E Spiritu Santo—Dios Su Forza Activo

SEGUN e doctrina di Trinidad, e spiritu santo ta e di tres persona di un divinidad, igual cu e Tata i cu e Yu. Manera e buki Our Orthodox Christian Faith ta bisa: “E Spiritu Santo ta completamente Dios.”

Den e Scritura Hebreo, e palabra mas frecuentemente usá pa “spiritu” ta ruʹach, nificando “rosea; biento; spiritu.” Den e Scritura Griego, e palabra ta pneuʹma, teniendo un nificacion similar. E palabranan aki ta indicá cu e spiritu santo ta parti di un Trinidad?

Un Forza Activo

E BIJBEL su uso di “spiritu santo” ta indicá cu e ta un forza controlá cu Jehova Dios ta usa pa cumpli cu un variedad di su propósitonan. Te na un cierto grado, e por ser compará cu coriente, un forza cu por ser adaptá pa haci un gran variedad di operacion.

Na Génesis 1:2 e Bijbel ta bisa cu “Dios su forza activo [“spiritu” (hebreo, ruʹach)] tabata move bai bini riba e superficie dje awa.” Aki, Dios su spiritu tabata su forza activo trahando pa duna forma na e tera.

Dios ta usa su spiritu pa iluminá esnan cu ta sirbi’é. David a pidi den oracion: “Siñá mi pa haci bo boluntad, pasobra abo ta mi Dios. Bo spiritu [ruʹach] ta bon; cu e por guiá mi den e tera di rectitud.” (Salmo 143:10) Ora 70 homber capaz a ser nombrá pa yuda Moises, Dios a bis’é: “Lo mi tin cu kita algo dje spiritu [ruʹach] cu tin riba bo i poné riba nan.”—Número 11:17.

Profecia di Bijbel a ser skirbí ora hombernan di Dios a ser “hibá pa spiritu santo [griego, dje palabra pneuʹma].” (2 Pedro 1:20, 21) Den e manera aki e Bijbel tabata “inspirá pa Dios,” e palabra griego pa esei ta The·oʹpneu·stos, nificando “Dios a respirá.” (2 Timoteo 3:16) I spiritu santo a guia algun persona pa mira visionnan of pa haña soñonan profético.—2 Samuel 23:2; Joel 2:28, 29; Lucas 1:67; Echo 1:16; 2:32, 33.

E spiritu santo a impulsá Jesus pa bai den e desierto despues di su bautismo. (Marco 1:12) E spiritu tabata manera un candela den Dios su sirbidornan, causando nan di ta yen di energia dor dje forza ei. I el a capacitá nan pa papia cu frankeza i curashi.—Miqueas 3:8; Echo 7:55-60; 18:25; Romano 12:11; 1 Tesalonicense 5:19.

Pa medio di su spiritu, Dios ta cumpli cu su huicio riba hombernan i nacionnan. (Isaias 30:27, 28; 59:18, 19) I Dios su spiritu por yega tur caminda, actuando na fabor di hende of contra nan.—Salmo 139:7-12.

‘Poder Mas Ayá di Loke Ta Normal’

DIOS su spiritu por suministrá tambe “poder mas ayá di loke ta normal” na esnan cu ta sirbi’é. (2 Corintio 4:7) Esaki ta capacitá nan pa soportá pruebanan di fe of pa haci cosnan cu di otro manera nan lo no tabata por a haci.

Por ehempel, encuanto Sámson, Huez 14:6 ta relatá: “E spiritu di Yahweh a poderá di dje, i aunke e no tabatin arma den su man el a sker e leon na pida pida.” (JB) Ta un persona divino realmente a drenta den of a poderá di Sámson, manipulando su curpa pa haci loke el a haci? No, tabata realmente “e poder dje SEÑOR [cu] a haci Sámson fuerte.”—TEV.

