Dunando Testimonio Na “Tur Nacion”

“E bon nobo dje reino aki lo ser predicá den tur e tera habitá como testimonio na tur nacion; i anto e fin lo yega.”​—⁠MATEO 24:⁠14.

KI UN sorpresa e palabranan di Jesus mencioná ariba mester tabata pa su disipelnan hudiu! E idea so pa hudiu santificá bai papia cu gentil “impuru,” “hende dje nacionnan,” tabata algu straño pa un hudiu, asta repugnante.a Sí, un hudiu conciencial lo no a pensa mes di drenta un cas gentil! E disipelnan hudiu ei ainda tabatin asina hopi di siña tocante Jesus, su amor i su comision. I ainda nan tabatin hopi di siña tocante Jehova su imparcialidad.​—⁠Echo 10:​28, 34, 35, 45.

² Testigonan di Jehova a predicá e bon nobo den e nacionnan, incluyendo Israel di dia moderno, i nan ta proclamand’e awor den mas nacion cu nunca promé. Na 1994 mas cu cuater miyon i mei Testigo ta predicando den rond di 230 pais. Nan ta conduciendo rond di cuater miyon i mei studio di Bijbel cu hende interesá. Esaki ta ser haci apesar di prehuicio mundial, hopi biaha basá riba ignorancia dje siñansa i motivacionnan dje Testigonan. Manera a ser bisá dje cristiannan di promé, asina por ser bisá di nan: “Berdaderamente en cuanto e secta aki ta conocí na nos cu na tur parti hende ta papia contra dje.” (Echo 28:22) Na kico anto nos por atribuí nan ministerio exitoso? Tin por lo ménos tres factor cu ta contribuí na nan progreso​—⁠siguiendo e guia di Jehova su spiritu, imitando Cristo su métodonan práctico i usando e instrumentonan corecto pa comunicacion eficas.

Jehova Su Spiritu i e Bon Nobo

³ Testigonan di Jehova ta gaba di nan éxito, como si fuera esei ta debí na cualkier abilidad special cu nan por tin? No, pasobra e palabranan aki di Jesus ta aplicabel: “Ora boso a haci tur cos asigná na boso, bisa, ‘Nos ta esclabo cu no ta sirbi pa nada. Loke nos a haci ta loke nos mester a haci.’ ” Como cristiannan dedicá i bautisá, Testigonan di Jehova a aceptá boluntariamente e responsabilidad di sirbi Dios, sin importá nan circunstancianan personal. Pa algun, esei ta nificá sirbishi di tempu completo como misionero of como boluntario den oficinanan di sucursal i facilidadnan pa imprimí publicacionnan cristian. Pa otronan tal disponibilidad cristian ta hiba nan na trabou di construccion riba edificionan religioso, na predicacion di tempu completo como ministernan pionero, of na predicacion part-time como publicadornan dje bon nobo den congregacionnan local. Ningun di nos hustamente por broma tocante hacimentu di nos deber, “loke nos mester a haci.”​—⁠Lucas 17:10; 1 Corintio 9:⁠16.

⁴ Cualkier éxito cu nos tin por ser atribuí na Jehova su spiritu, of forsa activo. Ta mes bálido pa bisa awe manera tabata den dianan dje profeta Zacarías: “Esaki ta e palabra di Jehova na Zorobabel, bisando, ‘No pa medio di un forsa militar, ni pa medio di poder, sino pa medio di mi spiritu,’ Jehova di ehército a bisa.” Asina, oposicion mundial n’e trabou di predicacion dje Testigonan a ser vencí, no pa medio di esfuerso humano, sino pa medio dje direccion i proteccion di Jehova.​—⁠Zacarías 4:⁠6.

⁵ En cuanto esnan cu ta respondé n’e mensahe di Reino, Jesus a bisa: “Ta pará skirbí den e Profetanan, ‘I nan tur lo ser siñá pa Jehova.’ Tur hende cu a tende for dje Tata i a siña ta bini cerca mi. . . . Ningun hende por bini cerca mi aménos cu e Tata ta duna esei na dje.” (Juan 6:​45, 65) Jehova por lesa curason i mente, i e conocé esnan cu probablemente lo respondé na su amor maske kisas nan no conoc’é ainda. Tambe e ta usa su angelnan pa dirigí e ministerio único aki. Esei ta pakico Juan a mira den vision un participacion angelical i a skirbi: “Mi a mira un otro angel bulando meimei di cielu, i e tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo.”​—⁠Revelacion 14:⁠6.

