E Apòstelnan A Pidi un Señal

Tabata djamars atardi lat, dia 11 di nisan. Hesus su sirbishi aki riba tera tabata yegando su final. Durante e último dianan ku a pasa, e tabata sumamente okupá. Den dia, e tabata siña e hendenan den tèmpel, i anochi e tabata keda na un lugá pafó di e stat. E hendenan tabata masha interesá den e mensahe ku Hesus tabata prediká pasobra nan tabata “bini mainta trempan serka dje den tèmpel pa skuch’é.” (Lukas 21:37, 38) Pero awor, Hesus tabata sintá riba Seru di Oleifi huntu ku kuater di su apòstelnan: Pedro, Andres, Santiago i Huan.

Nan a bin papia den privá ku Hesus. Nan a keda preokupá pasobra mas promé Hesus a bisa ku ni ún piedra di e tèmpel lo no a keda riba otro. Pero tabatin mas kos ku tabata preokupá nan. Kiko asina? Wèl, anteriormente, Hesus a urgi su disipelnan pa nan ta “prepará, pasobra e Yu di hende ta bini na un ora ku [nan] no ta kere.” (Lukas 12:40) Hesus a papia tambe di “e dia ku e Yu di hende [lo] keda revelá.” (Lukas 17:30) E apòstelnan tabatin masha gana di sa si e kosnan ei tabatin di haber ku loke el a kaba di bisa tokante e tèmpel. P’esei, nan a pidi Hesus: “Bisa nos: Ki dia e kosnan akí lo sosodé, i kiko lo ta e señal di bo presensia i di konklushon di e era akí?”—Mateo 24:3.

Podisé nan tabatin e destrukshon di e tèmpel, ku nan tabata por a mira for di kaminda nan tabata, na mente. Nan a puntra tambe tokante e presensia di e Yu di hende. Podisé nan a kòrda riba e ilustrashon di Hesus tokante “un hòmber di nasementu noble” ku “a biaha bai un tera leu pa keda koroná komo rei i bini bèk.” (Lukas 19:11, 12) I por último, nan tabata ke sa kiko e “konklushon di e era” ta enserá.

Wèl, Hesus a kontestá nan preguntanan na un manera detayá. El a duna nan un señal ku a indiká na ki tempu e fin di e sistema hudiu i e destrukshon di e tèmpel lo a tuma lugá. Pero esei no tabata tur kos. Ku yudansa di e señal ku el a duna, kristiannan den futuro lo por a haña sa na ki tempu e “presensia” di Kristu i e último dianan di e era malbado lo a kuminsá.

Atraves di añanan, e apòstelnan lo a mira kumplimentu di Hesus su profesia. I en bèrdat, hopi di e kosnan ku Hesus a profetisá a kuminsá kumpli den nan tempu. Pues, ora e fin di e sistema hudiu i e destrukshon di e tèmpel a yega na aña 70 di promé siglo (un 37 aña despues), esaki no a kue e kristiannan ku a keda alerta di sorpresa. Pero no ta tur loke Hesus a profetisá a kumpli na aña 70 di promé siglo i algun tempu promé. Awor, kiko lo a indiká Kristu su presensia komo Rei den e Reino di Dios? Esei tambe Hesus a revelá na su apòstelnan.

Hesus a bisa ku lo tin “guera den vários lugá” i ku “nashon lo lanta kontra nashon i reino kontra reino.” (Mateo 24:6, 7) El a bisa ku lo tin ‘temblor grandi, i den un lugá tras di otro pèst [malesa] i skarsedat di kuminda.’ (Lukas 21:11) Ademas, el a spièrta su disipelnan, bisando: ‘Hende lo pone man riba boso i persiguí boso.’ (Lukas 21:12) El a mustra tambe ku lo tin hopi profeta falsu ku lo gaña hopi hende, ku maldat lo oumentá i ku amor di hopi hende lo fria. I el a bisa tambe ku ‘e bon notisia di e Reino lo ser prediká den henter e tera habitá, komo testimonio pa tur nashon, anto e fin lo yega.’—Mateo 24:14.

