Yehova Ta Entrená Wardadónan pa Su Tou

“SEÑOR ta duna sabiduria; for di su boka ta sali konosementu i komprondementu.”—PROVERBIONAN 2:6.

1, 2. Pakiko hòmbernan batisá ta hasi esfuerso pa haña mas responsabilidat den e kongregashon?

“MI TABATA masha kontentu ora nan a nombra mi komo ansiano,” segun Nick, kende a sirbi shete aña komo superintendente. “Mi a mira e privilegio aki komo un oportunidat pa ekspandé mi sirbishi na Yehova. Mi a sinti ku mi tabatin e obligashon di gradisié pa tur loke el a hasi pa mi. Tambe mi kier a yuda miembronan di e kongregashon mas tantu posibel, den e mesun manera ku otro ansianonan a yuda mi.” Pero ademas di goso, Nick tabatin sierto preokupashonnan. E di: “Dia mi a ser nombrá mi no tabatin ni 30 aña ainda. P’esei mi tabatin miedu ku lo mi no tabata poseé e abilidatnan nesesario—e disernimentu i sabiduria—pa pastoriá e kongregashon na un manera efikas.”

² E rumannan ku Yehova ta nombra pa perkurá pa su tou tin hopi motibu pa ta felis. Apòstel Pablo a rekordá e ansianonan di Efesio riba un di e motibunan ei ora el a sita Hesus, bisando: “Ta mas bendishoná pa duna ku pa risibí.” (Echonan 20:35) E trabou di un sirbidó ministerial òf di un ansiano ta habri mas oportunidat pa hòmbernan batisá “duna” Yehova i e kongregashon. Por ehèmpel, sirbidónan ministerial ta asistí e ansianonan i ta perkurá tambe pa hopi otro asignashon ku ta tuma tempu, pero ku ta nesesario. Amor pa Dios i pa próhimo ta motivá e rumannan aki pa rindi un sirbishi balioso.—Marko 12:30, 31.

 3. Pakiko algun ruman hòmber kisas no ke hasi muchu esfuerso pa alkansá privilegio den e kongregashon?

³ Kiko nos por bisa di un ruman hòmber ku kisas no ke hasi muchu esfuerso pa alkansá e privilegio di ta un sirbidó ministerial i ku tempu un ansiano pa motibu ku e ta sinti su mes inkapas? Meskos ku Nick, kisas e ta preokupá ku e no tin e abilidatnan nesesario pa ta un wardadó efikas. Abo tambe ta un ruman hòmber batisá ku ta pensa asina? Bo preokupashonnan no ta sin base. Yehova ta tene wardadónan nombrá responsabel pa e manera ku nan ta trata e tou. Hesus a bisa: “Kada un, na kende hopi a wòrdu duná, hopi lo wòrdu eksigí; i esun ku hopi a wòrdu konfiá na dje, di esei nan lo eksigí muchu mas.”—Lukas 12:48.

 4. Kon Yehova ta yuda e rumannan ku e ta nombra pa kuida su karnénan?

⁴ Yehova ta ferwagt di esnan ku e ta nombra komo sirbidó ministerial i ansiano pa nan atendé nan responsabilidatnan adishonal sin ningun yudansa? Nò. Al kontrario, e ta perkurá yudansa práktiko ku no solamente ta yuda nan kumpli ku esakinan sino tambe pa nan ta eksitoso. Manera e artíkulo anterior a splika, Yehova ta duna nan su spiritu santu, i e fruta di esaki ta yuda nan kuida e karnénan ku ternura. (Echonan 20:28; Galationan 5:22, 23) Ademas, Yehova ta duna nan sabiduria, konosementu i komprondementu [“disernimentu,” NW]. (Proverbionan 2:6) Kon e ta hasi esaki? Laga nos konsiderá tres manera ku Yehova ta entrená rumannan ku e ta nombra pa kuida su karnénan.

Entrená dor di Wardadónan ku Eksperensia

 5. Kon bin Pedro i Juan tabata wardadónan efikas?

⁵ Ora apòstel Pedro i Juan tabata pará dilanti e Sanedrin (Konsilio), e huesnan di e korte ei, ku den bista di mundu tabata sabí, a haña ku e hòmbernan dilanti nan “no tabata . . . eduká ni siñá.” Klaru ku nan por a lesa i skirbi, pero nan no a bai e skolnan rabíniko pa studia e Skritura. Apesar di esei, Pedro i Juan, huntu ku e otro disipelnan tabata bon maestro ya ku hopi di e personanan ku a skucha nan a sinti nan konmoví pa bira kreyente. Kon e hòmbernan komun aki por a bira maestronan asina ekstraordinario? Despues ku e korte a skucha Pedro i Juan, nan a “rekonosé nan, ku nan ta hende ku tabata kana ku Hesus.” (Echonan 4:1-4, 13) Ta bèrdat ku nan a risibí spiritu santu, pero tabata opvio tambe—asta pa e huesnan ku tabata spiritualmente siegu—ku Hesus a entrená e hòmbernan ei. (Echonan 1:8) Tempu ku Hesus tabata huntu ku e apòstelnan riba tera, el a siña nan no solamente kon pa rekohé hende semehante na karné, sino tambe kon pa pastoriá nan unabes ku nan a bira parti di e tou.—Mateo 11:29; 20:24-28; 1 Pedro 5:4.

