Laga Nos Tur Ta Uní Meskos ku Yehova i Hesus Ta Uní

1, 2. (a) Kiko Hesus a pidi den e último orashon ku el a hasi ku su apòstelnan? (b) Dikon Hesus lo tabata preokupá ku union?

DURANTE Hesus su último sena ku su apòstelnan, e tabata preokupá ku un kos: union. Ora e tabata hasi orashon ku nan, el a ekspresá e deseo pa tur su disipelnan por ta ún, òf uní, meskos ku e i su Tata ta uní. (Lesa Huan 17:20, 21.) Nan union lo a demostrá bon kla ku ta Yehova a manda Hesus na tera pa hasi Su boluntat. Nan amor lo a identifiká nan komo e berdadero disipelnan di Hesus i lo a kontribuí na nan union.—Huan 13:34, 35.

² Nos por komprondé dikon Hesus a papia hopi tokante union e anochi ei. El a ripará ku tabata falta union òf armonia entre su apòstelnan. Por ehèmpel, durante e último sena, nan tabata diskutí tokante “kua di nan tabata esun di mas grandi.” (Luk. 22:24-27; Mar. 9:33, 34) Na un otro okashon, Santiago i Huan a pidi Hesus pa nan haña un puesto prominente den su Reino.—Mar. 10:35-40.

 3. Ki faktornan por a kousa desunion entre e disipelnan di Kristu, i ki preguntanan nos lo kontestá?

³ Pero, deseo pa prominensia no tabata e úniko faktor ku por a kousa desunion entre e disipelnan di Kristu. E hendenan den tempu di Hesus tabata dividí debí na odio i prehuisio. Hesus su disipelnan mester a vense e sintimentunan ei. Den e artíkulo akí, nos lo kontestá e siguiente preguntanan: Kon Hesus a trata ku prehuisio? Kon el a siña su siguidónan pa ta imparsial i pa ta realmente uní? I kon su siñansa ta yuda nos keda uní?

 4. Duna algun ehèmpel di prehuisio ku Hesus a hañ’é kuné.

⁴ Asta Hesus a hañ’é ku prehuisio. Ora Felipe a bisa Natanael ku el a haña e Mesías, Natanael a puntr’é: “Akaso algu bon por sali for di Názarèt?” (Huan 1:46) Aparentemente, Natanael tabata sa di e profesia na Mikéas 5:2 i a pensa ku Názarèt tabata muchu insignifikante pa e Mesías a bini for di einan. Di mes manera, e habitantenan prominente di Hudea a menospresiá Hesus pasobra e tabata di Galilea. (Huan 7:52) Pa hopi habitante di Hudea, hende di Galilea tabata inferior. Otro hudiu a purba di insultá Hesus i a yam’é samaritano. (Huan 8:48) E samaritanonan a bini for di un nashon distinto for di e hudiunan i tabatin un otro religion. Ni e habitantenan di Hudea ni esnan di Galilea no tabata respetá e samaritanonan i tabata evitá nan.—Huan 4:9.

 5. Ki prehuisio e siguidónan di Hesus a haña nan kuné?

⁵ E lidernan hudiu tambe a menospresiá e siguidónan di Hesus. Pa e fariseonan, e siguidónan di Hesus tabata hende “maldishoná.” (Huan 7:47-49) Sí, e fariseonan a konsiderá tur hende ku no a studia na e skolnan rabíniko òf ku no tabata sigui nan tradishonnan komo hende miserabel òf gewon. (Echo. 4:13, nota.) Hesus i su disipelnan a haña nan ku prehuisio pasobra hende di e tempu ei tabata orguyoso di nan religion, posishon sosial i rasa. Ademas, e disipelnan mes tabatin prehuisio. Pues pa nan por a keda uní, nan mester a kambia nan manera di pensa.