Conciente di un Necesidad Spiritual

⁶ Un otro factor den Jehova su dunamentu di oportunidad na un persona pa aceptá e bon nobo ta esun cu Jesus a expresá: “Felis ta esnan conciente di nan necesidad spiritual, ya cu e reino di cielu ta pertenecé na nan.” (Mateo 5:⁠3) Un persona satisfecho cu su mes of unu cu no ta buscando e berdad lo no ta conciente di un necesidad spiritual. E ta pensa solamente den términonan material i carnal. Complaciencia ta bira un barera. P’esei, ora hopi hende cu nos topa segun cu nos ta bai di cas pa cas ta rechasá e mensahe, nos mester tuma na consideracion tur e diferente motibunan cu hende por tin pa nan reaccion.

⁷ Hopi hende ta nenga di scucha pasobra nan ta pega caprichosamente n’e religion cu nan a heredá i no ta habrí pa un combersacion. Otronan a ser atraí na un religion cu ta cuadra cu nan personalidad​—⁠algun kier religion místico misticismo, otronan ta respondé na emocionalismo, otronan atrobe ta busca un club social na nan iglesia. Awe hopi hende a scoge un estilo di bida cu ta na conflicto cu e normanan di Dios. Talbes nan ta biba un bida inmoral, cua ta nan motibu pa bisa, “Mi no ta interesá.” Otronan atrobe, kendenan ta pretendé di ta educá i científico, ta rechasá e Bijbel como muchu simplístico.​—⁠1 Corintio 6:​9-11; 2 Corintio 4:​3, 4.

⁸ Rechaso dje mayoria mester mengua nos fe i celo den e ministerio salbador-di-bida? Nos por haña consuelo for dje palabranan di Pablo n’e romanonan: “Kico, anto, ta e caso? Si algun no a expresá fe, nan falta di fe tal bes lo haci e fieldad di Dios sin efecto? Hamas esei lo sosodé! Ma laga Dios ser hañá berdadero, aunke tur hende ta ser hañá mentiroso, net manera ta pará skirbí: ‘Pa bo sea probá hustu den bo palabra i por gana ora bo ta ser husgá.’ ”​—⁠Romano 3:​3, 4.

⁹ Nos por saca animacion for dje hopi ehempelnan rond mundu di paisnan cu a parce di ta masha desinteresá i tog, cu tempu, a resultá di ta net contrali. Jehova i e angelnan tabata sa cu tabatin hende di bon curason cu mester a ser hañá​—⁠pero e Testigonan di Jehova mester tabata persistente i perseverá den nan ministerio. Tuma, por ehempel, algun pais unda catolicismo a parce di presentá un obstáculo insuperabel 50 aña pasá​—⁠Argentina, Brazil, Colombia, Irlanda, Italia, México, Portugal i Spaña. Tabatin poco Testigo aya na 1943, solamente 126.000 mundialmente, di cua 72.000 tabata na Merca. E ignorancia i prehuicio cu e Testigonan a confrontá a parce manera un muraya di bloki dor di cua no por a pasa. Sin embargo, awe algun dje resultadonan di predicacion mas exitoso a ser obtené den e paisnan aki. Mescos ta e caso cu hopi pais anteriormente comunista. Na 1993 e bautismo di 7.402 persona na un congreso na Kiev, Ucrania, ta duna evidencia di esaki.

¹⁰ Ki métodonan e Testigonan a usa pa comunicá e bon nobo na nan próhimo? Nan a usa atraccion material pa gana miembro combertí, manera algun hende a pretendé? Nan a bishitá solamente hende pober i sin educacion, manera otronan a declará?

