Hesus Su Orashon Final den e Kamber Ariba

Hesus tabata stima su apòstelnan inmensamente. P’esei el a prepará nan pa su despedida, ku tabata djis tras di porta. Siguientemente, el a hisa su kara na shelu i a hasi orashon na su Tata: “Tata . . . glorifiká bo yu, pa bo yu por glorifiká bo, pa asina, meskos ku bo a dun’é outoridat riba tur hende, e por duna tur esnan ku bo a dun’é bida eterno.”—Huan 17:1, 2.

Ku e palabranan ei, Hesus a mustra bon kla ku e kos di mas importante ta pa duna gloria na Dios. I e speransa di biba pa semper ku el a menshoná ta realmente un gran konsuelo! Sí, komo ku Hesus a haña “outoridat riba tur hende,” e por duna nan e oportunidat di disfrutá di tur e benefisionan ku su reskate ta trese kuné. Pero ta algun hende so lo disfrutá di e bendishonnan ei. Dikon? Pasobra ta hende ku ta biba na armonia ku e siguiente palabranan di Hesus so ta bini na remarke pa risibí bida eterno. Hesus a bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.

Pues, un persona mester siña konosé e Tata i e Yu i sera un amistat íntimo ku nan. E mester mira kosnan manera nan ta mira nan. Ademas, e mester hasi esfuerso pa imitá nan kualidatnan den su trato ku otro hende. I e mester komprondé ku duna gloria na Dios ta mas importante ku haña bida eterno. Despues di a papia di bida eterno, Hesus a bai bèk na su tópiko prinsipal.

El a bisa: “Mi a glorifiká bo riba tera i a kaba ku e trabou ku bo a duna mi pa hasi. Pues awor, Tata, duna mi gloria banda di bo, e mesun gloria ku mi tabatin banda di bo promé ku mundu a eksistí.” (Huan 17:4, 5) Sí, Hesus a pidi su Tata pa resusit’é i risibié atrobe den gloria selestial.

Pero Hesus no a lubidá loke el a logra durante su sirbishi aki riba tera. Den su orashon, el a bisa tambe: “Mi a hasi bo nòmber konosí na e hendenan ku tabata den mundu i ku bo a duna mi. Nan tabata di bo, i bo a duna mi nan, i nan a kumpli ku bo palabra.” (Huan 17:6) Hesus a hasi mas ku djis proklamá e nòmber di Dios, Yehova. El a yuda su apòstelnan komprondé ken Yehova ta i a siña nan tokante Yehova su kualidatnan i tokante Yehova su manera di trata hende.

E apòstelnan a siña konosé Yehova, a haña sa e papel di su Yu i loke e Yu akí tabata siña hende. Humildemente, Hesus a bisa su Tata: “Mi a duna nan e palabranan ku bo a duna mi, i nan a aseptá nan i di bèrdat a haña sa ku mi a bini komo bo representante, i nan a kere ku ta abo a manda mi.”—Huan 17:8.

Despues, Hesus a hasi distinshon entre su siguidónan i humanidat en general. El a bisa: “Mi no ta pidi bo pa mundu, ma pa esnan ku bo a duna mi; pasobra di bo nan ta . . . Tata Santu, protehá nan pa motibu di bo nòmber ku bo a duna mi, pa nan por ta ún meskos ku nos ta ún.” El a sigui bisa: “Mi a warda nan, i ningun di nan no a bai pèrdí, ku eksepshon di e yu di destrukshon,” esta, Hudas Iskariot, kende tabata determiná pa traishoná Hesus.—Huan 17:9-12.

Hesus a sigui su orashon, bisando: “Mundu a odia nan. . . . Mi no ta pidi bo pa saka nan for di mundu, ma pa bo protehá nan pa motibu di e Malbado. Nan no ta parti di mundu, meskos ku ami no ta parti di mundu.” (Huan 17:14-16) Maske e apòstelnan i e otro disipelnan di Hesus tabata den mundu—e sosiedat humano goberná pa Satanas—nan mester a keda separá di e mundu ei i di su maldat. Kon asina?

Wèl, nan mester a keda santu, dediká na Dios su sirbishi, aplikando e bèrdatnan ku nan tabata siña for di e Skritura Hebreo i for di Hesus. Hesus a resa pidi su Tata: “Santifiká nan pa medio di e bèrdat; bo palabra ta e bèrdat.” (Huan 17:17) Despues, algun di e apòstelnan lo a skirbi bukinan inspirá ku tambe lo a bira parti di “e bèrdat” ku por yuda santifiká un persona, esta, hasié limpi den bista di Yehova.

Ku tempu, mas hende lo a aseptá “e bèrdat.” Pues, Hesus no tabata hasi orashon pa su 11 apòstelnan so, ma tambe pa tur hende ku lo a pone fe den dje pa medio di e palabra di su apòstelnan. Kiko Hesus a pidi pa tur su disipelnan? El a bisa su Tata: ‘Mi ta pidi bo pa nan tur por ta ún, meskos ku abo, Tata, ta den union ku mi i ami ta den union ku bo, pa nan tambe por ta den union ku nos.’ (Huan 17:20, 21) Hesus i su Tata no ta ún den sentido literal. Nan ta ún den e sentido ku nan ta uní, esta, di akuerdo ku otro den tur kos. I Hesus a pidi pa su siguidónan tambe ta uní, meskos ku é i su Tata ta uní.

Un poko tempu promé, Hesus a bisa Pedro i e otro apòstelnan ku e tabata bai pa prepará un lugá pa nan, esta, un lugá den shelu. (Huan 14:2, 3) Awor, Hesus a menshoná e punto ei tambe den su orashon. El a bisa: “Tata, mi ke pa esnan ku bo a duna mi tambe por ta kaminda mi ta, pa nan por mira e gloria ku bo a duna mi, pasobra bo a stima mi promé ku a funda mundu.” (Huan 17:24) Asina Hesus a konfirmá ku, for di hopi tempu pasá, promé ku Adam ku Eva a haña yu, Dios tabata stima su Yu unigénito, kende a bira Hesukristu.

Na final di su orashon, Hesus a bolbe enfatisá nòmber di su Tata i e amor ku Dios tabatin pa e apòstelnan. El a enfatisá tambe e amor ku Dios tin pa otro hende ku aseptá “e bèrdat.” El a bisa: “Mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”—Huan 17:26.