“Vigilá Contra e Zuurdeeg dje Fariseo i Saduceonan”

ORA Jesucristo a expresá e palabranan ei mas cu 19 siglo pasá, e tabata alertando su disipelnan contra siñansa i prácticanan religioso perhudicial. (Mateo 16:6, 12) E relato na Marco 8:15 ta specificá: “Tene cuidou cu e zuurdeeg dje fariseonan i e zuurdeeg di Herodes.” Pakico Herodes a ser mencioná? Pasobra algun dje saduceonan tabata herodiano, un grupo político.

Pakico un spiertamentu asina special tabata necesario? Tantu e fariseonan como e saduceonan no tabata opositornan abierto di Jesus? (Mateo 16:21; Juan 11:45-50) Sí, nan tabata. Tog, algun di nan despues a aceptá cristianismo i a purba imponé e ora ei nan ideanan riba e congregacion cristian.—Echonan 15:5.

Tabatin tambe e peliger cu e disipelnan mes por a imitá e lidernan religioso ei bou di kende nan influencia nan a ser lantá. Algun biaha, e solo echo cu nan a bini di un antecedencia asina a resultá di ta un obstáculo pa nan capta e sentido di Jesus su siñansanan.

Kico a haci e doctrina i prácticanan fariseo i saduceo asina peligroso? Un bistaso n’e condicionnan religioso den tempu di Jesus lo duna nos un idea.

Desunion Religioso

Relacioná cu e comunidad hudiu durante e promé siglo E.C., historiador Max Radin a skirbi: “E independencia dje congregacionnan hudiu di un for dje otro berdaderamente a existí, i asta nan a insistí riba dje. . . . Hopi biaha, ora e reverencia p’e tempel i e stad santu tabata mas fuertemente enfatisá, desprecio intenso por a ser manifestá pa esnan cu n’e momento ei tabata e gobernantenan den e pais madre.”

Un situacion spiritual tristu en berdad! Kico tabata algun factor cu a contribuí na esei? No tur hudiu tabata biba na Palestina. E influencia di cultura griego, den cua sacerdotenan no tabata lidernan di comunidad, a contribuí na debilitá respet pa Jehova su areglo dje sacerdocio. (Exodo 28:29; 40:12-15) Tampoco mester pasa por haltu dje laiconan educá i e escribanan.

E Fariseonan

E nomber fariseonan, of peru·shimʹ, probablemente a nificá “esnan separá.” Fariseonan a considerá nan mes como siguidor di Moises. Nan a forma nan mes liga, of fraternidad (hebreo, chavu·rahʹ). Pa por a ser admití como miembro, un persona mester a primintí dilanti tres miembro observancia estricto di puresa levítico, evitacion di asociacion estrecho cu e ʽam-ha·ʼaʹrets (e multitud sin educacion), i pagamentu puntual di diesmo. Marco 2:16 ta papia di “e escribanan dje fariseonan.” Algun dje fariseonan aki tabata escriba i maestronan profesional, miéntras cu otronan tabata laiconan.—Mateo 23:1-7.

E fariseonan a kere den un Dios omnipresente. Nan a razoná cu ya cu “Dios tabata tur caminda, E por a ser adorá tantu paden como pafó dje Tempel, i no mester a ser inbocá mediante sacrificionan so. Asina nan a promové e snoa como un lugá di adoracion, studio i oracion, i a elev’é na un lugá central i importante den e bida dje hendenan, algu cu a competí cu e Tempel.”—Encyclopaedia Judaica.

E fariseonan a falta aprecio pa Jehova su tempel. Esaki por ser mirá for dje palabranan di Jesus: “Ai di boso guianan ciegu, cu ta bisa, ‘Si un hende hura p’e tempel, esei no ta nada; pero si un hende hura p’e oro dje tempel, e ta bou di obligacion.’ Hendenan bobo i ciegu! Cua realmente ta mayor, e oro of e tempel cu a santificá e oro? Tambe, ‘Si un hende hura p’e altar, esei no ta nada; pero si un hende hura p’e ofrenda riba dje, e ta bou di obligacion.’ Ciegunan! Cua realmente ta mayor, e ofrenda of e altar cu ta santificá e ofrenda? P’esei, ken cu hura p’e altar ta hura p’e i pa tur loke tin riba dje.”—Mateo 23:16-20.

