Resurekshon—Speransa pa e Mortonan

Abo ta kere den loke Beibel ta primintí tokante resurekshon?a E idea di bolbe mira nos sernan kerí ku a muri ta zona masha bunita, pero e ta algu realístiko? Pa yuda nos kontestá e pregunta ei, ta bon pa nos analisá e ehèmpel di e apòstelnan di Hesukristu.

E apòstelnan a kere firmemente den resurekshon. Dikon? Wèl pa por lo ménos dos motibu. Pa di promé, nan speransa tabata basá riba e echo ku Dios a lanta Hesus for di morto. E apòstelnan, i “mas ku 500 ruman pareu,” a mira Hesus despues ku el a resusitá. (1 Korintionan 15:6) Ademas, manera e kuater Evangelionan ta mustra, e resurekshon di Hesus tabata bon dokumentá i tur kaminda e tabata bon konosí.—Mateo 27:62–28:20; Marko 16:1-8; Lukas 24:1-53; Huan 20:1–21:25.

Di dos, e apòstelnan a mira Hesus efektuá por lo ménos tres resurekshon​—un na Nain, un na Kapernaum i un na Betania. (Lukas 7:11-17; 8:49-56; Huan 11:1-44) E último ei, esun na Betania, ku nos a menshoná na kuminsamentu di e revista akí, tabata di un miembro di un famia ku tabata hopi será ku Hesus. Pues, ban wak kiko a sigui pasa.

“Bo ruman lo lanta for di morto.” Ora Hesus a bisa Marta e palabranan ei, Lázaro, ruman di Marta, tabatin kuater dia morto. Na promé instante Marta no a komprondé kiko Hesus tabata ke men. P’esei el a bisa Hesus: “Mi sa ku lo e lanta,” pensando ku esei lo tuma lugá den futuro. Hesus a bis’é: “Ami ta e resurekshon i e bida,” anto kaba el a resusitá Lázaro. Imaginá kon sorprendí Marta lo a keda.—Huan 11:23-25.

Unda Lázaro tabata durante e kuater dianan ku e tabata morto? E no a bisa ni duna e impreshon ku e tabata na un otro lugá durante e tempu ei. Lázaro no tabatin un alma inmortal ku a bai shelu. Hesus tampoko no a hal’é for di e presensia di Dios i tres’é bèk na tera. Pues, ta na unda e tabata anto? Drumí den su graf.—Eklesiástes 9:5, 10.

Kòrda, Hesus a kompará morto ku un soño ku hende ta lanta for di dje ora e resusitá. Segun e relato, el a bisa: “‘Nos amigu Lázaro ta drumí, pero mi ta bai einan pa lant’é.’ Anto su disipelnan a bis’é: ‘Señor, si ta drumí e ta, lo e bira bon.’ Hesus tabata papia di Lázaro su morto, ma nan a kere ku e tabata ke men ku Lázaro tabata gewon na soño. P’esei, Hesus a bisa nan e ora ei frankamente: ‘Lázaro a muri.’” (Huan 11:11-14) Hesus a lanta Lázaro for di morto i entreg’é na su rumannan. Esta un bunita regalo Hesus a duna e famia ei.

E resurekshonnan ku Hesus a hasi tempu e tabata riba tera ta djis un demostrashon chikí di loke e lo hasi den futuro komo Rei di e Reino di Dios.b Durante e tempu ku Hesus lo goberná e tera, lo e lanta e hendenan ku ta drumí den graf. Ta p’esei el a bisa: “Ami ta e resurekshon.” Purba imaginá kon felis lo bo ta ora bo mira bo sernan kerí atrobe i kon kontentu esnan resusitá lo ta!—Lukas 8:56.

Hesus a bisa Marta: “Esun ku pone fe den mi, maske e muri, lo bolbe biba; i tur ku ta bibu i ku pone fe den mi, lo no muri nunka.” (Huan 11:25, 26) Esnan ku Hesus resusitá durante su gobernashon di mil aña tin chèns di biba pa semper, basta nan pone fe den Hesus.

Despues di bisa e kosnan remarkabel ei tokante resurekshon, Hesus a bira puntra Marta: “‘Abo ta kere esaki?’ Marta a kontest’é: ‘Sí, Señor; mi ta kere ku abo ta Kristu, e Yu di Dios, Esun ku mester a bini na mundu.’” (Huan 11:26, 27) Kiko di abo? Lo bo ke tin e mesun fe ku Marta tabatin den resurekshon? E promé paso ku bo tin ku dal ta di siña konosé kiko ta Dios su propósito pa humanidat. (Huan 17:3; 1 Timoteo 2:4) E konosementu ei lo duna bo fe. Pakiko no pidi un Testigu di Yehova mustra bo kiko Beibel ta siña tokante e tópiko ei? Gustosamente lo e splika bo e bunita speransa di resurekshon.