E Bijbel ta bisa cu ora Jesus tabata bautisá, spiritu santo a baha riba dje den forma di un palomba, no den un forma humano. (Marco 1:10) E forza activo di Dios aki a capacitá Jesus pa cura e enfermonan i lanta e mortonan. Manera Lucas 5:17 ta bisa: “E Poder dje Señor [Dios] tabata tras di su [Jesus] obranan di curacion.”—JB.

Dios su spiritu a duna poder tambe na Jesus su disipelnan pa haci cosnan milagroso. Echo 2:1-4 ta relatá cu e disipelnan tabata reuní hunto na Pentecoste ora cu “di ripiente a sosodé for di cielo un sonido net manera di un coriente di biento fuerte, . . . i nan tur a ser yená cu spiritu santo i a cuminzá papia den diferente lenga, net manera e spiritu tabata permití nan pa haci expresion.”

Asina cu e spiritu santo a duna Jesus i otro sirbidornan di Dios e poder pa haci loke humanonan normalmente no por a haci.

No un Persona

NO TIN, sin embargo, versículonan di Bijbel cu ta papia dje spiritu santo den sentido di un persona? Sí, pero nota loke teólogo católico Edmund Fortman ta bisa tocante esaki den The Triune God: “Aunke e spiritu aki ta ser describí hopi bez cu términonan di un persona, ta parce masha claro cu e skirbidornan sagrado [dje Scritura Hebreo] nunca a comprendé of presentá e spiritu aki como un persona distinto.”

Den e Scritura no ta straño pa algo ser personificá. Ta ser bisá di sabiduria cu e tin yunan. (Lucas 7:35) Picá i morto ta ser yama reynan. (Romano 5:14, 21) Na Génesis 4:7 The New English Bible (NE) ta bisa: “Picá ta un demoño di bik na e porta,” personificando picá como un spiritu malbado di bik na Cain su porta. Pero, naturalmente, picá no ta un persona spiritual; ni tampoco personificando e spiritu santo ta haci’é un persona spiritual.

Di igual manera, na 1 Juan 5:6-8 (NE) no solamente e spiritu pero tambe “e awa, i e sanger” ta ser bisá di ta “testigonan.” Pero awa i sanger claramente no ta personanan, i e spiritu santo tampoco no ta un persona.

Na armonia cu esaki ta e uso general den e Bijbel dje “spiritu santo” den un manera impersonal, tal como comparando e cu awa i candela. (Mateo 3:11; Marco 1:8) Hende ta ser instá pa ser yená cu spiritu enbez di cu biña. (Efesio 5:18) Hende ta ser bisá di ta yená cu spiritu santo di e mésun manera cu nan ta ser yená cu cualidadnan tal como sabiduria, fe i gozo. (Echo 6:3; 11:24; 13:52) I na 2 Corintio 6:6 spiritu santo ta ser incluí entre un cantidad di cualidadnan. Tal expresionnan lo no tabata asina comun si e spiritu santo realmente tabata un persona.

Anto, tambe, mientras cu algun texto di Bijbel ta bisa cu e spiritu ta papia, otro textonan ta mustra cu esaki realmente tabata hací mediante hende humano of angel. (Mateo 10:19, 20; Echo 4:24, 25; 28:25; Hebreo 2:2) E accion dje spiritu den tal casonan ta manera ondanan di radio transmitiendo mensahenan for di un persona pa un otro persona leu ayá.

Na Mateo 28:19 referencia ta ser hací na “e nomber . . . dje spiritu santo.” Pero e palabra “nomber” no ta nificá semper un nomber personal, ni den griego ni na papiamento. Ora nos bisa “den nomber di ley,” nos no ta refiriendo na un persona. Nos kier men e loke e ley ta representá, su autoridad. Word Pictures in the New Testament di Robertson ta bisa: “E uso di nomber (onoma) aki ta uno comun den e Version Setenta i manuscritonan pa nificá poder of autoridad.” Pues bautismo ‘den e nomber dje spiritu santo’ ta reconocé e autoridad dje spiritu, cu e ta bini di Dios i ta funcioná pa boluntad divino.