Con e fariseonan por a bira asina trocí den nan razonamentu? Kico nan tabata pasando por haltu? Nota loke Jesus ta bisa siguientemente. “I ken cu hura p’e tempel ta hurando p’e i pa esun cu ta habitando e.” (Mateo 23:21) Relacioná cu e versículo aki, escolástico E. P. Sanders a comentá: “E tempel tabata santu no solamente pasobra e Dios santu tabata ser adorá ei, sino tambe pasobra e tabata ei.” (Judaism: Practice and Belief, 63 BCE—66 CE) Sin embargo, Jehova su presencia special lo no tabatin masha nificacion pa esnan cu a pensa cu e tabata tur caminda.

E fariseonan a kere tambe den un combinacion di predestinacion i boluntad liber. Cu otro palabra, “tur cos ta ser predestiná, tog, boluntad liber ta ser duná.” No obstante, nan a kere cu Adam i Eva a ser predestiná pa peca i cu asta un cortá menor na dede ta ser predestiná.

Jesus por tabatin e ideanan falsu ei na mente ora el a papia tocante e derumbe di un toren cu a resultá den 18 morto. El a puntra: “Boso ta kere cu [e víctimanan] a resultá di ta mayor debedornan cu tur otro hende bibando den Jerusalem?” (Lucas 13:4) Mescos cu ta e caso cu mayoria accidente, esaki tabata e resultado di “tempu i suceso imprevisto,” no destino manera e fariseonan a siña. (Eclesiastes 9:11) Con tal hendenan cu supuestamente tabatin conocimentu lo a trata cu mandamentunan bíblico?

Nan Tabata Inovadornan Religioso

Segun e fariseonan mandamentunan bíblico tabatin cu ser interpretá dor dje rabinan di cada generacion conforme cu e último informacion disponibel. Pues, e Encyclopaedia Judaica ta bisa cu nan “no a haña gran dificultad pa armonisá e siñansanan di Tora cu nan ideanan avansá, of pa haña nan ideanan implicá of indicá indirectamente den e palabranan dje Tora.”

En cuanto e Dia di Reconciliacion anual, nan a transferí e poder di haci reconciliacion pa picá for di e sumo sacerdote p’e dia mes. (Levítico 16:30, 33) N’e celebracion di Pascu, nan a pone mas énfasis riba e contamentu dje lesnan dje relato di Exodo riba biña i matzo [pan sin zuurdeeg] cu riba e lamchi di pascu.

Cu tempu e fariseonan a cuminsá haña influencia den e tempel. Nan a instituí e ora ei un procesion cu a enbolbé e cargamentu di awa for dje tanki di Siloam i un ofrenda di bashamentu di dje durante e Festival di Recogementu, i tambe batimentu di palu di ‘wilg’ riba e altar n’e conclusion dje festival, i oracion regular diario cu no tabatin base den e Ley.

“Specialmente significante” tabata “e inovacionnan dje fariseonan en coneccion cu e Sabat,” segun The Jewish Encyclopedia. Un esposa mester a ricibí e Sabat cendiendo lampinan. Si a parce cu cierto actividad por a hiba na labor ilegal, e fariseonan a prohibi’é. Nan asta a bai asina leu pa regulá tratamentu médico i a expresá iritacion riba Jesus su curacion milagroso riba Sabat. (Mateo 12:9-14; Juan 5:1-16) Sin embargo, e inovadornan religioso aki no a stop di establecé institucionnan nobo den un intento pa crea un tranké of curá, p’e proteccion di leynan bíblico.