 6. Duna algun ehèmpel ku ta mustra kon prehuisio por afektá nos.

⁶ Awe, mundu ta yen di prehuisio. Nos por ta víktima di prehuisio òf nos mes por tin prehuisio. Na Australia, un ruman muhé ku awor ta pionero a bisa: “Komo ku mi tabata konsentrá riba e inhustisia ku hende aborígeno tabata i ta pasa aden, mi a haña rabia riba hende koló kla. Mi a haña mas rabia ainda debí na e maltrato ku mi a eksperensiá.” Un ruman hòmber kanades a atmití: “Mi tabata pensa ku hende di abla franses ta superior, i p’esei mi tabatin rabia riba hende di abla ingles.”

 7. Kon Hesus a trata ku prehuisio?

⁷ Meskos ku den tempu di Hesus, den nos tempu tambe prehuisio por ta fuertemente ankrá i difísil pa vense. Kon Hesus a trata ku nan? Di promé, el a rechasá tur prehuisio i tabata semper imparsial. El a prediká na riku i pober, fariseo i samaritano i asta na kobradó di belasting i pekadó. Di dos, mediante su siñansa i su ehèmpel el a mustra su disipelnan ku nan no mester tin prehuisio.

 8. Ki prinsipio fundamental ta base pa nos union? Splika.

⁸ Hesus a siña su siguidónan un prinsipio fundamental ku ta base pa nos union. El a bisa: “Boso tur ta ruman.” (Lesa Mateo 23:8, 9.) Den un sentido, nos ta “ruman” pasobra nos tur ta desendiente di Adam. (Echo. 17:26) Ademas, Hesus a splika ku su disipelnan tabata ruman pasobra nan a rekonosé ku Yehova ta nan Tata selestial. (Mat. 12:50) Nan a bira parti di un famia spiritual grandi ku ta uní mediante amor i fe. P’esei, den e kartanan na e kongregashonnan, hopi biaha e apòstelnan tabata yama nan kompañeronan ‘ruman.’—Rom. 1:13; 1 Ped. 2:17; 1 Huan 3:13.

9, 10. (a) Dikon e hudiunan no tabatin motibu pa ta orguyoso di nan rasa? (b) Kiko Hesus a hasi pa siña hende ku prehuisio rasial ta robes? (Wak e promé plachi.)

⁹ Despues ku Hesus a splika bon kla ku nos mester mira otro komo ruman, el a pone énfasis riba humildat. (Lesa Mateo 23:11, 12.) Manera nos a mira, orguyo inkorekto a kousa desunion entre e apòstelnan. Ademas, e tempu ei, hende tabata orguyoso di nan rasa. Akaso e hudiunan tabatin motibu pa ta orguyoso pasobra nan tabata desendiente di Abraham? Nò. Pero, hopi di nan tabata konvensí di esei. Ma Huan Boutista a bisa nan: “Dios tin poder pa duna Abraham yu for di e piedranan akí.”—Luk. 3:8.

¹⁰ Hesus a siña hende ku orguyo di rasa ta robes. El a mustra esei bon kla ora un eskriba a puntr’é: “Ken realmente ta mi próhimo?” Komo kontesta, Hesus a duna un ilustrashon di un samaritano ku a perkurá bondadosamente pa un hudiu ku tabata biaha i ku ladron a maltratá. Algun hudiu ku a pasa no a yuda e hòmber, pero e samaritano sí a haña duele di dje. Na final di Hesus su ilustrashon, el a bisa e eskriba ku e mester hasi meskos ku e samaritano ei. (Luk. 10:25-37) Di e manera ei, Hesus a mustra ku un samaritano por a siña e hudiunan kiko berdadero amor pa próhimo ta enserá.

11. Dikon e disipelnan di Kristu mester tabata imparsial, i kon Hesus a yuda nan komprondé esei?

¹¹ Pa Hesus su disipelnan por a kumpli ku nan asignashon, nan mester a vense nan orguyo i prehuisio. Promé ku Hesus a bai shelu, el a asigná nan pa prediká “den henter Hudea i Samaria, i te na e parti mas leu di tera.” (Echo. 1:8) Mas promé, pa prepará nan pa e asignashon akí, Hesus a resaltá bon kualidat di hende estranhero. Por ehèmpel, el a elogiá un ofisial di ehérsito estranhero pa su fe ekstraordinario. (Mat. 8:5-10) Tempu Hesus tabata na Názarèt, el a konta kon Yehova a yuda algun estranhero, manera e biuda di Fenisia na Sarepta i Naman, e leproso di Siria. (Luk. 4:25-27) Ademas, Hesus a prediká na un señora samaritano i a asta keda dos dia den un stat samaritano pasobra e hendenan tabata interesá den su mensahe.—Huan 4:21-24, 40.

