Hesus—E Kaminda, e Bèrdat i e Bida

Ainda Hesus i su fiel apòstelnan tabata den e kamber ariba kaminda Hesus a instituí e sena pa konmemorá su morto. Anto Hesus a animá nan, bisando: “No laga boso kurason bira intrankil. Pone fe den Dios; pone fe den mi tambe.”—Huan 13:36; 14:1.

I pa su fiel apòstelnan no keda preokupá despues ku e bai, el a bisa nan: “Den kas di mi Tata tin masha hopi lugá. . . . Ora mi bai i prepará un lugá pa boso, lo mi bini bèk i risibí boso serka mi, pa kaminda mi ta, boso tambe por ta.” Pero e apòstelnan no a komprondé ku e tabata papia di bai shelu. Tomas a puntra: “Señor, nos no sa unda bo ta bai. Kon nos por sa e kaminda?”—Huan 14:2-5.

Hesus a kontest’é: “Ami ta e kaminda, e bèrdat i e bida.” Pues, un hende por drenta kas di Hesus su Tata solamente si e aseptá Hesus i su siñansanan i imitá su manera di biba. Hesus a bisa: “Ningun hende no ta yega serka e Tata si no ta pa medio di mi.”—Huan 14:6.

Felipe, kende tabata skucha ku atenshon, a pidi Hesus: “Señor, mustra nos e Tata, i esei ta sufisiente pa nos.” Probablemente, Felipe tabata ke haña un vishon di Dios, manera e vishonnan ku Moises, Elías i Isaías a haña. Sinembargo, e apòstelnan tabatin algu mihó ku e vishonnan ei. Hesus a laga nan komprondé esei ora el a bisa nan: “Mi tin asina tantu tempu huntu ku boso, i ainda bo no konosé mi, Felipe? Esun ku a mira mi a mira e Tata tambe.” Hesus a reflehá personalidat di su Tata perfektamente. P’esei, hende ku a biba den promé siglo i ku a opservá Hesus, na moda di papia, a mira e Tata tambe. Ta klaru ku e Tata ta mas ku e Yu, pasobra Hesus mes a bisa: “E kosnan ku mi ta bisa boso no ta di mi mes mi ta papia nan.” (Huan 14:8-10) E apòstelnan por a mira ku Hesus tabata duna su Tata tur mérito pa e kosnan ku e tabata siña e hendenan.

E apòstelnan a mira Hesus hasi hopi milager i a tend’é prediká e bon notisia di e Reino di Dios. Hesus a bisa nan: “Esun ku pone fe den mi lo hasi tambe e obranan ku mi ta hasi, i lo e hasi obranan mas grandi ku esakinan.” (Huan 14:12) Hesus no tabata ke men ku su disipelnan lo a hasi milagernan mas grandi kuné. E tabata ke men ku nan lo a hasi e trabou di prediká i di hasi disipel mas tantu tempu kuné, kubri mas teritorio i alkansá mas tantu hende kuné.

Despues ku Hesus lo a bai shelu, su disipelnan lo no a keda desampará, pasobra Hesus a primintí: “Si boso pidi kualke kos den mi nòmber, lo mi hasié.” El a bisa: “Lo mi pidi e Tata, i lo e duna boso un otro ayudante pa keda huntu ku boso pa semper, esta, e spiritu ku ta revelá e bèrdat.” (Huan 14:14, 16, 17) Sí, Hesus a sigurá su disipelnan ku nan lo a risibí un otro ayudante, esta, spiritu santu. I nan a haña e ayudante ei riba dia di Pentekòste.

Hesus a bisa nan: “Un poko tempu mas i mundu lo no mira mi mas, ma boso sí lo mira mi, pasobra mi ta biba i boso tambe lo biba.” (Huan 14:19) Hesus no solamente lo a aparesé na nan despues ku e resusitá, ma ku tempu lo el a resusitá nan komo spiritu pa nan ta huntu kuné den shelu.

Anto Hesus a bisa nan un simpel bèrdat: “Esun ku aseptá mi mandamentunan i kumpli ku nan ta esun ku stima mi. I esun ku stima mi, mi Tata lo stim’é, i ami tambe lo stim’é i mustr’é bon kla ken mi ta.” E ora ei, apòstel Hudas, esun ku nan tabata yama Tadeo, a puntr’é: “Señor, kon bini bo tin intenshon di mustra nos bon kla ken bo ta i bo no ta mustra mundu?” Hesus a kontest’é: “Si un hende ta stima mi, lo e kumpli ku mi palabra, i mi Tata lo stim’é . . . Esun ku no stima mi no ta kumpli ku mi palabranan.” (Huan 14:21-24) Distinto for di Hesus su siguidónan, mundu no ta aseptá Hesus komo e kaminda, e bèrdat i e bida.

Despues ku Hesus lo a bai shelu, kon su disipelnan lo por a kòrda tur loke el a siña nan? El a bisa: “E ayudante, e spiritu santu, ku e Tata lo manda den mi nòmber, lo siña boso tur kos i laga boso kòrda tur loke mi a bisa boso.” E apòstelnan a mira e poder di spiritu santu. Pues, loke Hesus a bisa tabata un konsuelo pa nan. El a sigui bisa: “Mi ta laga pas pa boso; mi ta duna boso mi pas. . . . No laga boso kurason bira intrankil ni lag’é kremp di miedu.” (Huan 14:26, 27) Pues, e disipelnan no tabatin mester di preokupá, pasobra nan lo tabatin e guia i protekshon di Hesus su Tata.

Pronto nan lo a mira kon Dios por protehá hende. Hesus a bisa: “E gobernante di mundu ta bini. E no tin poder riba mi.” (Huan 14:30) De echo, Diabel a logra poderá di Hudas. Pero Hesus sí no tabatin ningun debilidat ku Diabel por a usa pa pon’é bai kontra Dios. Ni nunka Diabel lo por a tene Hesus den gara di morto. Dikon nò? Hesus a bisa: “Mi ta hasi presis manera e Tata a manda mi hasi.” Sí, Hesus tabata sigur ku su Tata lo a resusit’é.—Huan 14:31.