Un Kambio pa e Hòmber Riku i pa Lázaro

Hesus a duna su disipelnan bon konseho tokante kon pa usa kos material. Pero no ta su disipelnan so tabata skuch’é. E fariseonan tambe tabata presente. Nan tambe mester a tuma Hesus su konsehonan na pechu. Dikon? Pasobra nan “tabata stima plaka.” No opstante, ora nan a tende loke Hesus tabata bisa, nan “a kuminsá hasi chèrchi.”—Lukas 15:2; 16:13, 14.

Ma Hesus no a laga nan intimid’é; el a bisa nan: “Boso ta esnan ku ta deklará boso mes hustu dilanti di hende, ma Dios konosé boso kurason, pasobra loke hende ta konsiderá di masha balor ta un kos repugnante den bista di Dios.”—Lukas 16:15.

Pa hopi tempu, hende a halsa e fariseonan. Pero awor, tabata tempu pa kambio. E personanan ku hende tabata halsa—esta, personanan riku òf personanan poderoso riba tereno polítiko òf religioso—tabata a punto di ser rebahá. En kambio, hende komun i koriente ku sí a rekonosé nan nesesidat spiritual lo a ser halsá. Hesus a señalá ku un kambio grandi tabata tumando lugá.

El a bisa: “Lei i e Profetanan a ser proklamá te na tempu di Huan. Djei padilanti, ta e Reino di Dios ta ser proklamá komo bon notisia, i tur tipo di hende ta hasi esfuerso pa drenta den dje. Sí, ta mas fásil pa shelu i tera kaba na nada ku pa pida di un lèter di Lei keda sin kumpli.” (Lukas 3:18; 16:16, 17) Kon e palabranan akí di Hesus a indiká ku un kambio tabata tumando lugá?

Wèl, e lidernan religioso hudiu tabata kana pretendé ku nan ta pega fielmente na e Lei di Moises. Ora Hesus a restorá bista di un hòmber na Herúsalèm, yen di orguyo e fariseonan a bisa: “Nos ta disipel di Moises. Nos sa ku Dios a papia ku Moises.” (Huan 9:13, 28, 29) Ún di e propósitonan di e Lei di Moises tabata pa guia hende humilde na e Mesías, esta, na Hesus. I Huan Boutista a identifiká Hesus komo e Lamchi di Dios. (Huan 1:29-34) Pues, for di tempu di Huan, e hudiunan humilde, spesialmente esnan pober, a tende di “e Reino di Dios.” Sí, tabatin “bon notisia” pa tur hende ku tabata ke biba bou di e Reino di Dios i risibí e bendishonnan ku e Reino akí ta trese.

E Lei di Moises a kumpli ku su propósito pasobra el a guia hende na e Mesías. Despues, hende lo no tabatin e obligashon mas di kumpli ku e Lei akí. Por ehèmpel, e Lei tabata permití hende divorsiá pa vários motibu. Pero, Hesus a mustra ku “ken ku divorsiá di su esposa i kasa ku un otro muhé ta kometé adulterio i esun ku kasa ku un muhé divorsiá for di su esposo ta kometé adulterio.” (Lukas 16:18) E fariseonan, kendenan tabata gusta traha regla pa tur kos, a rabia mashá ora Hesus a papia e palabranan akí.

Anto Hesus a kuminsá konta un ilustrashon pa resaltá e kambio grandi ku tabata tumando lugá. E ilustrashon tabata tokante dos hòmber, kendenan nan situashon a kambia drástikamente. Segun ku nos ta trata e ilustrashon, tene na mente ku entre e hendenan ku tabata skucha Hesus tabatin fariseo, kendenan tabata stima plaka i tabata ser halsá.

Hesus a bisa: “Tabatin un hòmber riku, i e tabatin kustumber di bisti paña püs i di lenen, i e tabata hiba un bida di luho i plaser. Ma e hendenan tabatin kustumber di pone un limosnero ku yama Lázaro na su porta. E hòmber akí tabata tur na yaga i tabatin gana di yena su barika ku wiriwiri ku tabata kai for di mesa di e hòmber riku. Sí, asta kachó tabata bin lembe su yaganan.”—Lukas 16:19-21.

No tabatin ningun duda na ken Hesus tabata referí ora el a papia di “e hòmber riku.” E fariseonan tabata stima plaka i tabata gusta bisti paña kostoso i luhoso. I fuera di e kosnan material ku e lidernan religioso akí por tabatin, tabata parse ku nan tabata disfrutá di hopi privilegio den sentido spiritual. Sí, e echo ku e hòmber riku tabatin kustumber di bisti paña püs, òf púrpura, ta ilustrá e posishon halsá ku e fariseonan tabatin, i lenen blanku a ilustrá e echo ku nan tabata pensa ku nan ta hustu.—Daniel 5:16.

Awor, kiko e lidernan akí, kendenan tabata riku i orguyoso, tabata pensa di hende pober, òf hende komun i koriente? Pa nan, e hendenan akí tabata amhárets, hende di tera, ku nan tabata despresiá. Segun nan, e hendenan akí no tabata konosé e Lei ni nan no tabata meresé pa hende siña nan e Lei. (Huan 7:49) E situashon di e hendenan akí tabata paresido na esun di Lázaro, e limosnero den e ilustrashon, kende tabatin gana di yena su barika ku “wiriwiri ku tabata kai for di mesa di e hòmber riku.” Pa e fariseonan, hende komun i koriente tabata hende despresiabel, komo si fuera yen di yaga den sentido spiritual.

