Fortificá pa Bisa No na Malecho

“TEMPU mi tabata tiener ainda, i mi tabata traha den un tienda,” Timothy ta conta, “un colega di trabou a invitá mi na su cas. El a bisa mi cu su mayornan lo no t’ei, cu lo bai tin mucha muher einan i cu lo tin oportunidad pa tene relacion sexual.” Hopi hóben djawe lo ta cla pa bisa sí na un invitacion asina. Pero kico Timothy a contestá? “Mi a bis’é mesora cu lo mi no bai i cu dor di mi concenshi cristian, mi no kier tene relacion sexual cu un persona cu no ta mi casá.”

Miéntras Timothy tabata splica pakico e ta nenga, e no tabata sa cu un otro empleada tambe tabata scucha. Su actitud birtuoso a intrigá e mucha muher aki, i no a pasa masha tempu cu Timothy tabatin cu bisa e tambe no, na vários ocasion, manera nos lo mira despues.

Naturalmente, e echo cu tentacion ta bombardiá nos, no ta un cos di nos tempu so. Un 3.000 aña pasá, rey Sálomon a skirbi: “Mi yu, si pecadónan purba di seducí bo, no consentí. . . . Tene bo pia for di nan caminda.” (Proverbionan 1:10, 15) Jehova mes a manda e nacion di Israel: “Bo no mester sigui e multitud pa finnan malbado.” (Exodo 23:2) Sí, tin biaha nos tin cu bisa no, i resistí e tentacion pa haci loke ta malu, asta si esaki kisas no ta e curso popular.

Bisa No Ta Importante Foral Awendia

Bisa no na malecho nunca no tabata fácil, i awendia e por ta extra difícil, pasobra nos ta bibando den loke Bijbel ta yama “e último dianan” dje sistema di cosnan aki. Na armonia cu profecia bíblico, hende en general a bira stimadó di placer i di violencia, sin cualidadnan spiritual i moral. (2 Timoteo 3:1-5) Presidente di un universidad jesuita a declará: “Nos tabatin un set di normanan tradicional cu a ser desafiá i cu a ser hañá deficiente of cu no ta na moda mas. Awor ta parce cu no tin ningun guia moral mes.” Den mésun liña di pensamentu, un hues di corte superior a bisa: “No tin distincion entre bon i malu mas. Tur cos ta mas of ménos. . . . Ménos hende ta reconocé e diferencia entre bon i malu. Awor nan ta atacá e picá i no e violacion.”

Relacioná cu hende cu e actitudnan ei, apostel Pablo a skirbi: “Nan ta den scuridad mentalmente, i alehá for dje bida cu ta pertenecé na Dios pa causa dje ignorancia cu ta den nan, pa causa dje insensibilidad di nan curason. Ya cu nan a yega di ta mas ayá di tur sentido moral, nan a entregá nan mes na libertinahe pa obra tur clase di impuresa cu golosidad.” (Efesionan 4:18, 19) Pero problema ta spera nan. Isaías a declará: “Ai di hende cu ta bisa cu bon ta malu i cu malu ta bon, hende cu ta pone scuridad pa lus i lus pa scuridad.” (Isaías 5:20) E personanan aki no solamente ta cosechá awor loke nan ta planta, pero pronto nan lo experenciá nan “ai” di mas grandi, esta, huicio desfaborabel for di Jehova.—Galationan 6:7.

“Ora e malbadonan ta spruit manera vegetacion i tur e practicantenan di loke ta perhudicial ta florecé, esei ta pa nan por ser anikilá pa semper,” Salmo 92:7 ta bisa. Cu otro palabra, e cosecha abundante aki di maldad lo no sigui pa semper, haciendo bida di tur hende insoportabel. De facto, Jesus a bisa cu e “generacion” cu ta promové e maldad aki mes ta esun cu Dios lo eliminá den un “tribulacion grandi.” (Mateo 24:3, 21, 34) P’esei, si nos kier scapa durante e tribulacion ei, nos tin cu distinguí bon for di malu di acuerdo cu e normanan di Dios; i naturalmente, nos mester tin e fortalesa spiritual tambe pa bisa no na malecho den tur su formanan. Aunke esaki no ta fácil, Jehova a percurá algun ehempel di tempu bíblico i djawe, cu ta animá nos mashá.