Anulacion

E fariseonan a pretendé di tin autoridad pa suspendé of abolí leynan bíblico. Nan razonamentu ta ser reflehá den un proverbio talmúdico: “Ta mihó pa un solo ley ser abolí cu pa henter e Tora ser lubidá.” Un ehempel tabata e descontinuacion dje Hubileo a base cu debí na temor di perde su derecho segun cu e periodo ei tabata acercá, ningun hende lo a fia n’e pobernan.—Levítico, capítulo 25.

Otro ehempelnan ta e anulacion dje huicio contra un muher cu ta ser sospechá di adulterio i den e caso di un asesinato no-solucioná, e suspension dje procedura di reconciliacion. (Númeronan 5:11-31; Deuteronomio 21:1-9) Tabata solamente un cuestion di tempu promé cu e fariseonan a anulá e rekisito bíblico di percurá pa mayornan den necesidad.—Exodo 20:12; Mateo 15:3-6.

Jesus a spierta: “Vigilá contra e zuurdeeg dje fariseonan, locual ta hipocresia.” (Lucas 12:1) E doctrina i prácticanan fariseo, cu su actitudnan no-teocrático, no por tabata nada otro cu hipocresia—definitivamente algu pa keda leu for dje congregacion cristian. No obstante, obranan di referencia hudiu ta presentá e fariseonan den un lus mas faborabel cu nan ta haci cu e saduceonan. Laga nos considerá awor e grupo mas conservativo aki.

E Saduceonan

E nomber saduceonan posiblemente a ser tumá for di Zadok, sumo sacerdote den e dianan di Sálomon. (1 Reynan 2:35, nota) E saduceonan a forma un partido conservativo representando e interesnan dje tempel i sacerdocio. Na contraste cu e fariseonan, kendenan a pretendé di tin autoridad mediante birtud di siñamentu i reverencia, e saduceonan a basa nan prerogativa riba genealogia i posicion. Nan a oponé inovacionnan fariseo te n’e destruccion dje tempel na 70 E.C.

Ademas di rechasá predestinacion, e saduceonan a nenga di aceptá cualkier siñansa no explícitamente mencioná den e Pentateuco, asta si el a ser declará otro caminda den e Palabra di Dios. En realidad, nan “a consider’é un birtud pa discutí” riba e asuntunan aki. (The Jewish Encyclopedia) Esaki ta haci nos corda e ocasion ora nan a desafiá Jesus tocante e resureccion.

Usando e ilustracion dje biuda di siete esposo, e saduceonan a puntra: “Den e resureccion, di cua dje sietenan lo e ser esposa?” Naturalmente, e biuda hipotético ei cu e saduceonan a mencioná por wel tabatin 14 of 21 esposo. Jesus a splica: “Den e resureccion ni homber ta casa ni muher ta ser duná den matrimonio.”—Mateo 22:23-30.

Conciente dje saduceonan su rechaso di escritornan inspirá cu no ta Moises, Jesus a proba Su punto dor di cita for di e Pentateuco. El a bisa: “En cuanto e mortonan, cu nan ta ser lantá, boso no a lesa den e buki di Moises, den e relato tocante e mata di sumpiña, con Dios a bis’é, ‘Mi ta e Dios di Abraham i Dios di Isaac i Dios di Jacob’? E ta un Dios, no dje mortonan, sino dje bibunan.”—Marco 12:26, 27.

Persiguidornan di Jesus i Su Siguidornan

E saduceonan a kere den uso di política pa tratu cu otro nacionnan en bes di warda riba e Mesías—si nan a kere mes den su binimentu. Bou di un acuerdo cu Roma, nan tabatin encargo pa manehá e tempel i no tabata kier pa ningun Mesías aparecé riba e esena, strobando asuntunan. Mirando Jesus como un menasa pa nan posicion, nan a uni forsa cu e fariseonan pa planea su morto.—Mateo 26:59-66; Juan 11:45-50.

