Sanedrin A Husga Hesus i Mand’é Serka Pilato

Dia tabata serka di habri ora ku Pedro a nenga Hesus pa di tres biaha. E miembronan di Sanedrin a kaba di terminá nan kaso hudisial ilegal i a sali bai. Nan a keda di topa otro atrobe asina ku dia habri, esta djabièrnè mainta trempan, probablemente pa purba di laga e huisio ilegal ku nan a tene e anochi anterior parse legal. Nan a bolbe laga trese Hesus dilanti di Sanedrin.

Atrobe nan a bis’é: “Bisa nos si ta abo ta Kristu.” Hesus a kontestá nan: “Te na ora mi bisa boso, boso lo no kere tòg. Ademas, si ami hasi boso pregunta, boso lo no kontestá mi tòg.” No opstante, ku kurashi Hesus a identifiká su mes komo e Yu di hende ku Daniel 7:13 a profetisá di dje. El a bisa nan: “Di awor padilanti, e Yu di hende lo ta sintá na e man drechi poderoso di Dios.”—Lukas 22:67-69; Mateo 26:63.

Nan a sigui insistí: “Ke men, ta bo ta e Yu di Dios?” Hesus a bisa nan: “Ta boso mes ta bisa ku mi ta.” Ta parse ku e deklarashon ei tabata sufisiente pa nan husga Hesus komo blasfemadó i laga mat’é. Nan a bisa: “Pakiko nos mester di mas testimonio?” (Lukas 22:70, 71; Marko 14:64) I nan a mar’é i mand’é pa e gobernador romano Ponsio Pilato.

Probablemente, Hudas Iskariot a mira nan hiba Hesus pa Pilato. Ora el a realisá ku Hesus a ser sentensiá na morto, el a sinti sierto remordimentu i a bira masha desesperá. No opstante, en bes di pidi Dios pordon, el a bai serka e saserdotenan prinsipal pa debolbé e 30 monedanan di plata ku nan a pag’é. El a bisa nan: “Mi a peka ora mi a traishoná sanger hustu.” E kontesta friu ku el a haña tabata: “Kiko esei tin di haber ku nos? Ta bo asuntu!”—Mateo 27:4.

Hudas a tira e 30 monedanan di plata den tèmpel. I pa hasi e situashon pió, el a bai pa horka su kurpa. Pero, aparentemente, e taki ku el a mara e kabuya na dje a kibra. Hudas a kai riba baranka i baster for di otro.—Echonan 1:17, 18.

Tabata mainta trempan ainda ora nan a hiba Hesus palasio di Ponsio Pilato. Ma e hudiunan ku a hib’é einan sí no kier a drenta. Nan no tabata ke tin trato ku hende ku no tabata hudiu pa nan no bira impuru. Pasobra si nan a bira impuru, nan lo no por a kome di e sena riba dia 15 di nisan, e promé dia di e Fiesta di Pan sin Zürdeg, ku tabata parti di e fiesta di Pasku Hudiu.

Pilato a bini pafó i a puntra nan: “Ki akusashon boso tin kontra e hòmber akí?” Nan a bis’é: “Si e hòmber akí no tabata un hende ku a hasi malu, nos lo no a entreg’é den bo man.” Ta parse ku Pilato a sinti ku nan tabata ke pone preshon riba dje, p’esei el a bisa nan: “Boso mes bai kuné i husg’é segun boso lei.” Ma nan tabata ke laga mata Hesus, p’esei nan a bisa Pilato: “Nos no tin outoridat pa mata ningun hende.”—Huan 18:29-31.

Si e hudiunan a mata Hesus durante e fiesta di Pasku Hudiu, esaki lo por a kousa henter un konmoshon. Pero si nan lo a logra konvensé e romanonan—kendenan tabatin outoridat pa ehekutá hende—pa mata Hesus a base di un supuesto krímen kontra e imperio romano, e hudiunan akí lo a keda liber di kulpa i lo no tabatin ningun kuenta di duna e pueblo.

E lidernan religioso no a bisa Pilato ku nan a kondená Hesus pa blasfemia. Nan a bini ku vários otro akusashon: “Nos a haña e hòmber akí [1] ta instigá nos nashon pa rebeldiá i [2] ta prohibí hende di paga belasting na Sésar, i [3] e ta bisa ku e mes ta Kristu, e rei.”—Lukas 23:2.

Komo representante di Roma, Pilato sigur tabatin bon motibu pa preokupá tokante e último akusashon. El a bolbe drenta palasio, a manda yama Hesus i a puntr’é: “Ta abo ta Rei di e hudiunan?” Ku otro palabra, ‘Bo a kibra lei romano i proklamá bo mes rei na lugá di Sésar?’ Hesus, kende probablemente tabata ke sa kiko Pilato tabata sa kaba di dje, a puntr’é: “Ta di bo mes bo ta puntra esaki, òf ta otro hende a konta bo di mi?”—Huan 18:33, 34.

Pilato a indiká ku e no tabata sa nada tokante Hesus pero ku e tabata interesá sí pa sa. El a bisa Hesus: “Mi ta hudiu anto? Ta bo mes nashon i e saserdotenan prinsipal a entregá bo den mi man. Kiko bo a hasi?”—Huan 18:35.

Hesus no a purba di evitá di papia tokante e tópiko prinsipal, esta, su reinado. Loke el a bisa despues sin duda a sorprendé Gobernador Pilato.