“Laga e Lector Usa Dicernimentu”

“Ora boso haña bista dje cos repugnante cu ta causa desolacion . . . pará den un lugá santu, . . . e ora ei laga esnan cu ta den Hudea cuminsá hui p’e cerunan.”—MATEO 24:15, 16.

 1. Ki resultado e spiertamentu cu Jesus a duna i cu nos ta haña na Lucas 19:43 i 44 tabatin?

ORA nos ta alerto pa un calamidad cu ta acercando, esei por permití nos evit’é. (Proverbionan 22:3) Pues, imaginá e situacion dje cristiannan di Jerusalem despues dje atake romano na aña 66 E.C. Jesus a spierta cu e stad lo a ser rondoná i destruí. (Lucas 19:43, 44) Mayoria hudiu a ignor’é. Pero su disipelnan sí a haci caso di su spiertamentu. Como resultado, nan a scapa dje calamidad di aña 70 E.C.

 2, 3. Pakico nos mester ta interesá den Jesus su profecia registrá na Mateo 24:15-21?

² Den un profecia cu implicacionnan pa nos awe, Jesus a describí un señal componí cu a incluí guera, scarcedad di cuminda, temblor, pest i persecucion di cristiannan cu ta predicá tocante e Reino di Dios. (Mateo 24:4-14; Lucas 21:10-19) Tambe Jesus a ofrecé un clave cu lo a yuda su disipelnan sa cu e fin tabata cerca: un ‘cos repugnante cu ta causa desolacion pará den un lugá santu.’ (Mateo 24:15) Laga nos examiná e palabranan significativo ei di nobo pa mira con nan por influenciá nos bida awor i den futuro.

³ Despues cu Jesus a describí e señal, el a bisa: “Ora boso haña bista dje cos repugnante cu ta causa desolacion, manera Daniel e profeta a papia di dje, pará den un lugá santu, (laga e lector usa dicernimentu,) e ora ei laga esnan cu ta den Hudea cuminsá hui p’e cerunan. Laga e homber cu ta riba dak di cas no baha pa saca cosnan di su cas; i laga e homber cu ta den cunucu no bolbe na su cas pa coge su bistí exterior. Ai dje muhernan na estado i di esnan cu ta criando yu na pechu den e dianan ei! Sigui haci oracion pa boso huimentu no sosodé den tempu di winter, ni riba dia di sabat; pasobra n’e tempu ei lo tin un tribulacion grandi tal como no a sosodé desde principio di mundu.”—Mateo 24:15-21.

 4. Kico ta indicá cu Mateo 24:15 tabatin un cumplimentu den e promé siglo?

⁴ E relatonan di Marco i Lucas ta duna detayenan adicional. Caminda Mateo ta usa “pará den un lugá santu,” Marco 13:14 ta bisa “pará unda e no mag.” Lucas 21:20 ta agregá Jesus su palabranan: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca.” Esaki ta yuda nos mira cu e promé cumplimentu a encerá e atake romano cu a cuminsá na 66 E.C. riba Jerusalem i su tempel, cu tabata un lugá santu p’e hudiunan pero no e lugá santu mas pa Jehova. Desolacion completo a tuma lugá ora e romanonan a destruí tantu e stad como e tempel na 70 E.C. Kico tabata “e cos repugnante” e tempu ei? I con el a ‘para den un lugá santu’? Contesta riba e preguntanan aki lo yuda clarificá e cumplimentu moderno.

 5, 6. (a) Pakico lector di Daniel capítulo 9 mester tabatin dicernimentu? (b) Con e profecia di Jesus tocante “e cos repugnante” a cumpli?

⁵ Jesus a urgi lector pa usa dicernimentu. Lector di kico? Probablemente di Daniel capítulo 9. Ei nos ta haña un profecia cu ta indicá na ki tempu e Mesías lo a aparecé i ta predicí cu lo el a ser “cortá” despues di tres aña i mei. E profecia ta bisa: “Riba e ala di cosnan repugnante lo bini esun cu ta causa desolacion; i te cu un exterminacion sosodé, e cos dicidí mes lo sigui basha tambe riba esun cu ta drumi desolá.”—Daniel 9:26, 27; mira tambe Daniel 11:31; 12:11.

