Dios Ta Interesá den Bo

MARIA, un señora cristian den su 40 i picu, a sufri hopi den su bida. E adulterio di su casá a hiba na divorcio mas cu un década pasá. Despues di esei, Maria a lucha pa cumpli cu su papel como un mayor soltero pa su cuater yunan. Pero ainda e ta so, i tin biaha e soledad ta parce insoportabel. Maria ta puntra su mes, ‘Esaki ta nificá cu Dios no ta interesá den mi of den mi yunan sin tata?’

Sea bo a experenciá un contratempu similar of no, siguramente bo por comprendé Maria su sintimentunan. Nos tur a yega di pasa dor di circunstancianan difícil, i nos por a puntra nos mes ta ki ora i con Jehova lo actua na nos fabor. Algun dje experencianan aki ta un resultado directo di nos pegamentu n’e leynan di Dios. (Mateo 10:16-18; Echonan 5:29) Otronan ta e consecuencia dje echo cu nos ta hende imperfecto cu ta biba den un mundu goberná pa Satanas. (1 Juan 5:19) Apostel Pablo a skirbi: “Tur e creacion ta sigui keha huntu i ta den dolor.”—Romanonan 8:22.

Sin embargo, e echo cu bo ta enfrentá un prueba severo no kier men cu Jehova a bandoná bo of cu e no ta interesá den bo bienestar. Con bo por ta sigur di esaki? Kico ta mustra cu Dios ta interesá den bo?

Un Ehempel di Pasado

Bijbel ta duna evidencia claro di Jehova su percuracion pa hende como individuo. Tuma por ehempel David. Jehova tabatin un interes personal den e wardador yong aki, mirand’e como “un homber agradabel na su curason.” (1 Samuel 13:14) Mas despues, ora David tabata goberná como rey, Jehova a primintié: “Lo mi resultá di ta cu bo unda cu bo bai.”—2 Samuel 7:9.

Esaki ta nificá cu David a hiba un bida liber di problema, cu proteccion special for di Dios? No, David a enfrentá pruebanan severo tantu promé como durante su reinado. Pa vários aña promé cu el a bira rey, el a ser persiguí di un manera implacabel dor di Rey Saul asesino. Durante e periodo aki di su bida, David a skirbi: “Mi alma ta meimei di leonnan . . . asta e yunan di hende, kende nan djentenan ta lansanan i flechanan.”—Salmo 57:4.

Tog, atrabes di su contratempu David tabata convencí di Jehova su cuido personal. “Bo mes a duna informe cu mi ta un fugitivo,” el a declará den un oracion na Jehova. Sí, pa David tabata como si Jehova a documentá henter e experencia teribel. Anto David a agregá: “Pone mi lágrimanan den bo boter di cueru. Nan no ta den bo buki?”a (Salmo 56:8) Cu e ilustracion aki, David a expresá confiansa cu Jehova tabata conciente di no solamente e situacion sino tambe su impacto emocional.

Yegando n’e fin di su bida, David por a skirbi di experencia personal: “Pa Jehova e pasonan mes di un homber físicamente capacitá a ser prepará, i den su caminda E tin deleite. Aunke e por cai, lo e no ser tirá abou, pasobra Jehova ta sosteniendo su man.” (Salmo 37:23, 24) Abo tambe por tin e confiansa cu asta si bo pruebanan ta persistente i ta continuando, Jehova ta tuma nota i ta duna balor na bo awante. Pablo a skirbi: “Dios no ta inhustu p’e lubidá boso trabou i e amor cu boso a mustra pa su nomber, pasobra boso a sirbi e santunan i ta sigui sirbi.”—Hebreonan 6:10.

Ademas, Jehova por actua na bo fabor dunando bo e fortalesa pa wanta cualkier obstáculo cu ser poné den bo caminda. “Hopi ta e calamidadnan dje hustu,” David a skirbi, “pero for di nan tur Jehova ta libr’é.” (Salmo 34:19) En berdad, Bijbel ta bisa nos cu e wowonan di Jehova “ta pasa rond di henter e tera pa mustra su forsa na fabor di esnan kende nan curason ta completo pa cuné.”—2 Crónicanan 16:9.

