Dios i Cesar

“Sin falta, anto, paga bek e cosnan di César na César, pero e cosnan di Dios na Dios.”—LUCAS 20:25.

 1. (a) Kico ta e posicion elevá di Jehova? (b) Kico nos debe na Jehova cu nos nunca mag duna César?

ORA Jesucristo a duna e instruccion ei, no tabatin duda den su mente cu e rekisitonan di Dios pa Su sirbidornan ta superior cu cualkier cos cu César, of Estado, lo por rekerí di nan. Jesus a comprendé mihó cu cualkier hende e berdad dje oracion dje salmista na Jehova: “Bo gobernacion real ta un gobernacion real pa tur tempu indefiní, i bo dominio [soberania]a ta dura pa tur generacion cu ta sigui.” (Salmo 145:13) Ora e Diabel a ofrecé Jesus autoridad riba tur e reinonan dje tera habitá, Jesus a contestá: “Ta pará skirbí, ‘Ta Jehova bo Dios bo tin cu adorá, i ta na dje so bo tin cu rindi sirbishi sagrado.’” (Lucas 4:5-8) Adoracion nunca mag di ser duná na “César,” sea César ta e emperador romano, of algun otro gobernante humano, of Estado mes.

 2. (a) Kico ta Satanas su posicion relativo pa cu e mundu aki? (b) Cu ken su permit Satanas ta ocupá su posicion?

² Jesus no a nenga cu e reinonan dje mundu a pertenecé na Satanas. Mas despues, el a yama Satanas “e gobernante dje mundu aki.” (Juan 12:31; 16:11) Yegando na fin dje promé siglo E.C., apostel Juan a skirbi: “Nos sa cu nos ta originá cu Dios, pero henter e mundu ta drumi den poder dje malbado.” (1 Juan 5:19) Esaki no ta nificá cu Jehova a renunciá su soberania riba e tera. Corda cu ora Satanas a ofrecé Jesus gobernacion riba e reinonan político, el a declará: “Lo mi duná bo tur e autoridad aki . . . pasobra el a ser entregá na mi.” (Lucas 4:6) Satanas ta ehercé autoridad riba e reinonan dje mundu solamente cu permit di Dios.

 3. (a) Ki posicion gobiernunan dje nacionnan tin dilanti Jehova? (b) Pakico nos por bisa cu sumision n’e gobiernunan dje mundu aki no ta nificá cu nos ta someté nos mes na Satanas, e dios dje mundu aki?

³ Di manera similar, Estado ta ehercé su autoridad solamente pa motibu cu Dios como Gobernante Soberano ta permitié haci esei. (Juan 19:11) Pues, por bisa di “e autoridadnan existente” cu nan a “ser poné den nan posicion relativo dor di Dios.” Compará cu Jehova su autoridad soberano supremo, esun di Estado siguramente ta un autoridad inferior. Sin embargo, nan ta “minister di Dios,” “sirbidornan público di Dios,” den e sentido cu nan ta percurá pa servicionan necesario, ta mantené ley i ordu i ta castigá malechornan. (Romanonan 13:1, 4, 6) Pues cristiannan tin cu comprendé cu maske Satanas ta e gobernante invisibel dje mundu of sistema aki, nan no ta sometiendo nan mes na dje ora nan ta reconocé nan sumision relativo na Estado. Nan ta obedeciendo Dios. Den e aña aki, 1996, Estado político ainda ta un parti di “e areglo di Dios,” un areglo temporal cu Dios ta permití existí, i Jehova su sirbidornan terenal mester reconoc’é como tal.—Romanonan 13:2.

Jehova Su Sirbidornan Pre-Cristian i Estado

 4. Pakico Jehova a permití Josef bira prominente den e gobiernu di Egipto?

⁴ Den tempunan pre-cristian, Jehova a permití algun di su sirbidornan ocupá posicionnan prominente den gobiernunan di Estado. Por ehempel, den siglo 18 P.E.C., Josef a bira promé minister di Egipto, cayendo directamente bou di e Fárao na mando. (Génesis 41:39-43) Sucesonan cu a sigui despues a haci cla cu Jehova a maniobrá esaki di manera cu Josef por a sirbi como un instrumento pa preservá e ‘simia di Abraham,’ su desendientenan, p’e realisacion di Su propósitonan. Naturalmente, nos tin cu corda cu Josef a ser bendé den sclabitud na Egipto, i el a biba na un tempu ora e sirbidornan di Dios no tabatin ni e Ley di Moises ni “e ley di Cristo.”—Génesis 15:5-7; 50:19-21; Galationan 6:2.