Ta bèrdat ku e profesia detayá akí di Hesus a kumpli en parte promé i durante e destrukshon di Herúsalèm na man di e romanonan. Pero Hesus su profesia tin un kumplimentu mayor. Bo ta mira kon esaki ta tumando lugá den e tempu ku nos ta bibando?

Un di e kosnan ku Hesus a menshoná komo parti di e señal di su presensia ta “e ‘kos repugnante’ ku ta kousa destrukshon.” (Mateo 24:15) Na aña 66 di promé siglo, e kos repugnante tabata e ehérsito romano, ku su símbolonan di idolatria. Sí, e romanonan a rondoná Herúsalèm i a debilitá algun di su murayanan. (Lukas 21:20) Pues, “e kos repugnante” tabata pará kaminda e no mester tabata, esta, na un sitio ku e hudiunan tabata konsiderá “un lugá santu.”

Hesus a sigui bisa: “Lo tin un tribulashon grandi manera no a yega di sosodé nunka, for di prinsipio di mundu te awor, i ku lo no sosodé nunka mas tampoko.” Na aña 70 di promé siglo, e romanonan a destruí Herúsalèm, e “stat santu” di e hudiunan, i su tèmpel i a mata míles i míles di hende. Esaki sigur tabata un tribulashon grandi. (Mateo 4:5; 24:21) Nunka promé e hudiunan ni nan stat no a yega di eksperensiá un destrukshon asina devastador. E destrukshon ei a asta pone un fin na e areglo pa rindi adorashon na Dios ku e hudiunan tabatin siglonan ta sigui. Pues, den futuro, e kumplimentu mayor di e profesia akí sin duda lo ta horibel!

Ainda Hesus tabatin mas detaye pa duna su apòstelnan tokante e señal di su presensia komo Rei den e Reino di Dios i di e fin di e era malbado. Siguientemente, el a spièrta nan pa nan no bai tras di “Kristu falsu i profeta falsu.” El a bisa nan ku e personanan akí lo purba di “gaña asta e skohínan, si ta posibel.” (Mateo 24:24) Pero, e skohínan lo no ser engañá. Hende por mira ken ta Kristu falsu. En kambio, Hesus su presensia sí lo no ta visibel.

Anto relashoná ku e tribulashon grandi ku lo tin na fin di e era, Hesus a bisa: “Solo lo bira skur, luna lo no duna su lus, strea lo kai for di shelu i e podernan di shelu lo keda sagudí.” (Mateo 24:29) Ora e apòstelnan a tende e deskripshon spantoso akí, probablemente nan no tabata sa kiko presis lo sosodé den futuro. Pero e suseso ei sigur lo shòk hende.

Awor, ki efekto e susesonan akí lo tin riba hende? Hesus a bisa: ‘Hende lo desmayá di miedu i di ansha pa e kosnan ku lo bini riba e tera habitá, pasobra e podernan di shelu lo keda sagudí.’ (Lukas 21:26) Asina, Hesus a deskribí loke lo bira e periodo di mas skur di historia humano.

Ta animante pa sa ku Hesus a laga e apòstelnan komprondé ku no ta tur hende lo bati nan pechu di tristesa ora ku ‘e Yu di hende bini ku poder i gran gloria.’ (Mateo 24:30) Sí, manera Hesus a indiká kaba, Dios lo intervení na fabor “di e skohínan.” (Mateo 24:22) Kon Hesus su disipelnan fiel mester reakshoná ora e kosnan spantoso akí ku Hesus a profetisá kuminsá tuma lugá? Wèl, Hesus a enkurashá su disipelnan, bisando: “Ora e kosnan akí kuminsá sosodé, para stret i lanta boso kabes, pasobra boso liberashon ta yegando serka.”—Lukas 21:28.