12, 13. (a) Kon e apòstelnan a reakshoná ora Hesus a prediká na un señora samaritano? (Wak e promé plachi.) (b) Kon nos por sa ku Santiago i Huan no a komprondé loke Hesus kier a siña nan?

¹² Sinembargo, no tabata fásil pa e apòstelnan vense nan prehuisio. Nan a keda sorprendí ku Hesus tabata dispuesto pa siña un señora samaritano. (Huan 4:9, 27) E lidernan religioso hudiu no tabata papia ku hende muhé den públiko, te pa nan a papia ku un señora samaritano ku no tabatin bon reputashon. E apòstelnan a urgi Hesus pa kome. Pero, e manera ku el a kontestá nan a mustra ku e tabata asina okupá ku e trabou di prediká ku e no a preokupá ku komementu. Pa Hesus, su kuminda tabata pa hasi e boluntat di su Tata, inkluso prediká na un señora samaritano.—Huan 4:31-34.

¹³ Santiago i Huan no a komprondé loke Hesus kier a siña nan. Ora Hesus i su disipelnan tabata biaha den Samaria, nan a buska un lugá pa pasa nochi den un pueblito. Ma e samaritanonan no kier a risibí nan. P’esei, Santiago i Huan a bira asina rabiá, ku nan a sugerí pa laga kandela baha for di shelu pa destruí henter e pueblito. Pero Hesus a skual nan. (Luk. 9:51-56) Santiago i Huan lo a reakshoná na e manera ei si e pueblito tabata den e region di Galilea for di unda nan a bini? Probablemente, ta prehuisio a pone nan rabia asina tantu. Mas despues, ora apòstel Huan a prediká na e samaritanonan, hopi di nan a skuch’é. Podisé esei lo por a lag’é sinti bèrgwensa di e manera ku el a reakshoná anteriormente.—Echo. 8:14, 25.

14. Kon e rumannan a resolvé un problema ku kisas tabatin di haber ku idioma?

¹⁴ Poko tempu despues di Pentekòste di aña 33, a surgi un problema di diskriminashon. E rumannan ku tabata parti kuminda pa e biudanan den nesesidat tabata neglishá e biudanan di abla griego. (Echo. 6:1) Esei kisas a sosodé debí ku nan tabata papia otro idioma. Mesora e apòstelnan a korigí e asuntu i a nombra ruman hòmbernan spiritualmente kualifiká pa atendé ku partimentu di kuminda. Tur e hòmbernan akí tabatin nòmber griego; kisas esaki lo a laga e biudanan ofendí sinti nan mihó.

15. Kon Pedro a siña gradualmente pa no hasi distinshon di persona? (Wak e promé plachi.)

¹⁵ Na aña 36 despues di Kristu, e disipelnan a kuminsá prediká na hende di tur nashon. Apòstel Pedro tabatin e kustumber di anda solamente ku e hudiunan. Pero, despues ku Dios a mustra bon kla ku kristiannan no mester hasi distinshon di persona, Pedro a prediká na Kornelio, un sòldá romano. (Lesa Echonan 10:28, 34, 35.) Despues, Pedro tabata kome i anda ku hende ku no tabata hudiu ku a bira kristian. Pero, algun aña despues, Pedro a stòp di kome ku e kristiannan no hudiu den e stat Antiokia. (Gal. 2:11-14) Pablo a hala Pedro su atenshon i ta parse ku el a aseptá e korekshon ei. Kon nos por sa esei? Wèl, ora Pedro a skirbi su promé karta na e kristiannan hudiu i na esnan ku no tabata hudiu na Asia Menor, el a papia ku kariño tokante henter e hermandat.—1 Ped. 1:1; 2:17.