Siendo políticamente orientá, e saduceonan lógicamente a haci lealtad na Roma un cuestion i a grita: “Nos no tin otro rey sino César.” (Juan 19:6, 12-15) Despues di Jesus su morto i resureccion, tabata e saduceonan cu a hiba delantera den purba stop e plamamentu di cristianismo. (Echonan 4:1-23; 5:17-42; 9:14) Despues dje destruccion dje tempel na 70 E.C., e grupo aki a stop di existí.

E Necesidad pa Permanecé Alerto

Ki apropiado Jesus su spiertamentu a resultá di ta! Sí, nos mester “vigilá contra e zuurdeeg dje fariseo i saduceonan.” Bo tin cu solamente ripará su mal fruta den tantu e pueblo hudiu como cristiandad awe.

Sin embargo, na contraste skerpi, ancianonan cristian cualificá den mas cu 75.500 congregacion di Testigonan di Jehova rond mundu ‘ta presta atencion constante na nan mes i na nan siñamentu.’ (1 Timoteo 4:16) Nan ta aceptá henter e Bijbel como inspirá di Dios. (2 Timoteo 3:16) En bes di ser inovativo i promové nan mes proceduranan religioso, nan ta traha unídamente bou dje direccion di un organisacion basá riba Bijbel cu ta usa e revista aki como su instrumento principal di instruccion.—Mateo 24:45-47.

E resultado? Miyones di hende rond mundu ta ser elevá spiritualmente segun cu nan ta yega na comprendé Bijbel, ta aplik’é den nan bida i ta siñ’é na otronan. Pa mira con esaki ta ser lográ, pakico no bishitá e congregacion mas cercano di Testigonan di Jehova of skirbi n’e publicadornan dje revista aki?

[Kuadro na página 26]

JESUS A TUMA SU AUDITORIO NA CUENTA

JESUCRISTO a siña cu claridad, teniendo cuenta cu e ideanan di su oyentenan. Por ehempel, el a haci esei ora el a papia cu e fariseo Nicodemo tocante e asuntu di “nace” di nobo. Nicodemo a puntra: “Con un hende por nace ora e ta bieu? E no por drenta den matris di su mama pa un di dos biaha i nace, no ta berdad?” (Juan 3:1-5) Pakico Nicodemo a keda asina confundí, siendo cu e fariseonan a kere cu renacementu tabata necesario pa combertí na hudaismo, i un dicho rabínico a compará esnan combertí cu “un mucha cu a nace di nobo”?

A Commentary on the New Testament From the Talmud and Hebraica, dor di John Lightfoot, ta ofrecé e siguiente comprendimentu: “E opinion comun dje hudiunan tocante e cualificacion di un israelita . . . ainda ta pegá den mente dje fariseo aki” kende no por “eliminá fácilmente su prehuicio inicial . . . : ‘Miéntras e israelitanan . . . tin un derecho pa ser admití den e reino dje Mesías, bo kier men anto cu e expresion di bo aki, cu ta necesario pa un hende drenta pa un di dos biaha den matris di su mama, p’e por ta un israelita di nobo?’ ”—Compará cu Mateo 3:9.

Aunke Nicodemo a reconocé un nacementu nobo pa esnan combertí, el a mira un proceso asina como imposibel pa hudiu natural—bolbe drenta den e matris na moda di papia.

Na un otro ocasion, hopi hende a keda ofendí ora Jesus a papia di ‘come su carni i bebe su sanger.’ (Juan 6:48-55) Sin embargo, Lightfoot ta splica cu “no tabatin nada mas comun den e scolnan dje hudiunan cu e frasenan di ‘come i bebe’ den un sentido figurativo.” Tambe el a skirbi cu e Talmud a mencioná “comiendo e Mesías.”

Pues dje manera ei e punto di bista dje fariseo i saduceonan tabatin bastante efecto riba pensamentu dje hudiunan di promé siglo. Sin embargo, apropiadamente, Jesus semper a tene cuenta cu e conocimentu i experencia di su auditorio. Esaki tabata un dje hopi factornan cu a haci’é e Gran Maestro.