⁶ E hudiunan a pensa cu esaki a aplicá n’e profanacion dje tempel dor di Antioco IV rond di 200 aña promé. Sin embargo, Jesus a mustra algu diferente. El a urgi pa usa dicernimentu pasobra “e cos repugnante” mester a aparecé ainda i para den “un lugá santu.” Ta evidente cu Jesus tabata referí n’e ehército romano cu lo a bini na 66 E.C. cu emblemanan distintivo. E emblemanan ei cu nan tabata usa pa hopi tempu caba, tabata casi manera ídolo i algu repugnante p’e hudiunan.a Pero na ki tempu nan lo a ‘para den un lugá santu’? Esei a sosodé ora e ehército romano, cu su emblemanan, a atacá Jerusalem i su tempel, cu e hudiunan a considerá santu. E romanonan a asta cuminsá coba bou dje muraya dje área di tempel. Berdaderamente, loke pa hopi tempu tabata repugnante a para awor den un lugá santu!—Isaías 52:1; Mateo 4:5; 27:53; Echonan 6:13.

Un “Cos Repugnante” di Tempu Moderno

 7. Ki profecia di Jesus ta cumpliendo den nos tempu?

⁷ For di Guera Mundial I padilanti, nos a mira e cumplimentu mayor di Jesus su señal registrá na Mateo capítulo 24. Pero, corda su palabranan: “Ora boso haña bista dje cos repugnante cu ta causa desolacion . . . pará den un lugá santu, . . . e ora ei laga esnan cu ta den Hudea cuminsá hui p’e cerunan.” (Mateo 24:15, 16) E aspecto aki dje profecia mester haña un cumplimentu den nos tempu tambe.

 8. Pa añanan largu, con Testigonan di Jehova a identificá “e cos repugnante” den nos tempu?

⁸ E Toren di Vigilancia di 1 di januari 1921, a demostrá e confiansa cu Jehova su sirbidónan tabatin cu e profecia aki lo cumpli, ora el a enfocá riba dje en coneccion cu desaroyonan den Medio Oriente.b Mas despues, den su edicion di 15 di december 1929, na página 374, E Toren di Vigilancia a bisa definitivamente: “Henter e tendencia dje Liga di Nacionnan ta pa alehá hende for di Dios i for di Cristo, i p’esei e ta un cos cu ta causa desolacion, producto di Satanas, i un cos abominabel den bista di Dios.” Pues na 1919 “e cos repugnante” a aparecé. Cu tempu, e Liga a traha lugá pa Nacionnan Uní. Pa hopi tempu Testigonan di Jehova a desenmascará e organisacionnan humano di pas aki como repugnante den bista di Dios.

 9, 10. Segun nos comprendimentu bieu dje tribulacion grandi, na ki tempu “e cos repugnante” lo a para den un lugá santu?

⁹ E artículo anterior a resumí un punto di bista mas cla di gran parti di Mateo capítulo 24 i 25. Algun clarificacion relacioná cu ‘e cos repugnante pará den un lugá santu’ ta necesario? Aparentemente cu sí. Jesus su profecia ta conectá e ‘paramentu den un lugá santu’ estrechamente cu e cuminsamentu dje “tribulacion” profetisá. P’esei, maske “e cos repugnante” a existí pa hopi tempu, e coneccion entre su ‘paramentu den un lugá santu’ i e tribulacion grandi mester cambia nos manera di pensa. Con asina?

¹⁰ Un tempu e pueblo di Dios a comprendé cu e promé fase dje tribulacion grandi a cuminsá na 1914 i cu e parti final lo a bini n’e bataya di Armagedon. (Revelacion 16:14, 16; compará cu E Toren di Vigilancia di 1 di april 1939, página 110.) Pues nos por comprendé pakico un tempu e rumannan a pensa cu e “cos repugnante” dje último dianan mester a para den un lugá santu djis despues di Guera Mundial I.

11, 12. Na 1969, ki punto di bista ahustá dje tribulacion grandi a ser presentá?

¹¹ Sin embargo, den añanan mas despues nos a bin mira cosnan na un manera diferente. Riba diahuebs, 10 di juli 1969, n’e Asamblea Internacional “Pas Riba Tera” na New York, F. W. Franz, e tempu ei vicepresidente di Watch Tower Bible and Tract Society, a duna un discurso electrisante. Ora Ruman Franz tabata repasá e comprendimentu anterior di Jesus su profecia, el a bisa: “E splicacion tabata cu e ‘tribulacion grandi’ a cuminsá na 1914 E.C. i cu Dios no a permitié sigui su curso completo pero cu el a pone un paro na Guera Mundial I na november 1918. For dje tempu ei padilanti Dios tabata permitiendo un periodo intermedio p’e actividad di su resto ungí di cristiannan eligí, promé cu e laga e parti final dje ‘tribulacion grandi’ reanudá n’e bataya di Armagedon.”

