Hesus A Kuminsá ku Su Trabou di Hasi Disipel

Hesus a pasa 40 dia den desierto. Awor, e tabata bayendo bèk Galilea. Pero promé, el a bai serka Huan, kende a batis’é. Ora Huan a mir’é ta bini, Huan a bisa e hendenan ku tabata presente: “Ata e Lamchi di Dios ku ta kita piká di mundu! Esaki ta esun di ken mi a bisa: ‘Despues di mi ta bini un hòmber ku a pasa bai mi dilanti, pasobra e tabata eksistí promé ku mi.’” (Huan 1:29, 30) Aunke Huan tabata mas grandi ku Hesus, e tabata sa ku Hesus a eksistí promé kuné komo un kriatura selestial.

Pero algun siman promé, ora Hesus a bini serka dje pa batisá, ta parse ku e no tabata sa sigur ku ta Hesus tabata e Mesías primintí. Huan a bisa: “Ami tampoko no tabata konos’é, ma e motibu pakiko mi ta batisá hende den awa ta pa Israel por mira ta ken e ta.”—Huan 1:31.

Anto Huan a konta su oyentenan kiko a pasa ora el a batisá Hesus. El a bisa nan: “Mi a mira spiritu santu baha manera un palomba for di shelu, i el a keda riba dje. Ami tampoko no tabata konos’é, ma ta Esun ku a manda mi batisá hende den awa a bisa mi: ‘Riba esun ku bo mira e spiritu baha i keda, é ta esun ku ta batisá den spiritu santu.’ I mi a mir’é, i mi a duna testimonio ku é ta e Yu di Dios.”—Huan 1:32-34.

E siguiente dia, Huan Boutista tabata pará huntu ku dos di su disipelnan ora el a mira Hesus ta bini atrobe. Huan a bisa: “Ata e Lamchi di Dios!” (Huan 1:36) Ora e dos disipelnan a tende esaki, nan a sigui Hesus. Un di nan tabata yama Andres i aparentemente e otro tabata e persona ku a skirbi e relato akí, kende tambe tabata yama Huan. Ta parse ku e Huan akí tabata primu di Hesus. E tabata yu di Zebedeo i Salomé. Probablemente, Salomé tabata ruman muhé di Maria.

Ora Hesus a drei wak i a mira ku Andres i Huan tabata siguié, el a puntra nan: “Kiko boso ta buska?”

Nan a kontest’é ku e pregunta: ‘Rabi, unda bo ta kedando?’

Hesus a kontestá nan: “Ban, i boso lo mira.”—Huan 1:37-39.

Tabata rònt di 4 or di atardi. Andres i Huan a bai ku Hesus i a keda e restu di e dia serka dje. Andres tabata asina emoshoná ku ora el a topa su ruman Simon, kende nan tabata yama Pedro, el a bis’é: “Nos a haña e Mesías.” (Huan 1:41) I el a hiba Pedro serka Hesus. Kisas Huan tambe a topa ku su ruman Santiago i a hib’é serka Hesus, pero Huan su relato no ta menshoná esei.

E siguiente dia, Hesus a topa ku Felipe. Felipe tabata di Bètsaida, un stat ku tabata keda pegá ku kosta nort di Laman di Galilea. Andres i Pedro tambe tabata di e stat ei. Hesus a bisa Felipe: “Sigui mi.”—Huan 1:43.

Anto Felipe, na su turno, a topa ku Natanael i a bis’é: “Nos a haña esun ku tantu Moises—den e Lei—komo e Profetanan a skirbi di dje, esta, Hesus, yu di Hose, di Názarèt.” Natanael, kende nan tabata yama tambe Bartolomeo, no a ker’é mesora i a puntr’é: “Akaso algu bon por sali for di Názarèt?”

Felipe a bis’é: “Bin mira.” Ora Hesus a mira Natanael ta bini serka dje, Hesus a bisa: “Ata un israelita den ken sigur no tin engaño.”

Natanael a puntr’é: “Kon bini bo konosé mi?”

Hesus a kontest’é: “Promé ku Felipe a yama bo, ora bo tabata bou di e palu di figu, mi a mira bo.”

Asombrá Natanael a bis’é: “Rabi, bo ta e Yu di Dios; ta bo ta Rei di Israel.”

Hesus a puntr’é: “Ta pasobra mi a bisa bo ku mi a mira bo bou di e palu di figu bo ta kere mi? Lo bo mira kosnan mas grandi ku esakinan!” E ora ei, Hesus a primintí: “Di bèrdat bèrdat mi ta bisa boso tur: Boso lo mira shelu habri i e angelnan di Dios baha kaminda e Yu di hende ta i subi bai ariba.”—Huan 1:45-51.

Djis despues, Hesus i su disipelnan nobo a bandoná e vaye di Riu Yordan pa bai Galilea.