Hesus—Kon El A Hiba Su Bida?

E SIRKUNSTANSIA ku Hesus tabata aden ora el a bisa e palabranan ei ta mustra kiko tabata e kos prinsipal den su bida. Hesus i su disipelnan a kana henter mainta dor di Samaria ku ta un lugá ku hopi seru. (Juan 4:6) E disipelnan a pensa ku Hesus mester tabatin hamber, i p’esei nan a puntr’é si e ke kome. (Juan 4:​31-33) Ora Hesus a kontestá nan, el a bisa nan ku un par di palabra kiko ta su propósito den bida. P’e, e trabou di Dios tabata mas importante ku kome. Ku echo i palabra, Hesus a biba pa hasi e boluntat di Dios. Kiko esaki a enserá?

Beibel ta mustra kiko tabata Hesus su karera den bida, bisando: “Hesus tabata pasa den henter Galilea, i tabata siña . . . i proklamá e evangelio di reino.” (Mateo 4:23) Hesus no tabata djis proklamá, òf prediká, e Reino di Dios na hende. E tabata siña hende tambe, es desir, e tabata instruí, splika i konvensé hende usando rasonamentu lógiko. E Reino tabata e tema prinsipal di Hesus su mensahe.

Durante henter su ministerio, Hesus a siña su oyentenan kiko e Reino di Dios ta i kiko e Reino lo hasi. Tuma nota di e siguiente bèrdatnan tokante e Reino i e tekstonan di Beibel ku ta mustra kiko Hesus a bisa relashoná ku e tópiko ei.

• E Reino di Dios ta un gobièrnu selestial, i Hesus ta esun ku Yehova a nombra komo Rei di e Reino.​—MATEO 4:17; JUAN 18:36.

• E Reino lo santifiká Dios su nòmber i sòru pa su boluntat sosodé na tera meskos ku den shelu.​—MATEO 6:​9, 10.

• Bou di e Reino di Dios, henter e tera lo bira un paradeis.​—LUKAS 23:​42, 43.

• E Reino di Dios pronto lo bini i lo kumpli ku Dios su boluntat pa e tera.a​—MATEO 24:​3, 7-12.

Hesus tabata konosí prinsipalmente komo “Maestro.” (Juan 13:13) Sinembargo, durante su ministerio di tres aña i mei, el a hasi milager tambe. E milagernan akí a proba dos kos. Di promé, nan a proba ku en bèrdat ta Dios a mand’é. (Mateo 11:​2-6) Di dos, nan a duna un idea di loke Hesus komo Rei di e Reino di Dios lo hasi den futuro na un eskala mas grandi. Ban wak algun di e milagernan ku el a hasi.

• El a dominá laman brutu i bientu fuerte.​—MARKO 4:​39-41.

• El a kura hende malu, i tambe esnan siegu, surdu i lam.​—LUKAS 7:​21, 22.

• El a rende kuminda, i asina a alimentá hopi hende ku tabatin hamber.​—MATEO 14:​17-21; 15:​34-38.

• Por lo ménos tres biaha, el a lanta hende for di morto.​—LUKAS 7:​11-15; 8:​41-55; JUAN 11:​38-44.

Bo por imaginá kon bida riba tera lo ta bou di liderato di un Rei asina poderoso?

No tin ningun persona den un mihó posishon ku e Yu di Dios mes, esta Hesukristu, pa siña hende tokante Yehova. Komo “primogénito di henter kreashon,” Hesus a biba mas tantu tempu den shelu serka Yehova ku kualke otro kriatura spiritual. (Kolosensenan 1:15) Pensa un ratu riba e oportunidat ku e tabatin pa siña konosé e boluntat, pensamentunan, normanan i kamindanan di su Tata.

Ku rason Hesus por a bisa: “Niun hende no konosé e Yu, ku no ta e Tata so; ni niun hende no konosé e Tata, sino e Yu so i esnan ku e Yu ke laga konosé e Tata.” (Lukas 10:22, BPK) Ora Hesus tabata riba tera, e tabata masha ansioso pa siña hende konosé su Tata. Hesus tabata den un posishon úniko ya ku e por a papia i siña hende loke el a siña den shelu i den presensia di e Dios Haltísimo.​—Juan 8:28.

Nos por kompará loke Hesus a hasi pa laga hende siña konosé su Tata ku loke un transformatòr grandi ta hasi. Ora vòltahe di koriente haltu pasa dor di e aparato akí, e ta transform’é den un vòltahe mas abou di manera ku e konsumidó por us’é. Ora Hesus tabata riba tera, el a splika hende loke el a siña den shelu tokante su Tata na un manera ku hende humilde por a komprondé i apliká.

Konsiderá dos manera importante ku Hesus a siña hende konosé su Tata.

• Den su siñansa, Hesus a yuda hende konosé e bèrdat tokante Yehova su nòmber, su propósito i su kamindanan.​—JUAN 3:16; 17:​6, 26.

• Pa medio di su akshonnan, Hesus a yuda hende konosé e tantísimo kualidatnan bunita di Yehova. Hesus a reflehá e personalidat di su Tata asina bon ku na moda di papia e por a bisa: ‘Si bo ke konosé mi Tata, bo tin ku siña konosé mi.’​—JUAN 5:19; 14:9.

En bèrdat, e manera ku Hesus a hiba su bida ta impreshoná nos. Si nos analisá dikon el a muri i aktua na armonia ku loke nos siña, nos por benefisiá masha hopi mes.