¹² E ora ei el a duna un ahuste importante n’e splicacion: “Pa corespondé cu e sucesonan dje promé siglo, . . . e ‘tribulacion grandi’ antitípico no a cuminsá na 1914 E.C. Mas bien, loke a tuma lugá riba e antitipo moderno di Jerusalem di 1914 pa 1918 tabata apénas ‘un cuminsamentu di dolor di angustia’ . . . E ‘tribulacion grandi’ tal como lo no sosodé atrobe, ta den futuro ainda, pasobra e ta nificá destruccion dje imperio mundial di religion falsu (incluso cristiandad) siguí p’e ‘guera dje gran dia di Dios e Todopoderoso’ na Armagedon.” Esaki a nificá cu henter e tribulacion grandi tabata den futuro ainda.

13. Pakico ta lógico pa bisa cu “e cos repugnante” lo para den futuro “den un lugá santu”?

¹³ Esaki tin di haber directamente cu dicerní na ki tempu “e cos repugnante” ta para den un lugá santu. Corda loke a sosodé den e promé siglo. E romanonan a atacá Jerusalem na 66 E.C., pero nan a retirá di ripiente, loke a permití “carni” cristian scapa. (Mateo 24:22) Den e mésun manera, nos ta verwagt cu e tribulacion grandi lo cuminsá pronto, pero lo hacié corticu pa causa dje scogínan di Dios. Tuma nota dje punto clave aki: Den e patronchi antiguo, ‘e cos repugnante pará den un lugá santu’ tabata conectá cu e atake romano bou di general Gallo na 66 E.C. E paralelo actual p’e atake ei—esta, e cuminsamentu dje tribulacion grandi—ta den futuro ainda. Pues “e cos repugnante cu ta causa desolacion,” cu a existí desde 1919, aparentemente ainda tin cu para den un lugá santu.c Con esaki lo sosodé? I ki efecto esei por tin riba nos?

Un Futuro Atake

14, 15. Con Revelacion capítulo 17 ta yuda nos comprendé sucesonan cu ta hiba na Armagedon?

¹⁴ E buki di Revelacion ta describí un futuro atake destructivo riba religion falsu. Capítulo 17 ta describí Dios su huicio contra “Babilonia e Grandi, mama dje muhernan di mala bida”—e imperio mundial di religion falsu. Cristiandad ta hunga un parti central i ta pretendé di ta den un pacto cu Dios. (Compará cu Jeremías 7:4.) Pa hopi tempu religion falsu, incluso cristiandad, tabatin trato ilícito cu “e reynan di tera,” pero esaki lo caba den e desolacion dje religionnan ei. (Revelacion 17:2, 5) Na man di ken?

¹⁵ Revelacion ta pinta “un bestia salbahe di color scarlata” cu ta existí pa un tempu, disparcé i despues regresá. (Revelacion 17:3, 8) E bestia aki tin e apoyo di gobernantenan di mundu. E detayenan cu e profecia ta duna ta yuda nos identificá e bestia simbólico aki como un organisacion di pas cu a cuminsá existí na 1919 como e Liga di Nacionnan (un “cos repugnante”) i cu awor ta Nacionnan Uní. Revelacion 17:16 i 17 ta mustra cu den futuro Dios lo hinca den curason di cierto gobernantenan humano cu ta prominente den e “bestia” aki pa desolá e imperio mundial di religion falsu. E atake ei ta marca e cuminsamentu dje tribulacion grandi.

16. Ki desaroyonan notabel cu ta enbolbé religion ta tumando lugá?

¹⁶ Ya cu e comienso dje tribulacion grandi ta den futuro ainda, e ‘paramentu den un lugá santu’ tambe ta den futuro ainda? Evidentemente cu sí. Aunke “e cos repugnante” a aparecé na principio dje siglo aki i, asina, a existí pa décadanan, lo e tuma un posicion na un manera único “den un lugá santu” den futuro cercano. Mescos cu Cristo su siguidónan di promé siglo lo mester a wak bon pa mira con e ‘paramentu den un lugá santu’ lo a desaroyá, asina cristiannan moderno mester haci tambe. Ta cierto cu nos lo tin cu spera riba e cumplimentu mes pa sa tur e detayenan. Tog, ta notabel cu den algun pais ya caba tin un apatia riparabel i creciente pa cu religion. Algun elemento político, den asociacion cu algun ex-cristian cu a desviá for dje fe berdadero, ta promoviendo hostilidad contra religion en general i cristiannan berdadero en particular. (Salmo 94:20, 21; 1 Timoteo 6:20, 21) Consecuentemente, awor aki mes podernan político ta “batayá contra e Lamchi,” i manera Revelacion 17:14 ta indicá, e bataya aki lo intensificá. Aunke nan no por pone man den sentido literal riba e Lamchi di Dios—Jesucristo den su condicion halsá i glorificá—nan lo sigui descargá nan oposicion contra Dios su adoradónan berdadero, su “santunan” en particular. (Daniel 7:25; compará cu Romanonan 8:27; Colosensenan 1:2; Revelacion 12:17.) Nos tin e garantia divino cu e Lamchi i esnan huntu cuné lo sali victorioso.—Revelacion 19:11-21.