Métodonan Exitoso pa Transmití e Bon Nobo

¹¹ Jesus i su disipelnan a establecé e patronchi cu e Testigonan ta sigui te n’e dia djawe den nan trabou di haci disipel. Jesus a bai unda cu tabatin hende, ricu of pober​—⁠na cas di hende, lugá público, cant’i lago, cant’i ceru, asta den snoanan.​—⁠Mateo 5:​1, 2; 8:14; Marco 1:16; Lucas 4:⁠15.

¹² Relacioná cu su mes ministerio, apostel Pablo por a bisa corectamente: “Boso wel sa con for dje promé dia cu mi a pone pia den e districto di Asia mi tabata cerca boso tur ora, trahando manera esclabo pa Señor . . . , miéntras cu mi no a nenga di bisa boso ningun dje cosnan cu tabata probechoso ni di siña boso públicamente i di cas pa cas.”​—⁠Echo 20: 18-20.

¹³ Testigonan di Jehova ta conocí rond mundu pa nan siguimentu dje patronchi apostólico, e ministerio di cas-pa-cas. En bes di concentrá riba predicacion via television costoso, superficial i impersonal, e Testigonan ta bai cerca e hendenan, ricu i pober, i ta topa nan cara-cara. Nan ta busca pa combersá tocante Dios i su Palabra.b Nan no ta purba cumpra hende cu beneficio material pa bira cristian, dor di duna cos material grátis. Na esnan cu ta dispuesto pa razoná, nan ta mustra cu e único solucion berdadero pa problemanan di humanidad ta gobernacion mediante e Reino di Dios, cu lo cambia condicionnan riba nos tera pa mihó.​—⁠Isaías 65:​17, 21-25; 2 Pedro 3:13; Revelacion 21:​1-4.

¹⁴ Pa e trabou por ser efectuá den mas tantu pais posibel, misioneronan i pioneronan den hopi nacion a establecé un vanguardia cu a sirbi como base pa mas progreso. Nan a pone un fundeshi, i despues e Testigonan local a tuma e delantera. Pues, no a rekerí cantidad grandi di Testigonan stranhero pa sigui cu e predicacion i pa manten’é bon-organisá. Un ehempel sobresaliente ta esun di Hapon. Na cabamentu di añanan 40, principalmente misioneronan australiano-asiático i británico a bai aya, a studia e idioma, a adaptá nan mes n’e condicionnan un tiki primitivo dje era ei despues di guera i a cuminsá predicá di cas pa cas. Durante Guera Mundial II, e Testigonan a ser prohibí i persiguí na Hapon. Pues ora e misioneronan a yega nan a haña solamente un man yen di Testigo hapones activo. Pero awe nan a crece te na mas cu 187.000 den mas cu 3.000 congregacion! Kico tabata e secreto di nan éxito trempan? Un misionero cu mas di 25 aña di sirbishi aya a bisa: “Tabata masha importante pa siña combersá cu e hendenan. Conociendo nan idioma, nos por a identificá nos mes cu nan, pa comprendé i apreciá nan moda di biba. Nos mester a mustra cu nos a stima e haponesnan. Nos a purba humildemente pa bira un parti dje comunidad local, naturalmente, sin comprometé nos balornan cristian.”

Conducta Cristian Tambe Ta un Testimonio

¹⁵ Sin embargo, no ta na un mensahe di Bijbel so hende a respondé. Tambe nan a mira cristianismo na accion. Nan a observá e amor, armonia i unidad dje Testigonan asta bou dje situacionnan di mas trabahoso, manera guera civil, pleitu di tribu i enemistad étnico. E Testigonan a mantené un posicion claro di neutralidad cristian den tur conflicto i a cumpli cu Jesus su palabranan: “Mi ta duna boso un mandamentu nobo, pa boso stima un e otro; mescos cu ami a stima boso, pa boso tambe stima un e otro. Na esaki tur hende lo sa cu boso ta mi disipelnan, si boso tin amor entre boso.”​—⁠Juan 13:​34, 35.