Awor, kon e disipelnan di Hesus ku ta biba den e tempu di fin por sa kon serka e fin akí ta? Pa un kontesta riba e pregunta akí, laga nos wak e ilustrashon tokante un palu di figu ku Hesus a konta su disipelnan. El a bisa: “Asina ku su taki nobo sprùit i saka blachi, boso sa ku zomer ta serka. Asina tambe, ora boso mira tur e kosnan akí, boso por ta sigur ku e Yu di hende ta serka, sí, djis tras di porta. Di bèrdat mi ta bisa boso ku e generashon akí lo no kaba na nada promé ku tur e kosnan akí tuma lugá.”—Mateo 24:32-34.

Pues, ora Hesus su disipelnan mira kumplimentu di e vários aspektonan di e señal, nan por sa ku e fin ta serka. Anto Hesus a duna e disipelnan ku lo ta na bida durante e tempu históriko ei e siguiente spièrtamentu:

“Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so. Pasobra meskos ku e dianan di Noe tabata, asina presensia di e Yu di hende lo ta. Pasobra meskos ku den e dianan ei promé ku e Diluvio, hende tabata kome i bebe, hòmber i muhé tabata kasa, te riba e dia ku Noe a drenta den arka, i nan no a hasi kaso te ora e Diluvio a bini i lastra nan tur bai kuné; asina presensia di e Yu di hende lo ta.” (Mateo 24:36-39) Aki Hesus tabata kòrda su oyentenan ku e diluvio históriko ku a tuma lugá den tempu di Noe tabatin un impakto global. Pues, e fin di e era lo ta meskos.

E apòstelnan ku tabata skucha Hesus riba Seru di Oleifi sin duda a mira e importansia di keda alerta. Hesus a bisa nan: “Presta atenshon na boso mes pa boso kurason nunka bira demasiado kargá ku komementu di mas, bebementu di mas i e inkietutnan di bida, i diripiente e dia ei sorprendé boso manera un trampa. Pasobra lo e bini riba tur esnan ku ta biba riba superfisie di tera. Pues, keda lantá, suplikando Dios tur ora bai pa boso por logra skapa di tur e kosnan akí ku sigur lo sosodé i pa boso por para dilanti di e Yu di hende.”—Lukas 21:34-36.

Un biaha mas, Hesus a mustra bon kla ku loke e tabata profetisá lo tabatin un kumplimentu mayor. E no tabata papia di susesonan ku lo a tuma lugá denter di algun dékada i ku lo a afektá Herúsalèm òf e nashon hudiu so. Mas bien, e tabata papia di susesonan ku lo tabatin i ku lo tin efekto “riba tur esnan ku ta biba riba superfisie di tera.”

Hesus a bisa ku su disipelnan mester keda vigilá i ta prepará. Anto pa enfatisá esaki, el a konta un otro ilustrashon. El a bisa: “Boso por ta sigur di esaki: Si e doño di kas sa ki ora di anochi un ladron ta bini, lo e keda lantá i lo no lag’é kibra drenta den su kas. P’esei, boso tambe wak pa boso ta prepará, pasobra e Yu di hende ta bini na un ora ku boso no ta pensa.”—Mateo 24:43, 44.

Siguientemente, Hesus a mustra su disipelnan ku nan tin bon motibu pa keda optimista. El a sigurá nan ku, ora su profesia ta haña kumplimentu, lo tin un “esklabo” ku lo ta alerta i aktivo. El a splika esaki usando un situashon ku tabata fásil pa e apòstelnan komprondé. El a bisa: ‘Ken realmente ta e esklabo fiel i prudente ku su doño a nombra riba su sirbidónan di kas pa duna nan nan kuminda na e debido tempu? Felis e esklabo ei ta si ora su doño yega, e hañ’é ta hasi esei. Di bèrdat mi ta bisa boso: Lo e nombr’é riba tur su pertenensianan.’ Pero, si e “esklabo” akí kultivá un mal aktitut i maltratá otro hende, e doño lo “dun’é e kastigu di mas severo.”—Mateo 24:45-51; kompará ku Lukas 12:45, 46.

No opstante, Hesus no tabata insinuá ku algun siguidó di dje lo a bira malbado. Kiko Hesus tabata ke siña su disipelnan anto? Wèl, e tabata ke pa nan keda vigilá i aktivo, manera el a enfatisá den un otro ilustrashon.