 6. Ki ehèmpel den entrenamentu di otro personanan Hesus i Pablo a pone?

⁶ Despues ku Hesus a ser resusitá, el a sigui entrená hòmbernan ku el a nombra komo wardadó. (Revelashon 1:1; 2:1–3:22) Por ehèmpel, ta e mes a skohe Pablo i a supervisá su entrenamentu. (Echonan 22:6-10) Pablo tabata masha gradisidu pa e entrenamentu ku el a risibí i a pasa loke el a siña pa otro ansiano. (Echonan 20:17-35) Por ehèmpel, el a invertí hopi tempu i energia den entrenamentu di Timoteo pa Timoteo por tabata “un trahadó” den sirbishi di Dios, “ku no [taba]tin motibu pa tin bèrgwensa.” (2 Timoteo 2:15) E dos hòmbernan aki a bira amigunan íntimo. Anteriormente, Pablo a skirbi di Timoteo: “El a sirbi huntu ku mi, manera un yu ku su tata, den e trabou di evangelio.” (Filipensenan 2:22) Pablo no a trata di hasi Timoteo ni ningun otro persona un disipel di su mes. Mas bien, el a animá su rumannan den fe pa bira ‘imitadó di dje, meskos ku e tambe tabata di Kristu.’—1 Korintionan 11:1.

7, 8. (a) Ki eksperensia ta mustra ku ora ansianonan imitá Hesus i Pablo, esei ta duna bon resultado? (b) Ki ora ansianonan mester kuminsá entrená rumannan ku tin potensial pa bira sirbidó ministerial i ansiano?

⁷ Wardadónan ku eksperensia ta imitá Hesus i Pablo dor di tuma inisiativa pa entrená ruman hòmbernan batisá, anto ku mesun bon resultado. Tuma por ehèmpel e eksperensia di Chad. El a lanta den un famia dividí pa motibu di religion pero resientemente el a ser nombrá komo ansiano. El a bisa: “Atraves di añanan, vários ansiano ku eksperensia a yuda mi progresá spiritualmente. Pa motibu ku mi tata no tabata Testigu, e ansianonan ei a mustra un interes partikular den mi i a bira manera tatanan spiritual pa mi. Nan a tuma tempu pa entrená mi den sirbishi, i despues, un ansiano en partikular a entrená mi pa mi por atendé ku e asignashonnan di kongregashon ku mi a risibí.”

⁸ Manera Chad su eksperensia ta demostrá, wardadónan ku tin bon disernimentu ta kuminsá entrená e rumannan ku tin potensial pa bira sirbidó ministerial i ansiano hopi tempu promé ku esakinan a progresá sufisiente pa kualifiká pa e privilegionan ei. Pakiko esaki ta nesesario? Pasobra Beibel ta bisa ku tantu sirbidó ministerial komo ansiano mester alkansá un nivel moral i spiritual haltu promé ku nan ser nombrá pa sirbi. Nan mester wòrdu “probá promé.”—1 Timoteo 3:1-10.

 9. Ki responsabilidat wardadónan maduro tin, i pakiko?

⁹ Pa rumannan batisá por wòrdu probá, ta apropiá pa nan wòrdu entrená promé. Por ehèmpel, si bo pidi un studiante di skol traha un eksamen difísil pa kua e maestronan no a dun’é un entrenamentu spesífiko, lo e por pasa e eksamen ku éksito? Ku tur probabilidat lo e faya, no ta bèrdat? P’esei, entrenamentu ta nesesario. Sin embargo, un maestro diligente lo entrená su studiantenan no solamente pa nan por pasa un eksamen sino tambe pa usa e konosementu ku nan ta haña. Meskos tambe, ansianonan diligente ta yuda ruman hòmbernan batisá kultivá e kualidatnan ku ta ser rekerí di un hòmber nombrá dor di duna nan entrenamentu spesífiko. Nan ta hasi esei no djis pasobra nan ke pa e rumannan aki ser nombrá, sino tambe pa yuda nan bira kapas pa perkurá den un forma adekuá pa e tou. (2 Timoteo 2:2) Klaru ku rumannan batisá mester hasi nan esfuerso i traha duru pa kumpli ku e rekisitonan ku un sirbidó ministerial òf ansiano mester kumpli kuné. (Tito 1:5-9) No opstante, wardadónan ku tin eksperensia por yuda esnan ku ta hasi esfuerso pa alkansá un privilegio di sirbishi progresá mas lihé dor di entrená nan di buena gana.

