Kon Hende Por Duna Fruta i Bira Amigu di Hesus?

Hesus tabata papiando na un manera franko ku su fiel apòstelnan i tabata animando nan. Tabata lat, kisas despues di mei anochi. Hesus a kuminsá konta nan un ilustrashon masha konmovedor.

El a bisa: “Ami ta e berdadero mata di wendrùif, i mi Tata ta e kunukero.” (Huan 15:1) Su ilustrashon a duna un idea similar na loke a ser bisá hopi siglo promé tokante e nashon di Israel, esta, ku e nashon tabata Yehova su mata di wendrùif. (Yeremías 2:21; Oséas 10:1, 2) Pero Yehova a rechasá e nashon akí. (Mateo 23:37, 38) P’esei, Hesus a ilustrá e kambio ku a tuma lugá. Sí, desde aña 29 di promé siglo, Yehova a hasi Hesus e mata di wendrùif, ungiendo e ku spiritu santu. Pero manera Hesus a indiká siguientemente, e mata di wendrùif no a simbolisá e so. El a bisa:

“[Mi Tata] ta kita tur mi ramanan ku no ta duna fruta, i e ta snui tur ku ta duna fruta, pa nan por duna mas fruta. . . . Meskos ku e rama no por duna fruta di su mes si e no keda pegá na e mata, asina tambe boso no por duna fruta si boso no keda den union ku mi. Ami ta e mata di wendrùif; boso ta e ramanan.”—Huan 15:2-5.

Kòrda, Hesus a primintí su fiel disipelnan ku, despues ku e bai shelu, lo el a manda un ayudante pa nan, esta, spiritu santu. Anto 50 dia despues ku Hesus lo a ser resusitá, ora e apòstelnan i algun otro hende lo a haña spiritu santu, nan lo a bira rama di e mata di wendrùif. I tur e “ramanan” mester keda uní ku Hesus. Pa logra kiko?

Hesus a splika: “Esun ku keda den union ku mi i ami den union kuné, é ta esun ku ta duna hopi fruta; pasobra sin mi boso no por hasi nada.” E “ramanan” akí, esta, Hesus su fiel siguidónan, lo por duna hopi fruta. Kon nan por hasi esei? Imitando Hesus su kualidatnan, dunando testimonio zelosamente tokante e Reino di Dios i kumpliendo ku e trabou di hasi disipel. Awor, kiko si un disipel no keda den union ku Hesus i no ta duna fruta? Hesus a bisa: “Si un hende no keda den union ku mi, ta tir’é afó.” Di otro banda, Hesus a bisa: “Si boso keda den union ku mi i mi palabranan keda den boso kurason, boso por pidi kiko ku boso ke i boso lo haña esei.”—Huan 15:5-7.

Despues, Hesus a bolbe papia di algu ku el a menshoná dos biaha kaba, esta, e importansia di kumpli ku su mandamentunan. (Huan 14:15, 21) El a splika kon su disipelnan por duna prueba ku nan ta kumpli ku su mandamentunan. El a bisa: “Si boso ta kumpli ku mi mandamentunan, boso lo keda den mi amor, meskos ku ami a kumpli ku e mandamentunan di mi Tata i ta keda den su amor.” Pero Hesus su disipelnan mester hasi mas ku stima Yehova Dios i su Yu. Hesus a bisa: “Esaki ta mi mandamentu: stima otro meskos ku ami a stima boso. Ningun hende no tin un amor mas grandi ku esun ku ta entregá su alma pa su amigunan. Boso ta mi amigunan si boso ta hasi loke mi ta manda boso.”—Huan 15:10-14.

Despues di algun ora, Hesus lo a demostrá su amor, dunando su bida pa tur hende ku pone fe den dje. Su ehèmpel mester motivá tur su siguidónan pa demostrá mesun amor di sakrifisio propio na otro. Manera Hesus a bisa mas promé, e amor akí lo identifiká nan komo su disipel: “Na esaki tur hende lo sa ku boso ta mi disipelnan, esta, si boso ta stima otro.”—Huan 13:35.

E apòstelnan mester a ripará ku Hesus tabata yama nan “amigu.” Anto Hesus a bisa tambe pakiko nan tabata su amigu: “Mi a yama boso amigu, pasobra mi a laga boso sa tur kos ku mi a tende di mi Tata.” Sí, ta un gran privilegio pa ta amigu di Hesus i pa sa e kosnan ku e Tata a bis’é. Pero pa Hesus su disipelnan por mantené e amistat akí, nan mester “sigui duna hopi fruta.” Di e manera ei, nan lo haña kiko ku nan pidi e Tata den nòmber di Hesus, manera Hesus a primintí.—Huan 15:15, 16.

E amor ku e “ramanan,” esta, Hesus su disipelnan, tin pa otro lo yuda nan soportá tur loke nan lo konfrontá. Hesus a bisa ku mundu lo a odia su disipelnan. Pero na mes momento el a duna e siguiente konsuelo: “Si mundu ta odia boso, boso sa ku el a odia ami promé ku el a odia boso. Si boso tabata parti di mundu, mundu lo a stima boso, pasobra boso lo tabata di dje. Awor, komo ku boso no ta parti di mundu, . . . pa e motibu akí mundu ta odia boso.”—Huan 15:18, 19.

Hesus a sigui splika dikon mundu lo a odia su disipelnan. El a bisa: “Nan lo hasi tur e kosnan akí kontra boso pa motibu di mi nòmber, pasobra nan no konosé Esun ku a manda mi.” Hesus a indiká ku e echo ku e hendenan ku tabata odi’é a mira e milagernan ku el a hasi a kondená nan. El a bisa: “Si mi no a hasi meimei di nan e obranan ku ningun otro hende a hasi, nan lo no tabata kulpabel di piká; ma awor nan a mira mi obranan, i nan ta odia tantu ami komo mi Tata.” Bon mirá, e echo ku nan tabata odia Hesus tabata kumplimentu di profesia.—Huan 15:21, 24, 25; Salmo 35:19; 69:4.

Hesus a bolbe primintí su disipelnan ku lo el a manda un ayudante pa nan: spiritu santu. E forsa poderoso akí lo ta disponibel pa tur siguidó di Hesus i lo yuda nan “duna testimonio,” òf duna fruta.—Huan 15:27.