E Importansia di Orashon i Humildat

Anteriormente, Hesus a konta su disipelnan un ilustrashon ku ta mustra e importansia di persistí den orashon. (Lukas 11:5-13) Awor ku e tabata na Samaria òf Galilea, el a bolbe enfatisá e importansia di perseverá den orashon. El a konta su disipelnan e siguiente ilustrashon:

“Den un stat tabatin un hues ku no tabatin temor di Dios, ni e no tabatin kunes ku hende. Den e stat ei tabatin tambe un biuda ku tabata blo bini serka dje i pidié: ‘Yuda mi haña hustisia den un kaso ku mi tin kontra un hende.’ Wèl, pa basta tempu e hues no kier a yud’é, ma despues el a bisa den su mes: ‘Maske mi no tin temor di Dios, ni mi no tin kunes ku hende, komo ku e biuda akí ta sigui molestiá mi, lo mi sòru pa e haña hustisia, ya e no ta keda bin kansa mi te ora mi no por mas.’”—Lukas 18:2-5.

Despues, Hesus a duna aplikashon di e ilustrashon, bisando: “Tende bon kiko e hues a bisa, maske e ta inhustu! Akaso Dios lo no sòru pa su skohínan, ku di dia i anochi ta sklama na dje, haña hustisia? Dios lo hasi esaki sigur, maske por parse ku e ta tarda, pasobra e tin pasenshi ku nan.” (Lukas 18:6, 7) Kiko Hesus tabata ke bisa di su Tata?

Hesus sigur no tabata ke men ku Yehova Dios ta manera e hues inhustu ei. Simplemente, e tabata ke mustra un kontraste: Si asta un hues inhustu ta kontestá hende ku ta persistí, Yehova lo no hasi esei muchu mas ainda? Sí, Yehova ta un Dios hustu i bon; e ta kontestá esnan ku ta perseverá den orashon. Nos por komprondé esei for di e siguiente palabranan di Hesus: ‘Mi ta bisa boso: Dios lo sòru pa nan haña hustisia rápidamente.’—Lukas 18:8.

Hopi biaha, hende ta faboresé hende riku i poderoso i ta trata hende pober i humilde na un manera inhustu. Pero Yehova sí no ta hasi asina. I na e debido tempu, lo e duna hende malbado nan kastigu i su sirbidónan bida eterno.

Ken tin fe manera e biuda den e ilustrashon? Kuantu hende ta kere di bèrdat ku Dios lo “sòru pa nan haña hustisia rápidamente”? Hesus a kaba di ilustrá e importansia di perseverá den orashon. I relashoná ku e fe ku hende mester tin den e poder di orashon, el a puntra: “Ora e Yu di hende bini, di bèrdat lo e haña e tipo di fe akí riba tera?” (Lukas 18:8) Loke Hesus tabata ke men ta ku poko hende lo tabatin e fe ei ora e bolbe.

Algun di e hendenan ku tabata skucha Hesus tabata sinti ku nan sí tabatin e tipo di fe ei. Nan tabata konvensí ku nan tabata personanan hustu, pero en realidat nan tabata menospresiá otro hende. P’esei, Hesus a dirigí su mes na e hendenan akí i a konta e siguiente ilustrashon:

“Dos hòmber a subi bai tèmpel pa hasi orashon; ún tabata fariseo i e otro, kobradó di belasting. E fariseo a lanta para i a kuminsá hasi orashon asin’akí den su mes: ‘O Dios, mi ta gradisí bo ku mi no ta manera otro hende—ladron, inhustu, ku ta kometé adulterio—ni tampoko manera e kobradó di belasting akí. Mi ta yuna dos biaha pa siman, i mi ta duna un désimo parti di tur loke mi haña.’”—Lukas 18:10-12.

E fariseonan tabata gusta duna e impreshon ku nan tabata hende masha hustu. Nan tabata hasi esei djis pa impreshoná hende. Nan tabatin e kustumber di yuna riba djaluna i djaweps. Dikon? Pasobra riba e dianan ei tabata drùk na e marshenan grandi i hopi hende por a mira nan. Nan tabata asta duna un diesmo di mata chikitu. (Lukas 11:42) Pero nan tabata despresiá hende komun i koriente. Algun luna promé, nan a ekspresá e despresio ei, bisando: “E hendenan akí, ku no konosé Lei [na e manera ku e fariseonan tabata interpretá esaki], ta maldishoná.”—Huan 7:49.

Hesus a sigui ku su ilustrashon: “Pero e kobradó di belasting, pará na un distansia, no kier a ni hisa su kara na shelu, ma e tabata blo bati su pechu i bisa: ‘O Dios, tene miserikòrdia di mi, un pekadó.’” Sí, humildemente, e kobradó di belasting a rekonosé su fayonan. Anto Hesus a konkluí: “Mi ta bisa boso: E hòmber akí a baha bai su kas mas hustu ku e otro hòmber, pasobra ken ku halsa su mes lo keda humiá, ma esun ku humiá su mes lo keda halsá.”—Lukas 18:13, 14.

Pues, Hesus a mustra bon kla e importansia di humildat. E konseho akí sigur a benefisiá su disipelnan ku a lanta den un komunidat kaminda fariseo, kendenan tabata hustu den nan mes bista, tabata enfoká hopi riba posishon i rango. Ademas, e konseho akí ta importante pa tur siguidó di Hesus.