¹⁶ Amor pa próhimo a ser ilustrá den e caso di un homber di edad kende a skirbi un corant local tocante “Sr. i Sra. Hende Nechi.” El a splica cu su bisiñanan tabata bondadoso cuné ora su casá tabata muriendo. “Desde cu el a muri . . . nan tabata magnífico,” el a skirbi. “Desde e tempu ei nan a ‘adoptá’ mi . . . , haci tur sorto di tarea di cas i yuda resolvé e problemanan di un pensionado di 74 aña di edad. Loke ta haci tur esaki asta mas excepcional ta cu nan ta coló scur, ami ta blancu. Nan ta Testigonan di Jehova, ami ta un católico inactivo.”

¹⁷ E experencia aki ta ilustrá cu nos por duna un testimonio den hopi manera, incluyendo nos conducta diario. Realmente, aménos cu nos conducta ta manera di Cristo, nos ministerio lo ta estilo di fariseo, sin efecto. Nos no kier ta manera esnan cu Jesus a describí: “Tur loke nan ta bisa boso, haci’é i cumpli cuné, pero no haci conforme cu nan echonan, pasobra nan ta bisa pero no ta haci.”​—⁠Mateo 22:​37-39; 23:⁠3.

E Clase di Esclabo Ta Suministrá e Instrumentonan Corecto

¹⁸ Un otro factor vital den predicá e bon nobo na tur nacion ta e disponibilidad di literatura bíblico producí dor dje Sociedad Watch Tower Bible and Tract. Nos tin buki, foyeto, tratado i revista cu por satisfacé casi tur hende sincero cu tin pregunta. Si nos topa un moslim, un hindú, un budista, un taoista of un hudiu, nos por usa e buki El hombre en busca de Dios of un variedad di tratado i foyeto pa cuminsá un combersacion i posiblemente un studio di Bijbel. Si un evolucionista puntra tocante creacion, nos por usa e buki La vida... ¿cómo se presentó aquí? ¿Por evolución, o por creación? Si un hóben puntra, ‘Kico ta e propósito di bida?’ nos por refiri’é n’e buki Loke hovenan sa puntra​—⁠contesta práctica. Si un persona ta ser afectá profundamente pa problemanan personal​—⁠depresion, cansancio, violacion sexual, divorcio​—⁠nos tin revistanan cu a trata tal temanan den un manera práctico. Berdaderamente, e clase di esclabo fiel cu Jesus a profetisá cu lo ta suministrando “cuminda n’e debido tempu,” ta cumpliendo cu su papel.​—⁠Mateo 24:​45-47.

¹⁹ Pero pa alcansá e nacionnan, ta necesario pa producí e literatura aki den hopi idioma. Con ta posibel pa traducí Bijbel i literatura bíblico den mas cu 200 idioma? Un consideracion breve di un ehempel, Albania, ta ilustrá con e esclabo fiel i discreto ta capas pa promové e bon nobo apesar di gran dificultad i sin un Pentecoste moderno pa duna acceso instantáneo na idiomanan.​—⁠Echo 2:​1-11.

²⁰ Solamente un par di aña pasá, Albania ainda tabata ser considerá como e único pais comunista berdaderamente ateista. E revista National Geographic a declará na 1980: “Albania ta prohibí [religion], proclamando su mes na 1967 como ‘e promé estado ateista na mundu.’ . . . Albania su generacion nobo conocé solamente ateismo.” Awor cu comunismo a cai, albanesnan cu ta reconocé nan necesidad spiritual ta respondiendo n’e predicacion cu ta ser hací dor di e Testigonan di Jehova. Un ekipo di traduccion chikitu consistiendo di Testigonan hóben cu un conocimentu di italiano i ingles a ser formá na Tiranë na 1992. Rumannan cualificá di bishita di otro paisnan a siña nan usa laptop computer pa editá texto na albanes. Nan a cuminsá traducí tratado i e revista Toren di Vigilancia. Segun cu nan ta gana experencia, nan ta traha riba traduccion di otro publicacionnan bíblico balioso. Actualmente tin rond di 200 Testigo activo den e pais chikitu ei (poblacion di 3.262.000), i 1.984 a asistí na Memorial di 1994.

