Unda Nos Por Haña Berdadero Konsuelo?
“E Dios i Tata di nos Señor Hesukristu . . . ta konsolá nos den tur nos aflikshon.”—2 KORINTIONAN 1:3, 4.
1. Ki sirkunstansianan por pone hende sinti un gran nesesidat pa konsuelo?
ENFERMEDAT debilitante por pone un hende sinti ku tur kos a kaba p’e. Temblor, tormenta i hamber ta laga hende den miseria. Guera por resultá den morto di miembro di famia, por destruí kas òf obligá e habitantenan pa bandoná nan propiedat i hui bai otro kaminda. Inhustisia por pone hende sinti ku no tin niun kaminda ku nan por bai buska alivio. Víktimanan di e kalamidatnan ei mester di hopi konsuelo. Unda nan por haña esei?
2. Pakiko e konsuelo di Yehova ta algu úniko?
2 Algun persona individual i tambe organisashon ta trata na ofresé konsuelo. Un palabra bondadoso ta kos di apresiá. Esfuersonan pa duna alivio material ta satisfasé e nesesidatnan di término kòrtiku. Pero ta Yehova so, e Dios berdadero, por drecha tur daño i duna e klase di yudansa ku ta nesesario pa e kalamidatnan ei no sosodé nunka mas. Beibel ta bisa di Dios: “Bendishoná sea e Dios i Tata di nos Señor Hesukristu, e Tata di miserikòrdianan i Dios di tur konsuelo, kende ta konsolá nos den tur nos aflikshon, pa asina nos tambe por konsolá esnan ku ta den kualke aflikshon ku e mesun konsuelo ku Dios a konsolá nos kuné.” (2 Korintionan 1:3, 4) Kon Yehova ta konsolá nos?
E Kousa Fundamental di Nos Problemanan
3. Kon e konsuelo ku Dios ta duna ta yega na rais di e problemanan di humanidat?
3 Henter e famia humano a heredá imperfekshon komo resultado di e piká di Adam, i esei ta kousa kantidat di problema ku finalmente ta hiba na morto. (Romanonan 5:12) E echo ku Satanas e Diabel ta “e prens di e mundu aki” ta hasi e situashon pió. (Juan 12:31; 1 Juan 5:19) Yehova no a limitá su mes na djis ekspresá duele pa e kondishon desafortuná di humanidat. El a manda su Yu unigénito komo reskate pa libra nos, i El a bisa nos ku nos por haña alivio for di e efektonan di e piká di Adam si nos kere den Su Yu. (Juan 3:16; 1 Juan 4:10) Tambe Dios a profetisá ku Hesukristu, kende a ser konfiá ku tur outoridat den shelu i riba tera, lo destruí Satanas i henter su mundu malbado.—Mateo 28:18; 1 Juan 3:8; Revelashon 6:2; 20:10.
4. (a) Kiko Yehova a perkurá pa fortalesé nos konfiansa den su promesanan di trese alivio? (b) Kon Yehova ta yuda nos saka afó ki tempu e alivio lo yega?
4 Pa fortalesé nos konfiansa den su promesanan, Dios a laga skirbi masha hopi prueba di ku tur loke e profetisá ta tuma lugá. (Josué 23:14) El a inkluí den Beibel un registro di loke el a hasi pa libra su sirbidónan di situashonnan ku for di un punto di bista humano tabata imposibel pa sali afó. (Eksodo 14:4-31; 2 Reinan 18:13–19:37) I mediante Hesukristu, Yehova a demostrá ku su propósito ta pa, entre otro, kura hende di “tur sorto di enfermedat” i asta resusitá e mortonan. (Mateo 9:35; 11:3-6) Ki tempu tur esaki lo tuma lugá? Beibel ta kontestá esei dunando un deskripshon di e último dianan dje sistema bieu aki, ku lo habri kaminda pa e shelu nobo i tera nobo di Dios. Hesus su deskripshon ta kuadra ku e tempu den kua nos ta biba.—Mateo 24:3-14; 2 Timoteo 3:1-5.
