Sirbi Yehova sin Distraishon

1, 2. Kiko a pone ku Hesus tabata stima Marta, pero kiko Marta a hasi ku a mustra ku e no tabata perfekto?

KIKO ta e promé kos ku ta bini na bo mente ora bo pensa riba Marta, ruman muhé di Lázaro i Maria? Beibel ta bisa: “Hesus tabata stima Marta.” Pero ta klaru ku e no tabata e úniko hende muhé ku Hesus tabata respetá i stima. E tabata stima su mama tambe. Ademas, e tabata konsiderá Maria, Marta su ruman muhé, su amiga. (Huan 11:5; 19:​25-27) Pero kiko a pone ku Hesus tabata stima Marta?

² Hesus tabata stima Marta no solamente pasobra e tabata diligente i hospitalario, pero prinsipalmente pa motibu di su spiritualidat. Marta tabata kere tur loke Hesus tabata siña. I e tabata konvensí ku Hesus ta e Mesías. (Huan 11:​21-27) Pero, meskos ku nos, e no tabata perfekto. Na un okashon, ora Hesus a bai kome na Marta su kas, Marta a tribi di bisa Hesus pa korigí un situashon ku segun e no tabata bon. Marta a bis’é: “Señor, bo no ta mira ku mi ruman ta laga mi so atendé tur kos? Bis’é bin yuda mi anto.” (Lesa Lukas 10:​38-42.) Kiko nos por siña for di e relato akí?

3, 4. (a) Den ki sentido Maria “a skohe e mihó parti”? (b) Ki lès Marta a siña? (Wak e promé plachi.)

³ Hesus tabata hopi gradisidu pa e hospitalidat di Marta i Maria, i p’esei e kier a kompartí algun bèrdat presioso ku nan. Maria a probechá di e oportunidat pa siña for di e Gran Maestro. El “a kai sinta na pia di Señor i a keda skucha su palabranan.” Marta por a hasi meskos. Sin duda, Hesus lo a elogiá Marta si el a skuch’é ku tur su atenshon.

⁴ Pero Marta tabata demasiado okupá ku preparashon di un kuminda spesial i otro trabounan pa laga Hesus sintié bon durante su bishita. Ma tur e trabounan ei a pon’é haña strès, i el a disgustá ku Maria. Hesus a ripará ku Marta tabata hasi demasiado kos; p’esei el a bis’é bondadosamente: “Marta, Marta, bo ta ansha i preokupá ku hopi kos.” El a splika Marta ku un plato mes lo tabata mas ku basta. Despues Hesus a defendé Maria bisando: “Pa loke ta Maria, el a skohe e mihó parti, i lo no kita esei for di dje.” Kasi sigur Maria lo a lubidá kiko el a kome na e okashon spesial ei, pero hamas lo el a lubidá e animashon i e kuminda spiritual ku el a haña debí ku el a skucha Hesus ku tur su atenshon. Mas ku 60 aña despues, apòstel Huan a skirbi: “Hesus tabata stima Marta i su ruman muhé.” (Huan 11:5) E palabranan inspirá ei ta mustra ku Marta a aseptá e korekshon ku Hesus a dun’é i a hasi esfuerso pa sigui ­sirbi Yehova fielmente pa restu di su bida.

 5. (a) Pakiko tin mas distraishon awe ku den tempu bíbliko? (b) Ki pregunta nos tin ku hasi nos mes?

⁵ Kompará ku tempu bíbliko, tin hopi kos mas ku por distraí nos awe. Mas ku 60 aña pasá un outoridat a bisa un grupo di studiante na Merka lo siguiente: “Nunka promé den historia hende por a gaba di tin medionan di komunikashon asina bon, kapasidat pa imprimí na velosidat haltu, revista na koló, radio, pelíkula, televishon . . . Konstantemente nan ta bombardiá nos ku kos nobo pa distraí nos . . . Poko tempu pasá, hende tabata pensa ku nos tabata biba den e ‘Era di Iluminashon.’ Pero mas i mas ta parse ku nos ta bibando den e ‘Era di Distraishon.’” E Watchtower di 15 di sèptèmber 1958 a bisa: “Mas serka nos yega di e fin, mas distraishon nos lo haña.” I ta esei ta loke ta sosodiendo. Ta bon pa nos puntra nos mes anto: Kon nos por imitá Maria i sirbi Yehova sin distraishon?

 6. Kon e organisashon di Yehova a hasi bon uso di teknologia?

⁶ E organisashon di Dios semper a hasi bon uso di teknologia pa promové adorashon berdadero. Por ehèmpel, pensa riba e “Foto-Drama di Kreashon,” un kombinashon di pelíkula, zonido sinkronisá i slide na koló. Promé i durante e Promé Guera Mundial, miónes di hende rònt mundu a haña konsuelo ora nan a mira e presentashon akí ku ta konkluí ku un deskripshon di e Reinado di Mil Aña di Kristu ku lo trese pas. Mas despues, miónes di hende por a skucha e mensahe di Reino via radio. Awe, teknologia di kòmpiuter i Internet ta yuda plama e bon notisia na tur parti di tera, asta na lugánan isolá.

