Kon Nos Por Gana Konosementu di Dios?

Tin hende ta duda ku dios ta realmente interesá den revelá su mes na hende. pero si e ta revelando su mes, kon e ta hasié?

E REFORMADÓ protestant di siglo 16, Johannes Calvijn, korektamente a konkluí ku hende riba su mes no por konosé Dios si Dios no revelá su mes na humanidat. Sin embargo, tin hende ta puntra nan mes si Dios ta realmente interesá den revelá su mes na hende. I si e ta interesá, kon e ta revelando su mes?

Yehova, e Magnífiko “Kreadó,” tin un motibu pa tur kos ku e ta hasi. Tambe, komo “Dios Todopoderoso,” e ta plenamente kapasitá pa kumpli ku su propósito. (Eklesiastés 12:1; Eksodo 6:3) Nos por tin sigur ku e tabata dispuesto pa revelá su propósito na hende, pasobra su profeta Amos a ser inspirá pa skirbi: “SEÑOR Dios no ta hasi nada, sin ku e revelá su konseho sekreto na su sirbidónan, e profetanan.” Pero tuma nota ku Beibel ta bisa ku Dios ta revelá su propósito solamente na su sirbidónan, esnan ku sinseramente ta stim’é. Esei ta lógiko, no? Na ken abo ta revelá bo asuntunan konfidensial? Na ken ku ta òf na bo amistatnan di mas íntimo?—Amos 3:7; Isaias 40:13, 25, 26.

Dios su sabiduria i konosementu ta yena personanan humilde ku rèspèt profundo i atmirashon, i esei ta na su lugá. Sin embargo, pa nos benefisiá personalmente di sabiduria i konosementu divino nos mester di mas ku djis un sintimentu di rèspèt profundo i atmirashon. Beibel ta enfatisá ku pa siña konosé e pensamentunan di Dios, nos mester tin un kurason humilde: ‘Warda mi mandamentunan den bo. Hasi bo orea atento na sabiduria. Inkliná bo kurason na komprondementu. Sklama pa disernimentu i halsa bo bos pa komprondementu. Sigui busk’é manera plata.’—Proverbionan 2:1-4.

Un persona humilde ku ta hasi e tipo di esfuerso aki, sigur lo por siña konosé Dios. E pasashi ei den e buki di Proverbionan ta sigui bisa: “[Yehova] ta duna sabiduria; for di su boka ta sali konosementu i komprondementu.” Sí, personanan ku sinseramente ta buska e bèrdat por komprondé òf “diserní hustisia i huisio, i rektitut, sí, tur bon kaminda.”—Proverbionan 2:6-9.

En Buska di e Bèrdat

The Encyclopedia of Religion ta deklará: “Bida humano ta ser karakterisá pa e nesesidat di distinguí entre loke ta real i ireal, poderoso i impotente, berdadero i engañoso, puru i kontaminá, bon kla i konfuso, i tambe di distinguí asuntunan ku no ta bon kla definí riba tereno di étika.” Pa satisfasé e nesesidat aki, hende tin hopi tempu ta buska e bèrdat. Te na e grado ku kada persona a akudí na Yehova—kende e salmista ta yama e “Dios di bèrdat”—den nan búskeda, te na e grado ei nan a hasi progreso den haña e bèrdat.—Salmo 31:5, BPK.

E nòmber Yehova literalmente ta nifiká “E Ta Kousa pa Bira.” (Génesis 2:4, NW, nota na pia di página) Pues, asta e nifikashon di Dios su nòmber ta dirigí atenshon na su posishon komo Kreadó i na su propósito. De echo, un di e karakterístikanan di e religion berdadero ta ku su miembronan konosé e nòmber Yehova i ta us’é. Hesus klaramente a rekonosé e echo aki. Refiriendo na su siguidónan, el a bisa Dios den orashon: “Mi a hasi bo nòmber konosí na nan i lo mi hasié konosí, pa e amor ku kual bo a stima mi por ta den nan i ami den nan.”—Juan 17:26.

Ora ku Hosé, un hebreo di antigwedat, a hañ’é konfrontá ku e tarea di revelá e nifikashon di soñonan, el a dependé riba su amistat ku Dios i a bisa ku konfiansa: “Interpretashon no ta Dios su asuntu?”—Génesis 40:8; 41:15, 16.

Vários siglo despues, Rei Nabukodonosor di Babilonia a soña algu ku su hòmbernan sabí no por a interpretá. Profeta Daniel a bisa e rei: “Tin un Dios den shelu ku ta revelá misterio, i el a hasi konosí na Rei Nabukodonosor kiko lo sosodé den e último dianan.”—Daniel 2:28.

