“Mi Ta Stima e Tata”

1, 2. Kiko apòstel Juan a revelá tokante e último anochi ku e apòstelnan a pasa huntu ku Hesus?

SEGUN ku un hòmber di edat tabata dòp su pèn den enk, e tabata kòrda riba e hopi kosnan ku el a pasa aden. Su nòmber tabata Juan, i e tabata e último apòstel di Hesukristu ku a keda na bida. Awor ku e tabatin mas o ménos 100 aña, el a reflekshoná riba loke a pasa un anochi masha memorabel un 70 aña promé, e último anochi ku e i e otro apòstelnan a pasa huntu ku Hesus promé ku Su morto. Bou di guia di e spiritu santu di Dios, Juan a logra kòrda i skirbi e susesonan detayadamente.

² E anochi ei, Hesus a deklará bon kla ku pronto outoridatnan lo a laga mat’é. Ta Juan so a revelá loke Hesus a bisa tokante e motibu pakiko lo el a someté su mes na e morto teribel ei: “Pa mundu por sa ku mi ta stima e Tata, i manera e Tata a ordená mi, asina mi ta hasi. Lanta, laga nos bai for di akinan.”—Juan 14:31.

 3. Kon Hesus a demostrá ku el a stima su Tata?

³ “Mi ta stima e Tata.” No tabatin nada mas importante pa Hesus ku esei. No ta asina ku e tabata ripití e deklarashon ei konstantemente. De echo, Juan 14:31 ta e úniko kaminda den Beibel ku nos ta haña ku Hesus a ekspresá su amor pa su Tata asina abiertamente. Sin embargo, Hesus su manera di biba a mustra ku e palabranan ei tabata bèrdat. Su amor pa Yehova tabata bisto tur dia. Hesus su kurashi, su obedensia i su perseveransia, tur tabata prueba di su amor pa Dios. Henter su ministerio tabata motivá pa amor.

4, 5. Beibel ta promové ki klase di amor, i kiko nos por bisa di Hesus su amor pa Yehova?

⁴ Awendia, algun persona kisas ta pensa ku hende ku ta mustra amor ta suak. Kisas nan ta pensa riba poemanan di amor i kantikanan sentimental, podisé asta di e euforia ku tin biaha ta ser konektá ku amor romántiko. Beibel ta papia di amor romántiko, pero na un manera mas digno di loke ta komun awe. (Proverbionan 5:15-21) Sin embargo, e Palabra di Dios ta duna hopi mas atenshon na un otro klase di amor. E amor aki no ta simplemente pashon òf un emoshon pasahero; tampoko e no ta un manera seku i filosófiko di trata ku relashonnan humano. E klase di amor ei ta enserá tantu e kurason komo e mente. E ta sali for di loke e persona ta di paden, e ta ser dirigí pa prinsipionan elevá i ta na armonia ku nan, i ta ser ekspresá den echonan positivo. Definitivamente e no ta un amor superfisial. E Palabra di Dios ta bisa: “Amor nunka no ta faya.”—1 Korintionan 13:8.

⁵ Di tur e hendenan ku a yega di biba, Hesus tabata esun ku a stima Yehova mas tantu. Ningun hende no a kumpli mihó ku Hesus ku e palabranan ku e mes a sita komo Dios su mandamentu di mas grandi: “Stima [Yehova] bo Dios ku henter bo kurason, i ku henter bo alma, i ku henter bo mente, i ku tur bo forsa.” (Marko 12:30) Kon Hesus a desaroyá un amor asina? Kon el a sòru pa su amor pa Dios keda fuerte durante e tempu ku e tabata riba tera? Anto kon nos por imit’é?

6, 7. Kon nos por sa ku Proverbionan 8:22-31 ta deskribí e Yu di Dios i no simplemente e kualidat di sabiduria?

