Pregunta Di Lektor

Kristiannan por tuma algun medida práktiko pa protehá nan mes, pero nan ta hasi esaki di akuerdo ku guia di Beibel. Beibel ta spièrta nos kontra e uso di arma, manera pistol, rifel òf otro tipo di arma di kandela pa protehá nos mes kontra otro hende. Ban analisá algun prinsipio:

Bida ta sagrado pa Yehova, spesialmente bida di hende. E salmista David tabata sa ku Yehova ta “e fuente di bida.” (Sal. 36:9) Pues, si un kristian ta tuma medida práktiko pa defendé su mes òf su propiedat, e mester hasi tur loke ta den su poder pa evitá di mata un hende i haña kulpa di sanger.—Deu. 22:8; Sal. 51:14.

Ta bèrdat ku uso di kualke opheto por resultá den kulpa di sanger, pero si nos tin un arma di kandela lo ta mas fásil pa mata un hende sea aksidentalmente òf intenshonalmente.a Ademas, si un atrakadó ku kisas ta nèrvioso kaba mira ku e otro persona tin un arma di kandela, esei por pone e situashon eskalá i un hende por mata e otro.

E anochi promé ku Hesus a muri, el a bisa su siguidónan pa nan kumpra un spada, pero no pa protehá nan mes. (Luk. 22:36, 38) En bes di esei, Hesus a bisa nan pa trese un spada pa siña nan un lès pa no rekurí na violensia, asta si nan haña nan enfrentá ku un multitut armá. (Luk. 22:52) Despues ku Pedro a saka su spada kontra esklabo di un saserdote prinsipal, Hesus a bisa Pedro: “Hinka bo spada bèk.” Despues Hesus a bisa un bèrdat fundamental, un prinsipio ku ta guia su siguidónan te awe: “Ken ku usa spada lo muri pa medio di spada.”—Mat. 26:51, 52.

Na armonia ku Mikéas 4:3, e pueblo di Dios lo “bati nan spadanan traha plug ku nan, i nan lo bati nan lansanan traha skèr-pa-snui ku nan.” Kristiannan berdadero ta konosí pa ta hende pasífiko. Nan ta sigui e konseho ku apòstel Pablo a skirbi bou di inspirashon: “No paga malu ku malu. . . . Si ta posibel, te asina leu ku ta dependé di boso, keda na pas ku tur hende.” (Rom. 12:17, 18) Apesar di tur e pruebanan ku Pablo a eksperensiá, ku ta inkluí “peliger di atrakadó,” el a sigui e konseho ei i nunka a pone su siguridat personal promé ku prinsipionan di Beibel. (2 Kor. 11:26) En bes di esei, el a konfia den Dios i den e sabiduria ku tin den Su Palabra, esta, sabiduria ku “ta mihó ku armanan di guera.”—Ekl. 9:18.

Pa un kristian, bida ta hopi mas balioso ku kosnan material. “Bida no ta dependé di loke [un hende] tin.” (Luk. 12:15) Pues, si un atrakadó armá bini, nos mester papia kalmu kuné, i si esei no funshoná, kristiannan berdadero ta sigui e prinsipio di Hesus su palabranan: “No resistí e hende malbado.” Na moda di papia, esaki kisas asta ta rekerí pa duna nan nos paña djabou i djariba. (Mat. 5:39, 40; Luk. 6:29)b Di mes, e mihó kos ku nos por hasi ta prevení. Si nos evitá di “kana broma ku loke [nos] tin” i si nos bisiña sa ku nos ta Testigunan di Yehova i ku nos ta stima pas, nos por evitá di bira víktima di kriminalnan violento.—1 Huan 2:16; Pro. 18:10.

Kristiannan ta respetá konsenshi di otro hende. (Rom. 14:21) Si den kongregashon tin un ruman ku tin un arma pa defendé su mes kontra hende i e rumannan haña sa, kisas algun di nan por keda di shòk òf por asta trompeká. Amor ta konmové nos pa pone interes di otro hende promé ku esun di nos, asta si esei ta nifiká ku nos tin ku legumai nos derecho legal.—1 Kor. 10:32, 33; 13:4, 5.

Kristiannan ta hasi esfuerso pa ta un bon ehèmpel. (2 Kor. 4:2; 1 Ped. 5:2, 3) Si un kristian tin un arma pa protehá su mes kontra otro hende i ta haña konseho bíbliko tokante esei ma no ta deshasí di dje, lo e no ta un bon ehèmpel. Lo e no kualifiká pa haña responsabilidat òf privilegio spesial den e kongregashon. Esei ta konta tambe pa un kristian ku ta sigui karga arma pa su trabou. Den kasonan asin’akí, ta mihó e ruman buska un otro trabou!c

Por lo general, kada kristian mester disidí kon pa protehá su mes, su famia òf su kosnan material i tambe ki trabou e ta skohé. E prinsipionan di Beibel ta demostrá Dios su sabiduria i amor pa nos. Kristiannan maduro ta respetá e prinsipionan ei i ta skohe pa no tin arma di kandela pa protehá nan mes kontra otro hende. Nan sa ku nan por disfrutá di berdadero siguridat pa semper si nan konfia den Dios i biba di akuerdo ku e prinsipionan di Beibel.—Sal. 97:10; Pro. 1:33; 2:6, 7.