Jehova A Atraé Bo na Dje

Evidencia adicional di Jehova su interes personal por ser hañá den e palabranan di Jesus. “Ningun hende por bini cerca mi,” el a bisa, “aménos cu e Tata, kende a mandá mi, ta atra’é.” (Juan 6:44) Sí, Jehova ta yuda hende individualmente pa saca probecho dje beneficionan di Cristo su sacrificio, Con? Na un bon midí, esei ta mediante e trabou di predicacion di Reino. Ta cierto cu e trabou aki ta sirbi como “un testimonio pa tur nacion,” pero e ta alcansá hende riba un base individual. E echo cu bo ta scucha i ta respondé n’e mensahe dje bon nobo ta evidencia di Jehova su interes personal den bo.—Mateo 24:14.

Pa medio di su spiritu santu Jehova ta atraé individuonan na su Yu i n’e speransa di bida eterno. Esaki ta permití cada persona comprendé i aplicá berdadnan spiritual apesar di cualkier limitacion i imperfeccion inherente. Realmente, un hende no por comprendé e propósitonan di Dios sin e yudansa dje spiritu di Dios. (1 Corintionan 2:11, 12) Manera Pablo a skirbi n’e tesalonicensenan, “no ta tur hende tin fe.” (2 Tesalonicensenan 3:2) Jehova ta suministrá su spiritu solamente na esnan cu ta manifestá un deseo pa ser atraí na dje.

Jehova ta atraé hende na dje pa motibu cu e ta stima nan como individuo i kier pa nan alcansá salbacion. Ki un evidencia firme di Jehova su interes personal! Jesus a bisa: “No ta un cos deseabel pa mi Tata cu ta den cielu pa un dje chikitunan aki perecé.” (Mateo 18:14) Sí, den bista di Dios cada persona ta importante como un individuo riba su mes. P’e motibu ei Pablo por a skirbi: “Lo e rindi na cada un segun su obra.” (Romanonan 2:6) I apostel Pedro a bisa: “Dios no ta parcial, sino den tur nacion e hende [e persona individual] cu ta tem’é i ta obra husticia ta aceptabel p’e.”—Echonan 10:34, 35.

E Milagernan di Jesus

Dios su interes personal den hende a ser demostrá di un manera conmovedor den e milagernan cu su Yu, Jesus, a efectuá. E curacionnan aki tabata compañá pa sintimentu profundo. (Marco 1:40, 41) Siendo cu Jesus “no por haci ni un solo cos di su mes iniciativa, sino solamente loke e mira e Tata haci,” su compasion ta ilustrá Jehova su interes amoroso den cada un di su sirbidornan.—Juan 5:19.

Considerá e relato di un milager cu Jesus a efectuá, registrá na Marco 7:31-37. Aki Jesus a cura un homber cu tabata surdu i tabata sufri di un impedimentu den abla. El a “alehá [e homber] for dje multitud privadamente,” segun e relato di Bijbel. Anto, “cu un mirada na cielu el a suspirá profundamente i a bis’é: ‘Effatha,’ esta, ‘Habri.’”

Pakico Jesus a alehá e homber aki for dje multitud? Wel, probablemente un persona surdu cu apénas por papia lo sinti su mes incómodo dilanti mirones. Jesus por a ripará e homber aki su incomodidad, i p’e motibu ei el a scoge pa cur’é den privacidad. “Henter e relato,” segun e comentario di un escolástico di Bijbel, “ta mustra nos di un manera masha bibu cu Jesus no a considerá e homber como simplemente un caso; el a consider’é como un individuo. E homber tabatin un necesidad special i un problema special, i cu e consideracion di mas tierno Jesus a trata cuné den un manera pa no ofendé su sintimentunan i den un manera cu e por a comprendé.”

E relato aki ta mustra cu Jesus tabatin un interes personal den hende. Bo por ta sigur cu e ta mes interesá den bo. Ta cierto cu su morto sacrificial tabata un expresion di amor pa henter e mundu di humanidad rescatabel. Sin embargo, bo por tuma e acto ei pa abo personalmente, mescos cu Pablo a haci, kende a skirbi: “E Yu di Dios . . . a stimá mi i a entregá su mes pa mi.” (Galationan 2:20) I siendo cu Jesus a mencioná cu ‘esun cu a mirá mi a mira e Tata tambe,’ nos por ta sigur cu Jehova tin e mésun interes den cada un di su sirbidornan.—Juan 14:9.