Konsuelo pa un Pueblo den Angustia
5. Ora Yehova a konsolá Israel di pasado, na kiko el a dirigí nan atenshon?
5 Na e manera ku Yehova a trata ku e nashon di Israel di pasado, nos ta siña kon el a konsolá nan den tempu di angustia. El a rekordá nan ki klase di Dios e ta. Esaki a fortalesé nan konfiansa den su promesanan. Yehova a laga su profetanan presentá e kontrastenan skèrpi ku tin entre e komo e Dios bibu i berdadero i e imágennan di diosnan falsu, ku no por a yuda ni nan mes ni esnan ku ta adorá nan. (Isaias 41:10; 46:1; Jeremias 10:2-15) Ora Yehova a bisa Isaias, “Konsolá, o konsolá mi pueblo,” El a inspirá su profeta pa usa ilustrashon i deskripshon di Su obranan di kreashon pa por a enfatisá kon grandi E ta komo e úniko Dios berdadero.—Isaias 40:1-31.
6. Ki indikashonnan Yehova a yega di duna enkuanto e tempu ku lo el a trese liberashon?
6 Na algun okashon, Yehova a konsolá su pueblo dor di indiká e tempu ku lo el a libra nan, sea riba un término hopi kòrtiku òf riba un término mas largu. Segun ku e liberashon for di Egipto a yega serka, el a bisa e israelitanan oprimí: “Un plaga mas lo mi trese riba Fárao i riba Egipto; despues di esei e lo laga boso bai for di akinan.” (Eksodo 11:1) Ora un aliansa di tres nashon a invadí Huda den e dianan di Rei Josafat, Yehova a bis’é ku “mañan” lo e intervení na fabor di nan. (2 Krónikanan 20:1-4, 14-17) Di otro banda, Isaias a skirbi kasi 200 aña di antemano di nan liberashon for di Babilonia, i Yehova a duna mas detaye mediante Jeremias, kasi shen aña promé ku e liberashon a tuma lugá. E profesianan ei tabata un gran animashon pa sirbidónan di Dios segun ku e tempu pa nan liberashon tabata aserkando!—Isaias 44:26–45:3; Jeremias 25:11-14.
7. Kiko e promesanan di liberashon a kontené hopi bes, i kon esaki a influensiá hende fiel den Israel?
7 Ta notabel ku e promesanan ku a konsolá e pueblo di Dios hopi bes a kontené informashon tokante e Mesias. (Isaias 53:1-12) Di generashon pa generashon esaki a trese speransa pa hende fiel segun ku nan a enfrentá vários prueba. Na Lukas 2:25 nos ta lesa: “Mira, tabatin un hòmber na Yerusalèm ku yama Simeon; i e hòmber aki tabata hustu i deboto i tabata spera e konsolashon di Israel [òf, konsuelo; realmente, e binida di e Mesias]; i spiritu santu tabata riba dje.” Simeon tabata sa dje speransa di un Mesias ku e Skritura a trese dilanti, i henter su bida el a biba den espektativa di su kumplimentu. E no a komprondé kon tur kos lo a kumpli, i e mes no a biba pa mira e salbashon profetisá bira realidat, pero el a alegrá sí ora el a identifiká Esun ku Dios lo a trese komo “salbashon.”—Lukas 2:30.
Konsuelo Mediante Kristu
8. Kon nos por kompará e yudansa ku Hesus a duna ku loke hopi hende a pensa ku nan tabatin mester?
8 Tempu ku Hesukristu a kumpli ku su ministerio aki riba tera, no ta semper el a duna e yudansa ku e hendenan a pensa ku nan tabatin mester. Algun a anhelá un Mesias ku lo a libra nan for di e dominashon di Roma ku nan a odia. Pero Hesus no a boga pa revolushon; el a bisa nan pa “duna Cesar loke ta di Cesar.” (Mateo 22:21) E propósito di Dios a enserá muchu mas ku libra hende for di dominio di un régimen polítiko. E pueblo kier a hasi Hesus rei, pero Hesus a bisa ku lo e duna “su bida komo preis di reskate pa hopi.” (Mateo 20:28; Juan 6:15) Ainda no tabata tempu p’e bira rei, i ta Yehova mester a pasa e outoridat di goberná p’e, no un grupo di hende malkontentu.
