Jehova Su Gran Tempel Spiritual

“Nos tin un sumo sacerdote manera esaki, . . . un sirbidor público dje lugá santu i dje berdadero tent, cu Jehova a lanta, i no hende.”—HEBREONAN 8:1, 2.

 1. Ki percuracion amoroso Dios a haci pa humanidad pecaminoso?

JEHOVA DIOS, pa motibu di su gran amor pa humanidad, a percurá un sacrificio pa kita e picánan dje mundu. (Juan 1:29; 3:16) Esei a haci necesario pa transferí e bida di su Yu primogénito for di shelu p’e matris di un bírgen hudiu yamá Maria. Jehova su angel a splica claramente na Maria cu e yu cu lo el a concibí lo a “ser yamá santu, Yu di Dios.” (Lucas 1:34, 35) Josef, kende tabata comprometí cu Maria, a ser informá tocante e caracter milagroso di Jesus su concepcion i a haña sa cu esun aki lo a “salba su pueblo di nan picánan.”—Mateo 1:20, 21.

 2. Kico Jesus a haci ora e tabatin rond di 30 aña di edad, i pakico?

² Segun cu Jesus a crece, e mester a comprendé algun dje echonan aki tocante su nacementu milagroso. E tabata sa cu su Tata celestial tabatin un trabou salbador di bida p’e haci riba tera. Pues, como un homber maduro di rond di 30 aña di edad, Jesus a bini cerca e profeta di Dios, Juan, pa ser bautisá den Riu Jordan.—Marco 1:9; Lucas 3:23.

 3. (a) Kico Jesus tabata kier men cu e palabranan, “Sacrificio i ofrenda bo no tabata kier”? (b) Ki ehempel sobresaliente Jesus a pone pa tur cu kier bira su disipelnan?

³ Jesus tabata haciendo oracion n’e ocasion di su bautismo. (Lucas 3:21) Evidentemente, for dje punto aki padilanti den su bida, el a cumpli cu e palabranan di Salmo 40:6-8, manera apostel Pablo a indicá mas despues: “Sacrificio i ofrenda bo no tabata kier, pero bo a prepará un curpa pa mi.” (Hebreonan 10:5) Asina Jesus a mustra cu e tabata sa cu Dios “no tabata kier” pa sacrificio di animal sigui ser ofrecé n’e tempel di Jerusalem. Mas bien, el a realisá cu Dios a prepará un curpa humano perfecto pa e, Jesus, ofrecé como un sacrificio. Esaki lo a kita cualkier necesidad adicional di sacrificio di animal. Mustrando su deseo sincero pa someté su mes n’e boluntad di Dios, Jesus a sigui bisa den oracion: “Mira! Mi a bini (den e rol dje buki ta pará skirbí tocante mi) pa haci bo boluntad, O Dios.” (Hebreonan 10:7) Ki un ehempel magnífico di curashi i debocion inegoista Jesus a pone riba e dia ei pa tur cu mas despues lo a bira su disipelnan!—Marco 8:34.

 4. Con Dios a mustra cu el a aprobá cu Jesus a duna su mes como ofrenda?

⁴ Dios a mustra cu el a aprobá e oracion di bautismo di Jesus? Laga un dje apostelnan scogí di Jesus duna nos e contesta: “Despues cu Jesus a ser bautisá, el a subi unbes for di awa; i mira! shelu a habri, i el a mira e spiritu di Dios baha den forma di un palomba biniendo riba dje. Mira! Tambe, tabatin un bos for di shelu cu a bisa: ‘Esaki ta mi Yu, esun stimá, kende mi a aprobá.’”—Mateo 3:16, 17; Lucas 3:21, 22.

 5. Kico e altar literal dje tempel a prefigurá?

⁵ E echo cu Dios a aceptá e presentacion dje curpa di Jesus pa usa como sacrificio a nificá cu, den un sentido spiritual, un altar mas grandi cu esun den e tempel di Jerusalem a haña prominencia. E altar literal unda animalnan a ser presentá pa sacrificio a prefigurá e altar spiritual ei, cu en efecto tabata Dios su “boluntad” of areglo pa aceptá Jesus su bida humano como un sacrificio. (Hebreonan 10:10) P’e motibu ei apostel Pablo por a skirbi compañeronan cristian: “Nos tin un altar for di cua esnan cu ta rindi sirbishi sagrado n’e tent [of, tempel] no tin autoridad di come.” (Hebreonan 13:10) Cu otro palabra, cristiannan berdadero ta saca beneficio for di un sacrificio superior di expiacion di picá, cu mayoria sacerdote hudiu a rechasá.