⁶ Bo a yega di traha riba un proyekto ku un amigu i a konstatá ku debí na esei boso dos a bira mihó amigu, mas será ku otro? E eksperensia agradabel ei por yuda bo komprondé e amor ku a desaroyá entre Yehova i su Yu unigénito. Nos a referí vários biaha na Proverbionan 8:30, pero laga nos analisá e versíkulo ei awor den su konteksto. Den versíkulo 22 te ku 31, nos ta haña un deskripshon inspirá pa Dios di sabiduria personifiká. Kon nos por sa ku e palabranan aki ta referí na e Yu di Dios?

⁷ Den versíkulo 22, sabiduria ta bisa: “[Yehova] a krea mi na prinsipio di su kaminda, promé ku su obranan di promé ayá.” Mester ta trata aki di algu ku ta mas ayá di sabiduria, pasobra sabiduria no ta un kos ku a ser “kreá.” E no tabatin un prinsipio pasobra semper Yehova a eksistí i semper e tabata sabí. (Salmo 90:2) Sin embargo, e Yu di Dios sí a ser kreá; e tabata “e primogénito di henter kreashon,” e promé di tur e obranan di Yehova. (Kolosensenan 1:15) Manera Proverbionan a deskribí, e Yu a eksistí promé ku tera i shelu. Anto komo e Palabra, es desir, e Bosero di Dios, e tabata e ekspreshon perfekto di e sabiduria di Yehova.—Juan 1:1.

 8. Kiko e Yu a hasi durante tur e tempu promé ku el a bin na tera, i kiko nos lo por pensa riba dje ora nos ta atmirá kreashon?

⁸ Kiko e Yu a hasi durante e míles di miónes di añanan ku el a biba promé ku el a bin na tera? Versíkulo 30 ta bisa nos ku e tabata na Dios su lado komo “un trahadó eksperto.” Kiko esei ta nifiká? Kolosensenan 1:16 ta splika: “Pa medio di dje tur kos a wòrdu kreá, tantu den e shelunan komo riba tera, . . . tur kos a wòrdu kreá pa medio di dje i p’e.” Pues Yehova, e Kreadó, a usa su Yu, e Trahadó Eksperto, pa krea tur otro kos; for di e kriaturanan spiritual den shelu te na e inmenso universo material, inkluso planeta Tera ku su variedat maravioso di mata i bestia, i e kulminashon di e kreashon terenal: hende. Den algun aspekto nos lo por kompará e koperashon aki entre Tata i Yu ku e koperashon ku tin entre un arkitekto i un kontratista. E kontratista ta spesialisá den konstruí e diseñonan ingenioso di e arkitekto presis manera nan ta. Pues, ora un sierto faseta di kreashon ta yena nos ku rèspèt i atmirashon, nos ta dunando krédito de echo na e Gran Arkitekto. (Salmo 19:1) Sin embargo, nos lo por kòrda tambe riba e felis kolaborashon di hopi tempu ku tin entre e Kreadó i su “trahadó eksperto.”

9, 10. (a) Kiko a hasi e laso entre Yehova i su Yu mas fuerte? (b) Kiko por hasi e laso ku bo tin ku bo Tata selestial mas fuerte?

⁹ Ora ku dos hende imperfekto ta traha den estrecho kolaborashon, nan de bes en kuando sa tin problema pa sali bon ku otro. Esei niun ora so no tabata e kaso ku Yehova i su Yu! E Yu a traha pa masha hopi siglo ku su Tata i tabata “regosihando semper su dilanti.” (Proverbionan 8:30) Sí, el a disfrutá di e kompania di su Tata, i e sintimentu tabata mutuo. Di mes, e Yu a bira mas i mas manera su Tata, i a siña imitá e kualidatnan di Dios. Nada straño anto ku e laso entre Tata i Yu a bira asina fuerte! Korektamente nos por yama esei e laso di mas bieu i di mas fuerte den henter universo.