 5. Pakico e exiliadonan hudiu a ser mandá pa “busca e pas” di Babilonia?

⁵ Siglonan despues e fiel profeta Jeremías a ser inspirá dor di Jehova pa bisa exiliadonan hudiu pa someté nan mes n’e gobernantenan ora nan tabata den exilio na Babilonia i asta pa haci oracion p’e pas dje stad ei. Den su carta na nan, el a skirbi: “Esaki ta loke Jehova di ehércitonan, e Dios di Israel, a bisa na tur e exiliadonan, . . . ‘Busca e pas dje stad na cua mi a causa pa boso bai den exilio, i haci oracion na fabor di dje na Jehova, pasobra den su pas lo resultá di tin pas pa boso mes.’” (Jeremías 29:4, 7) Semper, Jehova su pueblo tin motibu pa “busca pas” pa nan mes i e nacion caminda nan ta biba, pa nan por ta liber pa adorá Jehova.—1 Pedro 3:11.

 6. Aunke Daniel i su tres compañeronan a haña posicion haltu den gobiernu, den ki manera nan a nenga di haci compromiso relacioná cu e Ley di Jehova?

⁶ Durante e exilio babilónico, Daniel i tres otro fiel hudiu cu tabata prezu den sclabitud na Babilonia a someté nan na entrenamentu di Estado i a bira funcionarionan público di rango haltu na Babilonia. (Daniel 1:3-7; 2:48, 49) Sin embargo, asta durante nan entrenamentu, nan a tuma un posicion firme riba asuntunan di dieta cu por a hiba nan na kibra e Ley cu nan Dios, Jehova, a percurá mediante Moises. Pa esaki nan a ser bendicioná. (Daniel 1:8-17) Ora Rey Nabucodonosor a lanta un imágen di Estado, e tres compañeronan hebreo di Daniel aparentemente tabata obligá pa asistí n’e ceremonia huntu cu nan coleganan administrador di Estado. No obstante, nan a nenga di “cai abou i adorá” e ídolo di Estado. Atrobe, Jehova a recompensá nan integridad. (Daniel 3:1-6, 13-28) Di igual manera awe, Testigonan di Jehova ta respetá e bandera dje nacion den cua nan ta biba, pero nan lo no efectuá un acto di adoracion pa cuné.—Exodo 20:4, 5; 1 Juan 5:21.

 7. (a) Ki posicion excelente Daniel a tuma, apesar di tabatin un posicion elevá den e structura gubernamental di Babilonia? (b) Ki cambionan a tuma lugá den tempunan cristian?

⁷ Despues dje caida dje dinastia neo-babilónico, Daniel a ricibí un posicion gubernamental di rango haltu bou dje régimen medo-perso nobo cu a reemplasá e dinastia na Babilonia. (Daniel 5:30, 31; 6:1-3) Pero e no a permití su posicion haltu hib’é na comprometé su integridad. Ora un ley estatal a rekerí pa Daniel adorá Rey Dario en bes di Jehova, el a nenga. Pa motibu di esaki el a ser tirá pa leon, pero Jehova a libr’é. (Daniel 6:4-24) Naturalmente, esaki tabata den tempunan pre-cristian. Una bes e congregacion cristian a ser establecí, e sirbidornan di Dios a bini “bou di ley pa cu Cristo.” Hopi cos cu tabata permití bou dje sistema hudiu mester a ser mirá den un manera diferente, basá riba e manera den cua Jehova tabata tratando cu su pueblo awor.—1 Corintionan 9:21; Mateo 5:31, 32; 19:3-9.

Jesus Su Actitud pa cu Estado

 8. Ki incidente ta mustra cu Jesus tabata determiná pa evitá enbolbimentu político?

⁸ Ora Jesucristo tabata riba tera, el a fiha normanan mas haltu pa su siguidornan, i el a rechasá tur enbolbimentu den asuntunan político of militar. Despues cu Jesus a alimentá milagrosamente vários mil hende cu un par di pan i dos piscá chikitu, e hudiunan kier a gar’é i hacié un rey político. Pero Jesus a evitá nan dor di retirá lihé bai n’e cerunan. (Juan 6:5-15) Relacioná cu e incidente aki, The New International Commentary on the New Testament ta declará: “E hudiunan dje periodo ei tabatin anhelonan nacionalístico intenso, i sin duda hopi di esnan cu a mira e milager a sinti cu aki tabatin un lider acreditá dor di Dios, kende tabata net esun ideal pa guia nan contra e romanonan. Di manera cu nan a determiná pa hacié rey.” E ta agregá cu Jesus a “rechasá decisivamente” e oferta aki di liderato político. Cristo no a duna sosten na ningun lantamentu hudiu contra dominacion romano. En realidad, el a predicí loke lo tabata e resultado dje rebelion cu lo a tuma lugá despues di su morto—ainan sin igual p’e habitantenan di Jerusalem i e destruccion dje stad ei.—Lucas 21:20-24.