 6. (a) Kico a haña prominencia n’e ocasion di Jesus su bautismo? (b) Kico e título Mesías, of Cristo, ta nificá?

⁶ E ungimentu di Jesus cu spiritu santu a nificá cu awor Dios a producí henter su areglo dje tempel spiritual, cu Jesus sirbiendo como Sumo Sacerdote. (Echonan 10:38; Hebreonan 5:5) Disipel Lucas a ser inspirá pa señalá e aña dje suceso trasedental aki como siendo “e di diescincu aña dje reinado di Tiberio César.” (Lucas 3:1-3) Esei ta corespondé cu e aña 29 E.C.—exactamente 69 siman di aña, of 483 aña, for dje tempu cu Rey Artahérhes a duna e mandato p’e murayanan di Jerusalem ser reconstruí. (Nehemías 2:1, 5-8) Segun profecia, “Mesías e Lider” lo a aparecé den e aña marcá ei. (Daniel 9:25) Hopi hudiu evidentemente tabata na altura di esaki. Lucas ta informá cu “e hendenan tabata den expectativa” tocante e aparicion dje Mesías, of Cristo, títulonan cu ta bini for di palabranan hebreo i griego cu tin e mésun nificacion, “esun ungí.”—Lucas 3:15.

 7. (a) Na ki tempu Dios a ungi e “Santu di Santunan,” i kico esaki a nificá? (b) Kico mas a sosodé cu Jesus n’e ocasion di su bautismo?

⁷ N’e tempu di Jesus su bautismo, Dios su residencia celestial a ser ungí, of apartá, como “e Santu di Santunan” den e gran areglo dje tempel spiritual. (Daniel 9:24) ‘E berdadero tent [of, tempel], cu Jehova a lanta, i no hende’ a cuminsá funcioná. (Hebreonan 8:2) Tambe, mediante su bautismo cu awa i spiritu santu, e homber Jesucristo a nace di nobo como un Yu spiritual di Dios. (Compará cu Juan 3:3.) Esaki a nificá cu na su debido tempu Dios lo a yama su Yu bek pa bida celestial, unda lo el a sirbi n’e man drechi di su Tata como Rey i Sumo Sacerdote “segun e manera di Melkísedec pa semper.”—Hebreonan 6:20; Salmo 110:1, 4.

E Santísimo Celestial

 8. Ki rasgonan nobo e trono di Dios den shelu a asumí awor?

⁸ Riba e dia di Jesus su bautismo, e trono celestial di Dios a asumí rasgonan nobo. E identificacion di un sacrificio humano perfecto pa expiá e picánan dje mundu a enfatisá e santidad di Dios na contraste cu e estado pecaminoso di hende. E misericordia di Dios a ser resaltá tambe den e echo cu awor el a demostrá di ta dispuesto pa laga hende haci bon of reconciliá cuné. Dje forma ei e trono di Dios den shelu a bira manera e compartimentu di mas interior dje tempel, unda e sumo sacerdote a drenta un biaha pa aña cu sanger di animal pa expiá picá na un manera figurativo.

 9. (a) Kico e cortina entre e Lugá Santu i e Santísimo a prefigurá? (b) Con Jesus a haña acceso mas aleu cu e cortina dje tempel spiritual di Dios?

⁹ E cortina cu a separá e Lugá Santu for dje Santísimo a prefigurá Jesus su curpa carnal. (Hebreonan 10:19, 20) Esei tabata e barera cu a stroba Jesus di drenta den e presencia di su Tata miéntras e tabata como un homber riba tera. (1 Corintionan 15:50) N’e ocasion dje morto di Jesus, “e cortina dje santuario a sker den dos, djariba te abou.” (Mateo 27:51) Esaki a indicá na un manera dramático cu e barera cu a prevení Jesus su entrada den shelu awor a ser kitá. Tres dia despues, Jehova Dios a efectuá un milager sobresaliente. El a lanta Jesus for di morto, no como un hende mortal di carni i sanger, sino como un criatura spiritual glorioso ‘cu ta sigui bibu pa semper.’ (Hebreonan 7:24) Cuarenta dia despues, Jesus a subi na shelu i a drenta e berdadero “Santu dje Santunan,” “pa presentá dilanti e persona di Dios pa nos.”—Hebreonan 9:24.