9. (a) Kiko tabata e mensahe di konsuelo ku Hesus a proklamá? (b) Kon Hesus a demostrá e importansia di e mensahe p’e situashonnan ku e hendenan tabata enfrentá personalmente? (c) Hesus su ministerio a pone un base pa kiko?
9 E konsuelo ku Hesus a trese tabata parti di “e bon nobo dje reino di Dios.” Esaki tabata e mensahe ku Hesus a proklamá unda ku el a bai. (Lukas 4:43, NW) El a enfatisá kon importante e mensahe ei ta p’e problemanan diario di hende dor di demostrá kiko e komo e Gobernante Mesiániko lo hasi pa humanidat. Hesus a duna su kompatriotanan ku tabata sufri, gana di biba atrobe dor di kura esnan ku tabata siegu i muda (Mateo 12:22; Marko 10:51, 52), kura esnan mankaron (Marko 2:3-12), purifikando nan di malesanan repugnante (Lukas 5:12, 13) i aliviando nan di otro enfermedatnan grave. (Marko 5:25-29) El a trese gran alivio pa mayornan tristu dor di lanta nan yunan for di morto. (Lukas 7:11-15; 8:49-56) El a demostrá ku e tin e poder pa dominá tormentanan peligroso i pa satisfasé e nesesidat di kuminda pa grupo grandi di hende. (Marko 4:37-41; 8:2-9) Ademas, Hesus a siña nan e prinsipionan di bida ku por a yuda nan trata di un manera efikas ku problemanan eksistente i ku lo a yena kurason di hende ku speransa pa un gobernashon hustu bou di e Mesias. Pues, segun ku Hesus a kumpli ku su ministerio, no solamente el a konsolá esnan ku a skucha ku fe sino tambe el a pone un base pa animá hende durante dos mil aña mas.
10. Kiko a bira posibel komo resultado di e sakrifisio di Hesus?
10 Mas ku 60 aña despues ku Hesus a sakrifiká su bida humano i resusitá pa bida selestial, Dios a inspirá apòstel Juan p’e skirbi: “Mi yu chikitunan, mi ta skirbi boso e kosnan aki pa boso no hasi piká. I si un hende hasi piká, nos tin un abogado serka e Tata, Hesukristu, e hustu; i e mes ta e propisiashon pa nos pikánan, i no pa di nos so, ma tambe pa esnan di henter mundu.” (1 Juan 2:1, 2) E benefisionan dje sakrifisio humano perfekto di Hesus ta duna nos gran konsuelo. Nos sa ku nos por haña pordon pa piká, un konsenshi limpi, un relashon aprobá ku Dios i e chèns di biba pa semper.—Juan 14:6; Romanonan 6:23; Hebreonan 9:24-28; 1 Pedro 3:21.
Spiritu Santu Komo Konsolador
11. Ki otro perkurashon pa konsuelo Hesus a primintí promé ku su morto?
11 E último anochi ku Hesus a pasa ku su apòstelnan promé ku su morto komo sakrifisio, el a papia tokante un kos mas ku su Tata selestial a perkurá pa konsolá nan. Hesus a bisa: “Lo mi pidi e Tata, i e lo duna boso un otro konsolador [griego, pa·rá·kle·tos], pa e keda serka boso pa semper, esta, e spiritu di bèrdat.” Hesus a garantisá nan: “E konsolador, spiritu santu, . . . lo siña boso tur kos i hasi boso rekòrdá tur loke mi a bisa boso.” (Juan 14:16, 17, 26) Kon realmente spiritu santu a konsolá nan?