10, 11. Kon wardadónan por entrená otro rumannan pa mas privilegio?

¹⁰ Den ki maneranan spesífiko wardadónan ku tin eksperensia por entrená otro rumannan pa atendé asignashonnan den kongregashon? Pa kuminsá, wardadónan mester mustra interes den e rumannan den kongregashon, por ehèmpel, dor di traha regularmente ku nan den sirbishi di vèlt i yuda nan bira mas kapas pa manehá “e palabra di [e] bèrdat na un manera korekto.” (2 Timoteo 2:15) Wardadónan maduro ta papia ku e rumannan ei tokante e goso ku nan ta haña dor di sirbi otronan i e satisfakshon ku nan mes ta risibí ora nan ta pone metanan spiritual i ta alkansá nan. Ademas, bondadosamente nan ta ofresé sugerensianan spesífiko tokante kon un ruman hòmber por bira un mihó “ehèmpel pa e tou.”—1 Pedro 5:3, 5.

¹¹ Unabes un ruman ser nombrá komo sirbidó ministerial, wardadónan sabí ta sigui entren’é. Bruce, kende a sirbi komo ansiano pa hopi dékada, a bisa: “Mi ta gusta sinta ku un sirbidó ministerial resien nombrá i repasá huntu kuné e instrukshonnan ku e esklabo fiel i prudente a publiká. Nos ta lesa tambe kualke guia relashoná ku su asignashon spesífiko, i despues mi ta traha kuné te ora e konosé su debernan bon.” Segun ku un sirbidó ministerial ta haña eksperensia, e por ser entrená tambe den e trabou di pastoriá. Bruce a agregá: “Ora mi pidi un sirbidó ministerial kompañá mi na un bishita di pastoreo, mi ta yud’é skohe tekstonan spesífiko ku lo animá i motivá e persona òf famia ku nos ta bai bishitá. Pa un sirbidó bira un wardadó efikas ta hopi importante pa e siña usa e Skritura na un manera ku ta motivá otro hende.”—Hebreonan 4:12; 5:14.

12. Kon wardadónan ku tin eksperensia por entrená ansianonan resien nombrá?

¹² Wardadónan resien nombrá tambe ta benefisiá hopi di mas entrenamentu. Nick, menshoná anteriormente, a bisa: “E entrenamentu ku mi a risibí spesialmente for di dos superintendente di mas edat tabata hopi probechoso. Por lo general, e rumannan aki tabata komprondé kon mester a atendé sierto asuntunan. Semper nan tabata skucha mi ku pasenshi i tuma mi punto di bista na konsiderashon—asta ora nan no tabata di akuerdo kuné. Mi a siña hopi dor di opservá e manera humilde i respetuoso ku nan a trata ku e rumannan den e kongregashon. E ansianonan aki a inkulká den mi e importansia di usa Beibel ábilmente ora di atendé problema òf ora di duna animashon.”

Entrená dor di e Palabra di Dios

13. (a) Kiko un ruman tin mester pa e por ta un wardadó efikas? (b) Pakiko Hesus a bisa: “Mi siñansa no ta di mi”?

¹³ E Palabra di Dios ta kontené e leinan, prinsipionan i ehèmpelnan ku wardadónan tin mester pa nan por ta “perfekto [“kompetente,” NW], ekipá pa tur bon obra.” (2 Timoteo 3:16, 17) Un ruman hòmber por tin bon skol, pero ta su konosementu di e Skritura i e manera ku e ta aplik’é ta yud’é bira un wardadó efikas. Tuma Hesus komo ehèmpel. E tabata e wardadó spiritual di mas sabí, mas vèrsá i ku mas disernimentu ku a yega di biba riba tera; tòg, ni é no a dependé riba su mes sabiduria ora el a instruí e karnénan di Yehova. El a bisa: “Mi siñansa no ta di mi, ma di esun ku a manda mi.” Pakiko Hesus a duna mérito na su Tata selestial? E di: “Esun ku ta papia di su mes ta buska su mes gloria.”—Juan 7:16, 18.