10. (a) Kico a sosodé despues cu Jesus a presentá e balor di su sacrificio na su Tata celestial? (b) Kico e ungimentu cu spiritu santu a nificá p’e disipelnan di Cristo?

¹⁰ Dios a aceptá e balor di Jesus su sanger dramá como expiacion p’e picánan dje mundu? Sí, el a acept’é. Prueba di esaki a bini exactamente 50 dia despues di Jesus su resureccion, riba e dia festivo di Pentecoste. E spiritu santu di Dios a ser dramá riba 120 disipel di Jesus cu a reuní huntu den Jerusalem. (Echonan 2:1, 4, 33) Mescos cu nan Sumo Sacerdote, Jesucristo, awor nan a ser ungí pa sirbi como “un sacerdocio santu, pa ofrecé sacrificionan spiritual” bou di Dios su gran areglo di tempel spiritual. (1 Pedro 2:5) Ademas, e ungínan aki a constituí un nacion nobo, Dios su “nacion santu” di Israel spiritual. Djei padilanti, tur profecia di bon cosnan tocante Israel, manera e promesa dje “pacto nobo” registrá na Jeremías 31:31, lo a aplicá n’e congregacion cristian ungí, e berdadero “Israel di Dios.”—1 Pedro 2:9; Galationan 6:16.

Otro Rasgonan dje Tempel Spiritual di Dios

11, 12. (a) Kico e patio sacerdotal a prefigurá den e caso di Jesus, i kico e ta den e caso di su siguidornan ungí? (b) Kico e ponchera di awa ta prefigurá, i con e ta ser usá?

¹¹ Aunke e Santísimo a prefigurá “shelu mes,” caminda Dios ta entronisá, tur e otro rasgonan dje tempel spiritual di Dios ta relacioná cu cosnan riba tera. (Hebreonan 9:24) Den e tempel na Jerusalem, tabatin un patio sacerdotal interior cu a contené un altar pa sacrificio i un ponchera grandi di awa, cu e sacerdotenan a usa pa limpia nan mes promé cu nan a rindi sirbishi sagrado. Kico e cosnan aki ta prefigurá den e areglo dje tempel spiritual di Dios?

¹² Den e caso di Jesucristo, e patio sacerdotal interior a prefigurá su condicion sin picá como un Yu humano perfecto di Dios. Dor di ehercé fe den e sacrificio di Jesus, siguidornan ungí di Cristo ta ser acreditá cu husticia. Pues, Dios por trata corectamente cu nan como si fuera nan ta sin picá. (Romanonan 5:1; 8:1, 33) P’esei, e patio aki ta prefigurá tambe e condicion humano hustu acreditá cu miembronan individual dje sacerdocio santu ta disfrutá di dje dilanti Dios. N’e mésun tempu, cristiannan ungí ta imperfecto ainda i tin tendencia di peca. E ponchera di awa den e patio ta prefigurá e Palabra di Dios, cu e Sumo Sacerdote ta usa pa limpia e sacerdocio santu progresivamente. Dor di someté nan mes n’e proceso di purificacion aki, cristiannan ungí a alcansá un aparencia digno cu ta onra Dios i atraé esnan di pafó na su adoracion puru.—Efesionan 5:25, 26; compará cu Malakías 3:1-3.

E Lugá Santu

13, 14. (a) Kico e Lugá Santu dje tempel ta prefigurá den e caso di Jesus i su siguidornan ungí? (b) Kico e candelaria di oro ta prefigurá?

¹³ E promé compartimentu dje tempel ta prefigurá un condicion superior cu esnan dje patio. Den e caso dje hende perfecto Jesucristo, e promé compartimentu ta prefigurá su nacementu di nobo como un Yu spiritual di Dios destiná pa bolbe na bida celestial. Despues di a ser declará hustu a base di nan fe den e sanger dramá di Cristo, e siguidornan ungí aki tambe ta experenciá e obramentu special aki dje spiritu di Dios. (Romanonan 8:14-17) Mediante “awa [esta, nan bautismo] i spiritu,” nan ta “nace di nobo” como yu spiritual di Dios. Como tal, nan tin e speransa di ser resucitá na bida celestial como yu spiritual di Dios, basta nan permanecé fiel te na morto.—Juan 3:5, 7; Revelacion 2:10.

