“Nos A Haña e Mesias”

“NOS a haña e Mesias.” “Nos a haña esun di kende Moisés a skirbi den e Lei i di kende e Profetanan tambe a skirbi.” Dos hudiu deboto di e promé siglo a hasi e anunsionan asombroso ei. Por fin e Mesias tan sperá a yega. Nan tabata konvensí di esei!—Juan 1:35-45.

Ora bo tene kuenta ku e kuadro históriko i religioso di e tempu ei, nan konvikshon ta bira mas remarkabel ainda. Un kantidat di supuesto libertadó a aparesé ku hopi fanfare i promesa, pero ora nan no a logra libra e hudiunan for di dominashon romano, tur speransa a kaba na nada.—Echonan 5:34-37.

Sin embargo, e dos hudiunan ei—Andres i Felipe—nunka a duda den nan konvikshon ku nan a haña e berdadero Mesias. Al kontrario, den e añanan ku a sigui nan konfiansa a oumentá segun ku nan a presensiá personalmente e obranan poderoso ku e hòmber aki a hasi, kumpliendo ku loke a ser profetisá tokante e Mesias.

Pakiko e dos hòmbernan aki i hopi otro hende a pone fe den dje, konvensí ku e no tabata djis un Mesias falsu òf un gañadó desepshonante? Ki evidensia tin ku e tabata sin duda e Mesias outéntiko?

Di akuerdo ku e relato históriko, Andres i Felipe a identifiká Hesus di Názarèt, e eks-karpinté, komo e Mesias primintí i esun tan sperá. (Juan 1:45) Un historiadó kuidadoso di e époka ei, Lukas, ta deklará ku e binida aki di e Mesias a tuma lugá “den e di diesinku aña di e reinado di Tiberio Cesar.” (Lukas 3:1-3) E di 15 aña di e reinado di Tiberio a kuminsá den sèptèmber di aña 28 di nos era i a terminá den sèptèmber di aña 29. Lukas ta bisa mas aleu ku e hudiunan di e tempu ei “tabata spera yen di ekspektativa” riba yegada di e Mesias. (Lukas 3:15) Pakiko nan tabata spera riba dje den e tempu partikular ei? Laga nos mira.

Evidensia Ku E Ta e Mesias

En bista di e papel importante di e Mesias, ta lógiko ku e Kreadó Yehova lo a duna klavenan spesífiko pa yuda hende alerta i fiel identifiká e Mesias primintí. Pakiko? Pa personanan alerta no ser engañá dor di impostornan, manera asina tantu hende a ser engañá.

Ora un embahador presentá su mes na un otro gobièrnu, ta ferwagt di dje ku e ta presentá ku e dokumentonan nesesario pa mustra ku e ta esun outorisá pa su gobièrnu. Meskos tambe, hopi tempu adelantá Yehova a laga registrá e rekisitonan ku e Mesias lo a kumpli kuné. Pues, ora “e Agente Prinsipal” a aparesé, ta komo si fuera el a bini ku dokumento-, òf kredensialnan, ku lo a konfirmá su identidat.—Hebreonan 12:2, NW.

E rekisitonan ku e kredensialnan ei mester a kuadra kuné ta deskribí den hopi profesia di Beibel siglonan adelantá. Nan a predisí den un forma detayá kon e Mesias lo a bini, ki klase di ministerio e lo a kumpli kuné, kon e lo a sufri na man di otro hende i e tipo di morto ku e lo a eksperensiá. Kisas bo ta interesá pa sa ku e profesianan konfiabel ei a papia tambe di su resurekshon, kon el a ser halsá na e man drechi di Dios i finalmente di e bendishonnan ku su futuro Reino lo a trese. Den e manera aki, profesianan di Beibel a duna un patronchi úniko komparabel ku un fingerprint, ku por identifiká un solo persona.

Klaru ku ora Hesus a aparesé riba esena na aña 29 di nos era, no ta tur profesia relashoná ku e Mesias a kumpli n’e tempu ei. Por ehèmpel, den e aña ei ainda e no a ser matá ni resusitá. Tòg Andres, Felipe i hopi otro hende a pone fe den Hesus pa motibu di loke el a siña i hasi. Nan a mira hopi prueba ku e tabata, de echo, e Mesias. Si bo a biba e tempu ei i por a studia e evidensia personalmente ku un mente habri, probablemente bo tambe lo a keda konvensí ku Hesus tabata e Mesias.