Siña for di un Hóben Cu A Bisa No

Asta pa algun den e congregacion cristian, ta parce cu bisa no, foral na fornicacion i adulterio, ta particularmente difícil. Timothy, kende e promé paragraf a mencioná, a tuma na pechu e ehempel dje hóben Josef, registrá den e Scritura na Génesis 39:1-12. Ora cu bes tras bes e esposa dje oficial di ehército Pótifar, a invit’é pa tene relacion cuné, Josef a desplegá un fortalesa moral. E relato ta bisa cu Josef “tabata nenga i bisa . . . ‘con mi por cometé e gran maldad aki i realmente peca contra Dios?’”

Di ki manera Josef a adkerí e fortalesa moral pa bisa e esposa di Pótifar no, bes tras bes? Pa cuminsá, el a considerá su relacion cu Jehova di hopi mas balor cu placernan momentáneo. Ademas, aunke e no tabata bou di un código di ley divino (e Ley di Moises mester a bini ainda), Josef tabatin un comprendimentu cla di principionan moral; e tabata sa cu si e cometé fornicacion cu e esposa caprichoso di Pótifar, lo el a peca no solamente contra e esposo pero tambe contra Dios.—Génesis 39:8, 9.

Evidentemente, Josef a comprendé cu ta importante pa ni sikiera cende e vlam di deseo cu lo por a hiba n’e candela ardiente di pasion incontrolabel. Un cristian sabí ta sigui Josef su ehempel. E Toren di Vigilancia [na ingles] di 1 di juli 1957, a declará: “E tin cu reconocé cu su carni ta swak, i no pensa cu e por sigui tras di deseonan sensual te n’e límite cu e Scritura ta permití i stop einan. Asta si e por logra haci esei pa un periodo, cu tempu lo e pasa over di e límite ei i cai den picá. Esaki lo sosodé sigur, ya cu pasion cu ta ser alimentá, ta crece bira fuerte i ta haña un gara mas firme riba un persona. E ora ei e persona aki tin mas problema pa kit’é for di su mente. Su mihó defensa ta di resistí for di principio.”

Segun cu nos ta desaroyá un amor pa loke ta bon i un odio pa loke ta malu, ta bira mas fácil pa resistí for di principio. (Salmo 37:27) Pero nos tin cu sigui traha riba dje i persistí. Si nos haci esei, cu Jehova su yudansa nos amor pa loke ta bon i nos desprecio pa loke ta malu lo bira mas fuerte. Naturalmente, miéntras tantu nos tin cu keda vigilá manera Jesus a manda, i haci oracion constant pa nos scapa di tentacion i libra for dje malbado.—Mateo 6:13; 1 Tesalonicensenan 5:17.

Bisa No na Preshon di Pareu

Preshon di pareu ta un otro influencia cu ta hiba na malecho. Un hóben a confesá: “Mi ta hiba un bida dòbel—unu na cas i unu na scol. Na scol mi ta anda cu muchanan cu casi tur biaha cu nan habri nan boca, ta palabra malu ta skeiru. I mi ta birando ègt mescos cu nan. Kico mi tin cu haci?” Loke ta necesario ta e curashi pa ta diferente, i un manera pa obten’é ta dor di lesa i meditá riba relatonan bíblico cu ta conta nos tocante Dios su sirbidónan leal manera Josef. Otro ehempelnan excelente ta Daniel, Sadrac, Mesac i Abednego, cuater hóben cu tabatin e curashi pa ta diferente for di nan pareunan.