 9. (a) Con Jesus a describí e relacion di su Reino cu e mundu? (b) Ki guia Jesus a duna su siguidornan pa loke ta nan tratamentu cu e gobiernunan dje mundu?

⁹ Djis promé cu su morto, Jesus a bisa e representante special dje emperador romano na Hudea: “Mi reino no ta parti dje mundu aki. Si mi reino tabata parti dje mundu aki, mi sirbidornan lo a bringa pa mi no ser entregá n’e hudiunan. Pero, e caso ta, mi reino no ta dje fuente aki.” (Juan 18:36) Te ora su Reino pone fin n’e mando di gobiernunan político, e disipelnan di Cristo ta sigui su ehempel. Nan ta rindi obedencia n’e autoridadnan establecí ei pero nan no ta interferí den nan empeñonan político. (Daniel 2:44; Mateo 4:8-10) Jesus a percurá guia pa su disipelnan, declarando: “P’esei paga bek na César e cosnan di César, pero na Dios e cosnan di Dios.” (Mateo 22:21) Mas promé, den su Sermon Riba Ceru, Jesus a bisa: “Si un hende bou di autoridad ta obligá bo pa un miya di sirbishi, bai dos miya cuné.” (Mateo 5:41) Den e contexto dje sermon aki, Jesus tabata ilustrando e principio di sumision boluntario na exigencianan legítimo, sea den relacionnan humano of den rekisitonan gubernamental cu ta na armonia cu e ley di Dios.—Lucas 6:27-31; Juan 17:14, 15.

Cristiannan i César

10. Segun un historiador, ki posicion conciencial e cristiannan di promé tabatin relacioná cu César?

¹⁰ E instruccionnan breve aki mester a guia e relacion entre cristiannan i Estado. Den su buki The Rise of Christianity, historiador E. W. Barnes a skirbi: “Den futuro siglonan despues cu Cristo a duna e instruccion aki, ki ora cu un cristian tabata den duda en cuanto su deber pa cu Estado, el a acudí n’e siñansa autoritativo di Cristo. Lo e paga belasting: e impuestonan por ta pisá—nan a bira intolerabel promé cu e derumbe dje Imperio Occidental—pero e cristian lo paga e belasting apesar di con difícil esei tabata. Mescos tambe lo e aceptá tur otro obligacion di Estado, basta nan no a exigí p’e rindi na César e cosnan cu a pertenecé na Dios.”

11. Con Pablo a consehá cristiannan pa trata cu gobernantenan mundano?

¹¹ Tabata na armonia cu e principio aki cu, un poco mas cu 20 aña despues di Cristo su morto, apostel Pablo a bisa e cristiannan na Roma: “Laga tur alma sea sumiso n’e autoridadnan superior.” (Romanonan 13:1) Rond di dies aña despues, djis promé cu su di dos encarcelacion i su ehecucion na Roma, Pablo a skirbi Tito: “Sigui corda nan [cristiannan di Creta] pa ta sumiso i ta obediente na gobiernu i autoridad como gobernante, pa ta cla pa tur bon obra, pa no papia malu di ningun hende, pa no busca guera, pa ta razonabel, desplegando tur suavedad pa cu tur hende.”—Tito 3:1, 2.

Comprendimentu Progresivo di “e Autoridadnan Superior”

12. (a) Kico Charles Taze Russell a considerá como e posicion apropiado di un cristian en relacion cu e autoridadnan gubernamental? (b) Relacioná cu servicio den e forsanan armá, ki diferente puntonan di bista cristiannan ungí tabatin durante Guera Mundial I?

¹² Leu aya na 1886, Charles Taze Russell a skirbi den e buki The Plan of the Ages: “Ni Jesus ni e Apostelnan no a interferí cu gobernantenan terenal den ningun manera. . . . Nan a siña e Iglesia pa obedecé e leynan, i pa respetá esnan den autoridad debí na nan funcion, . . . pa paga nan belastingnan prescribí, i excepto unda nan ta na conflicto cu e leynan di Dios (Echo. 4:19; 5:29) pa no duna resistencia contra ningun ley establecí. (Rom. 13:1-7; Mat. 22:21) Jesus i e Apostelnan i e iglesia di promé tur tabata obediente na ley, aunke nan tabata separá dje gobiernunan dje mundu aki, i no a participá den nan.” E buki aki corectamente a identificá “e podernan mas haltu,” of “e autoridadnan superior,” cu apostel Pablo a mencioná, como autoridadnan gubernamental humano. (Romanonan 13:1, King James Version) Na 1904 e buki The New Creation a declará cu cristiannan berdadero “mester ser hañá entre e hendenan di mas obediente na ley dje tempu actual—ni agitador, ni pleitista, ni pulushi.” Algun a comprendé cu esaki ta nificá sumision total n’e podernan, asta te n’e punto di aceptá servicio den e forsanan armá durante Guera Mundial I. Sin embargo, otronan a mira servicio militar como contrario cu e declaracion di Jesus: “Tur esnan cu tuma spada lo perecé pa spada.” (Mateo 26:52) Claramente, un comprendimentu mas cla di sumision cristian n’e autoridadnan superior tabata necesario.