¹⁰ Pero kiko esei por nifiká pa nos? Kisas bo ta sinti ku abo nunka lo por kultivá un laso asina ku Yehova. Ta bèrdat ku ningun di nos no tin e puesto elevá di e Yu. Sin embargo, nos tin un oportunidat ekstraordinario. Kòrda ku Hesus a hala mas serka di su Tata dor di traha huntu kuné. Amorosamente Yehova ta ofresé nos e oportunidat pa ta su “kolaboradónan.” (1 Korintionan 3:9) Segun ku nos ta sigui e ehèmpel di Hesus den e ministerio, nos mester kòrda semper ku nos ta kolaboradó di Dios. Pues asina e laso di amor ku ta uni nos ku Yehova ta bira mas i mas fuerte. Tin un privilegio mas grandi ku esei?

11-13. (a) Dikon ta bon pa nos mira amor komo un kos bibu, i kon Hesus, tempu ku e tabata mucha, a sòru pa su amor pa Yehova keda fuerte? (b) Kon e Yu di Dios a mustra su interes pa siña for di Yehova, tantu promé ku el a bin na tera komo despues komo hende?

¹¹ Den hopi manera ta bon pa nos mira e amor den nos kurason komo un kos bibu. Meskos ku un bunita mata den kurá, amor mester haña nutrishon i kuido pa e por krese i bona. Si neglish’é i keda sin dun’é nutrishon, e ta bira suak i muri. Hesus no a konsiderá su amor pa Yehova komo algu komun i koriente. El a sòru pa su amor keda fuerte i sigui krese durante henter su estadia riba tera. Laga nos wak kon.

¹² Pensa un biaha mas riba e insidente kaminda Hesus, tempu ku e tabata mucha, a papia frankamente den e tèmpel na Yerusalèm. Kòrda e palabranan ku el a bisa su mayornan ku tabata tur preokupá: “Pakiko boso tabata buska mi? Boso no tabata sa ku mi mester tabata den e kas di mi Tata?” (Lukas 2:49) Komo mucha, Hesus evidentemente no tabatin ningun rekuerdo ainda di su eksistensia prehumano. Tòg su amor pa su Tata, Yehova, tabata intenso. E tabata sa ku e manera natural pa ekspresá e amor ei ta den adorashon. P’esei ningun otro lugá na mundu no a atraé Hesus manera e kas di adorashon puru di su Tata. El a anhelá pa ta einan i no kier a bai. Ademas, e no tabata djis un opservadó. E tabata ansioso pa siña tokante Yehova i pa ekspresá loke e tabata sa. E sintimentunan ei no a kuminsá tempu ku e tabatin 12 aña, ni nan no a kaba na e edat ei.

¹³ E Yu ansiosamente a siña for di su Tata tempu ku e tabata den shelu promé ku el a bira hende. Un profesia ku tin na Isaias 50:4-6 ta revelá ku Yehova a siña su Yu spesífikamente ki papel lo el a bin kumpli kuné komo e Mesias. Ounke e edukashon ei a enserá tambe detayenan tokante algun di e difikultatnan ku e Yu lo a pasa aden komo e Ungí di Yehova, el a siña ku smak. Mas despues, ora Hesus a bin na tera i a bira adulto, el a keda ku e aktitut ansioso pa bai na kas di su Tata i partisipá den e adorashon i e siñamentu ku Yehova tabata ke pa ser duná na su kas. P’esei Beibel ta informá nos ku Hesus tabata asistí fielmente na e tèmpel i na snoa. (Lukas 4:16; 19:47) Si nos ke pa nos amor pa Yehova keda bibu i sigui krese, nos mester asistí diligentemente na e reunionnan kristian, kaminda nos ta adorá Yehova i oumentá nos konosementu i apresio p’e.

14, 15. (a) Dikon Hesus a buska pa ta su so? (b) Kon e orashonnan ku Hesus a dirigí na su Tata ta revelá intimidat i rèspèt?

¹⁴ Un otro manera mas ku Hesus a sòru pa su amor pa Yehova keda fuerte tabata pa medio di hasi orashon ku regularidat. Ounke Hesus tabata un hòmber amigabel i sosial, ta bon pa tuma nota ku na sierto momentonan el a preferá di tabata su so. Por ehèmpel, Lukas 5:16 ta bisa: “Hopi biaha e tabata retirá su mes den desierto pa hasi orashon.” Asina tambe Mateo 14:23 ta deklará: “Despues ku el a manda e multitutnan bai, e so a subi bai riba seru pa hasi orashon. I ora nochi a sera, e tabata su so ayanan.” Hesus a buska pa ta su so na e okashonnan aki i na mas okashon, no pasobra e tabata un ermitaño òf no a gusta kompania di otro hende, sino pasobra e tabata ke ta su so ku Yehova, pa papia libremente ku su Tata den orashon.