 7. (a) Dikon ta peligroso pa hasi demasiado uso di mundu? (b) Ku kiko nos mester tene kuidou? (Wak nota.)

⁷ Beibel ta atvertí nos sí di e peliger di hasi demasiado uso di mundu. (Lesa 1 Korintionan 7:​29-31.) Ta fásil pa un di nos pèrdè hopi tempu riba kosnan ku riba nan mes kisas no ta malu. Pensa por ehèmpel riba hòbi, lesamentu di buki, wak televishon, keiru, kana wak kos pa kumpra i buska lo último di aparatonan elektróniko òf kosnan di luho. Otro kosnan ku por pone nos pèrdè tempu ta retnan sosial, manda mensahe via selular òf e-mail i ora nos ta chèk kada ratu e último notisianan i resultadonan di wega. Nos por asta bira bisiá na e kosnan akí.a (Ekl. 3:​1, 6) Si nos no kontrolá e kantidat di tempu ku nos ta dediká na e tipo di kosnan akí, nos por kuminsá neglishá e aktividat di mas importante: nos adorashon na Yehova.​—Lesa Efesionan 5:​15-17.

 8. Dikon ta asina importante pa nos sigui e konseho pa no stima loke mundu ta ofresé?

⁸ Satanas ke distraí nos ku loke e mundu akí tin di ofresé. Esei tabata e kaso den e promé siglo i awe mas ainda. (2 Tim. 4:10) Pues, nos mester sigui e konseho: “No stima . . . e kosnan ku tin den mundu.” Si nos purba di apliká e konseho akí den nos bida, nos lo no keda distraí i nos “amor pa e Tata” lo sigui krese. Asina, lo ta mas fásil pa nos hasi e boluntat di Dios i keda ku su aprobashon pa semper.​—1 Huan 2:​15-17.

 9. Riba kiko Hesus a bisa su disipelnan pa nan enfoká, i ki ehèmpel el a duna?

⁹ E konseho amoroso ku Hesus a duna Marta ta kuadra perfektamente ku loke el a siña hende i e ehèmpel ku el a duna. El a animá su disipelnan pa keda “enfoká” riba e Reino. (Lesa Mateo 6:​22, 33; wak nota.) Hesus mes no tabatin muchu kos material; e no tabatin un kas ni tereno.​—Luk. 9:58; 19:​33-35.

10. Ki ehèmpel Hesus a pone na kuminsamentu di su sirbishi?

¹⁰ Tabatin hopi kos ku por a distraí Hesus durante su sirbishi, pero nunka el a laga e kosnan ei strob’é. Por ehèmpel, na kuminsamentu di su sirbishi, despues ku el a siña e hendenan hopi kos i hasi hopi milager na Kapernaum, hopi a rog’é pa e keda. Pero kon Hesus a reakshoná? El a bisa: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:​42-44) I esei ta eksaktamente loke el a hasi. Den henter Palestina el a prediká i siña hende. Aunke e tabata perfekto, e tambe tabatin su nesesidatnan meskos ku kualke hende i tin biaha su trabou duru den sirbishi tabata lag’é keda hopi kansá.​—Luk. 8:23; Huan 4:6.

11. Kiko Hesus a bisa un hòmber ku tabatin un problema ku su ruman, i ki spièrtamentu Hesus a duna?

¹¹ Na un otro okashon, ora Hesus tabata siña su disipelnan kon pa enfrentá oposishon, un hòmber a interumpí nan bisando: “Maestro, bisa mi ruman hòmber pa e parti e herensia ku mi tata a laga pa nos.” Ma Hesus no a bai mete den e diskushon ei. El a kontest’é: “Hòmber, ta ken a nombra mi komo hues òf komo esun ku tin ku parti boso herensia?” Despues Hesus a sigui siña su disipelnan tokante e peliger di laga kosnan material distraí nan.​—Luk. 12:​13-15.

12, 13. (a) Kiko a lanta interes di algun prosélito poko promé ku Hesus su morto? (b) Kon Hesus a trata ku e situashon ei ku por a distraé?

¹² Durante e último siman di su bida, Hesus tabata bou di hopi preshon. (Mat. 26:38; Huan 12:27) E tabata sa ku lo e mester a enfrentá un huisio humiante i sufri un morto kruel. Riba dje, e tabatin hopi trabou di hasi ainda. Por ehèmpel, wak kiko a pasa riba djadumingu, 9 di nisan di aña 33. Manera Beibel a profetisá, Hesus a drenta Herúsalèm riba un buriku, i e multitut tabata grita: “Bendishoná ta Esun ku ta bini komo Rei den nòmber di Yehova.” (Luk. 19:38) E siguiente dia, Hesus a drenta e tèmpel i ku kurashi el a kore ku e komersiantenan ku tabata usa e kas di Dios pa gana plaka riba lomba di e hudiunan.​—Luk. 19:​45, 46.

