nos a arepentí? Nos ta demostrá esei ora nos ta sinti duele profundo pa loke nos a hasi, ta stòp di hasi loke ta malu i ta pidi Yehova pa pordoná nos. Despues, nos ta hasi tur nos esfuerso pa kambia kualke mal pensamentu òf hábito ku a hiba nos na kometé e piká. Anto, nos ta sigui hasi esfuerso pa biba di akuerdo ku Yehova su normanan moral limpi.—Lesa Isaías 55:6, 7.

2. Kon Yehova ta usa e ansianonan pa yuda nos ora nos peka?

Si nos kometé un piká serio, Yehova ta bisa nos pa “yama e ansianonan di kongregashon.” (Lesa Santiago 5:14, 15.) E ansianonan ta stima Yehova i su karnénan. Nan a siña kon pa yuda nos drecha nos relashon ku Yehova.—Galationan 6:1.

Kon e ansianonan ta yuda nos si nos kometé un piká serio? Dos òf tres ansiano lo usa teksto di Beibel pa mustra nos dikon loke nos a hasi ta robes. Ademas, nan lo duna nos bon konseho i animashon ku por yuda nos pa no bolbe kometé piká serio. Kisas nan por bisa nos tambe ku nos no por hasi sierto kos den kongregashon te ora ku nos tin un bon amistat ku Yehova atrobe. Si un persona ku a kometé piká serio no arepentí, e ansianonan lo ekspulsá e persona akí for di e kongregashon pa e no influensiá otro hende den kongregashon.

KIKO MAS NOS POR SIÑA?

Haña mas apresio pa e manera ku Yehova ta yuda nos si nos kometé un piká serio.

3. Ora nos konfesá nos piká, nos por drecha nos amistat ku Yehova

Kualke piká ku nos kometé ta duel Yehova. P’esei, nos tin ku konfesá na dje. Lesa Salmo 32:1-5. Despues, analisá e siguiente pregunta:

Dikon ta bon pa nos konfesá nos pikánan na Yehova na lugá di purba di skonde nan?

Ora nos pidi e ansianonan pa yudansa despues ku nos a konfesá nos pikánan na Yehova, nos lo sinti nos mihó. Pasa e VIDIO. Despues, analisá e siguiente pregunta:

VIDIO: “Esnan Ku Yehova Ta Stima E Ta Disipliná” (3:01)

Kon e ansianonan a yuda Canon bolbe serka Yehova?

Ora nos ta papia ku e ansianonan, nos mester ta habrí i onesto ku nan pasobra nan t’ei pa yuda nos. Lesa Santiago 5:16. Despues, analisá e siguiente pregunta:

Dikon ta mas fásil pa e ansianonan yuda nos ora nos ta onesto ku nan?

Kolekshon di plachi: 1. Un ruman hòmber tristu i tur preokupá ta tapa su kara ku su mannan. 2. E ruman hòmber ta hasi orashon na Yehova. 3. E ruman hòmber ta papia ku un ansiano na telefòn. 4. Na un Salòn di Reino, e ruman hòmber ta konta tres ansiano tokante e piká serio ku el a kometé. 5. E ruman hòmber ta smail pasobra awor e tin un konsenshi limpi. — Konfesá bo piká, sea onesto ku e ansianonan i aseptá Yehova su yudansa amoroso

4. Ku kiko ekspulshon ta yuda?

Si un persona ku a kometé un piká serio ta nenga di obedesé Yehova su normanan, e no por forma parti mas di e kongregashon. E persona ei ta ser ekspulsá i p’esei nos no ta pasa tempu mas kuné ni papia kuné. Lesa 1 Korintionan 5:6, 11 i 2 Huan 9-11. Despues, analisá e siguiente pregunta:

Meskos ku zürdeg ta fermentá henter un mansa, kon pasamentu di tempu ku un pekadó ku no a arepentí ta afektá e kongregashon?

Hopi hende ku a ser ekspulsá a bini bèk despues na e kongregashon. Dikon? Wèl, aunke e disiplina ku nan a risibí tabata doloroso, e disiplina a yuda nan realisá ku loke nan a hasi tabata robes. (Salmo 141:5) Pasa e VIDIO. Despues, analisá e siguiente pregunta:

VIDIO: Apoyá e Huisionan di Yehova Lealmente (9:28)

Komo ku Sonja a ser ekspulsá, kon esei a yud’é?

Kon ekspulshon ta . . .

onra Yehova su nòmber?
mustra ku Yehova ta rasonabel i amoroso?

5. Yehova ta pordoná nos ora nos arepentí di nos piká

Hesus a usa un ilustrashon ku ta laga nos komprondé kon Yehova ta sintié ora un persona arepentí. Lesa Lukas 15:1-7. Despues, analisá e siguiente pregunta:

Kiko e ilustrashon akí ta siña bo tokante Yehova?

Lesa Ezekiel 33:11. Despues, analisá e siguiente pregunta:

Ki paso importante nos tin ku tuma pa demostrá ku di bèrdat nos a arepentí?

Un wardadó di karné ku kariño ta mara verbant na un karné ku ta heridá. — Meskos ku un wardadó di karné ta stima su karnénan, Yehova tambe ta stima su karnénan mashá

LOKE HENDE SA BISA: “Mi tin miedu di papia ku e ansianonan tokante mi piká, pasobra nan lo ekspulsá mi.”

Kiko lo bo bisa un hende ku ta pensa asina?

RESÚMEN

Si nos a kometé un piká serio pero nos ta sinti duele profundo pa loke nos a hasi i nos ta determiná pa no bolbe kometé e piká ei, Yehova lo pordoná nos.

Repaso

Dikon ta bon pa nos konfesá nos pikánan na Yehova?
Kiko nos mester hasi pa Yehova pordoná nos nos pikánan?
Si nos a kometé un piká serio, dikon ta bon pa nos buska yudansa serka e ansianonan?

A kompletá e lès akí dia:

Meta

Siña konosé e ansianonan den bo kongregashon.

Otro meta:

Your other goal

MAS INFORMASHON INTERESANTE

Wak kon un hòmber a eksperensiá e miserikòrdia di Yehova ku Isaías 1:18 ta deskribí.

Nunka Duda di Yehova Su Miserikòrdia (5:02)

Ora un persona ser ekspulsá, ki benefisio esei ta trese kuné?

“Ekspulshon Ta un Muestra di Amor” (E Toren di Vigilansia di 15 di aprel 2015)

Wak kon bo por splika un hende ku no ta Testigu di Yehova tokante ekspulshon.

“Testigunan di Yehova Ta Evitá Kontakto ku Esnan Ku No Ta Miembro Mas di Nan Religion?” (artíkulo riba jw.org)

Den e historia di bida “Mi Mester A Bolbe Serka Yehova,” wak kon un hòmber ku a bandoná e bèrdat a sinti ku Yehova tabata ke pa e bolbe serka dje.

“Beibel Ta Kambia Bida di Hende” (E Toren di Vigilansia di 1 di aprel 2012, na spañó)