¹⁵ Ora Hesus tabata hasi orashon, el a usa tin biaha e ekspreshon “Abba! Tata!” (Marko 14:36) Den tempu di Hesus, “Abba” tabata un palabra di kariño pa “tata” ku a indiká intimidat, un palabra usá den famia. Hopi biaha e tabata un di e promé palabranan ku un mucha a siña. Pero a la bes e tabata un palabra di rèspèt. Ounke e palabra ei a revelá e relashon íntimo di e Yu papiando ku su Tata stimá, el a indiká tambe rèspèt profundo pa Yehova su outoridat komo tata. Nos ta haña e kombinashon ei di intimidat i rèspèt den tur e orashonnan di Hesus ku tin den Beibel. Por ehèmpel, na Juan kapítulo 17, apòstel Juan a skirbi e orashon largu i sinsero ku Hesus a hasi su último anochi. Ta realmente konmovedor pa nos studia e orashon ei i ta masha importante pa nos imit’é, naturalmente no dor di ripití e palabranan di Hesus, sino dor di haña maneranan pa papia di kurason ku nos Tata selestial mas tantu posibel. Hasiendo esei nos amor p’e lo keda bibu i fuerte.

16, 17. (a) Ku ki palabranan Hesus a ekspresá su amor pa su Tata? (b) Kon Hesus a revelá e generosidat di su Tata?

¹⁶ Manera nos a menshoná kaba, Hesus no a bisa bes tras bes: “Mi ta stima e Tata.” Sin embargo, hopi biaha el a ekspresá su amor pa su Tata ku otro palabra. Kon asina? Hesus mes a bisa: “Mi ta alabá bo públikamente, o Tata, Señor di shelu i tera.” (Mateo 11:25, NW) Ora nos a studia e Sekshon 2 di e buki aki, nos a mira ku Hesus tabata gusta alabá su Tata dor di yuda hende konosé Yehova. Por ehèmpel, el a kompará Yehova ku un tata ku tabata asina ansioso pa pordoná su yu hòmber rebelde ku e tabata warda pa e yònkuman arepentí bin bèk. E tata a mira e yu djaleu i a kore bai kontr’é i a bras’é. (Lukas 15:20) Ken por lesa e pasashi ei sin sinti su mes konmoví pa e manera ku Hesus a presentá Yehova su amor i pordon?

¹⁷ Hopi biaha Hesus a alabá su Tata pa Su generosidat. Hesus a usa e ehèmpel di mayornan imperfekto pa mustra kon sigur nos por ta ku nos Tata selestial lo duna nos tur e spiritu santu ku nos tin mester. (Lukas 11:13) Hesus a papia tambe tokante e speransa ku e Tata ta ofresé asina generosamente. Ku anhelo Hesus a deskribí su propio speransa di bolbe bèk na lado di su Tata den shelu. (Juan 14:28; 17:5) El a konta su siguidónan di e speransa ku Yehova ta ekstendé na Kristu su “tou chikitu,” esta, e speransa di biba den shelu i di partisipá den e gobernashon di e Rei Mesiániko. (Lukas 12:32; Juan 14:2) Anto el a konsolá un malechor ku tabata muriendo ku e speransa di bida den Paradeis. (Lukas 23:43) Segun ku Hesus a papia di e gran generosidat di su Tata den e maneranan aki esei siguramente a yud’é keda ku un amor fuerte pa Yehova. Hopi siguidó di Kristu a ripará ku e kos ku mas ta fortalesé nan amor pa Yehova òf nan fe den dje ta di papia tokante Yehova i e speransa ku e ta ekstendé na hende ku ta stim’é.