¹³ Algun prosélito griego ku a bini Herúsalèm pa selebrá e Pasku hudiu a keda hopi impreshoná ku loke Hesus a hasi. P’esei nan a puntra apòstel Felipe si nan por a papia ku Hesus. Ma Hesus no a laga nan distraé for di e kosnan mas importante. E no a buska apoyo di hende pa nan defend’é kontra di su enemigunan i asina skapa di un morto sakrifisial. Pues, despues ku el a splika Andres ku Felipe ku pronto lo e muri, el a bisa nan: “Esun ku ta stima su alma ta destruyé, ma esun ku ta odia su alma den e mundu akí, lo konserb’é pa bida eterno.” En bes di satisfasé e kuriosidat di e griegonan ei, el a animá su disipelnan pa sigui su ehèmpel di sakrifisio propio i a primintí nan: “Si un hende ke sirbi mi, e Tata lo onr’é.” Sin duda, Felipe a hiba e mensahe positivo akí pa e prosélitonan.​—Huan 12:​20-26.

14. Kiko ta mustra ku Hesus tabata balansá aunke e tabata pone e trabou di prediká promé den su bida?

¹⁴ Aunke Hesus no a laga nada distraé for di e trabou di prediká, e no tabata pensa riba trabou so. Beibel ta bisa ku el a asistí na un fiesta di kasamentu i el a asta kontribuí na e goso di e okashon ora el a kambia awa den biña. (Huan 2:​2, 6-10) Ademas, el a aseptá invitashon pa bai kome na kas di su bon amigunan i otronan ku tabata interesá den su mensahe. (Luk. 5:29; Huan 12:2) I mas importante ainda, Hesus a tuma tempu pa hasi orashon, meditá i deskansá.​—Mat. 14:23; Mar. 1:35; 6:​31, 32.

15. Ki konseho apòstel Pablo a duna, i ki bon ehèmpel e mes a pone?

¹⁵ Apòstel Pablo a kompará bida di un kristian ku un kareda di distansia largu. P’esei el a skirbi: “Laga nos tambe kita tur peso.” (Lesa Hebreonan 12:1.) Pablo a pone un bon ehèmpel den esei. Aunke e por tabatin un futuro prometedor den hudaismo i e por a bira riku i famoso, el a laga tur esakinan atras pa ­asina e por a konsentrá riba “e kosnan mas importante.” El a traha hopi duru den e trabou di prediká i el a biaha bai hopi kaminda, inkluso Siria, Asia Menor, Masedonia i Hudea. Pa loke ta su speransa di biba pa semper den shelu, Pablo a bisa: “Mi ta lubidá e kosnan mi tras i ta rèk pa gara e kosnan mi dilanti.” (Flp. 1:10; 3:​8, 13, 14) Komo ku Pablo tabata soltero, el a logra “sirbi Señor konstantemente sin distraishon.”​—1 Kor. 7:​32-35.

16, 17. Sea ku nos ta soltero òf kasá, kon nos por imitá e ehèmpel ku Pablo a pone? Konta un eksperensia.

¹⁶ Algun sirbidó di Dios ta preferá di keda soltero meskos ku Pablo pa asina nan tin ménos responsabilidat di famia, i pa nan por dediká mas tempu na e trabou di prediká. (Mat. 19:​11, 12) Sirbidónan di Yehova ku ta soltero, hopi bes tin ménos responsabilidat di famia ku esnan ku ta kasá. Sea ku nos ta soltero òf kasá, nos tur por “kita tur peso” i sirbi Dios ku ménos distraishon posibel. Esaki por nifiká ku nos tin ku eliminá sierto kustumbernan ku por pone nos pèrdè hopi tempu. Tambe nos mester pone meta pa dediká mas tantu tempu den nos sirbishi na Yehova.

¹⁷ Laga nos wak un ehèmpel di un pareha gales ku yama Mark i Claire. Tur dos a kuminsá ku e trabou di pionero despues ku nan a kaba skol, i nan a sigui traha komo pionero despues ku nan a kasa. Mark ta konta: “Nos a logra simplifiká nos bida mas ainda ora nos a bende nos kas di tres kamber i kita for di nos trabou partaim pa asina nos por a bai yuda den e trabou di konstrukshon rònt mundu.” Durante e último 20 añanan, nan a bai vários kaminda na Afrika pa yuda konstruí Salòn di Reino. Na dado momento nan tabatin solamente 15 dòler, pero Yehova a perkurá pa nan. Claire a bisa: “E echo ku nos ta sirbi Yehova tur dia ta duna nos un gran satisfakshon. Nos a haña hopi amigu nobo i nos no falta nada. E tiki ku nos a sakrifiká no ta nada kompará ku e felisidat ku ta bini di sirbi Yehova den e trabou di tempu kompleto.” Hopi ruman ku ta den e trabou di tempu kompleto tabatin eksperensianan similar.b

18. Ki pregunta nos tin ku hasi nos mes?

¹⁸ Kiko di abo? Kiko bo por hasi si bo ripará ku bo no ta apoyá e Reino ku e mesun entusiasmo mas? Bo a laga kosnan ménos importante distraí bo? Si ta asina, kisas bo mester analisá kon ta bayendo ku bo estudio personal. E siguiente artíkulo lo por yuda bo benefisiá mas di bo lesamentu di Beibel i estudio personal.