13. Ki cambio den comprendimentu dje identidad dje podernan mas haltu a ser presentá na 1929, i con esaki a resultá beneficioso?

¹³ Na 1929, na un tempu ora leynan di vários gobiernu a cuminsá prohibí cosnan cu Dios ta manda, of exigí cosnan cu ta na conflicto cu e leynan di Dios, e rumannan a kere cu e podernan mas haltu mester ta Jehova Dios i Jesucristo.b Esaki tabata e comprendimentu cu e sirbidornan di Jehova tabatin durante e periodo crucial promé i durante Guera Mundial II i drentando den e Guera Friu, cu su balansa di teror i su estado di alerta militar. Mirando bek, ta evidente cu e punto di bista aki di cosnan, halsando debidamente e supremacia di Jehova i su Cristo, a yuda e pueblo di Dios mantené un posicion neutral sin haci compromiso atrabes dje periodo difícil aki.

Sumision Relativo

14. Con un lus mas cla a ser tirá riba Romanonan 13:1, 2 i textonan relacioná cu esei na 1962?

¹⁴ Na 1961 e New World Translation of the Holy Scriptures a ser completá. Su preparacion a exigí un estudio cabal dje idioma textual dje Scritura. E traduccion exacto dje palabranan cu a ser usá no solamente den Romanonan capítulo 13 sino tambe den textonan manera Tito 3:1, 2 i 1 Pedro 2:13, 17 a haci cla cu e término “autoridadnan superior” ta referí, no n’e Autoridad Supremo, Jehova, i su Yu Jesus, sino na autoridadnan gubernamental humano. Na cabamentu di 1962, E Toren di Vigilancia a publicá artículonan cu a duna un splicacion exacto di Romanonan capítulo 13 i tambe a duna un bista mas cla cu esun cu tabatin n’e tempu di C. T. Russell. E artículonan aki a mustra cu sumision cristian n’e autoridadnan no por ta absoluto. E mester ta relativo, basta e no ta trece e sirbidornan di Dios na conflicto cu e leynan di Dios. Mas artículonan den E Toren di Vigilancia a enfatisá e punto importante aki.c

15, 16. (a) Ki punto di bista mas balansá e comprendimentu nobo di Romanonan capítulo 13 a hiba na dje? (b) Ki preguntanan ta keda pa ser contestá?

¹⁵ E clave aki p’e comprendimentu corecto di Romanonan capítulo 13 a haci posibel p’e pueblo di Jehova balansá debido respet p’e autoridadnan político cu un posicion di no comprometé principionan bíblico vital. (Salmo 97:11; Jeremías 3:15) El a permití nan haña un punto di bista apropiado di nan relacion cu Dios i nan tratamentu cu Estado. El a haci sigur cu miéntras nan ta paga bek e cosnan di César na César, nan no ta neglishá di paga bek na Dios e cosnan di Dios.

¹⁶ Pero exactamente kico ta e cosnan di César? Kico Estado por exigí legítimamente for di un cristian? E preguntanan aki lo ser considerá den e siguiente artículo.

[Nota]

Interesantemente, den su comentario riba Romanonan capítulo 13, profesor F. F. Bruce ta skirbi: “Ta bisto for dje contexto directo, mescos tambe for dje contexto general dje skirbimentunan apostólico, cu estado corectamente por exigí obedencia solamente dentro dje límitenan dje propósitonan pa cua el a ser instituí dor di Dios—particularmente, cristiannan no solamente por sino mester resistí estado ora e ta exigí lealtad cu hende debe na Dios so.”

Bo Por Splica?

◻ Pakico sumision n’e autoridadnan superior no ta nificá sumision na Satanas?

◻ Kico tabata Jesus su actitud pa cu política di su dia?

◻ Ki conseho Jesus a duna su siguidornan pa loke ta nan tratamentu cu César?

◻ Con Pablo a consehá cristiannan pa trata cu e gobernantenan dje nacionnan?

◻ Con e comprendimentu dje identidad dje autoridadnan superior a desaroyá durante e añanan?

[Plachi na página 10]

Ora Satanas a ofrecé Jesus poder político, el a rechas’é

[Plachi na página 13]

Russell a skirbi cu cristiannan berdadero “mester ser hañá entre e hendenan di mas obediente na ley dje tempu actual”