¹⁴ E adoradornan parti pafó dje tempel no por a mira e sacerdotenan cu tabata sirbi den e Lugá Santu dje tempel terenal. Di igual manera, cristiannan ungí ta experenciá un condicion spiritual cu mayoria adorador di Jehova, kende nan speransa ta pa biba pa semper den un paradijs riba tera, no ta compartí ni comprendé completamente. E candelaria di oro dje tabernáculo ta prefigurá e condicion iluminá di cristiannan ungí. E obramentu dje spiritu santu di Dios, mescos cu e zeta den e lampinan, ta tira lus riba Bijbel. E comprendimentu cu cristiannan ta gana como resultado, nan no ta tene pa nan mes. Mas bien, nan ta obedecé Jesus, kende a bisa: “Boso ta e lus di mundu. . . . Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.”—Mateo 5:14, 16.

15. Kico e pan riba e mesa di pan di presentacion ta prefigurá?

¹⁵ Pa permanecé den e condicion iluminá aki, cristiannan ungí mester alimentá regularmente riba loke e pan riba e mesa di pan di presentacion a prefigurá. Nan fuente primario di alimento spiritual ta e Palabra di Dios, cua nan ta haci esfuerso pa lesa i meditá ariba diariamente. Tambe Jesus a primintí di percurá pa nan “alimento n’e tempu apropiado” mediante su “esclabo fiel i discreto.” (Mateo 24:45) E “esclabo” aki ta henter e cuerpo di cristiannan ungí riba tera na cualkier tempu particular. Cristo a usa e cuerpo ungí aki pa publicá informacion riba e cumplimentu di profecianan bíblico i pa duna direccion oportuno riba e aplicacion di profecia bíblico den e bida diario djawe. P’esei, cristiannan ungí ta alimentá di un manera apreciativo riba tur e percuracionnan spiritual ei. Pero e sosten di nan bida spiritual ta dependé riba mas cu gana conocimentu di Dios den nan mente i curason. Jesus a bisa: “Mi cuminda ta pa mi haci e boluntad di esun cu a mandá mi i terminá su trabou.” (Juan 4:34) Di igual manera, cristiannan ungí ta haña satisfaccion dor di dedicá nan mes diligentemente tur dia pa haci e boluntad revelá di Dios.

16. Kico e sirbishi n’e altar di censia ta prefigurá?

¹⁶ Parti mainta i parti anochi, un sacerdote a ofrecé censia na Dios riba e altar di censia den e Lugá Santu. N’e mésun tempu, adoradornan no-sacerdotal tabata haci oracion na Dios miéntras cu nan tabata pará den e pationan parti pafó di su tempel. (Lucas 1:8-10) “E censia,” Bijbel ta splica, “ta nificá e oracionnan dje santunan.” (Revelacion 5:8) “Laga mi oracion ser prepará manera censia dilanti bo,” e salmista David a skirbi. (Salmo 141:2) Cristiannan ungí tambe ta atesorá nan privilegio di acercá Jehova den oracion mediante Jesucristo. Oracionnan ferviente cu ta bini di curason ta manera censia cu ta hole dushi. Cristiannan ungí tambe ta alabá Dios den otro maneranan, usando nan lip pa siña otronan. Nan awante apesar di dificultad i nan integridad bou di prueba ta agradá Dios mashá.—1 Pedro 2:20, 21.

17. Kico tabata enbolbí den e cumplimentu dje patronchi profético cu e promé entrada dje sumo sacerdote den e Lugá Santu riba e Dia di Expiacion a duna?

¹⁷ Riba e Dia di Expiacion, e sumo sacerdote di Israel tabatin cu drenta e Santísimo i kima censia riba un incensario di oro cu a contené carbon cayente-cayente. Mester a haci esaki promé cu el a trece paden e sanger di ofrenda pa picá. Na cumplimentu cu e patronchi profético aki, e homber Jesus a warda integridad absoluto na Jehova Dios promé cu el a ofrecé su bida como e solo sacrificio duradero pa nos picánan. Dje manera ei el a demostrá cu un homber perfecto por a warda su integridad na Dios sin importá ki presion Satanas a trece riba dje. (Proverbionan 27:11) Ora Jesus a ser poní na prueba, el a haci uso di oracion “cu sclamacion fuerte i lágrima, i el a ser tendé faborablemente pa su temor piadoso.” (Hebreonan 5:7) Den e manera aki el a glorificá Jehova como e Soberano hustu i legítimo dje universo. Dios a recompensá Jesus resucitand’e for di morto na bida celestial inmortal. Den e posicion elevá aki, Jesus ta duna atencion n’e motibu secundario pa su binimentu na tera, esta, pa reconciliá hende pecador repentí cu Dios.—Hebreonan 4:14-16.