16. Pa kiko e promé kristiannan tabata konosí?

¹⁶ Ta bisto ku e apòstelnan a siña for di Hesus su ehèmpel pa stima “tur sorto di hende.” (Huan 12:32; 1 Tim. 4:10) Sí, nan a kambia nan manera di pensa aunke esaki a tuma tempu. E promé kristiannan a bira konosí pa nan amor pa otro. Tertuliano, un eskritor di siglo 2, a sita loke hende ku no tabata kristian a bisa: “Nan stima otro . . . Nan ta asta kla pa muri pa otro.” Debí ku e promé kristiannan a bisti “e personalidat nobo,” nan a komprondé ku tur hende ta igual den bista di Dios.—Kol. 3:10, 11.

17. Kon nos por eliminá prehuisio? Duna ehèmpel.

¹⁷ Awe, kisas nos tambe mester tuma tempu pa eliminá kualke rasgo di prehuisio. Un ruman muhé na Fransia ta splika kon e ta lucha. El a bisa: “Yehova a siña mi kiko amor ta enserá, kon pa kompartí i kiko ke men stima tur sorto di hende. Pero ainda mi ta siñando kon pa vense prehuisio, i no ta tur biaha esei ta fásil. Ta p’esei mi ta sigui hasi orashon.” Un ruman muhé di Spaña ku tin un lucha similar a bisa: “Tin biaha mi ta lucha ku sintimentunan negativo ku mi tin pa ku sierto kultura, i mayoria di biaha mi ta logra vense nan. Ma mi sa ku mi tin ku sigui lucha. Danki na Yehova, mi tin e goso di ta parti di un famia uní.” Ta bon pa nos kada un puntra nos mes onestamente: Kisas mi tambe mester lucha kontra prehuisio, meskos ku e dos ruman muhénan ei?

18, 19. (a) Ki motibu nos tin pa risibí tur hende gustosamente? (b) Den ki manera nos por hasi esaki?

¹⁸ Kòrda ku un tempu nos tur tabata “hende straño,” òf estranhero, esta, hende alehá for di Dios. (Efe. 2:12) Pero, Yehova a hala nos serka dje “ku lasonan di amor.” (Osé. 11:4; Huan 6:44) I Kristu a risibí nos gustosamente. Na moda di papia, el a habri kaminda pa nos por bira parti di Dios su famia. (Lesa Romanonan 15:7.) Siendo ku Hesus a risibí nos ku asina tantu amor, aunke nos ta imperfekto, ken nos ta pa rechasá otronan?

¹⁹ Sin duda, segun ku e fin di e sistema malbado akí ta aserkando, desunion, prehuisio i hostilidat, òf odio, lo oumentá. (Gal. 5:19-21; 2 Tim. 3:13) Ma komo sirbidónan di Yehova, nos ta buska sabiduria di ariba ku ta imparsial i pasífiko. (Sant. 3:17, 18) Nos ta sinti nos felis ora nos ta sera amistat ku hende di otro pais, aseptá nan kultura i, si ta posibel, asta siña nan idioma. Ora nos hasi esaki, nos lo tin pas manera riu i hustisia manera ola di laman.—Isa. 48:17, 18.

20. Kiko ta sosodé ora amor ta moldia nos mente i nos kurason?

²⁰ E ruman muhé di Australia, menshoná anteriormente, a konta kon su estudio di Beibel a yud’é, bisando: “Ora mi a kuminsá studia Beibel, mi wowonan a habri. E bèrdat a moldia mi kurason i a kambia mi manera di pensa. Pues, tur mi odio i prehuisio ku tabata fuertemente ankrá a disparsé tiki tiki.” I e ruman hòmber di Canada a bisa ku awor el a realisá ku “hopi biaha ignoransia ta e kousa di rasismo i ku hende su kualidatnan no tin nada di haber ku e lugá kaminda el a nase.” El a kasa ku un ruman muhé di abla ingles. E ehèmpelnan akí ta demostrá ku amor kristian por i ta vense prehuisio. No tin duda, amor ta e laso perfekto di union.—Kol. 3:14.