E situashon tristu ei tabata eksistí pa un tempu kaba, pero Hesus tabata sa ku e tempu a yega pa un kambio grandi tuma lugá, tantu pa esnan ku e hòmber riku a representá komo pa esnan ku Lázaro a representá.

Siguientemente, Hesus a deskribí e kambio drástiko ku tabata tumando lugá. El a bisa: “Awor, despues di un tempu e limosnero a muri, i e angelnan a bai pon’é sinta banda di Abraham. E hòmber riku tambe a muri i a der’é. I den Graf, miéntras ku e tabatin hopi doló, el a hisa kara wak ariba i a mira Abraham leu ayá ku Lázaro sintá banda di dje.”—Lukas 16:22, 23.

E hendenan ku tabata skucha Hesus tabata sa ku Abraham tabatin hopi tempu morto kaba i ku e tabata den Graf. I e Skritura ta mustra bon kla ku hende den Graf, òf Sheol, no por papia, i esei a konta pa Abraham tambe. (Eklesiástes 9:5, 10) Awor, kiko e lidernan religioso a pensa ku Hesus tabata ke bisa ku e ilustrashon akí? Kiko Hesus tabata ke bisa tokante hende komun i koriente i tokante e lidernan religioso ku tabata stima plaka?

Hesus a kaba di papia di un kambio ora el a bisa ku ‘e Lei i e Profetanan a ser proklamá te na tempu di Huan Boutista, pero ku djei padilanti e Reino di Dios lo a ser proklamá komo bon notisia.’ Pues, ta debí na e predikashon di Huan i di Hesus, e situashon di tantu Lázaro komo esun di e hòmber riku a kambia. Sí, nan a muri den e sentido ku nan situashon a kambia. Awor, nan tabata den un posishon nobo den bista di Dios.

Pa hopi tempu, spesialmente hende pober òf humilde tabata ser neglishá den sentido spiritual. Pero debí ku Huan Boutista i despues Hesus a prediká na nan i nan di nan parti a aseptá e mensahe di Reino, nan a haña yudansa den sentido spiritual. Ántes, nan mester a keda konforme ku “wiriwiri” ku tabata kai for di mesa spiritual di e lidernan religioso. Awor, nan tabata ser alimentá ku bèrdatnan importante for di e Skritura, spesialmente e kosnan maravioso ku Hesus tabata splika nan. Tabata komo si fuera por fin nan tabatin un posishon aprobá den bista di Yehova Dios.

En kambio, e lidernan religioso ku tabata riku i ku tabatin hopi influensia a nenga di aseptá e mensahe di Reino ku Huan a proklamá i ku Hesus tabata predikando den henter e pais. (Mateo 3:1, 2; 4:17) De echo, e mensahe ei tabata pone nan rabia i tabata tormentá nan, pasobra e tabata señalá na e huisio ardiente di Dios ku tabata spera nan. (Mateo 3:7-12) Pues, e lidernan religioso, kendenan tabata stima plaka, lo a haña un gran alivio si Hesus i su disipelnan lo a stòp di proklamá e mensahe di Dios. E lidernan akí tabata manera e hòmber riku den e ilustrashon, kende a bisa: “Tata Abraham, tene miserikòrdia di mi, i manda Lázaro muha e punta di su dede den awa pa e por freska mi lenga, pasobra mi ta sufri den e vlam di kandela akí.”—Lukas 16:24.

Pero esei lo no a sosodé. Mayoria di e lidernan religioso lo no a kambia. Nan a nenga di ‘skucha Moises i e Profetanan’ ku a skirbi bèrdatnan ku lo a yuda nan aseptá Hesus komo e Mesías i e Rei ku Dios a nombra. (Lukas 16:29, 31; Galationan 3:24) Ademas, nan lo no a humiá nan mes pa skucha di e humildenan ku a aseptá Hesus su mensahe i ku tabatin Dios su aprobashon i ku por a konvensé nan. Un kos tabata sigur, Hesus su disipelnan lo no a komprometé nan mes ni suavisá e bèrdat djis pa tene konsiderashon ku e lidernan religioso i aliviá nan doló. Esaki ta un realidat ku Hesus a deskribí den su ilustrashon. Kon? Mediante e palabranan akí ku “Tata Abraham” a dirigí na e hòmber riku:

“Mi yu, kòrda ku durante bo bida bo a haña loke ta bon na abundansia, miéntras ku Lázaro a haña loke ta malu. Sinembargo, awor e ta haña konsuelo akinan, ma abo ta sufri. I fuera di tur esaki, tin un abismo grandi entre nos i boso, di manera ku esnan di e banda akí ku ke pasa bai serka boso no por, ni hende no por krusa di e banda ei bini serka nos.”—Lukas 16:25, 26.

E kambio drástiko ei tabata hustu i na su lugá! El a reflehá e kambio di posishon ku a tuma lugá entre e lidernan religioso orguyoso i e hendenan humilde ku a tuma e yugo di Hesus i ku finalmente por a ser refreská i alimentá den sentido spiritual. (Mateo 11:28-30) E kambio akí lo a bira asta mas bisto, un par di luna despues, ora e pakto di Lei lo a ser remplasá pa e pakto nobo. (Yeremías 31:31-33; Kolosensenan 2:14; Hebreonan 8:7-13) I riba Pentekòste di aña 33 di promé siglo, ora Dios lo a drama su spiritu santu, lo no a keda ningun duda ku ta e disipelnan di Hesus tabatin e aprobashon di Dios i no e fariseonan i nan kompinchinan religioso.