Dios Su Regalo di Mas Grandi Kiko e Mester Motivá Bo pa Hasi?

UN REGALO ekstraordinario mester motivá nos pa ekspresá nos gratitut. Hesus a enfatisá esei despues ku el a kura dies hòmber di un malesa teribel ku pa e tempu ei no tabatin kura p’e. Un di e dies hòmbernan ei “a bira bini bèk i tabata glorifiká Dios na bos haltu.” Hesus a bisa: “No ta tur dies a kura? Unda e otro nuebenan a keda?” (Lukas 17:12-17) Kiko nos por siña for di esei? Wèl, masha lihé nos por lubidá e obranan di bondat ku otro hende ta hasi pa nos.

E reskate ta un regalo úniko. E ta e mihó regalo ku un persona a yega di duna nos. Pues, kiko loke Dios a hasi mester motivá nos pa hasi?

• Siña konosé e Persona ku a duna e regalo akí. E reskate no ta duna hende bida eterno outomátikamente. Mas bien, Hesus a bisa Dios den orashon: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Si un hende bisa bo ku un persona a salba bo bida tempu bo tabata mucha, lo bo no ta interesá pa siña mas di e persona ei i dikon el a salba bo bida? Yehova Dios, kende a duna e regalo di e reskate ku por salba bida, ke pa bo siña konos’é i forma un amistat será kuné. Beibel ta animá nos: “Hala serka Dios, i lo e hala serka boso.”—Santiago 4:8.

• 

  Pone fe den e reskate. Beibel ta bisa: “Esun ku pone fe den e Yu lo haña bida eterno.” (Huan 3:36) Kiko ta nifiká pone fe? Esei ta nifiká ku nos mester hasi algu, nos mester demostrá nos fe den e reskate ku obra. (Santiago 2:17) Ki tipo di obra? Un regalo ta bira di bo solamente ora bo saka bo man pa asept’é. Pues bo mester ‘saka man’ i aseptá e reskate. Kon? Wèl, esei ta di siña kon Dios ke pa bo biba i apliká loke bo ta siña.a Pidi Dios pa e pordoná bo pikánan i duna bo un konsenshi limpi. Akudí na dje ku tur konfiansa ku e reskate ta garantisá un futuro eterno di pas, siguridat i prosperidat pa tur hende ku pone fe den dje.—Hebreonan 11:1.

• 

  Asistí na e Konmemorashon di e morto di Hesus. Hesus a establesé un evento anual pa rekordá nos di e provishon di e reskate. Relashoná ku e evento ei, el a bisa: “Sigui hasi esaki na mi memoria.” (Lukas 22:19) Testigunan di Yehova lo konmemorá e morto di Hesus riba djamars 11 di aprel 2017, despues ku solo baha. E reunion lo dura mas o ménos un ora i ta inkluí un diskurso ku lo splika e importansia di e morto di Hesus i kon e ta trese bendishon awor i den futuro pa nos. Aña pasá, mas o ménos 20 mion hende rònt mundu a asistí na e Konmemorashon. Nos ta invitá bo pa djòin nos i mustra bo gratitut pa Dios su regalo di mas grandi.