El A Realisá e Deseo di Su Curason
TA E deseo di bo curason pa mira e Reino Mesiánico tene dominio completo riba henter e tera? Si ta asina, bo ta anhelá i ta resa p’e bendicionnan terenal primintí bou di e Reino celestial ei. Tene pacenshi, anto, pasobra “e cos deseá ta un palu di bida ora e ta bini.”—Proverbio 13:12; Santiago 5:7, 8.
Casi 2.000 aña pasá, tabata biba den Jerusalem Simeon, e homber “hustu i reverente.” E tabatin fe den profecianan mesiánico i cu pacenshi tabata “spera e consolacion di Israel.”—Lucas 2:25.
Profecianan Mesiánico Ta Duna Speransa
Jehova tabata responsabel p’e promé profecia mesiánico—un cu a duna speransa na humanidad pecaminoso i muribundo. Dios a profetisá dje binimentu dje Simia di su “muher,” of organisacion universal.—Génesis 3:15.
Esei Esun ei a ser identificá como simia di Abraham, i Jacob a profetisá su binimentu. (Génesis 22:17, 18; 49:10) E glorianan dje Reino mesiánico a ser elogiá den e salmonan. (Salmo 72:1-20) Isaías a profetisá cu e Simia lo a nace di un bírgen, i Miqueas a profetisá cu e nacimentu lo a sosodé den Betlehem. (Isaías 7:14; Miqueas 5:2) Esakinan ta solamente algun dje hopi profecianan mesiánico.
Ainda Ningun Mesías!
Reflehá rib’e pasado, i imaginá cu e promé siglo E.C. ta acercando. Dios su profecia mesiánico original ta 4.000 aña bieu awor. E hudiunan a experimentá e destruccion dje tempel di Jehova, e desolacion di nan tera natal, un exilio di 70 aña na Babilonia i 500 aña mas di sumision na gobernantenan pagano. Ainda ningun Mesías!
Cuantu e hudiunan temeroso di Dios a anhelá p’e binimentu dje Mesías! Lo el a drama su bendicion riba nan i tur nacion.
Un Homber Reverente
Entre e hudiunan reverente anhelando i resando p’e binimentu dje Mesías tin Simeon, un fiel sirbidor di Jehova di edad avansá, bibando den e stad capital di Hudea. Algu special a sosodé cu Simeon.
Dios a pone su spiritu santu riba Simeon i a recompens’é cu un revelacion. Simeon lo no mira morto promé cu e mira Esun cu lo ta e Mesías. Pero dianan i lunanan ta pasando. Simeon ta birando bieu i apénas por spera di biba mas largu. E promesa di Dios na dje lo ser cumplí?
Un dia (na 2 P.E.C.), un pareha casá hóben cu un baby ta bini n’e tempel for di Betlehem. Spiritu santu ta revelá na Simeon cu esaki ta e dia tan sperá. E ta bai n’e tempel unda lo e mira Esun di ken e profetanan a skirbi. Purando mes lihé cu su curpa bieu ta permití, e ta mira José, Maria i e mucha.
Cu ki goso Simeon ta tuma e mucha Jesus den su brasanan! Esun aki lo ta e Mesías primintí—“e Cristo di Jehova.” Na un edad asina avansá, Simeon no por spera pa mira Jesus cumpli cu Su mision terenal. Tog, ta maraviyoso pa mir’é como baby. Profecianan mesiánico ta cuminsá haña cumplimentu. Ki felis Simeon ta! Awor lo e ta contentu pa drumi den morto te n’e resureccion.—Lucas 2:25-28.
Simeon Su Palabranan Profético
Segun cu Simeon ta halsa su bos den alabansa na Jehova, nos ta tend’é bisa: “Awor, Soberano Señor, bo ta laga bo esclabo bai liber den pas segun bo declaracion; pasobra mi wowonan a mira bo medio di salba cu bo a prepará den bista di tur pueblo, un lus pa kita e belo for dje nacionnan i un gloria pa bo pueblo Israel.” José, Jesus Su tata di criansa, i Maria, Su mama, ta sigui straña tocante e palabranan aki.—Lucas 2:29-33.
Simeon su semblante ta briyante segun cu e ta bendicioná José i Maria, evidentemente deseando nan Jehova su bendicion den cumplimentu cu nan responsabilidadnan pa cu e yu. Despues e homber bieu su cara ta bira serio. Dirigiendo su comentarionan na Maria so, e ta agregá: “Mira! Esun aki ta poní p’e caimentu i lantamentu atrobe di hopi den Israel i pa un señal contra cua lo ser papiá (sí, un spada largu lo traspasá e alma di bo mes), p’e razonamentu di hopi curason ser descubrí.”—Lucas 2:34, 35.
E Declaracion di Simeon na Maria
Imaginá bo con Maria a sinti. Kico Simeon tabata kier men? Algun lo a aceptá Cristo i ser lantá for di nan estado ya decaí. Sin embargo, otronan lo a rechas’é, trompecá riba dje i cai. Manera a ser profetisá, Jesus a resultá di ta un piedra di tropieso pa hopi hudiu. (Isaías 8:14; 28:16) E palabranan di Simeon no ta nificá cu israelitanan individual lo cai promé den incredulidad i despues lanta den credulidad dor di aceptá Jesus. Mas bien, reaccionnan na dje lo varia cu diferente individuo, descubriendo e razonamentunan di hopi curason i hibando nan na Dios su huicio pa bon of pa malu. Pa esnan incrédulo, lo e ta manera un señal, of un obheto di desprecio. Dor di pone fe den dje, otronan lo ser lantá for di un estado morto den delitu i picá pa disfrutá di un posicion hustu cu Dios. E accionnan di hende pa cu e Mesías lo mustra kico tabatin den nan curason.
Kico dje palabranan di Simeon: “Un spada largu lo traspasá e alma di bo mes”? No tin ningun indicacion bíblico cu un berdadero spada a traspasá Maria. Pero, rechaso di Jesus dor dje mayoria lo a afligi’é. I ki penoso tabata pa Maria mira Jesus clabá na un staca! Esaki tabata manera un spada a traspas’é.
Simeon Ta Aplicá Profecianan Mesiánico
E spiritu di Dios a impulsá Simeon pa aplicá profecianan mesiánico na Jesus. Simeon por a bandoná su bida den pas of trankilidad, ‘debí cu su wowonan a mira Dios su medio di salba cu El a prepará den bista di tur pueblo, un lus pa kita e belo for dje nacionnan i un gloria pa Su pueblo Israel.’ (Lucas 2:30-32) Ki bon esaki a aplicá n’e palabranan profético di Isaías!
E profeta ei a profetisá: “E gloria di Jehova siguramente lo ser revelá, i tur carni mester mir’é huntu.” “Ami [Jehova] tambe a duná bo [e Mesías] pa un lus dje nacionnan, pa mi salbacion yega te n’e extremo dje tera.” (Isaías 40:5; 42:6; 49:6; 52:10) E Scritura Griego Cristian i e echonan físico a confirmá desde e tempu ei cu e Mesías, Jesucristo, ta e berdadero lus dje nacionnan, Esun pa kita e belo di scuridad spiritual i trece salbacion n’e pueblo.
E Palabra di Dios no ta bisa nada mas tocante e anciano Simeon. Evidentemente, el a muri promé cu Cristo a habri e caminda pa bida celestial. Pronto, anto, Simeon lo ser resucitá na bida riba tera. Ki un goso e—i abo—por experenciá den e mundu nobo bou di Dios su Reino mesiánico!