Na Kaminda pa Hudea

Pa un tempu, Hesus tabata na Perea, un área ku tabata keda “na otro banda di Riu Yordan.” (Huan 10:40) Despues, el a kue rumbo zùit pa sigui su biahe pa Herúsalèm.

E no tabata su so. Su disipelnan i “un gran kantidat di hende,” inkluso algun kobradó di belasting i hende pekadó, tabata huntu kuné. (Lukas 14:25; 15:1) Algun fariseo i eskriba, kendenan tabata kritiká loke Hesus tabata bisa i hasi, tambe tabata entre e hendenan. E ilustrashonnan ku Hesus a konta tokante e karné pèrdí, e yu pèrdí i e hòmber riku i Lázaro a duna nan hopi kos di pensa riba dje.—Lukas 15:2; 16:14.

Podisé ta krítika i bofon di su opositornan a pone ku awor Hesus tabata bai hala atenshon di su disipelnan na algun punto ku el a trata tempu ku e tabata na Galilea.

El a bisa nan: “Ta bai bini kosnan ku ta pone hende trompeká; esei ta inevitabel. Ma ai di esun pa medio di ken nan ta bini! . . . Presta atenshon na boso mes. Si bo ruman kometé un piká kontra bo, skual e, i si e arepentí, pordon’é. Asta si e peka shete biaha pa dia kontra bo, i e bini bèk serka bo shete biaha i bisa bo: ‘Mi ta arepentí,’ bo tin ku pordon’é.” (Lukas 17:1-4) Podisé e echo ku Hesus a papia di e kantidat di biaha ku un hende mester pordoná su ruman lo a laga Pedro kòrda loke el a yega di puntra Hesus, esta, si ta te ku shete biaha mester pordoná un hende.—Mateo 18:21.

E disipelnan lo por a kumpli ku e palabranan akí di Hesus? Nan a bisa Hesus: “Duna nos mas fe.” Hesus a sigurá nan: “Si boso fe tabata djis e tamaño di un pipita di mòster, boso lo a bisa e palu grandi akí: ‘Sea ranká ku rais ku tur i plantá den laman!,’ i lo el a obedesé boso.” (Lukas 17:5, 6) Sí, asta ku un poko fe, hende por logra hopi.

Siguientemente, Hesus a splika e apòstelnan dikon ta importante pa ta humilde i pa nan tin un punto di bista balansá tokante nan mes. El a bisa nan: “Kua di boso lo bisa boso esklabo ku ta plug, òf ku ta kuida boso bestianan, ora e yega kas for di kunuku: ‘Bini aki mesora i sinta kome na mesa’? Boso lo no bis’é mas bien: ‘Prepará algu pa mi kome, bisti un frèskòt i sirbi mi te ora mi kaba di kome i bebe, i despues abo por kome i bebe’? Akaso boso lo ta gradisidu na e esklabo pasobra el a hasi loke a mand’é? Asina tambe, despues ku boso a hasi tur loke a manda boso, boso mester bisa: ‘Nos ta esklabo ku no ta sirbi pa nada. Loke nos a hasi ta loke nos tabatin deber di hasi.’”—Lukas 17:7-10.

Tur sirbidó di Dios mester mira e importansia di pone e interesnan di Reino na promé lugá den nan bida. Ademas, kada un di nan mester kòrda ku ta un privilegio pa adorá Dios i forma parti di su organisashon.

Den esei, un mensahero ku Maria i Marta a manda a yega serka Hesus. Maria i Marta tabata ruman muhé di Lázaro, i nan tabata biba na Betania, na Hudea. E mensahero a bisa Hesus: “Señor, bo amigu stimá ta malu.”—Huan 11:1-3.

Aunke Hesus a tende ku su amigu Lázaro ta hopi malu, e no a bira demasiado tristu. Hesus a bisa: “E malesa akí no ta hiba finalmente na morto, ma na e gloria di Dios, pa e Yu di Dios por ser glorifiká pa medio di dje.” I Hesus a keda dos dia mas kaminda e tabata. Despues, el a bisa su disipelnan: “Laga nos bolbe bai Hudea.” Pero nan a protestá: “Rabi, ta poko dia ei e hendenan di Hudea a purba di piedra bo mata, anto bo ta bai einan bèk?”—Huan 11:4, 7, 8.

Hesus a bisa nan: “Tin 12 ora di lus di dia, tòg? Si un hende ta kana den lus, e no ta trompeká riba nada, pasobra e ta mira e lus ku ta bria riba e mundu akí. Ma si un hende ta kana anochi, e ta trompeká riba algu, pasobra e no tin lus pa gui’é.” (Huan 11:9, 10) Aparentemente, Hesus tabata ke men ku e tempu ku Yehova a stipulá pa e kumpli ku su sirbishi riba tera no a terminá ainda. Mientrastantu, e mester a hasi bon uso di e poko tempu ku a ked’é.

Hesus a sigui bisa: “Nos amigu Lázaro ta drumí, pero mi ta bai einan pa lant’é.” E disipelnan, kendenan evidentemente a pensa ku Lázaro tabata drumí i ku lo el a rekuperá, a bisa: “Señor, si ta drumí e ta, lo e bira bon.” E ora ei Hesus a bisa nan bon kla: “Lázaro a muri . . . Ma laga nos bai serka dje.”—Huan 11:11-15.

Tomas, kende tabata sa ku nan lo por a mata Hesus na Hudea, kier a sostené Hesus. El a urgi e otro disipelnan: “Laga nos tambe bai, pa nos por muri huntu kuné.”—Huan 11:16.