E “Yudante”

JESUS a papia dje spiritu santo como un “yudante,” i el a bisa cu e spiritu santo lo siña, guia i papia. (Juan 14:16, 26; 16:13) E palabra griego cu el a usa pa yudante (pa·raʹkle·tos) ta un palabra masculino. Pues ora Jesus a referí na loke e yudante lo haci, el a usa pronomber personal masculino. (Juan 16:7, 8) Na otro banda, ora e palabra griego pa spiritu (pneuʹma) cu ta un palabra neutral (ni masculino ni femenino) ta ser usá, e pronomber neutral “het” na hulandes ta ser usá (na ingles “it”).

Mayoria traductor trinitario ta sconde e echo aki, manera e New American Bible católico ta admití tocante Juan 14:17: “E palabra griego pa ‘Spiritu’ ta neutral, i mientras cu nos ta usa pronomber personal na ingles (‘he,’ ‘his,’ ‘him’) [na hulandes ‘hij,’ ‘zijn,’ ‘hem’], mayoria MSS [manuscritonan] griego ta usa na ingles ‘it’ [na hulandes ‘het’].”

Pues ora e Bijbel ta usa pronomber personal masculino en coneccion cu pa·raʹkle·tos na Juan 16:7, 8, e ta cumpli cu reglanan di gramática, no expresando un doctrina.

No Ta Parti di un Trinidad

VARIOS fuente ta reconocé cu e Bijbel no ta apoyá e idea cu e spiritu santo ta e di tres persona di un Trinidad. Por ehempel:

The Catholic Encyclopedia: “Ningun caminda den e Testament Bieu nos ta haña cualkier indicacion claro di un Tercer Persona.”

Teólogo católico Fortman: “E hudionan nunca a mira e spiritu como un persona; tampoco tin cualkier evidencia sólido cu cualkier skirbidor di e Testament Bieu tabatin e punto di bista aki. . . . E Spiritu Santo ta ser presentá generalmente den e Sinópticonan [Evangelionan] i den Echonan como un forza divino of poder.”

E New Catholic Encyclopedia: “E T[estament] B[ieu] claramente no ta representá Dios su spiritu como un persona . . . Dios su spiritu ta simplemente Dios su poder. Si tin bez e ta ser representá como siendo distinto di Dios, ta pasobra e rosea di Yahweh ta actua pafó di dje.” Tambe e ta bisa: “E mayoria di textonan dje T[estament] N[obo] ta revelá Dios su spiritu como un cos, no un persona; esaki ta ser mirá specialmente den e paralelo dje spiritu i e poder di Dios.”—Letter cursivo ta di nos.

A Catholic Dictionary: “En general, e Testament Nobo, mescos cu e Bieu, ta papia dje spiritu como un energia of poder divino.”

Pues anto, ni e hudionan ni e cristiannan di promé a mira e spiritu santo como parti di un Trinidad. E siñanza ei a bini siglonan despues. Manera A Catholic Dictionary ta mencioná: “E di tres Persona a ser afirmá na e Concilio di Alehandria na aña 362 . . . i finalmente pa e Concilio di Constantinopel di aña 381”—un tres siglo i mei despues cu e spiritu santo a yena e disipelnan na Pentecoste!

No, e spiritu santo no ta un persona i e no ta parti di un Trinidad. E spiritu santo ta Dios su forza activo cu e ta usa pa cumpli cu su boluntad. E no ta igual cu Dios pero e ta semper na su disposision i sumiso na dje.

[Komentario na página 22]

“En general, e Testament Nobo, mescos cu e Bieu, ta papia dje spiritu como un energia of poder divino.”—A Catholic Dictionary

[Plachi na página 21]

Na un ocasion e spiritu santo a aparecé den forma di un palomba. Na un otro ocasion el a aparecé den forma di lenga di candela—nunca den forma di un persona