14. Kon wardadónan ta evitá di buska nan mes gloria?

¹⁴ Wardadónan leal ta evitá di buska nan mes gloria. Nan ta basa nan konseho i animashon, no riba nan mes sabiduria, sino riba e Palabra di Dios. Nan ta komprondé ku e asignashon di un wardadó ta pa yuda e karnénan haña “e mente di Kristu,” no e mente di e ansianonan. (1 Korintionan 2:14-16) Por ehèmpel, kiko lo pasa si un ansiano ku ta yudando un pareha ku tin difikultat matrimonial basa su konseho riba su mes eksperensia en bes di riba prinsipionan bíbliko i informashon publiká dor di “e esklabo fiel i prudente”? (Mateo 24:45) Su konseho lo ta limitá na su konosementu personal, i fuera di esei lo e por ta hopi bou di influensia di kustumbernan lokal. Ta bèrdat ku algun kustumber riba nan mes no ta malu, i kisas e ansiano tin hopi eksperensia den bida. Pero e karnénan ta benefisiá mas tantu ora wardadónan ta animá nan pa skucha e bos di Hesus i e dichonan di Yehova en bes di sigui pensamentu di hende òf kustumbernan lokal.—Salmo 12:6; Proverbionan 3:5, 6.

Entrená dor di “e Esklabo Fiel i Prudente”

15. Ki enkargo Hesus a duna “e esklabo fiel i prudente,” i kiko a kontribuí na e éksito di e klase di esklabo?

¹⁵ Wardadónan manera apòstel Pedro, Juan i Pablo tur tabata miembro di e grupo ku Hesus a deskribí komo “e esklabo fiel i prudente.” E klase di esklabo aki ta konsistí di Hesus su rumannan ungí riba tera, kendenan tin e speransa di goberná ku Kristu den shelu. (Revelashon 5:9, 10) Durante e último dianan di e sistema di kosnan aki, manera nos por a ferwagt, e kantidat di rumannan di Kristu ku a keda riba tera a baha. Sin embargo, e trabou ku Hesus a enkargá nan kuné, esta, e predikashon di e bon nobo di Reino promé ku e fin yega, ta tumando lugá na un eskala mas ekstenso ku nunka aktualmente. Tòg, e klase di esklabo tin bastante éksito! Loke a kontribuí na esei sin duda ta e echo ku nan a entrená miembronan di e “otro karnénan” pa yuda nan den e trabou di prediká i siña. (Juan 10:16; Mateo 24:14; 25:40) Awe, ta e grupo leal aki ta hasi e mayor parti di e trabou.

16. Kon e klase di esklabo ta entrená hòmbernan nombrá?

¹⁶ Kon e klase di esklabo ta perkurá e entrenamentu aki? Den e promé siglo, a outorisá representantenan di e klase di esklabo pa entrená i nombra superintendentenan den e kongregashonnan, i nan, na nan turno, a entrená e karnénan. (1 Korintionan 4:17) Meskos ta sosodé awe. E Kuerpo Gobernante—e grupo chikitu di ansianonan ungí ku ta representá e klase di esklabo—ta outorisá su representantenan pa entrená i nombra sirbidó ministerial i ansiano den e míles i míles di kongregashonnan rònt mundu. Ademas, e Kuerpo Gobernante ta organisá skolnan pa entrená miembronan di Komité di Sukursal, superintendentenan biahero, ansianonan i sirbidónan ministerial pa nan por perkurá mihó pa e karnénan. Tambe nan ta haña mas instrukshon mediante karta, artíkulonan publiká den E Toren di Vigilansia i otro publikashonnan, manera Organisá pa Hasi Yehova Su Boluntat.a

17. (a) Kon Hesus a demostrá su konfiansa den e klase di esklabo? (b) Kon wardadónan spiritual ta mustra ku nan tin konfiansa den e klase di esklabo?

¹⁷ Hesus tabatin asina tantu konfiansa den e klase di esklabo ku el a nombr’é riba “tur su propiedatnan”—esta, tur su interesnan spiritual riba tera. (Mateo 24:47) Wardadónan nombrá ta demostrá ku nan tambe tin konfiansa den e klase di esklabo dor di apliká e instrukshonnan ku nan ta risibí di su Kuerpo Gobernante. Sí, ora wardadónan entrená otro rumannan, ora nan laga nan mes wòrdu entrená dor di e Palabra di Dios, i ora nan apliká e entrenamentu ku e klase di esklabo ta perkurá, nan ta promové union den e tou. Nos ta masha gradisidu ku Yehova a entrená hòmbernan ku tin un interes profundo den kada miembro di e kongregashon kristian!

[Nota]

Kon Lo Bo Kontestá?

• Kon wardadónan spiritual maduro ta entrená otro rumannan?

• Pakiko wardadónan no ta instruí otronan a base di nan mes pensamentunan?

• Kon i pakiko wardadónan ta mustra konfiansa den e klase di esklabo?

[Plachinan na página 25]

Ansianonan kristian ta entrená hòmbernan mas hóben den e kongregashon

[Plachinan na página 26]

“E esklabo fiel i prudente” ta perkurá hopi entrenamentu pa ansianonan