Un Kuadro di Vários Parti

Kiko lo a yuda bo yega na e konklushon ei? Durante siglonan, profetanan di Beibel a suministrá rekisitonan spesífiko ku e Mesias lo mester a kumpli kuné, i eseinan a identifik’é indudablemente komo tal. Segun ku e profetanan a suministrá e detayenan aki den transkurso di siglonan, un kuadro di e Mesias a kuminsá forma. Henry H. Halley a remarká: “Suponé ku un kantidat di hende di diferente pais, ku nunka no a mira otro ni komuniká ku otro, kana drenta den un kuarto, i kada un presentá ku un pida marmer tayá. Anto ora pone esakinan huntu, nan ta forma un estatua perfekto. E úniko manera pa splika esei ta ku ún persona a traha tur e spesifikashonnan i despues manda un pida pa kada hòmber, no ta bèrdat?” Anto Halley ta puntra: “Kiko otro por splika e kuadro asombroso aki di Hesus su bida i obra, hinká den otro dor di diferente eskritor di diferente siglo i époka promé ku Hesus a bini, ku no ta UN MENTE SOBREHUMANO ku a supervisá e skirbimentu?” Halley a konkluí ku esei tabata “e milager di tur époka!”

E “milager” aki a kuminsá den e promé buki di Beibel. Ademas di e promé profesia di Beibel ku a indiká ki papel e Mesias lo tabatin, e eskritor di Génesis a mustra ku e Mesias lo a bini mediante e liña di desendensia di Abraham. (Génesis 3:15; 22:15-18) Un otro klave a revelá ku e Mesias lo tabata di e tribu di Huda. (Génesis 49:10) Mediante Moisés, Dios a bisa e israelitanan ku e Mesias lo tabata un bosero i libertadó mas grandi ku Moisés mes.—Deuteronomio 18:18.

Den e tempu di Rei David, profesia a revelá ku e Mesias lo a bira heredero di e trono di David i ku Su Reino lo a ser “establesé pa semper.” (2 Samuel 7:13-16) E buki di Mikeas a revelá ku e Mesias lo a nase na Bètlehèm, stat di David. (Mikeas 5:2) Isaias a profetisá ku lo El a nase di un bírgen. (Isaias 7:14) Profeta Malakias a predisí ku un persona meskos ku Elias lo a anunsiá Su yegada.—Malakias 4:5, 6.

E buki di Daniel ta kontené un otro detaye spesífiko tokante Mesias. Señalando na nèt e aña ku e Mesias lo a aparesé, e profesia ta deklará: “Sabi anto i komprondé ku for di e momento ku e òrdu a wòrdu duná pa restorá i rekonstruí Yerusalèm te na e Mesias, e Prens, lo tin shete siman i sesent’i dos siman; e lo wòrdu trahá atrobe, ku kaya i roi, den tempu di angustia.”—Daniel 9:25.

Artaherhes, rei di Persia, a duna “e òrdu” pa restourá i rekonstruí Yerusalèm den e di 20 aña di su reinado. Su reinado a kuminsá na aña 474 promé ku nos era, di manera ku su di 20 aña lo tabata aña 455 promé ku nos era. (Nehemias 2:1-8) Pues, entre e òrdu pa restourá i rekonstruí Yerusalèm i e aparishon di e Mesias lo mester a pasa un periodo di 69 (7 plùs 62) siman profétiko. Klaru ku sesentinuebe siman literal ta ekivalente na solamente 483 dia, òf ménos ku dos aña. Pero ora apliká e regla profétiko di “un dia pa kada aña,” e ta revelá ku e Mesias lo a aparesé 483 aña despues, na aña 29 di nos era.—Ezekiel 4:6.a

Ounke un kantidat di hende ku a pretendé di ta e Mesias a aparesé den otro añanan, e úniko ku a aparesé riba esena di mundu na aña 29 di nos era ta Hesus di Názarèt. (Lukas 3:1, 2) Eksaktamente den e aña ei, Hesus a bini serka Juan Boutista i a ser batisá den awa. N’e momento ei Hesus a ser ungí ku spiritu santu komo e Mesias. Despues, Juan, esun ku a bai dilanti Hesus i ku a hasi un trabou similar na esun di Elias, a introdusí Hesus na Andres i un otro disipel, yamand’e “e Lamchi di Dios ku ta kita piká di mundu!”—Juan 1:29; Lukas 1:13-17; 3:21-23.

