Ta Ora Caba pa Bo Lanta!

“NO EKIBOCA boso mes tocante e época den cua nos ta biba; ta ora caba pa nos lanta for di nos soño.” (Romanonan 13:11, Knox) Apostel Pablo a skirbi e palabranan ei n’e cristiannan na Roma rond di 14 aña promé cu e fin catastrófico dje sistema di cosnan hudiu na 70 E.C. Dor cu cristiannan hudiu tabata spiritualmente lantá, nan no tabata den Jerusalem n’e tempu crucial ei. P’esei, nan a scapa di morto of sclabitud. Pero con nan por a sa cu nan mester a sali i keda leu for dje stad?

Jesucristo a spierta cu enemigunan lo a rondoná Jerusalem i cu su habitantenan lo a ser tirá abou na suela. (Lucas 19:43, 44) Despues di esei, Jesus a duna su siguidónan fiel un señal consistiendo di diferente rasgo cu no tabata difícil pa reconocé. (Lucas 21:7-24) P’e cristiannan cu tabata biba den Jerusalem, bandoná e stad a nificá bandoná cas i trabou. No obstante, e echo cu nan tabata alerto i a hui, a conserbá nan bida.

Ora Jesus a predicí e destruccion di Jerusalem, su disipelnan a puntra: “Na ki tempu e cosnan aki lo ta, i kico lo ta e señal di bo presencia i dje conclusion dje sistema di cosnan?” (Mateo 24:3) Den su contesta, Jesus a compará su futuro presencia cu e periodo promé cu e Diluvio mundial den dia di Noe. Jesus a mustra cu e Diluvio a bari tur e malbadonan. (Mateo 24:21, 37-39) Asina el a indicá cu Dios lo a intervení un bes mas den asuntunan humano. Te na ki grado? Wel, te n’e punto di eliminá henter un mundu, of sistema di cosnan malbado! (Compará cu 2 Pedro 3:5, 6.) Esei lo por pasa den nos tempu?

Tur Cos Ta Mescos Ainda?

Masha poco hudiu di promé siglo hamas por a imaginá nan cu nan stad santu, Jerusalem, lo a ser destruí. Hende cu ta biba banda di un volcan pero cu no a mira un erupcion nunca, tampoco ta kere cu un dia lo e drenta accion. “No durante mi bida” ta un reaccion comun ora duna advertencia. E volcanólogo Lionel Wilson ta splica: “Típicamente volcannan tin erupcion cada dos of tres siglo. Si bo mayornan tabatin cu muda debí na un erupcion, bo ta wòri. Pero si el a sosodé cu bo welonan, e ora ei e no ta dje relevante ei.”

Pero, informacion exacto por yuda nos reconocé señalnan di peliger i tuma nan na serio. Di esnan cu a hui for di Mont Pelée, un di nan tabata conocé volcan i a comprendé e señalnan di peliger. E señalnan ei tambe a ser interpretá corectamente djis promé cu e erupcion di Ceru Pinatubo. E volcanólogonan cu tabata controlá e forsanan invisibel cu tabata aumentá parti paden dje ceru a convencé e hendenan local pa bandoná e área.

Naturalmente, semper tin algun hende cu lo ignorá señalnan di peliger i insistí cu nada ta bai pasa. Nan asta por haci mofa di esnan cu ta tuma accion decisivo. Apostel Pedro a predicí cu un punto di bista asina lo ta comun den nos tempu. El a bisa: “Boso sa esaki promé, cu den e último dianan lo bini mofadónan cu nan mofa, i lo procedé segun nan mes deseonan i bisando: ‘Unda e presencia primintí di dje ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde e principio di creacion.’”—2 Pedro 3:3, 4.