17. Sin ser dogmático, kico nos por bisa dje manera cu “e cos repugnante” lo para den un lugá santu?

¹⁷ Nos sa cu desolacion ta warda religion falsu. Babilonia e Grandi ta “burachi dje sanger dje santunan” i el a actua como un reina, pero su destruccion ta sigur. E influencia impuru cu e tabatin riba e reynan di tera lo cambia dramáticamente ora e relacion ei combertí den un odio violento di parti dje ‘dies cachunan i e bestia salbahe.’ (Revelacion 17:6, 16; 18:7, 8) Ora e “bestia salbahe di color scarlata” atacá e prostituta religioso, “e cos repugnante” lo ta pará na un manera menasante den cristiandad su asina yamá lugá santu.d Pues desolacion lo cuminsá riba cristiandad infiel, cu ta pinta su mes como santu.

Con e ‘Huimentu’ Ta Tuma Lugá?

18, 19. Kico ta mustra cu “hui p’e cerunan” lo no nificá cambia di religion?

¹⁸ Despues cu Jesus a profetisá di ‘e paramentu dje cos repugnante den un lugá santu,’ el a spierta esnan cu tin dicernimentu pa actua. E tabata kier men cu ta te e ora ei numa—ora cu “e cos repugnante” ta “pará den un lugá santu”—hopi hende lo hui for di religion falsu i aceptá adoracion berdadero? Sigur cu no. Pensa riba e promé cumplimentu. Jesus a bisa: “Laga esnan den Hudea cuminsá hui p’e cerunan. Laga e homber riba dak di cas no baha, ni drenta paden pa saca nada for di su cas; i laga e homber den cunucu no bolbe pa cosnan atras pa coge su bistí exterior. Ai di e muhernan na estado i di esnan cu ta cria yu na pechu den e dianan ei! Sigui haci oracion pa esei no sosodé den tempu di winter.”—Marco 13:14-18.

¹⁹ Jesus no a bisa cu ta esnan den Jerusalem so mester a hui bai, como si fuera su punto tabata cu nan mester a sali for dje centro di adoracion hudiu; su spiertamentu no a mencioná tampoco pa cambia di religion, pa hui for di esun falsu i aceptá esun berdadero. Jesus su disipelnan sigur no tabatin mester di ningun spiertamentu pa hui for di un religion bai otro; ya nan a bira cristian berdadero caba. I e atake na 66 E.C. no a motivá practicantenan di hudaismo den Jerusalem i rond Hudea pa bandoná e religion ei i aceptá cristianismo. Profesor Heinrich Graetz ta bisa cu esnan cu a persiguí e romanonan cu a bati retirada a bini bek n’e stad: “E zelotenan, cantando alegremente canticanan di guera na bos haltu, a regresá Jerusalem (8 di october), cu nan curason ta bati cu e speransa gososo pa haña libertad i independencia. . . . Dios no a yuda nan misericordiosamente mescos cu El a yuda nan antepasadonan? E curason dje zelotenan no tabata sa kico ta temor pa futuro.”

20. Con e disipelnan di promé a respondé na Jesus su spiertamentu pa hui bai n’e cerunan?

²⁰ Con anto, e grupo comparativamente chikitu di scogínan e tempu ei a actua riba e conseho di Jesus? Dor di bandoná Hudea i hui p’e cerunan na otro banda di Jordan, nan a mustra cu nan no tabata parti dje sistema político of religioso dje hudiunan. Nan a bandoná cunucu i cas, sin sikiera recogé nan pertenencianan for di nan cas. Sigur dje proteccion i apoyo di Jehova, nan a pone su adoracion promé cu tur otro cos cu por a parce importante.—Marco 10:29, 30; Lucas 9:57-62.