12. Kon e papel di spiritu santu komo yudansa pa e memoria di Hesus su disipelnan a yuda trese konsuelo pa hopi hende?
12 Hesus a siña su apòstelnan masha hopi kos. Hamas nan lo a lubidá e eksperensia ei, pero realmente nan lo a kòrda tur loke el a bisa? Instrukshonnan importante lo a bai pèrdí pa motibu di nan memoria imperfekto? Hesus a sigurá nan ku spiritu santu lo ‘hasi nan rekordá tur loke el a bisa nan.’ Di manera ku rònt di ocho aña despues di e morto di Hesus, Mateo por a skirbi e promé Evangelio, den kua el a registrá Hesus su Sermon Riba Seru (un diskurso masha konmovedor), su hopi ilustrashonnan relashoná ku e Reino, i su splikashon detayá di e señal di su presensia. Mas ku 50 aña despues, apòstel Juan por a skirbi un relato konfiabel ku detayenan ekstenso tokante e último dianan di Hesus su bida riba tera. E registronan inspirá aki a resultá di ta un tremendo animashon te den nos tempu!
13. Kon spiritu santu a sirbi komo maestro p’e promé kristiannan?
13 Fuera di simplemente yuda nan rekordá e palabranan di Hesus, spiritu santu a siña e disipelnan i guia nan na un mihó komprondementu di e propósito di Dios. Miéntras ku Hesus tabata ku su disipelnan ainda, el a bisa nan kosnan ku e tempu ei nan no a komprondé muchu bon. Sin embargo, mas despues, bou di guia di spiritu santu Juan, Pedro, Santiago, Hudas i Pablo a skirbi kartanan pa splika kon e propósito di Dios a desaroyá mas aleu. Den e forma ei spiritu santu a sirbi komo un maestro, dunando e garantia balioso di ku ta Dios a dirigí nan.
14. Den ki maneranan spiritu santu a yuda e pueblo di Yehova?
14 E donnan milagroso di spiritu tambe a yuda mustra bon kla ku Dios a transferí su fabor for di Israel karnal p’e kongregashon kristian. (Hebreonan 2:4) Manifestashon di fruta di e spiritu ei den bida di hende tambe tabata un faktor importante pa identifiká esnan ku di bèrdat tabata disipel di Hesus. (Juan 13:35; Galationan 5:22-24) I tambe e spiritu a fortalesé e miembronan di e kongregashon ei pa nan bira testigunan yen di kurashi i sin miedu.—Echonan 4:31.
Yudansa na Momentu di Preshon Severo
15. (a) Ki preshon kristiannan tantu di pasado komo presente a enfrentá? (b) Pakiko tin biaha esnan ku ta duna animashon mes tin mester di dje?
15 Tur persona ku ta dediká na Yehova i ku ta leal na dje ta haña nan ku un òf otro klase di persekushon. (2 Timoteo 3:12) Sin embargo, hopi kristian a haña nan bou di preshon sumamente severo. Den tempu moderno, gruponan violento a persiguí algun kristian i sera nan bou di kondishonnan inhumano den kampo di konsentrashon, prizòn i kampo di trabou fòrsá. Gobièrnunan mes a kuminsá persiguí nan, òf a laga elementonan sin eskrúpulo kometé barbaridatnan kontra nan sin haña kastigu. Ademas, kristiannan a enfrentá problemanan grave di salú òf krísis serio den famia. Tambe un kristian maduro ku ta yuda hopi di su rumannan den fe trata ku situashonnan difísil, por haña su mes bou di basta preshon. Den e tipo di kasonan ei, kisas esun ku ta duna animashon tambe tin mester di animashon.
16. Ora David tabata bou di gran preshon, ki yudansa el a risibí?
16 Ora Rei Saul tabata persiguí David pa mat’é, David a akudí na Dios komo su Ayudante: “O Dios, tende mi orashon,” el a roga. “Den e sombra di bo halanan lo mi tuma refugio.” (Salmo 54:2, 4; 57:1) David a risibí yudansa? Sí, por sierto. Durante e periodo ei, Yehova a usa profeta Gad i saserdote Abiatar pa duna guia na David, i El a usa Jonatan yu di Saul pa enkurashá e yònkuman aki. (1 Samuel 22:1, 5; 23:9-13, 16-18) Tambe Yehova a permití e filisteonan invadí e tera, i esei a stroba Saul di sigui persiguí David.—1 Samuel 23:27, 28.