Nos Tur Tin un Responsabilidad

²¹ Sucesonan di mundu ta alcansando un culminacion. Cu e aumento den crímen i violencia, e matansa i violacion den gueranan local, e moralidad permisivo prevalente i su fruta di malesanan transmití sexualmente, e falta di respet pa autoridad legítimo, e mundu ta parce di bira un anarkia, ingobernabel. Nos ta den un periodo paralelo cu e tempu promé cu Diluvio describí den Génesis: “Jehova a mira cu e maldad di hende tabata abundante den e tera i tur inclinacion di pensamentu di su curason tabata solamente malu tur ora. I Jehova a sinti duele cu el a traha hende riba e tera, i el a sinti’é ofendí den su curason.”​—⁠Génesis 6:​5, 6; Mateo 24:​37-39.

²² Mescos cu den dia di Noe, Jehova lo tuma accion. Pero den su husticia i amor, e kier p’e bon nobo i e mensahe di spiertamentu ser predicá promé na tur nacion. (Marco 13:10) En coneccion cu esaki Testigonan di Jehova tin un responsabilidad​—⁠pa haña esnan cu ta digno dje pas di Dios i pa siña nan su camindanan di pas. Pronto, n’e debido tempu di Dios, e comision di predicá lo ser completá exitosamente. “Anto e fin lo yega.”​—⁠Mateo 10:​12, 13; 24:14; 28:​19, 20.

[Footnotes]

Bo Ta Corda?

◻ Ki éxito Testigonan di dia moderno tabatin den nan ministerio?

◻ Pakico hopi hende ta rechasá e mensahe cristian?

◻ Ki método apostólico di predicá e Testigonan ta usa?

◻ Ki instrumentonan nos tin pa un ministerio eficas?

◻ Kico nos tur mester haci na armonia cu Marco 13:⁠10?

[Study Questions]

 1. Pakico e palabranan di Jesus registrá na Mateo 24:14 mester tabata un sorpresa pa su siguidornan?

 2. (a) Con extenso e ministerio dje Testigonan tabata? (b) Cua tres factornan básico a contribuí n’e progreso dje Testigonan?

 3. Pakico nos no por gaba pa loke a ser lográ?

 4. Con oposicion mundial n’e ministerio cristian a ser vencí?

 5. Ki papel Jehova ta hunga den laga e mensahe di Reino ser plamá?

 6. Ki actitud básico ta necesario pa un persona respondé n’e bon nobo?

 7. Pakico hopi hende no ta respondé n’e berdad?

 8. Pakico rechaso no mester mengua nos celo? (Juan 15:​18-20)

9, 10. Ki evidencia tin cu oposicion a ser vencí den hopi pais?

11. Ki ehempel excelente Jesus a pone den su ministerio? (Mira Juan 4:​6-26.)

12, 13. (a) Con Pablo a proveé un patronchi pa cristiannan? (b) Con Testigonan di Jehova a sigui e ehempel di Pablo?

14. (a) Con hopi misionero i pionero a pone un fundeshi sólido? (b) Kico nos ta siña for dje experencia di Testigonan di Jehova na Hapon?

15. Con e Testigonan a demostrá conducta cristian?

16. Ki experencia ta ilustrá amor cristian práctico?

17. Ki curso nos mester evitá?

18. Con literatura bíblico ta ekipá nos pa yuda hende di curason onrado?

19, 20. Con e trabou di Reino a gana velocidad na Albania?

21. Den ki clase di periodo nos ta bibando?

22. Ki responsabilidad cristian tur Testigo di Jehova tin?

[Box on page 19]

PAIS TESTIGONAN ACTIVO NA 1943 NA 1993

Argentina 374 102.043

Brazil 430 366.297

Chile 72 44.668

Colombia  ?? 60.854

Filipina Guera M. II​—ningun registro 116.576

Francia Guera M. II​—ningun registro 122.254

Irlanda 150? 4.224

Italia Guera M. II​—ningun registro 201.440

México 1,565 380.201

Perú Ningun registro di actividad 45.363

Polonia Guera M. II​—ningun registro 113.551

Portugal Ningun registro di actividad 41.842

Spaña Ningun registro di actividad 97.595

Uruguay 22 9.144

Venezuela Ningun registro di actividad 64.081

[Caption on page 17]

Testigonan di Jehova ta aumentando den hopi pais católico, manera Spaña

[Caption on page 18]

Testigonan di Jehova ta activo den nacionnan rond e tera