E Gloria Mas Grandi dje Tempel Spiritual di Dios

18. Con Jehova a trece gloria sobresaliente na su tempel spiritual?

¹⁸ “E gloria dje cas mas despues aki lo bira mas grandi cu esun dje [cas] anterior,” Jehova a profetisá. (Ageo 2:9) Resucitando Jesus como un Rey i Sumo Sacerdote inmortal, Jehova a trece gloria sobresaliente na su tempel spiritual. Awor Jesus ta den un posicion pa trece “salbacion eterno na tur esnan cu ta obedec’é.” (Hebreonan 5:9) E proménan pa mustra tal obedencia tabata e 120 disipelnan cu a ricibí spiritu santu na Pentecoste di 33 E.C. E buki di Revelacion a profetisá cu e yunan spiritual di Israel aki finalmente lo a yega e cantidad di 144.000. (Revelacion 7:4) Despues di a muri, hopi di nan tabatin cu drumi inconciente den e graf comun di humanidad, sperando e tempu di Jesus su presencia den poder real. E cronologia profético cu Daniel 4:10-17, 20-27 ta contené, ta señalá na 1914 como e tempu pa Jesus cuminsá reina meimei di su enemigunan. (Salmo 110:2) Pa décadanan promé cu 1914, cristiannan ungí a spera e aña ei ansiosamente. E promé guera mundial i e calamidadnan riba humanidad cu a compan’é a duna prueba cu Jesus en berdad a ser entronisá como Rey na 1914. (Mateo 24:3, 7, 8) Djis despues, ora e tempu a yega pa “huicio cuminsá cu e cas di Dios,” Jesus lo a cumpli cu e promesa na su disipelnan ungí cu a bai drumi den morto: “Mi ta bini atrobe i lo mi ricibí boso na cas cerca mi mes.”—1 Pedro 4:17; Juan 14:3.

19. Con e resto dje 144.000 lo haña acceso n’e Santísimo celestial?

¹⁹ No tur e 144.000 miembronan dje sacerdocio santu a ser seyá finalmente i recogé na nan cas celestial. Un resto di nan ainda ta biba riba tera den e condicion spiritual cu e Lugá Santu a prefigurá, separá for dje presencia santu di Dios dor dje “cortina,” of barera, di nan curpa carnal. Segun cu esakinan ta muri fiel, nan ta ser resucitá instantáneamente como criaturanan spiritual inmortal pa uni cu esnan dje 144.000 cu ya caba ta den shelu.—1 Corintionan 15:51-53.

20. Ki trabou vital e resto dje sacerdocio santu ta efectuando n’e tempu aki, i cu ki resultado?

²⁰ Cu asina tantu sacerdote sirbiendo huntu cu e gran Sumo Sacerdote den shelu, e tempel spiritual di Dios a ricibí gloria adicional. Miéntras tantu, e resto dje sacerdocio santu ta efectuando un trabou balioso riba tera. Mediante nan predicacion, Dios ta ‘sagudiendo tur e nacionnan’ cu expresionnan di su huicio, manera Ageo 2:7 a profetisá. N’e mésun tempu, miyones di adoradornan describí como “e cosnan deseabel di tur e nacionnan” ta basha bini den e pationan terenal di Jehova su tempel. Con esakinan ta cuadra den e areglo di Dios pa adoracion, i ki futuro gloria nos por spera pa su gran tempel spiritual? E preguntanan aki lo ser examiná den e siguiente artículo.

Preguntanan di Repaso

◻ Ki ehempel sobresaliente Jesus a pone na 29 E.C.?

◻ Ki areglo a cuminsá funcioná na 29 E.C.?

◻ Kico e Lugá Santu i e Santísimo ta prefigurá?

◻ Con e gran tempel spiritual a ser glorificá?

[Plachi na página 1]

Ora Jesus a ser ungí cu spiritu santu na 29 E.C., e gran tempel spiritual di Dios a cuminsá funcioná