Abo ta kere cu nos ta den “e último dianan”? Den The Columbia History of the World, John A. Garraty i Peter Gay ta puntra: “Nos ta mirando e colapso di nos civilisacion?” Anto e historiadónan aki ta analisá e problemanan di gobernacion, e aumento mundial di crímen i desobedencia civil, e decadencia di bida di famia, e fracaso di ciencia i tecnologia pa resolvé problemanan di sociedad, e crísis di autoridad, i e degeneracion moral i religioso rond mundu. Nan ta concluí: “Si esakinan no ta e señalnan di un fin definitivo, nan sigur ta parc’é mashá.”

Nos tin motibu sólido pa kere cu un “fin” ta inminente. No, nos no tin nodi tene miedu di un fin dje planeta mes, pasobra Bijbel ta bisa cu Dios “a funda e tera riba su lugá establecí; lo no lagu’é tambaleá te na tempu indefiní, ni pa semper.” (Salmo 104:5) Tog, nos mester spera un fin pronto n’e mal sistema di cosnan aki cu a causa humanidad asina tantu miseria. Pakico? Pasobra nos por mira hopi rasgo evidente cu ta identificá e último dianan dje sistema aki, manera Jesucristo a describí. (Mira e cuadro “Algun Rasgo dje Ultimo Dianan.”) Pakico no compará Jesus su palabranan cu sucesonan di mundu? Esei lo por yudá bo tuma decisionnan sabí pa bo mes i bo famia. Pero pakico tuma accion awor aki mes?

Tin un Necesidad Real pa Keda Lantá

Aunke científiconan por sa ki ora un erupcion volcánico ta inminente, nan no por bisa precis ki ora lo e tuma lugá. Di igual manera, relacioná cu e fin dje sistema di cosnan aki, Jesus a bisa: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata.” (Mateo 24:36) Siendo cu nos no sa exactamente ki ora e sistema di cosnan actual lo terminá, Jesus a duna nos e spiertamentu aki: “Sabi un cos, cu si e doño di cas tabata sa den ki warda e ladron tabata pa bini, lo el a keda lantá i lo no a permitié kibra drenta su cas. P’e motibu aki, boso tambe demostrá cu boso ta cla, pasobra na un ora cu boso no ta pensa cu e ta, e Yu di hende [Jesus] ta bini.”—Mateo 24:43, 44.

E palabranan di Jesus ta mustra cu e fin cataclísmico dje sistema aki lo coge e mundu aki di sorpresa. Asta si nos ta siguidó di Jesus, nos tin cu ‘demostrá cu nos ta cla.’ Nos situacion ta manera di un doño di cas cu lo por ser sorprendí pasobra e no sa ki ora un ladron lo kibra drenta su cas.

Di igual manera, apostel Pablo a bisa e cristiannan na Tesalónica: “Boso mes sa bon cla cu e dia di Jehova ta bini exactamente manera un ladron den anochi. . . . Boso, rumannan, no ta den scuridad, p’e dia ei alcansá boso manera ladron.” Tambe Pablo a urgi: “Laga nos no sigui drumi manera e otronan, sino laga nos keda lantá i mantené nos huicio.” (1 Tesalonicensenan 5:2, 4, 6, nota) Kico kier men “keda lantá i mantené nos huicio”?

Distinto dje huida di e cristiannan di promé siglo for Jerusalem, nos huida na siguridad no ta encerá bandoná un cierto stad. Despues cu Pablo a insta su compañeronan creyente na Roma pa lanta for di soño, el a urgi nan pa “kita e obranan cu ta pertenecé na scuridad” i “bisti Señor Jesucristo.” (Romanonan 13:12, 14) Dor di sigui e pasonan di Jesus cu sumo cuidou i atencion, nos lo mustra cu nos ta lantá pa loke ta e tempu aki, i e alerta spiritual aki lo permití nos ricibí proteccion divino ora e mal sistema di cosnan aki yega na un fin.—1 Pedro 2:21.