21. Kico nos no tin nodi di spera ora “e cos repugnante” atacá?

²¹ Considerá awor e cumplimentu mayor. Pa hopi década nos ta urgiendo hende pa sali for di religion falsu i aceptá adoracion berdadero. (Revelacion 18:4, 5) Miyones di hende a haci esei caba. Jesus su profecia no ta indicá cu una bes e tribulacion grandi dal aden, hende lo acudí masalmente na adoracion puru. Ta sigur cu no tabatin un combertimentu masal di hudiu na 66 E.C. Tog, cristiannan berdadero lo tin un gran incentivo pa aplicá Jesus su spiertamentu i hui.

22. Kico aplicacion di Jesus su conseho pa hui bai n’e cerunan lo por encerá pa nos?

²² Actualmente no ta posibel pa nos tin tur e detayenan tocante e tribulacion grandi, pero nos por concluí lógicamente cu pa nos e huida cu Jesus a papia di dje lo no ta den un sentido geográfico. E pueblo di Dios ta rond mundu caba, casi den tur skina. Pero nos por ta sigur cu ora ta necesario pa hui, cristiannan lo tin cu sigui mantené un distincion cla entre nan mes i organisacionnan religioso falsu. Ta significativo tambe cu Jesus a spierta pa no bai cas bek pa coge paña of otro cos. (Mateo 24:17, 18) Pues, lo por tin prueba den futuro en cuanto con nos ta mira cos material; nan ta e cos mas importante, of ta e salbacion cu lo bini pa tur hende cu ta na banda di Dios ta mas importante? Sí, nos huimentu lo por encerá algun contratempu i miseria. Nos lo mester ta cla pa haci tur loke ta necesario, mescos cu e cristiannan (nos ekivalentenan) di promé siglo, cu a hui for di Hudea pa Perea, n’e otro banda di Jordan.

23, 24. (a) Unda so nos lo haña proteccion? (b) Ki efecto Jesus su spiertamentu tocante ‘e cos repugnante pará den un lugá santu’ mester tin riba nos?

²³ Nos mester ta sigur cu nos refugio lo sigui ta Jehova i su organisacion semehante na un ceru. (2 Samuel 22:2, 3; Salmo 18:2; Daniel 2:35, 44) Ei ta caminda nos lo haña proteccion! Nos lo no imitá e masanan di humanidad cu lo hui bai “den cueba” i sconde “den baranca di ceru,” esta, organisacion i institucionnan humano cu lo por permanecé pa un tempu corticu despues cu Babilonia e Grandi ser destruí. (Revelacion 6:15; 18:9-11) Berdad, tempu por bira mas difícil, mescos cu lo e tabata na 66 E.C. pa muhernan na estado cu a hui for di Hudea, of pa ken cu tabatin cu biaha den awaceru i frialdad. Pero nos por ta sigur cu Dios lo haci sobrebibencia posibel. Laga nos fortalecé awor aki mes nos confiansa den Jehova i su Yu, cu ta reinando actualmente como Rey dje Reino.

²⁴ No tin motibu pa nos biba den temor di loke ta bai sosodé. Jesus no tabata kier pa su disipelnan e tempu ayá tene miedu, ni e no kier pa nos tin miedu tampoco sea awor of den e dianan binidero. El a alertá nos di manera cu nos por prepará nos mente i curason. Al fin i al cabo, cristiannan obediente lo no sufri castigu ora destruccion bini riba religion falsu i e resto dje sistema di cosnan malbado aki. Nan lo dicerní i haci caso dje spiertamentu tocante ‘e cos repugnante pará den un lugá santu.’ I nan lo actua decisivamente a base di nan fe insagudibel. Laga nos nunca lubidá loke Jesus a primintí: “Esun cu a wanta te na fin ta esun cu lo ser salbá.”—Marco 13:13.

[Nota]

Bo Ta Corda?

◻ Con “e cos repugnante cu ta causa desolacion” a manifestá su mes den e promé siglo?

◻ Pakico ta razonabel pa pensa cu e “cos repugnante” di tempu moderno lo para den un lugá santu na un tempu den futuro?

◻ Revelacion ta profetisá ki atake di parti di un “cos repugnante”?

◻ Ki tipo di ‘huimentu’ lo por ta necesario ainda di nos parti?

[Plachi na página 16]

Revelacion ta yama Babilonia e Grandi “mama dje muhernan di mala bida”

[Plachi na página 17]

E bestia salbahe di color scarlata di Revelacion capítulo 17 ta “e cos repugnante” na cua Jesus a referí

[Plachi na página 18]

E bestia salbahe di color scarlata lo haci un atake destructivo contra religion