Miéntras nan tabata haña educacion huntu cu otro hóbennan den e corte real di Babilonia, e cuater hóbennan aki mester a come “un porcion diario for dje alimentonan exkisito di rey.” Dor cu nan no kier a violá aspectonan dje Ley di Moises relacioná cu cuminda, nan a nenga e alimento aki. Esei a exigí fortalesa—i mas ainda ya cu e cumindanan tabata “alimentonan exkisito di rey,” nan tabata probablemente hopi tentador. Esta un excelente ehempel e hóbennan aki a pone pa cristiannan djawe cu kisas ta haña nan den tentacion, asta bou di preshon, pa bebe alcohol di mas of usa droga of tabaco!—Daniel 1:3-17.

Sadrac, Mesac i Abednego a demostrá tambe e berdad di loke Jesucristo a bisa despues: “E persona fiel den loke ta mínimo ta fiel tambe den loke ta hopi.” (Lucas 16:10) Nan posicion di curashi relacioná cu cuminda, algu relativamente chikitu, i e resultado excelente cu Jehova a duna, sin duda a fortalecé nan pa un prueba mas serio cu a bini despues. (Daniel 1:18-20) E prueba ei a bini ora a ordená nan, bou di menasa di morto den candela, pa tuma parti den idolatria. Yen di curashi, e tres hóbennan a keda decididu pa adorá Jehova so i pa confia plenamente den dje sea cual sea e resultado. Jehova a bendicioná nan un bes mas pa nan fe i curashi—e biaha aki el a protehá nan milagrosamente for dje vlamnan ora nan a ser tirá den e fornu super cayente.—Daniel 3:1-30.

E Palabra di Dios ta contené hopi otro ehempel di esnan cu a bisa no na malecho. Moises a nenga di ser “yamá yu dje yu muher di fárao,” maske esaki lo a dun’é oportunidad amplio pa “disfrutá temporalmente di picá” cuantu cu e kier na Egipto. (Hebreonan 11:24-26) Profeta Samuel a nenga di abusá di su autoridad dor di aceptá soborno. (1 Samuel 12:3, 4) Cu curashi e apostelnan di Jesucristo a bisa no, ora nan a haña ordu pa stop di predicá. (Echonan 5:27-29) Cu firmesa Jesus mes a bisa no na tur malecho, asta te na e último momentonan di su bida ora e soldánan a ofrec’é “biña drogá cu mira.” Si el a acept’é, esei lo por a debilitá su determinacion na un tempu crucial asina.—Marco 15:23; Mateo 4:1-10.

Bisa No—Un Asuntu di Bida i Morto

Jesus a bisa: “Drenta p’e porta smal; pasobra hanchu i espacioso ta e caminda cu ta hiba na destruccion, i hopi ta esnan cu ta drenta dor di dje; miéntras cu smal ta e porta i pertá e caminda cu ta hiba na bida, i poco ta esnan cu ta hañ’é.”—Mateo 7:13, 14.

E caminda hanchu ta popular pasobra ta fácil pa cana riba dje. Esnan cu ta cana riba dje ta gusta complacé nan mes, ta entregá na pensamentu i conducta carnal, i nan no kier ta diferente. Mas bien, nan kier adaptá nan n’e mundu di Satanas. Nan ta haña cu Dios su ley i principionan ta restringí nan moralmente. (Efesionan 4:17-19) Tog, Jesus a bisa specíficamente cu e caminda hanchu lo hiba “na destruccion.”

Pero di con Jesus a bisa cu ta poco hende so ta scoge e caminda pertá? Na promé lugá, ta un minoria so kier pa ley i principionan di Dios goberná nan bida i yuda nan resistí e cantidad di incentivonan cu ta hiba na malecho i e oportunidadnan pa haci malu cu ta existí rondó di nan. Ademas, na comparacion, un par so ta dispuesto pa lucha contra mal deseo, preshon di pareu i miedu di mofa cu lo por bini den nan direccion debí n’e caminda cu nan a scoge.—1 Pedro 3:16; 4:4.