Esnan cu ta sigui Jesucristo tin un bida significativo i satisfaciente. Miyones di Testigo di Jehova a descubrí cu e yugo di ser un disipel cristian ta unu bondadoso i refrescante. (Mateo 11:29, 30, nota) E promé paso pa bira un disipel ta pa ‘gana conocimentu di Dios i di esun cu el a manda, Jesucristo.’ (Juan 17:3) E Testigonan ta bishitá miyones di cas tur siman pa por yuda hende gana “un conocimentu exacto dje berdad.” (1 Timoteo 2:4) Nan lo ta contentu pa studia Bijbel grátis cu bo na bo cas. I segun cu bo ta crece den conocimentu dje Palabra di Dios, sin duda bo tambe lo keda convencí cu nos dianan ta diferente. Sí, ta ora caba pa lanta for di soño!

[Kuadro/Plachinan na página 7]

ALGUN RASGO DJE ULTIMO DIANAN

“Nacion lo lanta contra nacion”; ‘lo kita pas for dje tera.’ (Mateo 24:7; Revelacion 6:4)

E dos gueranan mundial dje siglo aki, huntu cu decenas di otro conflicto, a kita pas for dje tera. “E Promé—i tambe e Segundo—Guera Mundial tabata diferente for di tur guera bringá anteriormente,” e historiadó John Keegan ta skirbi, “diferente na escala, intensidad, alcanse i costo material i humano. . . . E Gueranan Mundial a mata mas hende, a consumí mas rikesa i a causa mas sufrimentu riba un área mas grandi di tera cu cualkier guera anterior.” E gueranan djawe ta afligí mas hende muher i mucha cu soldá. E Fondo di Nacionnan Uní pa Mucha ta calculá cu den e último dies añanan, dos miyon mucha a ser matá den guera.

“Scarcedad di cuminda” (Mateo 24:7; Revelacion 6:5, 6, 8)

Na 1996, prijs di trigu i maishi a subi drásticamente. E motibu? Mundu su reservanan dje granonan aki a cai na un suministro pa apénas 50 dia, e nivel di mas abou registrá. Aumento di prijs di alimento básico ta nificá cu cientos di miyones dje poblacion den necesidad—di cua hopi ta mucha—ta bai drumi cu hamber.

“Temblor den un lugá tras di otro” (Mateo 24:7)

Durante e último 2.500 añanan, solamente nuebe temblor a mata mas cu 100.000 hende. Cuater dje temblornan aki a tuma lugá desde 1914.

“Aumento di maldad” (Mateo 24:12)

Segun cu siglo 20 ta yega na su fin, maldad, of kibramentu di ley, a plama tur caminda. Atakenan terorista riba civil, asesinonan sanger friu i matansa masal ta entre e aspectonan horibel dje último dianan violento aki.

“Den un lugá tras di otro pestilencia” (Lucas 21:11)

Durante añanan ’90, probablemente 30 miyon hende lo muri di tuberculósis. Bacterianan portador di enfermedad ta birando mas i mas resistente contra remedi. Malaria, un otro enfermedad mortal, ta afligí entre 300 pa 500 miyon hende tur aña i segun cálculo ta mata mas o ménos 2 miyon. Pa fin dje década aki, segun pronósticonan, AIDS lo causa 1,8 miyon morto pa aña. “Awe humanidad ta experenciando un epidemia di epidemianan,” State of the World 1996 ta declará.

“E bon nobo aki dje reino lo ser predicá den tur e tera habitá.” (Mateo 24:14)

Na 1997, Testigonan di Jehova a dedicá mas cu mil miyon ora predicando e bon nobo dje Reino. Mas cu cincu miyon Testigo ta hiba e mensahe aki regularmente na hende den 232 pais.

[Rekonosementu]

Foto di FAO/B. Imevbore

Foto di U.S. Coast Guard

[Plachi na página 4, 5]

Cristiannan a hui for di Jerusalem dor cu nan tabata spiritualmente lantá