E ehèmpel di Hosé i di Daniel ta mustra ku e sabiduria i konosementu di Dios ta disponibel solamente pa esnan ku ta sirbi Yehova Dios. Klaru ku pa nos gana Dios su aprobashon, esei kisas ta enserá ku nos mester legumai puntonan di bista ku nos tabatin anteriormente. Hudiunan di promé siglo ku a bira kristian mester a hasi netamente esei. Komo ku for di chikí nan a siña respetá i obedesé e leinan establesé bou di e sistema di kosnan hudiu, nan tabatin mester di tempu pa aseptá Hesus komo e Mesias. El a bin pa kumpli ku e Lei di Moisés, un Lei ku a sirbi komo “un sombra di e bon kosnan ku ta bin.” (Hebreonan 10:1; Mateo 5:17; Lukas 24:44, 45) E Lei di Moisés ei a ser remplasá pa “e lei di Kristu,” ku ta hopi mas superior.—Galationan 6:2; Romanonan 13:10; Santiago 2:8.

Nos tur a nase den un mundu alehá for di Dios. Debí na piká ku nos a heredá di e promé pareha humano, nos a nase den enemistat ku Dios, i sin un konosementu eksakto di su propósito. Tambe nos a heredá un kurason engañoso. (Jeremias 17:9; Efesionan 2:12; 4:18; Kolosensenan 1:21) Pa nos haña e amistat di Dios, nos tin ku siña imitá Dios su manera di pensa. Esei no ta nada fásil.

Kisas ta difísil pa legumai ideanan òf práktikanan religioso falsu, foral si esakinan a ser inkulká den nos for di infansia. Pero ta sabí pa sigui den e kaminda robes? Klaru ku nò! Definitivamente ta mas sabí pa kambia bo manera di pensa i asina haña e aprobashon di Dios.

Kon pa Identifiká Dios Su Kanal di Instrukshon

Unda nos por haña yudansa pa komprondé e Palabra di e bèrdat i pa despues biba di akuerdo kuné? Den Israel di pasado, Dios a pone personanan leal i di konfiansa den puestonan di responsabilidat pa dirigí e nashon. Kristu, e Kabes di e kongregashon kristian djawe, di igual manera ta guia esnan ku sinseramente ta buska e bèrdat. E ta hasi esei mediante su siguidónan leal i di konfiansa, kendenan ta forma e kanal ku ta responsabel pa dirigí i protehá buskadónan sinsero di e bèrdat. (Mateo 24:45-47; Kolosensenan 1:18) Pero kon bo por identifiká Dios su kanal di instrukshon?

Berdadero siguidónan di Hesukristu ta hasi esfuerso pa reflehá e mesun kualidatnan ku el a desplegá komo hende. Den un mundu ku ta birando mas i mas malbado, ta fásil pa identifiká e siguidónan aki segun ku nan ta desplegá kualidatnan spiritual úniko. (Wak e kuadro na página 6.) Abo ta mira e kualidatnan aki den e religion na kua bo ta afiliá òf den e religionnan di bo bisiñanan? Lo ta bale la pena pa investigá e asuntu aki ku yudansa di Beibel.

Nos ta invitá bo, nos lektor, pa hasi esei mediante un estudio di Beibel. Aña pasá, un promedio di mas ku 6.000.000 persona den 235 pais a probechá di e areglo aki pa studia Beibel ku Testigunan di Yehova. Gana sabiduria i konosementu di Dios ta un aktividat kontinuo, satisfasiente i rekompensador. Pakiko no kuminsá ku e trayekto di gana e sabiduria i konosementu di Dios? Ta un trayekto ku nunka lo bo lamentá di a kuminsá kuné. Sí, nos realmente por siña konosé Dios.

[Kuadro na página 6]

HENDE KU TA TRAHA NA ARMONIA KU DIOS . . .

ta keda neutral den konfliktonan polítiko.—Isaias 2:4.

ta produsí bon fruta hasiendo e boluntat di Dios.—Mateo 7:13-23.

ta desplegá berdadero amor entre nan mes.—Juan 13:35; 1 Juan 4:20.

ta papia di ún akuerdo tur kaminda. —1 Korintionan 1:10.

no ta imitá mal aktitut i kondukta di e mundu rònt di nan.—Juan 17:16.

ta duna testimonio di e bèrdat i ta hasi disipel.—Mateo 24:14; 28:19, 20.

ta gusta reuní huntu regularmente pa enkurashá otro.—Hebreonan 10:25.

ta alabá Dios komo un grupo internashonal.—Revelashon 7:9, 10.

[Plachi na página 7]

Nos por gana konosementu di Dios individualmente, komo famia i komo kongregashon