E personanan aki ta comprendé bon-bon con apostel Pablo a sinti ora el a describí e lucha cu e tabatin pa bisa no na picá. Mescos cu e mundu djawe, e mundu romano i griego di tempu di Pablo a percurá un caminda hanchu di oportunidad pa cometé malecho na abundancia. Pablo a splica cu su mente—cu tabata sa loke ta bon—tabatin un ‘lucha’ continuo contra su carni, cu sí tabata incliná na cometé malecho. (Romanonan 7:21-24) Sí, Pablo tabata sa cu su curpa tabata un bon sirbidó pero un mal doño, p’esei el a siña bis’é no. “Mi ta dominá mi curpa i ta hib’é manera un esclabo,” el a skirbi. (1 Corintionan 9:27) Con el a logra un dominio asina? No cu su mes forsa, cual no tabata suficiente pa cumpli cu e tarea aki, sino cu yudansa dje spiritu di Dios.—Romanonan 8:9-11.

Como resultado, aunke Pablo tabata imperfecto, e por a mantené su integridad na Jehova te na fin. No muchu tempu promé cu su morto, e por a skirbi: “Mi a lucha e lucha excelente, mi a core e careda te na fin, mi a observá e fe. Dje tempu aki padilanti tin reservá pa mi e corona di husticia.”—2 Timoteo 4:7, 8.

Segun cu nos ta lucha contra nos imperfeccionnan, nos tin gran ehempelnan animador, no for di Pablo so, sino di tur esnan cu a sirbi como ehempel p’e, esta, Josef, Moises, Daniel, Sadrac, Mesac, Abednego i hopi otro mas. Aunke nan tabata hende imperfecto, cada un dje hombernan di fe aki a bisa no na malecho. Nan no a hacié debí na obstinacion of terkedad, pero pa motibu dje fortalesa moral cu e spiritu di Jehova a duna nan. (Galationan 5:22, 23) Nan tabata hombernan spiritual. Nan a anhelá cada expresion for dje boca di Jehova. (Deuteronomio 8:3) Su palabra a nificá bida pa nan. (Deuteronomio 32:47) Riba tur cos, nan tabata stima Jehova i tem’é, i cu su yudansa i cu pacenshi nan a cultivá un odio contra malecho.—Salmo 97:10; Proverbionan 1:7.

Laga nos ta manera nan. Sí, pa sigui bisa no na malecho den tur su formanan, mescos cu nan, nos tambe tin mester di Jehova su spiritu. Jehova ta duna nos su spiritu generosamente, si nos pidi p’e, studia su Palabra i asistí regularmente na reunionnan cristian.—Salmo 119:105; Lucas 11:13; Hebreonan 10:24, 25.

Timothy cu a ser mencioná na principio, tabata contentu cu e no a neglishá su necesidadnan spiritual. E hóben empleada cu a scucha Timothy su combersacion cu su colega di trabou, i cu a sinti un atraccion incorecto p’e birtud di Timothy, despues na scondí a invitá Timothy pa bin na cas ora su casá no tabat’ei. Timothy a nenga. Siendo cu e empleada no a desanimá lihé, el a ripití e invitacion na vários ocasion, mescos cu e esposa di Pótifar. Cada biaha na un manera bondadoso pero tog firme Timothy a bisa no. Asta el a duna e muher aki un excelente testimonio for dje Palabra di Dios. Profundamente gradicidu na Jehova cu el a dun’é fortalesa moral pa bisa no, awor Timothy ta felismente casá cu un compañera cristian encantador. Sí, Jehova lo bendicioná i fortificá tur cu kier mantené nan integridad cristian dor di bisa no na malecho.—Salmo 1:1-3.