Genealogia i Identifikashon di Mesias

E profesianan inspirá a relashoná e Mesias ku sierto famianan hudiu. Pues ta masha rasonabel ku e Kreadó omnisapiente lo a sòru pa e Mesias a bini na un tempu ku e registronan genealógiko tabata disponibel pa verifiká su desendensia.

E Cyclopedia di McClintock i Strong ta deklará: “Kasi sigur e registronan di e tribunan i famianan hudiu a bai pèrdí den e destrukshon di Yerusalèm [na aña 70 di nos era], i no promé.” Tin tur indikashon ku Mateo i Lukas a skirbi nan Evangelionan promé ku aña 70 di nos era. P’esei, nan lo por a konsultá e registronan aki ora nan a kompilá nan relato tokante e antepasadonan di Hesus. (Mateo 1:1-16; Lukas 3:23-38) I siguramente riba un asuntu asina importante, hopi di nan kontemporáneonan mes lo kier a verifiká ken tabata e antepasadonan di Hesus.

Ta pa Kasualidat Hesus A Kumpli ku Nan?

Pero ta eksistí e posibilidat ku ta pa puru kasualidat Hesus a kumpli ku e profesianan relashoná ku Mesias? Den un entrevista, un erudito a kontestá: “Nò, esei no ta posibel. E echo ku tin asina tantu supuesto koinsidensia ta deskartá e posibilidat ei. Un hende a hasi e kalkulashon i a yega na e konklushon ku pa apénas ocho profesia kumpli den Hesus pa kasualidat, ta ún chèns den shen mil bion.” Pa ilustrá esaki, el a deklará: “Si bo tuma e sifra aki na [moneda di] dòler di plata, esakinan lo tapa e estado di Texas [un área di 690.000 kilometer kuadrá] bou di un kapa di mas ku mei meter. Si bo marka un di e monedanan aki i laga un persona kana un ratu wowo tapá den henter e estado i sak abou i kohe un moneda, ki chèns e tin di kue nèt esun marká?” Anto el a agregá ku esei ta “e mesun chèns ku kualke persona den historia tin pa por a kumpli ku apénas ocho di e profesianan relashoná ku Mesias.”

Pero, durante Hesus su ministerio di tres aña i mei, el a kumpli ku no solamente ocho sino hopi profesia di Beibel. En bista di e evidensia konvinsente ei, e erudito ei a konkluí: “Ta Hesus—i Hesus so den henter historia—por a logra esei.”

E ‘Binida’ di e Mesias

No tin duda ku e Mesias a bini na aña 29 di nos era den e persona di Hesus di Názarèt. Esei tabata su binida komo un Reskatadó humilde ku a pasa sufrimentu. E no a bini komo un Rei invensibel pa kibra e yugo opresivo di e romanonan, manera mayoria hudiu i asta su siguidónan aparentemente a ferwagt. (Isaias, kapítulo 53; Zakarias 9:9; Echonan 1:6-8) Sin embargo, segun profesia, su futuro binida sí lo ta ku poder i gran outoridat.—Daniel 2:44; 7:13, 14.

Un estudio kuidadoso di profesia di Beibel a konvensé hende rasonabel rònt mundu ku e Mesias a bini den e promé siglo i ku e mester a bini bèk. Segun evidensia, su segundo binida profetisá, esta kuminsamentu di su “presensia,” a tuma lugá na 1914.b (Mateo 24:3-14, NW) Den e aña ei, Hesus a ser entronisá invisiblemente den shelu komo Rei di e Reino di Dios. Denter di poko, lo e drenta akshon pa eliminá for di tera tur e mal efektonan di e rebelion den Edén. Su Reino di Mil Aña ku lo sigui despues lo ta un bendishon pa tur hende ku ta manifestá fe den dje komo e Simia primintí, e Mesias, ku ta “kita piká di mundu!”—Juan 1:29; Revelashon 21:3, 4.

Gustosamente Testigunan di Yehova lo analisá e evidensia ei ku bo i mustra bo den Beibel kiko e gobernashon di e Mesias por nifiká pa abo i bo sernan kerí.

[Nota]

[Diagram/Plachinan na página 6, 7]

455 promé ku nos era, ‘e òrdu pa restorá Yerusalèm’

29 di nos era, e Mesias ta presentá

483 aña (69 siman profétiko)—Daniel 9:25

1914, e Mesias ta ser entronisá den shelu

Pronto e Mesias lo kaba ku maldat i hasi tera un paradeis