17. Ora Hesus tabata bou di preshon intenso, na unda el a akudí pa yudansa?
17 Hesukristu mes tabata bou di gran preshon ora e fin di su bida riba tera tabata yegando serka. E tabata plenamente konsiente di e manera ku su kondukta por a afektá e nòmber di su Tata selestial i kiko esei lo por a nifiká p’e futuro di henter humanidat. El a hasi orashon sinsero, i asta a drenta un “ansha.” Dios a hasi sigur ku Hesus a risibí e sosten ku e tabatin mester durante e tempu difísil ei.—Lukas 22:41-44.
18. Ki konsuelo Dios a duna e promé kristiannan ku a ser persiguí severamente?
18 E persekushon di kristiannan despues ku e kongregashon di promé siglo a ser fundá tabata asina feros ku tur e disipelnan di Hesus, ku eksepshon dje apòstelnan, a ser plamá for di Yerusalèm. Hòmber i muhé a ser lastrá literalmente for di nan kas. Ki konsuelo Dios a duna nan? Esei tabata e siguransa di su Palabra ku nan tabatin “un mihó poseshon i un ku ta permanesé,” un herensia garantisá den shelu huntu ku Kristu. (Hebreonan 10:34; Efesionan 1:18-20) Segun ku nan a sigui prediká, nan a mira evidensia ku e spiritu di Dios tabata ku nan, i nan eksperensianan a duna nan mas motibu pa alegrá.—Mateo 5:11, 12; Echonan 8:1-40.
19. Ounke Pablo a sufri persekushon severo, kon el a sinti tokante e konsuelo ku Dios ta duna?
19 Ku tempu, Saul (Pablo), kende anteriormente tabata un persiguidó violento, a bira e blanko di persiguishon pa motibu ku el a bira un kristian. Riba e isla di Cyprus tabatin un hasidó di bruha ku a purba stroba Pablo su ministerio usando engaño i malisia. Na Galasia, nan a piedra Pablo te ora nan a kere ku el a muri. (Echonan 13:8-10; 14:19) Na Masedonia nan a sut’é ku bara. (Echonan 16:22, 23) Despues di a soportá maltrato violento na man di un multitut na Efeso, el a skirbi: “Nos tabatin un karga masha pisá mes, mas ku nos por a soportá, asina ku asta nos tabata desesperá di nos bida; sí, nos tabatin e sentensia di morto den nos mes.” (2 Korintionan 1:8, 9) Pero den e mesun karta ei, Pablo a skirbi e palabranan di konsuelo menshoná den paragraf 2 di e artíkulo aki.—2 Korintionan 1:3, 4.
20. Kiko nos ta bai konsiderá den e siguiente artíkulo?
20 Kon abo tambe por konsolá otro hende? Tin hopi ruman den nos tempu ku mester di konsuelo ora nan ta sinti nan tristu, sea pa motibu di un kalamidat ku ta afektá míles di hende òf pa motibu di tribulashon ku ta afligí solamente nan. Den e siguiente artíkulo, nos lo konsiderá kon nos por duna konsuelo den ámbos kaso.
Bo Ta Kòrda?
• Pakiko e konsuelo di Dios ta mihó ku esun di kualkier otro fuente?
• Ki konsuelo nos ta haña mediante Kristu?
• Kon e spiritu santu a resultá di ta un konsolador?
• Duna ehèmpel di e konsuelo ku Dios ta perkurá ora su sirbidónan ta pasa den prueba severo.
[Plachi na página 15]
Beibel ta mustra nos ku Yehova a konsolá su pueblo dor di libra nan
[Plachi na página 16]
Hesus a duna konsuelo dor di siña otronan, dor di kura hende i dor di resusitá e mortonan
[Plachi na página 18]
Hesus a risibí yudansa for di ariba