Jehova Ta Bira un Recompensador

Ganando conocimentu di Dios ta enbolbé yega na conocé cada faceta di su personalidad manera e ta ser revelá den Bijbel. E nomber Jehova mes ta nificá “E Ta Causa pa Bira,” implicando cu Jehova por bira kico cu e kier afin di cumpli cu su boluntad. Atrabes di historia, el a asumí vários papel, incluyendo esun di Creador, Tata, Señor Soberano, Wardador, Jehova di ehércitonan, Tendedor di oracion, Hues, Magnífico Instructor i Recomprador.b

Pa comprendé e nificacion completo dje nomber di Dios, tambe nos mester yega na conocé Jehova den e papel di Recompensador. Pablo a skirbi: “Sin fe ta imposibel pa agrad’é bon, pasobra esun cu ta acercá Dios mester kere cu e ta existí i cu e ta bira recompensador di esnan cu ta busk’é sinceramente.”—Hebreonan 11:6.

Jehova a primintí bida eterno den un tera paradísico na esnan cu awe ta scoge pa sirbié di henter nan curason. No ta egoista pa anhelá e cumplimentu dje magnífico promesa ei, ni tampoco ta presumido pa imaginá bo mes bibando ei. Moises “a mira atentamente n’e pago dje recompensa.” (Hebreonan 11:26) Di igual manera, Pablo a anticipá ansiosamente e cumplimentu dje promesa di Dios pa fiel cristiannan ungí. El a skirbi: “Mi ta sigui den direccion dje meta p’e premio dje yamada di Dios pa bai ariba mediante Cristo Jesus.”—Filipensenan 3:14.

Abo tambe por anhelá e recompensa cu Jehova ta primintí esnan cu ta wanta. Anticipando e recompensa ei ta un parti integral di bo conocimentu di Dios i di bo awante den su sirbishi. Pues meditá diariamente riba e bendicionnan cu Jehova tin wardá pa bo. Maria, mencioná den e introduccion, a haci un esfuerso special pa logra esaki. “Pa promé biaha den mi bida,” e ta bisa, “mi a aceptá recientemente cu Jesus su sacrificio di rescate ta aplicá na mi. Mi ta cuminsá sinti cu Jehova ta interesá den mi como un persona. Mi ta un cristian pa mas cu 20 aña caba, pero ta apénas recientemente mi realmente a cuminsá kere esaki.”

Mediante estudio i meditacion sincero riba Bijbel, Maria, huntu cu miyones di otro persona, ta siñando cu Jehova ta interesá den su pueblo no solamente como grupo sino tambe como individuo. Apostel Pedro tabata asina convencí di esaki cu el a skirbi: “Tira tur boso ansiedad riba [Dios], pasobra e ta interesá den boso.” (1 Pedro 5:1) Sí, Dios ta interesá den bo!

[Nota]

[Kuadro na página 6]

Resureccion—Prueba cu Dios Ta Interesá den Hende

NOS ta haña prueba convincente den Bijbel di Dios su interes den cada inviduo na Juan 5:28, 29: “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.”

Interesantemente, e palabra griego mne·mei’on (grafnan conmemorativo) ta ser usá aki en bes di ta’phos (graf). E palabra ta‘phos simplemente ta transmití e pensamentu di un entiero. Pero mne·mei’on ta duna idea cu e registro di bida dje persona cu a muri ta ser recordá.

Respecto esaki, djis pensa riba kico e resureccion lo rekerí di Jehova Dios. Pa trece un hende bek na bida, e tin cu sa tur cos dje hende ei—incluyendo su característicanan heredá i memoria completo. Solamente e ora ei e individuo por ser restorá cu e mésun identidad.

Naturalmente, esaki ta imposibel for di un punto di bista humano, pero “tur cos ta posibel cerca Dios.” (Marco 10:27) E asta por averiguá loke tin den curason di un persona. Asta si un persona ta morto pa hopi siglo, Dios su memoria di dje ta infalibel; e no ta bira vago. (Job 14:13-15) Pues, ora Jesus a mencioná Abraham, Isaac i Jacob, e por a bisa asta siglonan despues cu nan muri cu Jehova “ta un Dios, no dje mortonan, sino dje bibunan, pasobra nan tur ta bibu p’e.”—Lucas 20:38

Pues, miles di miyones di hende cu a muri ta den Jehova Dios su memoria den detaye completo. Ki un prueba asombroso cu Dios ta interesá den hende riba un base individual!

[Plachi na página 7]

Jesus a mustra interes personal den esnan cu el a cura