18. Kua ta e manera di mas importante den kua nos tin ku sigui Hesus, i dikon?

¹⁸ Di tur e maneranan ku nos tin ku sigui Hesus, ningun no ta mas importante ku esaki: Nos tin ku stima Yehova ku henter nos kurason, alma, mente i forsa. (Lukas 10:27) Nos no por midi nos amor pa Yehova simplemente na kon intenso nos sintimentunan ta; nos tin ku konsiderá tambe te na ki grado nos ta demostrá nos amor den akshon. Hesus no a keda kontentu ku djis sinti amor pa su Tata ni e no a djis bisa: “Mi ta stima e Tata.” E di: “Pa mundu por sa ku mi ta stima e Tata, i manera e Tata a ordená mi, asina mi ta hasi.” (Juan 14:31) Satanas a pretendé ku ningun hende lo sirbi Yehova motivá pa amor sin egoismo. (Jòb 2:4, 5) Pa por a duna e mihó kontesta posibel riba e kalumnia malisioso di Satanas, Hesus a aktua ku kurashi i a mustra mundu kuantu el a stima su Tata. El a obedesé su Tata te na e punto di entregá su bida. Abo lo sigui Hesus? Lo bo mustra mundu ku di bèrdat bo ta stima Yehova Dios?

19, 20. (a) Pa ki motibunan importante nos ke asistí ku regularidat na e reunionnan kristian? (b) Kon nos por mira nos estudio personal, meditashon i orashon?

¹⁹ Nos tin un nesesidat spiritual profundo pa demostrá tal amor. P’esei Yehova a hasi areglo pa nos ador’é na un manera ku nos ta nutri i fortalesé nos amor pa nos Tata. Ora bo ta asistí na reunionnan kristian, purba kòrda ku bo ta einan pa adorá bo Dios. Algun faseta di e adorashon ei ta entre otro hasi orashon sinsero huntu, kanta kantikanan di alabansa, skucha ku atenshon i partisipá ki ora ku ta posibel. Reunionnan asina ta duna bo tambe e oportunidat pa animá e otro rumannan kristian. (Hebreonan 10:24, 25) Si nos ta adorá Yehova ku regularidat na reunionnan kristian, esei lo yuda nos amor pa Dios bira mas i mas fuerte.

²⁰ Nos amor pa Dios lo bira mas fuerte tambe pa medio di estudio personal, meditashon i orashon. Mira e kosnan aki komo oportunidatnan pa bo ta bo so ku Yehova. Segun ku bo ta studia Dios su Palabra skirbí i ta meditá riba dje, Yehova ta transmitiendo su pensamentunan na bo. Segun ku bo ta hasi orashon, bo ta habriendo bo kurason na dje. Kòrda ku orashon ta enserá mas ku djis pidi Dios kos. Orashon ta tambe un oportunidat pa gradisí Yehova pa e bendishonnan ku bo a risibí i pa alab’é pa su obranan maravioso. (Salmo 146:1) Es mas, e mihó manera pa gradisí Yehova i pa mustr’é ku bo ta stim’é ta di alab’é públikamente ku goso i ku entusiasmo.

21. Kon importante amor pa Yehova ta, i kiko nos lo konsiderá den e kapítulonan ku ta sigui?

²¹ Amor pa Dios ta e faktor prinsipal ku por yuda bo alkansá felisidat eterno. Esei ta tur loke Adam ku Eva tabatin mester pa nan por tabata eksitoso, i ta nèt e kos ku nan no a kultivá. Amor pa Dios ta e kos di mas importante ku bo tin mester pa surpasá kualke prueba di fe, rechasá kualke tentashon i wanta kualke difikultat. Esei ta e faktor di mas importante di ser un siguidó di Hesus. Klaru ku amor pa Dios ta konektá ku amor pa nos próhimo. (1 Juan 4:20) Den e kapítulonan ku ta sigui, nos lo analisá kon Hesus a demostrá su amor pa hende. Den e siguiente kapítulo, nos lo konsiderá dikon asina tantu hende a haña Hesus aserkabel.